計劃左半年的東京之旅終於出發喇！
一行四人，撘10:50am 機，今次搭 HK express ，我地四個住同一區，一架的士兜晒去機場，在的士上睇到新聞，有旅遊巴士和的士在機場附近相撞，導致五人死亡的慘劇，真的好可怕，同時我們的交通亦有小小阻塞，最緊要安全！
我們只有小小延誤，到達機場後，先往 Terminal 2 check in ，跟住去食早餐，又去 Spaghetti house ，今日要等位，我們叫了五份早餐吃，食完再去229號閘上機，又要坐巴士埋去飛機度上機，我們分開坐，因為好友們要可以伸腳的闊坐位，而闊坐位只剩三個，所以我自己坐後一行，我都係比較喜歡坐普通座位，起碼有個窗睇下野，同埋跟身嘅袋都可以放前座下面，闊位就一定要放頭頂個櫃度，飛咗四個鐘就到達成田，中間瞓咗一陣，又睇咗一套電影，當然係自己部tablet 度睇啦！
到埗後去搭 Skyliner 去日暮里，我地住嘅民宿就在鶯谷，就在日暮里轉車一個站，去到車站買車飛嘅時候買錯咗普通車，所以我地被迫拎住行李坐普通火車，冇位置放行李，撞啱放工時間真係有D唔好意思，而且車程都要個幾鐘頭！去到日暮里再搭JR到鶯谷站，民宿距離車站大概步行2分鐘路程，都好近，先在信箱度攞鎖匙，民宿就在9樓，呢一座大廈都有D舊，去到民宿放低行李，見到實際環境同相片都有D唔同，間民宿都幾舊，再詳細睇下D床，呢度一共有三間房，有五張床，只有一個浴室同一個廁所，所謂廚房其實係個廳果度揀咗個位做煮食位，設備好舊，浴室又冇掛鉤，沖涼想掛野都唔得，床單和毛巾都有漬，五張床有兩張床單係特別污糟，應該話污跡特別明顯，白色嘅床單變得灰灰黃黃，我哋即刻send message俾屋主投訴，佢話會搵清潔公司處理，我地唔理咁多住，放低行李出咗去食嘢先！
第一站先去食龍蝦拉麵，之前睇咗周奕瑋介紹，呢間叫做海老丸らーめん的店，龍蝦湯底做拉麵，點止位於水道橋站東口，一出站轉右一路直行，沿途都見到好多食店，沿住馬路行，身後面可以見到有摩天輪，果度係後樂園同東京巨蛋，去到拉麵店，店子地方唔大，吧枱位大約有六個，其餘四方枱大約有10幾個，全店滿座，有四個人等緊，等緊嘅時候見有唔少香港人，我諗睇電視介紹左之後好多人都來試，不過都唔駛等好耐，就有得食喇，我地四個人坐吧枱位，一人叫咗一碗龍蝦拉麵，當然佢餐牌唔係剩係得龍蝦拉麵啦，亦都有普通嘅叉燒拉麵，只係用龍蝦湯底，佢仲有D芝麻拉麵，不過一場黎到，就梗係試佢最出名嘅龍蝦拉麵啦！我地坐吧枱位就可以睇到佢嘅製作過程，龍蝦先係煎左一陣，然後再放落焗爐度焗，拉麵就用個磅計左份量先煮，拉麵送到埋嚟嘅時候先放低，然後再加芝士，芝士係即場刨絲落碗拉麵度，每碗麵有一隻龍蝦，龍蝦鉗會起咗肉放埋拉麵上，好細心！除咗龍蝦仲有豬肉片，豬肉片慢煮咗6小時，所以見到佢嘅肉係粉紅色，個龍蝦湯好濃稠，用咗加拿大嘅龍蝦、白蘭地、香草等等去煲，好好味，個湯嘅份量會比一般拉麵少，我覺得都啱，咁就可以飲晒D湯，唔會嘥！食完個拉麵仲可以加多一個 risotto 做結尾，個份量好細嘅啫，仲有幾粒蝦肉，又刨左D芝士，然後加落剩左嘅龍蝦湯度搞完之後就食得啦，味道好好，不過我食得真係好飽，所以只係四個人share一碗，食埋就真的係一個完美嘅收結！
食完拉麵返返去民宿，在附近的便利店買雪糕食，今期Häagen-Dazs出咗一款新口味，係朱古力、士多啤梨、香檳雪糕，個名叫做Spécialité ，好味！
沒有留言:
發佈留言