粥世家

今日去九龍城食晏，周圍都好多人，見到呢間粥店冇乜人，可能大熱天時冇乜人想食粥，我見佢有炒麵同腸粉所以想食，店入面冇幾多個客，我叫咗一碟腸粉、一碟炒麵、一個糭，一杯豆漿！腸粉話即叫即做，應該都係，味道不過不失，炒麵就唔熱，食乜都好普通！

 

昇麵館

土瓜灣呢間新開嘅小店，主要係食車仔麵，你都有飯食，食過佢哋嘅豬手飯都唔錯，佢哋嘅蔥油雞扒蛋飯，就出乎意料之外地好食，雞扒煎得靚，豉油汁好味，白飯夠熱，加埋一齊，再落埋蔥油，正呀 ！👍🏻👍🏻👍🏻

 

Tuned coffee & roastery

又有新嘅coffee shop去試，就在旺角東火車站下面，餐廳嘅面積唔大，大約有20幾個位，門外面有三個位，主要係俾人坐低等位，因為呢三個位係冇枱嘅，睇吓個餐牌食物嘅選擇都算多，有沙律碗、pasta、麵包多士類、甜品類，仲有一款牛扒添！
先後試左日式燒雞沙律碗🥗、香蔥蒜蓉忌廉芝士包、煙肉三文魚班尼迪蛋、手撕豬肉班尼迪蛋🍞、貝殼窩夫，而咖啡就試咗佢哋嘅signature drink，係咖啡配梳打水加水果糖漿，又試咗佢哋嘅 fruiticano，係菠蘿沙冰咖啡，食物嘅造型都好靚，尤其係貝殼窩夫，隔離左右枱大家都見到人哋嗰款好似靚D，你問我個碟係乜？我又問你嗰碟係乜，好搞笑😆😆😆 呢度嘅食物唔單只係靚咁簡單，亦都好味道，價錢都唔貴，所以要一食再食！👍🏻👍🏻👍🏻

 

飯局主場 - 第廿六回 肉屋 Nikuya

又有飯局，又食壽喜燒！上次去City Super買牛肉返嚟自己整，今次見到網上有package賣，今次幫襯呢間叫做肉屋 にくや，訂咗一個二至三人嘅月．見 - 櫻套餐，包含咗A5 薩摩牛肉，有八片肉眼，同四片西冷，會跟埋一包烏冬、燒豆腐、日本雞蛋、大蔥、芋絲、冬菇、魚蛋、油豆腐、皇帝菜，當然唔少得壽喜燒汁啦！

落單嘅時候註明叫佢盡早送，果然好早就送來，送來嘅時候係一大箱，包裝都好靚，我先放咗入雪櫃先，因為好友今晚先至上來食飯，所以出去飲杯咖啡先！去咗早幾日去過嘅 sofi ，再join埋好友一齊去九龍城街市，買咗D菜同埋蝦、油豆腐、又買咗一盒香印提子！

上次食過日山之後，見到人哋係用慢火煮，所以今次我哋都係用慢火去煮，但係覺得慢火又好似太慢！😅效果亦都唔係太理想，覺得上次好食D，定係今次D牛肉冇上次咁好食？不過我諗係sukiyaki 個汁唔好味！🤔 同埋牛肉太薄，食起上嚟冇日山果D咁滑，質感亦冇咁豐厚 😅 最後食淨左油豆腐同埋烏冬，跟住果兩日要食埋佢😆

 

尚氣與十環幫傳奇 Shang-Chi and the Legend of Ten Rings

 

徐文武在古代開始已世上活回了千年，一次在森林尋找大羅這個神秘地方，希望得到它的力量，但被守護者應麗擊退，但兩人卻相愛起來，應麗與文武結婚，並生了一個兒子尚氣和女兒夏靈，從此兩人退隱江湖，可惜應麗最終被人殺害，憤怒的文武決定重出江湖並替應麗報仇⋯⋯！

對呢套戲都有D期望，因為一向都有睇Marvel 嘅電影，今次有香港嘅代表梁朝偉同陳法拉，套戲主要都係講尚氣嘅身世，都好有中國feel，好多場景服裝都係好中國，亦都有楊紫瓊同埋元華客串，以為睇緊香港電影🤣🤣🤣

4口

食完 tea，行左一陣街，想飲杯嘢，見到呢間開咗冇幾耐嘅小店，又坐低試下，呢度係食新派福建菜，見到佢哋啲食物應該都幾細碟，所以揀咗幾樣野，藍莓淮山、老酒蒸蟶、黑蒜粒燉番鴨湯、姬松茸北蓀排骨湯，同埋一碗米線，仲有兩杯飲品，所有嘢嘅份量都係好細，因為頭先都食咗下午茶，細細份就啱喇！食物嘅質素就不過不失，味道唔算好特別！

 

舍 SHÈ

今日去中環呢間餐廳度食Tea，呢間餐廳嘅位置，應該以前係法國 Angelina 餐廳，早幾年去過，唔知幾時執咗，亦都唔知有冇轉到其他餐廳，而家呢一間見佢都好靜，可能餐廳嘅位置在連卡佛裏面，唔係咁多人知道，呢度勝在有個幾靚嘅 view，今次個Tea 係中式點心，造型都幾靚，點心有粉紅色嘅蝦餃、松露野菌餃、雜菌手袋👜酥、花之戀春卷同埋鮑魚酥，甜點方面就有天鵝🦢棉花糖、椰汁金魚配楊枝甘露、豆沙小南瓜同埋燕窩撻，食物嘅味道又唔係特別好，都過得去啦，始終價錢都唔貴 👌🏻👌🏻

 

sofi Coffee

上次同好友在九龍城食泰國嘢，食完行過見到呢間Cafe，今日就去試吓，店入面嘅裝修有D禪，深色嘅木紋傢俬，配上米白色嘅圓形坐墊，店入面最入嘅位置，地上有一幅枯山水（かれさんすい），好有日式庭園 feel ，店入面比較靜，雖然出邊係太子道西，車水馬龍，但係裏面就比較平靜，見到呢個環境，大家講嘢都唔會太大聲，呢度除咗咖啡之外亦都有茶，食物嘅選擇唔算好多，主要係一D輕食，有窩夫同埋刈包，仲有少少甜品，試咗兩款窩夫，燻三文魚配羽衣甘藍窩夫🧇、古味辣花生醬雞柳窩夫🧇，另外試左豆腐芝士蛋糕配黑芝麻醬，食物嘅味道唔錯👍🏻，造型都好靚，咖啡都好味 ☕️😋

 

紅花会

成個九月份，得一個生日飯局，呢個朋友過去一年都冇出嚟食飯，因為佢有D社交恐懼，前年我哋又唔記得咗同佢食生日飯，所以今次約出去食飯都冇特別講係同佢食生日飯，比個 surprise 佢補祝返生日！

今次去港島區食，因為要就好友收工，因為得佢一個住香港區，平時都係佢過嚟九龍食，今次就一就佢，因為佢話而家放工後要學緊奇門遁甲，所以唔能夠太早出嚟，所以就佢喺佢公司附近食，揀咗呢間菜式係少少京川菜咁，我哋叫咗水煮毛血旺、老壇酸菜魚，茶薫樟茶鴨、避風塘九肚魚、梅肉炒萵筍絲、回鍋肉，食物嘅質素都唔錯，不過我哋叫晒全部都係辣野，點知好友個新女友唔食辣野😅，不過回鍋肉同埋樟茶鴨都唔辣，佢都可以食😅甜品就叫咗個紅棗糕，當然唔少得我哋帶嚟嘅蛋糕啦！當好友開開心心切蛋糕🎂，希望佢生理心理都健康啦！😆😆