點茶公館

又去南豐紗廠，因為知道佢做可口可樂展覽，不過去到先發現原來要網上登記，所以入唔到去睇，只可以在出面影幾張相，下星期睇吓有冇時間再去！

原本約咗好友一齊睇展覽同埋食lunch，不過好友突然間屋企有事嚟唔到，我唯有自己去食，好耐冇去過酒樓飲茶，所以好想食點心，見到呢間點心小店，望到招牌左邊紅噹噹嘅裝修，有少少人客，但係店員叫我坐另外一邊，右邊係半開放式，以綠色裝修為主，加咗D霓虹光管招牌，有少少大排檔feel，店入面只有兩個客，加埋我先至三個，不過坐低一陣果兩個都走埋，不過後來又來多一個客，見到點心紙好多樣嘢都想食，但係一個人食唔到咁多野，叫咗我最鍾意食嘅叉燒包、蘆筍蝦餃、黑白蝦米腸，在門口見到一款包，係飛行棋造型，原來係流沙包，一個人真係食唔到咁多包，所以冇叫到，既然佢擺咗個sample出嚟就影返張相，下次同朋友再去試！個蘆筍蝦餃幾好食，蝦嘅份量都算多，都好爽口，叉燒包就有D失望，味道有D淡，叉燒份量都比較少！腸粉就普普通通，不過佢冇比甜醬辣醬我，淨係比豉油，我都冇特別問佢攞醬，淨係點豉油都OK，食完都好飽！

下次可以再嚟試吓其他點心，不過呢個商場有好多間食店我都未食過，下次或者試吓其他都可以！