2025年六月大阪自駕遊 Day 1 - 難波、心齋橋

又去日本喇！近期因為一本日本漫畫預言7月5號日本會大地震，導致少左人買機票，今次機票算平，加上好友相約，所以就飛返轉😅不過大家假期夾唔到，相差咗一日，我早一日先到步，到時亦都比佢哋高一日返港，今日就自己一個飛過去先！

一早搭巴士去機場，食返個早餐，喺food court食咗個點心，跟住四圍行吓，見到將會開霸王茶姬，可能見到附近嗰間Arabica 咁好生意，所以賣咖啡或茶都有生意做，再去搭無人駕駛，過去220 以上閘口，個閘口一睇就知係要搭巴士埋去架飛機度上機，即係話要等到上滿咗一架巴士先至開車，只係前後開兩班巴士過去，呢架飛機唔算好大，每邊三個座位，成班機應該係滿晒座，話就話好多人驚去日本，但係一樣坐滿成班機，可能減少咗一啲冇乜人揀嘅航班，例如黃昏先至飛嗰啲，所以一早飛嘅航班都係爆晒！

飛咗差唔多四個鐘就到步，去到關西空港，都要搭車，過海關嘅位置裝修咗，佢會有部白色機去做分流，首先喺嗰部白色機嗰度掃描Passport，影埋相打埋指模，跟住就會將你分去abcd其中一組，我就係a組，我唔知佢係點樣分，總之分咗之後就跟返你係邊一組嗰條隊去排，我見主要係有兩條隊，一條係適合ab嘅人排，另一條係適合abcd排，明顯呢條係多人啲，咁我就梗係排ab嗰幾條隊，每條隊大概有10幾人，因為之前已經打咗指模同埋影相，所以都幾快過到關，去到行李帶啲行李都到晒，拎住行李過關嘅時候亦都有分組， 佢有個mon影住你，同時會顯示你係邊一組，唔使驚排錯，ad嗰條隊基本上係唔使排，好快就過咗海關，反而望到另外嗰條隊係好長🧐

行過去火車站搭Rapit，今次買咗單程車飛，因為預計好有可能會車我去機場或者其他車站過去，所以我就唔買回程住，搭咗大概35分鐘就去到難波，出咗閘就去搵酒店，今次book嗰間酒店位置有少少靜，比起上兩次住嘅酒店行多一兩分鐘，有車站過去大概7-8分鐘路程，先去放低行李，再出去搵嘢食，行咗去千日前道具街，見到一間拉麵店，上次經過嘅時候係好多人排隊，今日既然唔使排隊又食吓啦，其實佢係Ode 拉麵店嘅分支，香港都有一間，香港嗰間係食鯛魚湯麵，呢間就食牡蠣湯麵，叫咗碗麵加咗隻蛋，後來先發覺原來碗麵本身有蛋😅所以食得有啲飽，本來係唔想食咁飽，因為今晚book咗食牛舌，結果食完我隻蛋真係非常之飽，個湯又好好味😋

唯有四圍行吓消耗下體力，等陣間食牛舌嘅時候唔會飽得滯食唔落，喺心齋橋行咗一轉，四圍睇吓嘢，仍然係好多人嘅有芝士蛋糕店，門外排晒長龍，另外就係 Onitsuka Tiger 兩間分店都係排晒隊，雖然我都有買過呢個牌子嘅鞋，但我唔覺得佢特別靚或者特別好着😅加上而家只係鍾意着Hoka ，所以唔會特別再買！行行下都去左宇治香園食咗杯抹茶雪糕☺️

行到咁上下就去搵今晚訂咗嘅嗰間牛舌の檸檬，開頭睇地圖以為係橫街，原來喺正大街，不過門面真係唔係好明顯，爭啲睇漏眼，去到唔係太多人，都有少少空位，不過我早幾日已經訂咗枱，所以就一定有位，佢呢度有幾個套餐選擇，套餐會有湯、沙律、山藥等，套餐可以選擇牛舌伴牛肉，我就因為有啲飽，所以唔叫套餐，就咁叫一客牛舌，仲加咗一個細嘅三文魚子飯，同埋叫咗一杯檸檬梳打，呢間餐廳喺東京好出名，上次去東京嘅時候因為遲咗預約，所以book唔到，今次見大阪有分店就即刻book咗先，我見啲人叫套餐好快有得食，但係我嗰個就反而要耐啲，個牛舌非常之厚，好好味！好正，而且呢度嘅職員係好好Service，又好友善同你傾偈，氣氛亦都非常好，整體嚟講食得好開心，佢呢度嘅白飯係可以refill，當然我個三文魚子飯就冇得refill，佢又加咗隻蛋落去，即係我呢幾個鐘食咗三隻蛋🥹🥹 三文魚子唔會好鹹，亦都冇腥味，幾好食，可惜我太飽，都係食淨少少飯！飲番啲檸檬梳打解膩🤭 下次去東京一定要再幫襯！食飽再去行吓藥妝店，因為要幫好友買supplement，自己都要買定，格定個價先！行到咁上下就返酒店休息，聽日再會合好友！

酒店住後感：
Hotel S-Presso South
南艾斯普雷索酒店
酒店嘅位置離難波站南出口步行約7分鐘，酒店係完全自助check-in，沒有職員在櫃面，佢有個QR code俾你scan去做check-in，有乜嘢就email俾佢哋，不過你撳鐘佢都會有人應你，當然唔係面對面嗰種，連樣都見唔到淨係聽到把聲好似講電話咁，跟住佢就會email你住邊間房，俾埋Password你，又唔使影印Passport，其實都幾好，不過唯一嘅缺點就係冇得存放行李，不過佢會提供一個地址俾你係佢哋嘅Office，可以將行李擺喺嗰度，個位置就喺高島屋旁邊嘅一座大廈，位置都好方便，而且寄放行李嗰度嘅地方都幾大，又有梳化俾你可以坐吓，整理吓啲行李，有埋Wi-Fi俾你上網，可以喺度Hea一陣先至走！酒店嘅房間都唔錯，幾新淨，佢可能冇晒單人房，佢俾咗一間雙床房我，床尾有一張好長嘅枱，浴室同廁所都係分開，可惜只係住一晚，雖然酒店嘅位置比較靜，不過附近都有間業務超市，而且動漫嗰條街就喺後面，所以行過一個街口就熱鬧好多，我見呢間酒店有幾間分店喺附近，都係咁嘅形式運作，下次可以試吓另外果幾間😄