2022年11-12月大阪飛機團 Day 2 - 木津卸壳市場、難波八阪神社、環球影城、鶴橋

今朝一早六點，同好友行去木津卸売市場，佢老婆要瞓覺唔去，我地自己去，由酒店行過去十分鐘左右，呢度係魚巿場，賣海鮮為主，有間好大的食物批發商店，入面D蔬菜、水果、食材超大件，超平！可惜攞唔到返香港！市場入面D海鮮都係超平！我地想搵水果，但全場只得兩檔，今期係士多啤梨，同水尾的提子，見到有蜜瓜，但係好生，未食得住，如果買返香港，可能最後一日先買！睇完新鮮海鮮，就在市場外圍的食店食野，呢度得幾間食店，有一間賣鰻魚的，好香好想食 😋但今次目標係好多人去嘅海鮮丼專門店，店子好細，只有12個位，去到有四個人在等位，入面有張二人枱，都留比前面四位先，不過有張四人枱走，同一班六個香港人，剛好食完，咁就清左場有位喇！只係等左八分鐘🤣

餐牌頭先睇左，我地叫左一個名物ウニ海鮮丼（海膽海鮮丼）同埋 ウニ・いくら丼（海膽三文魚籽丼）海鮮丼有五款魚片、蝦、三文魚籽、白飯魚仔、拖羅蓉，好新鮮好好味！😋😋

食完野，行去難波八阪神社，因為都經過順路去睇吓，呢個神位係安在一隻獅子做型建築內，很特別，影張相到此一遊！

去完神社同好友分道揚鏢，因為佢地諗住今日行街 shopping，同埋明天開始要揸車，所以想休息一下，而我就想去環球影城，所以各自活動！今晚再一齊食飯！

八點左右出發去環球影城！我在大阪難波站搭阪神難波線去西九条，再轉JR梦咲線去環球影城！未試過咁早入園！去到售票處都係8:35am，樂園已經入得場，一日門票¥8400，見年票由¥20,000-¥48,800，都唔箅貴，入口位唔算多人，我唔知 Mario 位置喺邊度，不過跟住D急急腳嘅人羣行就啱，去到 Mario 入口，已經有玩遊戲隻錶賣，見到有條隊，其實唔使排，入D仲有幾檔賣錶嘅！隻錶¥3600，主要係要嚟在園區玩遊戲儲分數，但係要先 download 左 Universal Studio 個 App ，然後用個 App scan 隻錶後面 QR code ，先至計到分！開頭唔知點用，問職員佢又聽唔明，仲唔想理你🙄，問左兩次先比個 QR code 你 scan 去安裝App 🤦🏻‍♀️ 

在Mario 園區狂影相，跟住去排隊玩遊戲 Mariokart Koopa’s challenge，個遊戲要排60分鐘，足足排咗55分鐘先有得玩，但係只係玩七分鐘😅，中間除咗排隊，仲有聽佢講解點玩法，排隊嘅位置都好多影相位，時間過得快D，而且條隊都一直有郁，停低嘅時間好短！不過在室內排隊有D焗，空氣唔太流通！玩呢個 game 會先比個野你，在頭上，可以教緊佢，然後先聽佢講解點玩，佢每架車可以坐四人。兩前兩後，後面兩個位高D ！跟住再加一個鏡片在頭上，塊鏡片有條電線，套左上頭之後有D重量，頭會向前傾，不過都玩到，最緊要盡量較緊D! 然後開車，就好似玩 Mario 遊戲機咁＇目標要攞100分，個畫面質素好靚，好玩！我亂玩都有81分🤣🤣可惜唔記得scan 我隻錶，冇計分比我😅

離開Mario 園區時，在入口見到要攞整理券，好多人排隊等入去！好彩一早入園區 😆，跟住去 Harry Potter 園區，因為 Mario 園區吸引咗好多人過去，所以Harry Potter呢度雖然好多人，天色有D灰暗，影吓霍格華茲，見有款新小食係 meat pie ，見得兩三個人排隊，就買個試吓！個pie入面嘅 meat 係好似肉醬意粉D肉醬咁嘅味，幾好食😋！跟住去排個遊戲Harry Potter and the Forbidden Journey ，見唔係好多人，雖然佢寫住要等一個鐘，但係其實15分鐘就到 locker 個位，話說我鎖完啲嘢之後，就排隊去玩遊戲，排排下隊發覺唔見咗條locker鎖匙，原本諗住日本都好安全，我諗住玩完遊戲先至去搵，但係今日喺樂園周圍都聽到人講廣東話同國語，我就有D擔心俾人執咗條鎖匙攞咗我locker啲嘢，因為全部護照同埋錢都喺晒locker，所以即刻返轉頭搵職員幫手，不過職員聽唔識英文，前後搵咗三個職員先至有一個溝通到，佢叫我喺一個位置度等，但係遠離個locker，我好擔心有人執咗鎖匙去開咗locker，所以我都係企喺個locker度等佢哋，然後再過一陣先至行返去搵佢哋，終於有一個識少少英文嘅職員協助，佢都要用Google Translate去翻譯，佢話如果搵唔番條鎖匙要賠返¥2000，如果攞得返locker啲嘢， $2000俾佢有乜所謂如果攞得返locker啲嘢， ¥2000俾佢有乜所謂！跟住佢比張form我填，填番我個人資料，同埋locker 入面有啲乜嘢，跟住佢有兩個職員一齊開個locker，核對左同張form上面啲資料正確之後，就俾返D野我，然後同我講佢哋搵返條locker鎖匙，係我半路跌咗！真係嚇死我然後同我講佢哋搵返條locker鎖匙，係我半路跌咗！真係嚇死我！好彩攞得返晒啲嘢！😅 鎖返D個人物品落第二個locker，繼續去玩，之前個職員比左張飛我，可以中途插隊唔使從頭再排過，玩完出嚟，出左太陽🌞又再影過霍格華茲，跟住過去 Minion 園區！

Minion 園區呢邊好熱鬧，好多小朋友，今期爆谷筒唔太吸引，有李小龍造型 Minion，有毛公仔 Tim Tim ，我買左 Tim Tim 比好友，佢有儲開 Minion 爆谷筒的，唔知佢鐘唔鐘意😅 
先去搵野食，周圍都勁多人，只有上次食果間壽司店冇乜人，咁就去食呢間，叫左個 set ，有壽司有天婦羅，呢度做緊咒術迴戰 promotion ，有個 area 比人影相，我就冇興趣！食完野去排隊玩 Minion ，又要排一個鐘！🤦🏻‍♀️ 今次玩冇咁驚，同埋相隔四年，覺得畫質差左！😅唔知係咪顯示屏舊左，定係條片播得多差左！

玩完 Minion 出嚟都開始天黑！影吓聖誕樹，再去 shop 買野，跟住就走！因為今晚約左好友的家姐食飯，所以要早小小走！搭返車出去，在西九条坐環狀線去鶴橋駅，會合好友去食燒肉放題！

呢間 あぶりや，在心齋橋也有分店，之前食過幾次，好多香港人去！呢間分店少人D，坐得舒服D，卡位好大張，可以坐六個人，我地五個人剛剛好，好友的家姐住在大阪，佢話政府有資助國民去旅行，唔怪之得旅遊景點咁多本地人！原來佢哋都有振興經濟方案！好多景點都係日本人同香港人佔大多數！🤣 講返呢間燒肉，好好味！佢有兩個放題選擇，有牛舌同冇牛舌分別，我地都食牛舌，所以叫左貴D有牛舌的放題！不過牛舌只有薄切，味道麻麻地，下次可以唔使叫牛舌果set放題！

食完飯，好友姐夫車我地去一間大型超市 Trial ，原來在機場附近，唔怪之得要揸車40分鐘先到，之後又車我地返酒店先返屋企，真係辛苦晒！返到酒店都拿拿聲冲涼瞓覺，玩左成日都攰，原本想上去浸溫泉都冇去到😅

 

2022年11-12月大阪飛機團 Day 1 - 難波、心齋橋

原來已經四年半冇去過大阪！對上一次去大阪係2018年，今次又同好友兩公婆去，上個月出發去東京之前已經訂左機票酒店，今日班機11:30 飛，先和好友去Gate 1 附近 Premium lounge 食早餐，去到先至發現我張咭已經冇得入去，職員話要去Gate 40 果邊先用得！咁就同好友分道揚鏢，之後再在登機閘口等！我記得上次去 Gate 40 果邊個 Premium lounge 改咗做 Sapphire lounge ，再過去睇吓，見有指示 Premium lounge 在另一個位置，跟住指示行左一段路，搵到個 premium lounge 但係開12:00 🤦🏻‍♀️比人點左過去，雖然話登機閘口在三十號都好近！但係過到嚟冇野食，跟住行左去 Starbucks ，食咗個Sausage roll ，飲返杯咖啡先！☕️

會合好友之後仲係有個幾鐘，大家吹下水，上吓網等飛！11:30飛三個半鐘頭就到，跟住過關，上次用 MySOS app，今次用 visit Japan web，但係我遲左 upload 針紙，所以仲係赤色碼，未係青碼，分流時只係比青碼人士做多一個step，就係 show 返針紙 copy 對一對係咪認可疫苗，同埋是否passport 同名就得，好快！所以 upload 唔到都唔使擔心！因為赤色碼的人唔多，所以好快攪掂！40分鐘完成整個過關流程可以去攞行李，以前有兩張申報紙，依家在 Visit Japan web度填有兩個 QR code 比左你＇攞完行李仲要攪埋申報表，係自助型式，有部機要scan passport同 QR code ，呢度攪左廿分鐘，因為得八部機，全機人逐個整，最後出接機大堂之前仲要 scan 多次你個樣！成個流程比上次用 MySOS + 填紙
本申報表慢左！日後加多D機應該好D ! 前後攪左65分鐘先出到嚟！

一出嚟就去撘 Rapit 返難波，但剛走了一班車，佢依家班次每小時一班，每班車都係05分開，要等成個鐘！轉搭普通車，5分鐘後有車，車程50分鐘，比Rapit 多十分鐘，唯一係冇得擺行李，有小小阻路，好在非繁忙時間，影響不大！

今次住 FourZ hotel Kintetsu Osaka-Japan ，放低行李，先去搵食！行去心齋橋附近，好熱閙好多人，雖然有D店係冇開，但係條街好熱閙好多香港人！因為周圍都聽到廣東話 😅😅 我地去くら寿司，好友 check 左佢在心齋橋開左間新店，所以去試吓！先攞飛，要揀卡位定單邊位，在等候區等，都好快，店內裝修好新淨，全部卡位！每個卡位可以坐六個人，而且係網上點餐，壽司由¥125起，我地一坐低就叫左好多碟，不過今次冇做大拖羅 promotion，我地第一次在九州食呢間 くら寿司嘅時候，做緊大拖羅期間限定，D拖羅好正，今次呢間整體質素係差左，三年前去過涉谷果間都係爭D，市區分店好似冇偏遠地區地區D質素咁好！我地食左三十幾碟，未破到上次最高紀錄！🤣🤣

食完野就梗係去影吓固力果啦！跟住就去藥妝店行，睇定D價錢先，之後再去買！不過好多店八點已經收左，得一、兩間收夜D，行左一陣就返酒店，因為明天要清晨出發！

酒店住後感：
FourZ Hotel Kintetsu Osaka-Japan
酒店好新，在心齋橋附近，由難波站步行約七分鐘 （如果行心齋橋過去就耐D，因為塞人😂）酒店用自動 check in 及自助暫存行李，當然有職員stand by 協助，大堂有獨立包裝的牙刷、潔面用品、剃鬚刀、浴帽、咖啡粉等供應，客人可自取，但夜D會收檔，所以check in 完要攞左先，房間比預期大小小，起碼有張梳化仔，一入門口旁邊係 toilet 加浴室，有個籃同浴衣毛巾供應，因為頂樓有個小小浴場，當然唔係好大，可以容納四個人左右，我都有上去浸左一陣，剛剛好四個淋浴位，浴場有提供獨立包裝的髮膜同body lotion，好貼心！

霸王川莊

今晚去iSquare呢間食京菜，原本想叫套餐，不過套餐係主要食蟹嘅，唔係特別想食蟹，所以就散叫，我哋叫咗小籠包、雞絲粉皮、水煮魚、片皮鴨、上湯菜苗，同埋甜品拔絲香蕉，食物嘅質素都唔錯，我哋仲叫咗兩杯大杯嘅水果茶，仲可以睇埋幻彩詠香江，都好耐冇睇喇！

食完飯仲行去半島酒店影相，今次聖誕嘅裝飾係用咗 Chanel 巨型珍珠鏈，好靚好特別！

 

正義迴廊 The Sparring partner

 

張顯宗同唐文奇被控謀殺張顯宗的父母，有九個人組成嘅陪審團，來自社會不同階層職業嘅人組成，每個人有自己嘅睇法，由於張顯宗早已承認殺人，基本上陪審團嘅成員都認為佢罪名成立，只有一人反對，卻沒有具體嘅原因，而最具爭議嘅係第二被告唐文奇是否有罪？

電影取材自一宗真實的謀殺父母嘅命案，真係想像唔到可以落到手去殺人！ 我唔知現實中D陪審員係咪咁兒戲，咁樣去判定被告是否有罪，最主要係第二被告疑似扮傻，逃過罪責，真正嘅正義係咪真係能夠彰顯？ 

兩個演被告的演員做得唔錯，有久違了的周文健，林海峰都係做返自己，擺脫唔到佢少少攪笑嘅作風！

富園海鮮酒家

好友J生日，去咗九龍城食海鮮，呢間之前係竹園，我哋叫咗個海鮮餐，有乳鴿、扇貝、芝士焗龍蝦、豉油王蝦、鮑魚、䱽魚、炒菜，另外再加左蟶子，好豐富，水準不過不失，蛋糕就訂咗Tony汪嘅雜莓拿破崙，而家出咗半磅裝，啱晒人少少嗰陣時食！

 

闊別三年-東京快閃五天遊 Day 5 東京站

行程去到最後一日，今日搭三點幾機，如果要一點幾去到機場都要12:00左右到東京站搭火車，朝早check out 之後，將行李放喺酒店，然後出去行吓，由於時間太早，周圍都冇乜嘢行，秋葉原一帶都冇咁早開，所以行咗一陣就返酒店攞行李走，直接去東京站度行吓！攞行李之前，去酒店樓下嗰間Starbucks飲杯咖啡，坐咗一陣先至走，喺火車站見到賣生雞蛋嗰檔嘢已經開咗檔，諗咗一陣都係冇買到生雞蛋，應該唔可以入境 😅所以只係買咗支醬油、紫菜絲，同埋一個袋仔 ☺️

去到東京站，再買多少少手信，因為尋晚執行李嘅時候仲有少少位剩，可以買多幾盒手信，另外買咗一隻叫做 Cocoris 的朱古力夾心餅，見到有D人排隊，應該唔會太差掛，買兩盒試吓先！

去到機場，先去將行李寄艙，咁就可以行吓，寄艙嘅手續都好快，過關之前去藥妝店睇吓有冇朋友要嘅嘢，竟然有！咁就買埋先至上機！平時唔會喺機場買藥妝，因為價錢比較貴，但係好友要嗰隻藥，喺市區買唔到，機場呢間有就算貴D都要買！

因為驚過咗關之後冇嘢食，所以過關之前搵嘢食先，都有好幾間食肆有開，去咗壽司岩，呢間食過幾次，雖然水準唔算高，不過叫做平平哋，價錢合理，食埋呢餐壽司先上機！

過海關都好快！過咗關之後再睇吓啲舖頭仲喺唔喺度，果間 FaSoLa 仲有一間 Akihabara 有開，手信有好多，不過冇乜人買！我就買咗兩支 sake ，跟住就等上機，日本呢邊都係要用Passport同登機證做核對！回程呢班機少人好多，我諗坐滿一半都冇！咁就大家坐得鬆動！同樣飛機餐，只係一個包，同埋一支水，因為我食飽咗嘢，所以我唔要個包喇，淨係要咗支水，不過我都冇飲，留返落咗機之後先飲！回程要四個幾鐘，返到香港接近八點，落咗機之後要行一段好長好長嘅路，然後仲有一個分流嘅地方，每個人都要掛一個綠色嘅牌，然後去一個位置要scan你個牌上面嘅 barcode，跟住又派張紙俾你，就係嚟緊要做檢測同埋點樣網上登記，跟住就去做核酸檢測，做完檢測再搭無人駕駛去返 T1 ，再出去等行李，由落機到等行李大概用咗20分鐘，比想像中快！等行李都等咗成15分鐘，一出去接機大堂，睇吓個安心出行已經轉咗做黃碼！原本想買外賣返去食，不過車程都要D時間，所以都係冇買！返屋企煮個麵食就算，返到屋企就要攞晒所有嘢出嚟影相，雖然話冇乜點買嘢，不過擺晒出嚟都幾多嘢🤣🤣