今朝10:00 前要 check out ，無需任何手續就走得，拖個行李去酒店office 寄存先，就在高島屋旁邊一座大廈，旁邊角位有間大国藥妝，之前都幫襯過，大廈入口都有指示牌，上去講返邊間酒店同房號就得，呢度環境幾舒適，地方頗大，有梳化休息，有WiFi ，一陣可以整理吓行李！
行返去心齋橋果邊，之前book mark 左一間醬油拉麵店，店名叫做 IKR51 中華そば食堂，佢除咗拉麵仲有海膽同魚生丼，去到又係未開！又去附近行吓，心齋橋近南船場，就去附近行吓街，去藥妝店睇吓啲價錢，因為呢邊都好少去，又去扭蛋機睇吓有咩新嘢，竟然有李錦記😅
行返過去拉麵店終於都開門啦，開門嘅時候只有兩個客，睇完個餐牌之後決定叫咗個海膽三文魚子丼，佢嘅海膽有幾個等級選擇，當然越貴越靚，我揀咗三款之中最貴嘅一款，因為同低一級只係爭800円，個丼其實唔係好大碗，睇過蛋黃嘅比例就知道，不過都好好味，食完個丼之後都唔算好飽，所以叫咗一個醬油拉麵嘅淨麵，個醬油湯都好好味，拉麵都幾爽身，好食！
繼續行街等好友，去藥妝店幫朋友買supplement，行到咁上下有啲熱，見到有間餐廳，就入去食返個雪糕梳打，店名叫 Nambaribon ナンバリボン，店舖嘅裝修有少少英式嘅風格，深紅色嘅梳化配木枱，叫咗個蜜瓜梳打雪糕，即刻涼返晒，雪糕唔會太甜，其實呢度好多嘢食，不過頭先食得太飽！加上要留肚今晚食飯，所以淨係食咗杯雪糕就算喇！跟住行返去高島屋嗰邊等好友架車過嚟接我！
尋日我同好友搭同一個時間嘅航班， 3:00左右已經到咗，但係今日要四點幾都仲未到，後來見到好友嘅時候，佢哋喺車度話俾我聽，原來佢哋去咗機場附近個魚市場度買海鮮，跟住就直接去我哋訂咗嘅民宿，於天下茶屋站附近，放低行李就攞啲食物出嚟，佢哋買咗唔少嘢食，有大拖羅、兩盒海膽、蝦、赤貝，全部都係我最鍾意食嘅嘢🤭 大拖羅非常肥美，赤貝好爽口，海膽鮮甜，正👍🏻👍🏻
食完嘢我哋又出去行一陣，首先喺附近睇吓有乜嘢行，附近只有一間藥妝店，同埋兩間便利店，不過行去火車站嗰邊都有間超市，同埋藥妝店，兩間都幾大間，因為今日好友先第一日到步，所以唔心急買嘢住，睇吓啲價錢先，然後揸車去食晚飯！今晚book咗一間壽喜燒放題，其實而家放題我哋都唔係食咗好多嘢，加上壽喜燒係肉類，應該食好少就飽，店名係すき焼き壱番 もりやま，位於下小阪，店嘅地方唔算好大，不過真係要訂枱先有位，而且聽到好多台都係講廣東話，可能大家都係睇同一個YouTuber介紹😅 佢有兩種牛肉嘅價錢，我哋叫咗平嗰個¥3,300，如果要特選黑毛和牛就¥5,500，我哋叫嗰個餐牛肉係比較瘦同埋薄，有少少似溫野菜果啲牛肉，而貴啲嗰個就明顯有油花，不過我哋驚太油膩會好滯，所以先至揀平啲嗰個，同埋可以食多幾轉，佢每次上一碟牛肉俾我哋，之後先再加，我諗平均我哋每人都食咗三四碟，都好夠飽，其實我覺得¥5,500個餐都好抵食，因為明顯呢牛肉係靚啲！反正食得唔多，食靚少少！
食完飯揸返車返民宿附近間超市度行吓，買咗少少食物同飲品返民宿，跟住大家輪流沖涼，因為我哋四個人都要輪成個鐘😅沖完涼就嗱嗱聲瞓覺💤因為都搞到成點鐘😅
酒店住後感：
AI Annex 民宿，位於天下茶屋站附近，呢度好近火車站，都係住宅區，呢間民宿係單幢樓，一幢只有三層，我哋住喺中間嗰層，附近有個好近嘅停車場，仲有間便利店，位置都唔錯，上到去睇吓間屋，都算幾新淨，一入門口左邊有一間房有張雙人床，右邊係浴室同埋洗衣機，再入就係廁所，一入去廳就係爐頭同埋鋅盤，跟住就係一個細細嘅廳，再入去就係另一個廳，係榻榻米嘅形式，有個電視機，旁邊有啲空位就係用嚟鋪墊褥被鋪，大概可以鋪到三份被鋪，佢哋讓我瞓房，佢哋三個因為係一家人，所以話一齊瞓榻榻米，我都唔係幾好意思，其實我唔介意瞓榻榻米，好友兩公婆瞓房都得，不過你推我讓咁，最後我都係霸咗間房😅 不過間房嘅隔音就麻麻哋，可能床頭貼住個窗，加上呢頭住宅區比較靜，夜晚人喺樓下講嘢都聽得好清楚，有聽到垃圾車洗埋嚟，佢哋瞓榻榻米向着內街，就唔會有呢個問題，不過今次我哋住中間呢層，呢幾日都覺得樓上樓下冇人住，好似得我哋一戶有人住，因為一路都未見過樓上樓下有着過燈，亦都聽唔到有人出入嘅聲，例如我哋夜晚搭𨋢上到去，第二朝架lift都係停咗喺呢度，即係冇人用過，呢度有提供埋毛巾、洗頭水、沐浴露、風筒、直髮夾，淨係冇牙膏牙刷同埋漱口杯，好彩我喺第一晚間酒店攞咗兩隻有獨立包裝嘅紙杯🤭牙膏牙刷拖鞋就自己帶咗嚟！屋入面又係有兩個垃圾桶，一個可燃燒一個不可燃燒嘅垃圾，樓下有個大垃圾桶，可以將垃圾放喺大垃圾桶度！
沒有留言:
發佈留言