殿大喜屋

好耐冇去食放題，一來自己食得唔多，二來唔係好鍾意果度D環境，不過今日約咗好友兩公婆，好耐冇同佢地食飯，自從佢屋企接連有兩單白事之後，都已經好少出嚟食飯，難得佢哋肯出嚟，佢哋又想食放題，所以就一定會陪佢哋去，佢哋仲帶埋女女出嚟，就去尖沙咀呢間殿大喜屋，係食過嘅放題之中最好嘅一間，所以係超級多人！

今日落好大雨，早咗出去尖沙咀，在The One 流連咗一陣，早少少過去攞位先，因為諗住都要等，點知等咗一陣就可以入，因為呢度係計時間嘅，佢哋我哋未齊人，就開始計時有D蝕底，不過我覺得我哋已經係尾圍，就算遲少少都唔緊要！

不過好友都係遲咗幾個字就到！好友話呢度轉左用QR code落單，但係今日佢話個系統壞咗，又係用返紙仔落單，我哋揀咗好多刺身串燒等等嘅食物，不過差唔多囉寫咗三張紙都係嚟咗一張左右，到差唔多夠鐘嘅時候好多嘢都冇嚟到，我哋同店員講話好多order都冇送來，個店員就叫我哋重新落過單，同埋俾我哋食到最尾先走，不過到啲食物嚟嘅時候，我哋都已經冇乜食力😅😅

 

機動恐龍展

最近因為侏羅紀電影上畫，周圍都再見恐龍蹤影，今日去海港城睇吓佢果隻恐龍，海港城呢隻係暴龍，所以係大隻D，雖然只係個頭同條尾少少郁，同埋播恐龍叫聲，不過都吸引咗好多人嚟睇，我都影咗好多張相，時代廣場果隻就係細隻D，相對嚟講冇咁多人睇😅

 

Lady M

好耐好耐冇去過Lady M，因為佢嘅千層蛋糕我唔係特別喜歡，因為我唔係好鍾意咁多cream嘅蛋糕，今日比老細捉住，難得佢唔使開會，可以一齊收工，佢一定會去飲番杯咖啡，去咗又一城嗰間，平時尖沙咀果間排隊排到癲，呢間就周不時都冇乜人，我諗佢都唔做得幾耐，呢個舖位好似做乜嘢都做唔長！ 😅 我哋叫咗兩件cake 🍰🍰，兩杯飲品，我都係覺得佢個cake 好漏 😅😅

Yukkuri

啱啱買咗新相機，今日去九龍城影吓相，先去咗南角飲我最鍾意嘅斑蘭椰子咖啡，然後去太子道中間果個世運公園影吓相，不過天色唔係太好，而且開始有少少落雨，所以影咗一陣就走啦，加上我唔記得咗張卡原來冇乜Memory，所以都係唔夠Memory影，行返過去南角道果邊，見到呢間小店，之前已經見過，因為食飽咗先見到，所以冇去到時，後來又忘記咗佢，今日行過又諗起佢，我記得佢門口神神秘秘咁，因為睇唔到裏面，只有一個好細嘅窗，望到裏面係一間賣日本瓷器嘅店，後面係咖啡店，門口餐牌主要係一D甜品同小食，同埋茶類嘅飲品，仲有兩款麵，就入去試一試佢先！

先睇一睇嗰啲陶瓷餐具，價錢都幾貴，應該係人手做獨一無二嗰種，不過藝術嘅嘢，未必個個啱口味，我就冇乜嘢吸引到我，直接去餐廳，餐廳嘅裝修有少少文青味道，有啲舊舊地嘅傢俬，燈光亦都係比較昏暗，餐牌都係門口嗰一個，揀咗一款甜品同埋一款茶，因為頭先已經食咗意粉，仲有啲飽，所以簡簡單單食少少嘢，純粹想試一試佢，叫左一個叫做花盒嘅甜品，同埋叫咗一個焙煎濃香蜂蜜麥茶，個甜品我覺得甜咗少少，茶嘅味道都好清淡，簡簡單單，感覺都唔錯，下次可以試吓其他食物 👍🏻👍🏻

Savvy

之前在海港城見到呢間餐廳，一路都好想試，今晚終於去試咗，一直以為佢係食西餐嘅，店員話係食東南亞食品，我唔知佢係定期會轉，定一話係一路都係食東南亞嘢，不過裏面嘅格局都係似西餐廳，而且有蛋糕賣，所以我估佢係星期會轉餐牌嗰種，睇吓個餐牌食物嘅選擇都唔少，而且好多人都好似好吸引，我哋叫咗虹吸式冬陰功湯，帶子三文魚芒果沙律、泰式燒雞、咖喱配印度烤餅，個冬陰功湯係用虹吸式嘅咖啡壺裝住，唔知佢點樣煮，味道就正正常常冇乜特別，其餘嘅食物都唔錯，個印度烤餅好好食，所以另外再叫多一個，仲叫咗甜品芒果糯米飯 ，呢度環境唔錯，座位都好寬敞，坐得舒服，店員服務都好好，食物嘅質素都唔錯，可以再來 👍🏻👍🏻👍🏻

 

好好火鍋店

睇完戲，約咗好友去打邊爐，出咗去佐敦，好友之前食過話呢間OK，去到見店入面唔係好多人，大概只有一半座位有人！

我哋叫咗個雞煲，有半隻雞，另外叫咗牛肉、椒鹽粟米🌽、蟶子、脆肉鯇魚片、響鈴、菜🥬，唔係叫咗好多嘢食，因為大家要留返個肚食榴槤！呢度食物質素都OK，價錢合理，而且服務都好好！

打完邊路，行過去果欄買榴槤，我哋買咗兩個金枕頭，原本想買寶石球，但係冇貨，唯有買金枕頭啦，今次呢兩個金枕頭都OK，比上一次好食 👍🏻👍🏻

Top Gun Maverick 壯志凌雲 - 獨行俠

Pete 已在空軍服役多年，以他的資歷應該可以有更高成就，然而他為了可以繼續駕駛飛機，而拒絕升職，他在超音速飛行實驗，令機體不勝負荷而失事。上司原本想以此事來勒令他停飛，但現任太平洋艦隊司令 Iceman 卻調派他往北島的海軍航空站，訓練一隊精英飛行員，秘密執行任務 …….！

印象中冇睇過第一集，原本對呢套戲興趣都唔係太大，不過我覺得Tom Cruise都已經接近60歲，仲可以拍呢套戲，所以都想睇吓，出乎意料之外地好睇，執行任務個場面拍得好緊張，感受到飛行員駕駛飛機嘅時候好吃力，睇到我好肉緊，唔怪得票房咁好！

 

京都勝牛

之前見到呢間食店裝修緊，都好想試，終於等到佢開張，我唔知佢開咗幾耐，因為最近冇經過，我估都係一兩個禮拜嘅事！

今日就去試一試佢，佢令我諗起上次去日本都有食呢種吉列和牛，見佢有幾款牛肉選擇，就揀咗一個set係有兩款牛肉嘅，係菲力牛同翼板牛，店員冇俾個爐我，我就主動問佢哋攞，我唔知佢哋係漏咗？定係你唔問佢唔俾，見到呢set吉列和牛，日本嘅回憶返晒嚟，再輕輕燒一燒牛肉嘅表面，好味！菲力牛嘅牛味重D，好食D 👍🏻，只係個吉列厚咗少少🤏🏻