2026年3月北海道自駕遊 Day 2 - 富良野熱氣球體驗、紋別市、螃蟹爪雕像 カニの爪オブジェ

今朝一早， book咗7:00去坐熱氣球，接待處就喺酒店後面，我哋行過去，只係見，我哋四個，接待人員揸車車我哋去熱氣球嘅位置今朝一早， book咗7:00去坐熱氣球，接待處就喺酒店後面，我哋行過去，只係見得我哋四個，接待人員揸車車我哋去熱氣球嘅位置，去到見到有另一組人已經處理緊另一個氣球，我哋嗰個就喺架車度，我哋落咗車之後，佢哋就開始處理我哋個氣球，另一組人比我哋提前少少升空，我哋遲大概10分鐘先至起到飛，今次嘅熱氣球係可以飛出去，上次係純粹升高20米，今次最高可以上到1000米，不過我哋見到儀表顯示，最高我哋都係上過四百幾米，但係望到之前起飛嘅熱氣球就升到好高，而且係高速由低位升高，所以我哋都好驚，但係我哋嘅駕駛員可能見我哋Loading比較重，連埋佢有五個人，而另外嗰個只有三個人，雖然只有四百幾米，但係個景色都好靚！仲見到有隻狐狸喺雪地上奔跑😆飛咗大約35分鐘就落地，不過落地嗰下都有啲出乎我地意料之外，估唔到係硬著地落雪地😅所以嗰下大家都企唔穩，跟住我哋行返去架車度，積雪非常厚，職員準備咗熱湯俾我哋飲，可能驚我哋喺個天飛咗咁耐有啲凍，飲完湯就車返我哋去佢哋Office，咁我哋就返酒店check out！

Check out 完喺附近便利店買少少嘢食，因為跟住係長途車過去紋別市，中途又喺香りの里たきのうえ道の駅 take 個break !

去到紋別市附近Aeon，見啲牛肉都OK，但係海鮮就麻麻哋，所以我哋就再揸車過返去市中心，結果係搵唔到一間啱心水嘅超市，最後搵到一間叫做しめまる嘅超市，有返D好D嘅海鮮同牛肉，因為今晚自己煮，想煎牛扒牛肉！附近只有呢間超市，如果啲嘢唔啱食都冇辦法返轉頭去買，因為車程好遠😅

去到Apartment 已經五點幾，好友準備食材嘅時候，我哋出去行咗個圈，因為紋別市嘅地標係一隻巨型蟹鉗，我哋住嗰間Apartment就喺蟹鉗側邊，所以出去影一陣相再返嚟食嘢，食完嘢我哋又出去戶外玩花火，玩得好開心😆玩完花火都成12點，所以都要瞓，聽日又要早起身😅

酒店住後感：
Okhotsk Ocean Villa Al Mare
今次book呢間Apartment，佢好似一間貨櫃屋咁，當然佢比貨櫃仲要大，呢度方圓幾里都冇其他酒店，呢間Apartment只有兩間屋，一間係有桑拿浴室，我哋嗰間就冇，而且個桑拿浴室係室外， Apartment 好新淨，裏面空間都大，而且係寵物友善，有寵物籠，不過行李篋唔可以放個轆落地板推，所以全程要打側抽入去，佢呢度係自助check-in，佢有一個小小嘅Office喺房側邊，用Tablet幫助登記入住同check out，入邊有飯廳同客廳，有兩間房，一間房有兩張床，另一間房有上下格床共四張床褥，廚房係開放式，都幾大，浴室亦都係傳統一個浴缸加一個淋浴間，呢度有洗衣機，不過係日式機，冇得乾衣，而且我哋只係第二日，都未有衫要洗！廚房嘅設備都好齊全，有飯煲、咖啡機、多士爐、微波爐等等，我哋非常滿意，而且可能因為唔係旺季，價錢亦都唔貴，我哋真係覺得好抵😄

 

2026年3月北海道自駕遊 Day 1 - 新千歲機場 / 富良野

三個月前同好友去仙台嘅時候已經plan咗今次去北海道坐破冰船，當時已經訂咗船飛，之後先至訂機票同酒店，話咁快就三個月，今次搭Hong Kong Airline去札幌，我一早到咗機場， 好友就因為call 咗車，個司機遲到，搞到佢哋遲咗半個鐘先到，嗱嗱聲去check-in，我就喺機場食左少少嘢等佢哋，佢哋去lounge 快速食啲嘢，然後就準備登機，要過去216 號閘，過到去啲時間都係啱啱好，開始上機！

飛咗五個鐘，去到札幌新千歲機場，雖然海關好多人，大概有兩班機一齊到，不過都算過得快，仲要等行李添，用咗差不多一個鐘，就去攞車，好友同租車公司用WhatsApp 聯絡，約咗我哋喺停車位度等租車公司接我哋，同時間有三組人，連埋司機10個人一齊坐佢哋嘅車去租車公司攞車，要坐15分鐘車先去到租車公司，好友話上次佢租嘅時候呢間公司係一間好細嘅公司，今次去到見到佢裝修咗，新淨咗大咗，員工仲多數識英文，所以好快手搞掂，今次租嘅係三菱Delica，而且架車都幾新，只係行咗3200公里，我哋就好滿意，四個人坐好寬敞，可以擺晒我哋五個篋，正！

第一站先去Workman plus ，自從上次喺仙台幫襯過，覺得佢啲嘢都唔錯，今次又再去行吓，揸咗15分鐘車就到千歲市嘅分店，見佢開始換季，只係剩返少量嘅冬天衫，做緊清貨，比好友執到件外套，原價¥4500，而家只需¥980😆，我之前買咗條Mediheal 褲係可以有助消除疲勞，但係質地好厚，只適合冬天着，而今次見到佢有薄身嘅，就買咗一套長袖衫長褲，另外再買一條短褲，我哋四個人加埋買咗三個購物籃🤭

買完衫即刻要揸車去富良野，揸咗成日兩個鐘頭車先去到，先去酒店check-in，放低行李之後出去食飯，揸架車去富良野火車站附近，見到一間食蒸蠔放題，店名叫做牡蠣食べ放題 ほっかきや ふらの店，就去試吓佢，呢期因為諾如病毒，大家都唔敢食生蠔，見到佢係熟蠔，所以我哋就去食，佢有幾款套餐，有兩款係限定蠔嘅數量，4隻或者10隻，另外有兩款係任食，只係有冇烏冬嘅分別，佢嘅烏冬有六款湯可以揀，所以我哋揀咗任食蠔加烏冬，至於飲品，佢就冇散叫，全部係放題，爭在有冇酒精，我哋全部揀冇酒精，佢嘅蠔每次係8隻一盒，用一個四方形嘅金屬盒裝住，直接擺上火煮，每次煮10分鐘，佢有淨蠔、加sake、加牛油及sake，仲有一款我唔記得係乜嘢，總之我哋覺得牛油加sake 係最好味，所以我哋keep住叫呢隻，我哋四個人佢俾兩個爐我哋，所以每次可以煮16隻，啲蠔有大有細，多數都唔係太大隻，所以我哋叫左大約6 round ，平均每人食左廿幾隻，仲叫左兩round 烏冬，每round 兩碗，不過每碗嘅份量唔算多，所以可以食到兩round，大滿足！食完飯附近冇嘢行，揸返架車返酒店嘅時候途經便利店，又去行吓，反而便利店入面都幾多人，然後返酒店休息，因為今晚我哋四個人一間房，要排隊沖涼，所以都唔搞太夜😅

酒店住後感：
Hotel Edel Warme

今晚住呢間酒店，附近有滑雪場，所以見到好多住客都係着住滑雪衣着，酒店嘅大堂好大好新淨，佢有提供welcome drink，大堂有個休息空間，中間有個大火爐，可以喺接待處買棉花糖喺呢度燒，亦都有咖啡機可以沖咖啡飲，酒店亦都有浴場，我哋訂咗一間四人房，房間就比較舊，可能只係翻新咗大堂，房間未完全翻新，房內有四張單人床，床尾有小小空間，我哋可以擺自己個篋喺床尾，但係電掣只有一組在梳妝台，床頭係冇得插電，而個廁所好細！就好似東京市區嗰啲細酒店嘅廁所咁細，真係僅企到一個人😅 浴室雖然有洗頭水，但係大堂亦都有好多款洗頭水，可以攞少少返房試用，佢提供咗一啲細細個嘅膠兜，俾你自己裝少少返房用，我就冇試到，大堂都有一間小店，都係賣一啲零食同埋酒，夜晚我哋返去嘅時候大堂都冇職員，可能要撳鐘先有人出嚟！

roommate / 飯局作客 - 烤肉餐

約咗好友今晚去朋友屋企食飯，晏晝我哋要去買少少海鮮，先去新蒲崗食少少嘢，去咗呢間coffee shop，去到都要排隊等位，等咗大約半個鐘就有位，餐廳嘅座位唔算多，可能今日星期日，就座無虛席，我哋叫咗兩款意粉，同兩杯手沖咖啡，意粉比預期好食，特別係蕃茄意粉都dope 🤣咖啡亦都唔錯，估唔到喺新蒲崗都有唔錯嘅Cafe，cheese cake 都ok 👍🏻下次要試吓佢哋嘅糕餅類！食完嘢喺附近買個蛋糕仔，就行過去大成街街市買海鮮，今晚我哋在朋友家鐵板燒， 好友已經預備咗牛扒同埋壽司，我哋買少少海鮮，每人一隻扇貝，另外有一啲好大隻嘅蝦，買咗四隻都成斤重😅唔敢買咁多嘢食，因為大家都唔係好有食力🤣🤣

買完餸就搭車入將軍澳，好友屋企之前去過一次，今次第二次去，佢哋兩公婆，間屋都裝修得好靚，今次見到佢太太明顯發福，疑似有孕，因為好友一直都話佢太太好想快啲生B，結果好友親自承認老婆有喜，真係恭喜晒，所以佢好多嘢都唔食，因為剛剛滿三個月仲要戒口！好友全程負責煮食，整得好好味，仲煲左魚湯，食完飯仲有士多啤梨，再切埋個蛋糕食，我哋食得好開心😆