新娘愛鬥大 Bride War

呢個星期無乜好戲睇,睇呢套應該輕鬆惹笑,加上套戲都好短,睇預告都大概知套戲講乜野!

兩個女主角都拍過不少愛情小品,今次演情同姊妺的女友,自小夢想將來在六月份結婚並在廣場行禮,兩人男友差不多同時求婚,因wedding planer攪錯日子,令兩人同一日行禮,因兩人不願改期而互相整蠱對方,最終當然和氣收場,中間有d都幾好笑,亦都有小小感動位.

浮生路 Revolutionary Road

果日去完High tea 就順道去圓方行吓,果日大堂佈置得好靚,一個好大既浪漫玫瑰園,d玫瑰有真有假,都好靚,之後仲有人演奏音樂tim.

原本想睇奇幻逆緣,但係買唔到飛,改左睇浮生路,兩個主角多年沒有合作,對上的鐵達尼是我很喜愛的電影,不過兩人的外型不太合襯,老左d就無咁姊弟feel.

套戲好長亦都頗悶,很多嘈交戲,內心戲,兩人由初相識到育有2個孩子,過着平淡的生活,幹着枯燥無味的工作,中間沒有交待前因後果,只是女主角因為種種不如意,忽然想放棄現在的一齊,離開美國去巴黎過新生活,在離開前兩人都很愉快地期待着,漸漸地,男主角在工作上得到新的發展,開始想放棄去巴黎,加上太太懷孕了,兩人分歧漸大...................終於睇完................個人覺得唔太好睇,可能太深吧!

睇完戲見到童装店的Baby Dior擺設很可愛,細細個bear bear,so cute!

W hotel

星期五去左九龍站既 W Hotel high tea, 間酒店好新好trendy好modern,不像傳统的酒店格局,雖然地方較細,四處的擺設都有帶點中國風格加現代藝術感,令人感覺有點前衛,亦不失舒服感覺,由進入電梯開始,地上的屏幕,令人有時尚感覺,上到六樓,接待處有小食和水接待,那個寫着"Thirsty?"的牌令人會心微笑,四處的設計以黑白為主,亦加入色彩鮮艷的坐椅,為單調的黑白添上色彩.

去到Cafe,樓底很高,店內沒有客人??坐下來看見窗外的環境,一邊是凱旋門等住宅,另一邊是興建中的ICC,亦望到小小海景,能遠眺港島西區,這處的梳化位很寬倘,兩人位的高櫈就相對較迫,與旁邊的兩人位較接近.

下午茶有High tea 和Low tea, 同樣是$238 兩位, High tea 主要是中式點心,而Low tea 則全部西點,我們選了Low tea ,始終飲咖啡不大配中點吧! 在等候食物時,漸見有人客陸續到來,那客Low tea 也很快到了,份量不多,剛剛好夠,只是咖啡略為不夠,大概傾得久了,食物的水準跟一般酒店也差不多,若是想三五知己來坐一個下午靜靜地傾傾計,這是不錯的選擇,總比去Landmark好!

Yes man 乜都得先生

前兩日睇左呢套戲,Jim Carrey一貫的攪笑,今次減少了誇張的攪笑方式,略為認真地帶出一些正面的訊息,戲中的他,經歴婚姻失敗後,變得孤獨避世,過着枯燥生活,直至參加了激勵課程而改變了一切,雖然凡事say yes,令他勇於嘗試一些非常困難的事,亦令生活變得多彩多姿充滿刺激,卻失去了自己,不懂在需要時say no.幾乎失去心中所愛.....成套戲都好多笑料,想輕輕鬆鬆笑吓,都係一個唔錯既選擇!

板長

去完迪士尼之後,我地去左尖沙咀食飯,我地未去過板長,雖然要等位,不過都好快有位,我地唔太肚餓,只係叫左幾客壽司食,感覺同板前無乜大分別,始終同一個集團,不過,個吞那魚壽司算唔錯,個火炙和牛壽司,表面比火燒過熱熱地,裏面凍冰冰,個燒三文魚鮫淡淡地,無乜味,其它都無乜特別.

Love Romance

昨天和姊姊去了廸士尼,原本和姨甥女一起去,但臨時沒有帶她一起來,最近廸士尼加了價,感覺少了港人,但國內遊客也很多,現時樂園內還有農曆新年的裝飾,也有中西情人節裝飾,處處都是心心,平時米奇米妮拍照的亭,都變了白雪公主和王子,排了長長的人龍.

我地去左畫畫班,還是第一次去,班裏只有十多人,這次畫的是小熊維尼,都算很容易畫.畫完去左睇Parade, 再去睇金裝米奇,雖然睇左好多次,仍然令我好期待好感動!

睇4D既時侯,坐前面的國內遊客,大概是第一次睇,兩母子非常興奮,不斷伸手"捉",把身體都伸到前一個位,有些"飛"出來的畫面時,又左閃右避和呼叫,相當有趣.

NDS i

今日去旺角買左部新既NDSi比人做生日禮物,新款呢部多左中間個鏡頭,同埋多左蓋面個鏡頭,屏幕都大左小小,不過我覺得作用唔大,都唔使買新款,仲要得兩個色揀咋!

買完野去左朗豪坊果間Caffe Pascucci 坐左一陣,我叫左個Parma ham salad 因Yogurt friut ,個店員唔識聽廣東話,個樣唔多耐煩咁用英文同我講佢唔識中文,我咪同佢講英文,呢個時候有個國內遊客埋去用國語問佢洗手間在哪?佢個樣又唔耐煩,但係佢可能諗對方唔識英文,唔知點講好,呢個時侯我幫佢答左個遊客,佢先笑住同我講thank you!其實身處遊客區工作唔識國語就差d.

講返我個Parma ham salad, 其實好鐘意 Parma ham ,配哈密瓜最好,個salad 配左意式olive oil + 醋,都係我喜歡既,個yogurt friut 原來係咖啡, 我覺得唔係咁啱配咸味既Parma ham, 食完好口乾!

大事勿用

今日見月曆寫住"是日四絕,大事勿用"睇落好似唔係幾好既日子,今日有幾個朋友都唔係咁好彩,有同事受工事煩擾,有朋友被爆竊,好似幾心緒不寧,好左今日都好快完結左.

前兩日同阿兒,阿魚+男友,bb去左和民食飯,和民係佢地最喜歡去既食店,我地叫左幾多野食,果個乜野豆腐個樣好得意但係好難食,其它炸生蠔,帶子,湯窩,蛋卷,牛肉韮菜卷都唔錯,最好味都係個日式pizza,我地每次都order,食飯時都影左d相,阿魚話三月去台灣影婚紗相,十一月註冊同擺酒,阿兒會做姊妹,佢話結婚都講左好耐,今年終於成事.

新強記

這幾天都有唔同飯局,前日就去左大圍新强記,我上次去大圍係同細傑食茶餐廳,今次去呢間新强記,位於火車站旁,都好就腳,呢間"酒樓"好有舊式酒樓feel,店名加左燒鵝兩字,應該係燒鵝最好,不過,我地無叫燒鵝,反而叫左燒乳鴿,我地得2個人,食鵝可能太多,而且我地想食炒蟶子同蒜蓉蒸蝦,同埋豆苗,所以細隻D就啱喇!不過D乳鴿唔係特別好,都係一般水準,反而蟶子就唔錯,豆苗更加唔使講喇!

食完飯我地行去坐火車,旁邊的幾座住宅大厦,唔記得嘉乜野花園,我好鐘意呢種一落街就有商鋪同埋有得上落車既樓,好方便,依家D屋苑,要行老遠去商場,我上次病左要落街行好遠去買藥,真係幾乎暈低,將來機會搬,一定要揀呢種樓,不過可能要擇高層單位先無咁嘈!

和幸

尋日同Edmond,Eva, 康仔,阿傑佢地出來食飯,去左銅鑼灣果間和幸食烤肉,等緊佢地既時侯遇見Ken,我知佢約左Alan佢地食泰國菜同佢farewell,我唔join佢地,因為約左Edmond,既然遇見就一齊影相留念啦!

上到去和幸見唔多人,店內格局都好日本漁港feel,不過佢主打係和牛同豚肉,我覺得個店名好熟,唔記得幾時聽過......佢地就來過幾次,所以全程佢地叫野食,不過都係唔同部位既牛肉,我最喜歡係牛舌條同和牛,好稔好味,白豚肉包着車厘茄都唔錯,雞翼就好淡,無醃過咁,無乜味,雖然主要食肉類,但係樣樣都好細片,都唔算太飽,食完肉叫左個焗露筍同甜品,d甜品都唔錯,我地叫左cheese cake,芝士年糕,兩樣都要燒一燒先食,幾好味喎!燒完個面脆脆地,好得意,另外兩個奶凍都好滑好味道!下次同Flora去試吓先!

我今日終於諗起喺邊度見過和幸個名,就係Sogo門口個牛排人呀!