大阪5天享受之旅 Day 1 - 果園、大阪城、神戶

已經好耐冇試過跟團去日本了，今次因為同老人家去唯有跟團!睇左幾間旅行社的大阪團，好多團行程差不多，最後揀左呢個大阪5天享受之旅，行程有和歌山、白濱、京都、神戶、環球影城，見個團有溫泉浸，環球影城包埋入哈利波特，我又未去過神戶，所以揀呢個團，個團零晨機去，夜機返！

行程第一日，零晨1:45am機，坐國泰機去，晚上11：15集合，呢D時間差不多冇野食，得返老麥同拉麵，揀左拉麵，食完拉麵去等上機！飛機 delay 左十零分鐘，成班機都好爆，領隊話有D要分開坐，好彩我地一齊坐！

零晨機冇飛機餐，只係比包 nuts你，三個幾鐘飛行時間當然要瞓一陣！好快就到埗！之前填左入境紙，好快攞行李過關，集合之後，就分祖編排旅遊巴坐位，然後上車！

第一站去摘生果，呢個季節係柑同柿！我地去摘柑，個果園好好僻靜，得我地一團去，我地可以自己即摘即食，不可以帶走，D柑唔算好靚，細細個，食左幾個就走，園主每人送兩個柑比我地，然後上車走人！

摘完柑，去大阪城！導遊介紹我地食日本青提子，呢期香港最hit係晴王同埋香印，導遊介紹果隻係日本名，唔知係咪其中一種，去到日本城外圍，一落車就見生果檔，好多提子，但價錢太貴了，三千多円的青提，比香港賣的晴王更貴！沿路見到炸番薯同牛肉串燒好想食，回頭先買吧！行入去大阪城都幾遠！好多年前第一次去日本果陣來過，已經無印象，在大阪城堡前地，有很多小賣店，頗熱鬧，今日好曬好熱，要上城堡的天守閣要付費的，有電梯上，只是要排隊！上到去影左D相就走，時間不多，行返去時買了炸番薯，他們做得很慢，遲了一點上車！

跟住行程去神戶，先去購物街行街，我們的目標是大丸百貨，所以沒有在購物街行，直接去大丸，先去食 lunch，選了一家西餐廳，每人叫了一客意粉，份量頗少的，志在休息一下，然後去睇袋同鞋，個人無乜興趣，都係陪人睇，好彩揀啱左個袋！又去睇碗碟，買左幾隻碟！然後去超市買水果，見到巨峰剛拆箱，只係仟幾円，買左一揪今晚食，然後返去集合點，仲有大半小時，搵左間餐廳食仲 cake ，飲杯野，同店員溝通左好耐先明我要檸水，佢冇收我檸水錢，因為餐牌冇呢樣野，只係將佢地供應的免費水，加片檸檬比我，所以冇收錢！只係比 cake 錢！

集合之後，去神戶，我未去過神戶，第一次來到，先在海濱睇景點，這裡有一紅色的塔，乜有一間酒店，在海濱坐左一陣就上去商場行，商場旁邊有摩天輪，和麵包超人館，呢度店舖都係賣衫、手信、精品之類，我買左一個袋，雖然行左一陣，都幾攰，可能搭完通宵機又玩左成日！

比預定晚餐時間早左小小去餐廳門口等！餐廳名叫做花水木，係食天婦羅，因為差不多包場，可以早小小入坐，每人一set蝦同豬扒天婦羅，白飯任裝，同枱有兩母女，年紀較輕，兩人頗健談，食完飯就返酒店，今晚住 Plaza hotel，房間企理，面積算是中等，只係住一晚，快速冲涼瞓覺，始終三十多小時冇瞓！好快就瞓左！

裝修大作戰 - 12

今日上去望望，都係同上次一樣！冇郁過，都係等傢俬，只係拆左栅!

出旺角搵窗簾，間間睇落差不多，都唔知點揀，呢條街好多亞姨派傳單，跟傳單上左一間睇，呢間睇落D布靚D，問店員價錢，話要視乎布料和尺寸，大約一千元一套窗，我唔知算唔算貴，印象中，上次六百幾（N 年前屋邨舖買），我有兩套窗，廳要兩層，仲要落地長度，我諗要三、四千，我跟返設計圖個顏色揀，房果幅要高度遮光，揀左三款布料，自己好鐘意，揀埋款式，計落比預期貴左D！

裝修大作戰 - 11

又上去睇！今日冇人開工，見到成間屋整好晒天花、地板、牆，只欠全屋傢私，我諗全個裝修工程，花最多時間在訂做傢俬，睇情況，現在只是等傢俬到左先可以開工，仲有40日，䓁等等等..........

Metal Steak

昨天在旺角睇燈和門鎖，今天去灣仔！

先去食個 lunch ，去左中環歌賦街呢間 Metal Steak，去到未開門，今日好熱，行左去斜對面間叫做 Creative Co-op 的家品店涼冷氣，順便睇睇，見到門口有米字旗梳化，又有同款單人椅，價錢不算貴，見到有個鐘幾啱心水，要度度尺寸是否夠位掛，又見到D碗都幾好，好幾樣都啱心意，等遲小小裝修差不多完工再來睇！呢度D店員好有禮貌，服務好好！

行返去 Metal Steak，開左門，我第一個入去，冇其他客，有兩個店員，入口有個燈箱餐牌，佢地主要賣六款牛，價錢每 gram 計，最少要order 200g，最貴是佐賀牛A4西冷，要$1.9/g，其次係佐賀牛A4肉眼，要$1.8/g，西班牙黑毛豬就$1.2/9，其他安格斯和紐西蘭就$0.6-0.7/g，即係最低消費$120，另外加$30有湯、沙律、飯，但份量很小，飲品有罐裝 wine，有紅、白酒和 Rosé，沒有試，始終太早了，而且相信質素應該很一般！先在門口的燒烤爐那邊的窗口跟師傅落單，要邊種牛肉同埋要幾重，同埋要煮幾成熟，然後比張 sticker 你，好似超市果D價錢 sticker ，埋去收銀處比錢，然後入去搵位坐，呢度既設計帶小小工業feel，高身木枱和櫈，有些鐵網，牆身都好raw，一入門口收銀後面有一排位，行入D有四張可以坐六人的枱，有樓上但沒有開，牆上掛了些圍裙供人客自取，因為用鐡板上，所以用圍裙好D，我們叫了佐賀牛A4西冷和肉眼，五成熟，店員把牛扒送來，牛扒略為生了，不足五成熟，而鐵板不夠熱，好快凍左，肉質好，要是熟多一點，油脂會少D，吃起來不會太油，成個 lunch hour 只有四枱客，我諗食個 lunch $150，唔係太多打工仔可以成日食，我諗都幾難做！

潮福蒸汽石窩

去完迪士尼，出旺角食野，原本諗住去朗豪坊附近的食店：水上人，試近期大熱蒸海鮮，但要等位，改了去旺角道的潮福，一樣要等位，其實都好夜，成十點都要等，都等左半小時先有位！九點後八折，十一點後六折，再等多半個鐘有六折，但係好餓好累喇，唔想等，即刻叫野食！

叫左𧎚，鮑魚、元貝、雞、菜、仲有排骨粥底，先將米、排骨、南瓜放在鍋底，不用加水，靠蒸氣和海鮮汁去煲，上層蒸海鮮，下層煲粥，每款海鮮都有計時器去計時，蒸完一款蒸另一款，始終是新鮮海鮮，味道當然是鮮，排骨粥更是精華所在，好好味！難怪大熱，更有不少人自己在家整，個個都買有蒸格的火鍋煲！

迪士尼詭城玩失蹤

又到 Halloween promotion，今年迪士尼有新野，往年的詭墳學院、馬戲團，都冇乜特別，今年見宣傳轉晒，見十七號，有會員優先試玩，立即登記左先！

入園前例必去青衣城食野，今次又食拉麵！好友早兩個月搬左屋，去青衣唔太就腳，下次要約去九龍塘或者旺角先得！食完麵，入到去三點幾，先去售票處登記，兩點半開始登記，四點半後會封左 Toy story、灰熊山谷同埋迷離莊園，只招待已登記會員，所以有條營光粉紅色手帶比我地做識認，由於節目七點才開始，四點半後好多會員未入來，呢幾個園區極少人，所有機動遊戲基本上不用排隊！連平時好多人的彈弓狗，都唔使等，大把位，可以一人坐一卡！玩左一陣，差不多七點，去灰熊山谷睇第一個節目，見到有個好細的舞台，等睇表演的人越來越多，亦有些傳媒，等到表演一開始，有個人出來講故事，然後有一班人出來演繹故事內容，但這班人是手持扯線公仔，由公仔來演繹，因為人多公仔又矮小，完全看不到在表演甚麽！只"聽"了一陣便走了，因為7：20在迷離莊園有表演，行過去等一陣便開始了，表演是用燈光投射到迷離大宅，然後有一些全身由頭到腳都是白色的人，在大宅外行來行走，營造陰森氣氛，然後他們走到人群，與觀眾合照，我們未看完便走了，還有其他表演至晚上十時，我們選擇去城堡前等睇八點鐘的煙花，今年的 Halloween 節目實在令人失望，感覺迪士尼的管理層不善經營，未能因應港人的喜好去創作活動！去睇煙花因為知道十週年改了煙花滙演的投射影像，到煙花開始才發現沒有改，同早前在網上看到的不同，不過今晚好多人係第一次睇煙花，因為反應好熱烈同興奮！

睇完煙花去買野，商店出奇地少人！以往睇完煙花散場時，商店內是迫滿人，排晒隊，但今晚很少人，不用排隊，雖然可以很輕鬆，但看見冷清的場面，代表經濟不景，對我們來說也有間接╱直接影響！

裝修大作戰 - 10

上去睇，有師傅在工作，見到廚房已經舖了牆磚，廁所都鋪晒天地牆，坐廁都安埋，整左個幾月，進度都好快，希望可以快D完成！

裝修大作戰 - 9

裝修公司聯絡我，話有幾個位有鋼根外露，問我想就咁補返，定係打左生銹部分先再補，價錢相差一倍！問左師傅意見，貴D做法會 last 得耐D，長遠計，都係要比多D！

裝修大作戰 - 8

尋日約左揀廚房爐頭磚，上去裝修公司揀，元素系列，有D似岩石同雲石之間，有幾種顏色選擇，雪花白太淺色，因為櫃都係白色，石墨若又黑麻麻又撞色，得灰色比較適合，灰色又有分幾種灰色，最後揀左碎岩石果隻灰色，揀完磚，對埋D櫃尺寸，比埋D電器尺寸，攪定！

今日又上去睇睇，見到砌緊磚牆，地同牆都做左入牆，睇到D電線點走，好期待呢！

裝修大作戰 - 7

今日約左去旺角砵蘭街揀磚，呢度好多裝修用品店，我地去左一間樓上鋪，應該係同裝修公司相熟，選擇好多，大陸磚平價一D，意大利磚當然靚，貴一倍以上！最後當然買大陸磚，揀左地磚，廚、廁的牆磚，價錢比預期平！

揀完磚，揀坐廁、洗面盆、花洒、水龍頭，坐廁個個睇落差不多！坐上去試，揀左個細少少，方方地，油壓式廁板，洗面盤揀左個圓形的，水龍頭買了意大利牌子，浴室花洒、廚、廁水龍頭，同一個系列！

買完再去買牆紙，只需要買一卷，只是床頭幅牆要貼，所以一卷就夠！