十常八九

今日本來一早要去呢度，但係佢間店借左比人拍戲定拍 MV，所以去左第二間，食完野再行過嚟睇吓拍完未，已經拍完！仲要有位！正呀！

上次行過見到呢間已經想試，但當時冇位，本來可以等吓，但係餐廳做法係要登記電話在門口！個電話 list 掛在門外任何人都可以睇到，做法太沒有私隱，而且附近冇乜野好行，所以沒有等，今次有位唔使留電話就最好！

店入面只有兩張四人枱（榻榻米型式）和三張雙人枱，即係只可以招呼五枱客，最多14人，而呢家店主打係甜品，亦可以帶貓狗入來，今日就見到有一張枱有隻貓，貓奴叫左幾款甜品同主子影相！

睇吓個餐牌係用繪圖代替相片，好有童話 feel！見到每枱必點雞蛋布甸🍮，我都叫個試吓，見到個富士山造型的奶凍，但店員話未推出，所以改左叫個 Canelé ，有原味和抹茶味，揀左原味，另外叫左杯菠蘿熱情果梳打，食物造型很多漂亮，個個狂影相！😝 個雞蛋布甸好濃蛋味，好食！ canelé 外皮頗硬，味道明顯減左甜，較適合港人口味！飲品就意料中事，其實佢有D咖啡同茶，不過剛才飲左咖啡就唔敢再飲了！整體來講都好滿意好開心 ！😊

Cafe Sausalito

又去大南街，一心想去另一間小店，但去到發現借左比人拍戲/拍 MV 🤦🏻‍♀️，我諗有排攪，所以轉左去呢間！😔

呢間小店門外有五、六個位，因有兩個人坐緊所以只可側側地影個門口，先至影唔到人！店入面只有大約14-16 個位，一入門口係廚房，廚房旁邊有4個位，廁所在店中間，最入仲有D位，裡面有隻窗望到出街，其實只係後巷！

先攞位，再落 order ，只餐牌有D好特別既咖啡，不過唔識佢，所以叫返普通的薄荷朱古力咖啡，另外叫左一個爆芝士牛肉 bagel ，牛肉味道唔錯喎，只係偏咸左少少，可能芝士本身都係咸咸地，加埋牛肉醬汁就變得咸左！如果個汁淡返D就 perfect!👍🏻

meal meal cafe & bar

又去南豐紗廠，今次去咗呢間試吓！今日星期日，好多人和狗狗！很熱鬧！

去到餐廳剛好剩返兩個位！睇 menu 有小小日韓及西式feel，叫左一個自家紅醬炒扁意粉，同埋菠蘿柚子梳打，紅醬唔知係乜嘢醬，唔辣又唔係蕃茄醬，意粉的份量頗少的，食左唔係好夠飽！杯菠蘿梳打跟左少少椰子乾碎，加埋落杯梳打度都幾得意！🍹

Big Sur

 

 

今日去咗中環，因為中環 Donki 尋日開張，今日去八卦吓！先去食D野！原本想去PMQ食嘢，但係 PMQ 冇乜嘢好食，行過士丹頓街見到呢間餐廳，感覺幾舒服，所以就去試試佢！

我地叫左個 Caesar salad 、smoked chicken、牛肉漢堡，兩杯咖啡，沙律加左D魚肉，以前 Caesar salad 只有菜、芝士、麵包粒，依家都加左一條條魚仔，smoked chicken 跟左D焗羽衣甘藍，味道唔錯！漢堡包我沒有試，睇落唔錯！

食完野行去 Donki，超多人！好迫咁入去行左一圈就走，地方好細好迫！😅

去撘地鐵時，行去香港站睇吓台灣品牌在地鐵站內的 Showline ，開了短期手信店，牌子是海邊走走，之前沒有食過，主要係蛋捲，買左一包細盒的肉鬆蛋捲試試，味道一般，我覺得唔夠鬆脆，太厚了！

利星海鮮火鍋小炒

 

好友 T and K 臨時即興約食飯，去咗深水埗呢間小菜館度食，我哋幾個食嘢嘅口味都好相近，大家都想食羊腩煲，所以叫咗一個羊腩煲，但係見佢份量都幾多，所以只係加多兩個小菜，一個唔記得乜嘢排骨，令一個就係豆豉鯪魚油麥菜，最終碟菜都係食剩少少，因為大家都好飽，個羊腩煲嘅肉都幾多，味道唔錯！價錢都合理！

整容液 Beauty water

 

藝智自小因其貌不揚及肥胖而自卑，而且暴飲暴食，受盡欺凌，有一天她收到廣告電話，介紹一種美容液，他不以為意，卻收到了美容院的送貨，以及一條介紹使用的手指，看過影片介紹後，她決定前往一試，但自己做的效果不好，所以前往整容液的公司作出修補，並要求父母支付龐大的費用，經過修補後，她變成了又靚又苗條的女孩，走到街上，非常矚目，她決定改名，及要進入娛樂圈，務求能夠成名，卻因為意外，讓她徹底毁容，為了變回原本靚樣不惜代價.....！

同好友食完飯，臨時決定去睇呢套戲，所以匆匆忙忙遲咗入場，睇唔到最頭一段，我哋一直想睇呢套戲，只係夾到今日去睇，睇預告片覺得套戲應該係恐怖片，雖然睇影評話佢係講一D比較警世，唔好只求外表之類的含意，但係我覺得套戲都冇好明確咁表達呢一樣野，反而我覺得當一套驚慄片睇就算，如果要講警世，只能夠講人係唔能夠滿足於現狀，只係不斷追求要更多，結果只會弄巧反轉！個結尾就麻麻哋，我覺得可以拍得好D！

Poseidon restaurant & bar

好友 F 的生日飯，三人行，好懷念以前四人行，始終食野可以多D選擇，而且 F 的前度是很有食力，每次都做最後勇士，包尾食晒D野，依家三個人會就住叫野食！

上網 search 到呢間餐廳，用 app 訂枱有主餐牌食物7折！又試吓佢，在亞士厘道的商廈，都幾多人，好彩訂咗位！我地坐卡位，很寛闊落，可以坐到6個人，我地叫左半打生蠔🦪，好友 F唔食，我同 J 一人三隻，生蠔味道ok ，不過太瘦了！唔係咁抵食！另外叫左龍蝦牛扒🦞🥩，同埋海膽魚湯意粉，食物質素又幾好喎！好食！牛扒正！👍🏻👍🏻

我地買左蛋糕🎂，蛋糕都幾大個！三個人一人一大件😅如果四個人分就好喇！

樂天皇朝

好友 S 又約食飯，最近都幾頻密同佢食飯，因為佢而家份工係freelance ，所以佢都好得閒，只係要講多幾個電話睇多幾個message，另外約埋好友F 同佢男友四個人一齊去食嘢，去咗旺角雅蘭食飯，去到雅蘭就諗起以前，好多時同家姐去樓上酒樓度食飯，已經唔記得咗間酒樓個名，淨係記得我地好鍾意叫一個瑤柱扒四蔬嘅菜，依家都唔見有酒樓有類似咁樣嘅餸菜，其實只係四款唔同嘅蔬菜，果陣時覺得好好食！

今晚訂咗7:30 ，我早咗去到，坐住等佢哋，睇吓個餐牌嘅時候見到樣樣都好似好好食，類似係上海菜咁樣嘅菜式，餐牌D相影得好靚，所以好吸引，樣樣都好想食，不過到時睇吓份量有幾多再決定，好友嚟到同我一樣，睇到餐牌上面D相都想食，不過有D嘢食都已經賣晒，因為呢度9:00就 last order ！最後我地叫咗小籠包、麻醬油麥菜、松子桂花魚、京醬肉絲、紅燒肉、上海炒年糕，D餸上得好快，可能想快D收工，食物嘅質素都唔錯，份量比較細，個小籠包有八種味，老實講真係分唔出有D咩唔同，因為個餡係一樣，只係個皮唔同味，但係分別唔大，食完之後，我地叫甜品，好友F的男友好開心我地叫甜品，因為好友F唔食甜野，平時佢地兩個人撐枱腳冇乜機會食，如果要食就要預自己人一個人食嘅份量，但係好似呢一類咁樣嘅甜品就一個人一定食唔晒😅，我地叫咗雷沙湯丸同埋豆沙鍋餅，甜品都幾令人失望，豆沙鍋餅同平時食嘅好唔同，雷沙湯丸亦都同之前食過嘅唔同，本來唔同味都唔緊要，不過唔同味得來又唔係咁好食！好友 S 話下次去荃灣食另一間老牌上海菜！