闊別三年 - 2022年10-11月東京快閃五天遊 Day 2 深谷花園 Premium Outlet，新宿

今朝遲咗少少起身，尋晚好好瞓！

今朝先去飲奶！🤣🤣在秋葉JR 車站的6號月台有間牛奶店叫做”酪”，有好多牛奶選擇，即買即飲，今次揀咗北海道4.0牛奶，好味！

飲完就去搭車，要搭上野東京ライン，我搭咗車落東京轉車，其實蠢咗，因為架車會經過上野，我應該搭相反方向，搭兩個站去上野轉車先啱！依家前後搭左6個站😅，去到東京站，在8號月台搭 9:14  高崎線方向班車，排隊條線係橙色，寫住高崎線嗰條，搭左一個鐘多D，應該要在熊谷站轉車，但我 miss 左落車，唯有搭多一個站去籠原站搭番返轉頭😅 去到熊谷出閘轉秩父線，呢條線班次唔密，最快幾分鐘，最耐半個鐘，視乎你幾點搭，車站有時刻表，東京搭去熊谷車程要65分鐘左右，可以預一預時間。在秩父線熊谷站月台已經有架車等緊客，架火車好靚，仲有幾分鐘先開車，影吓車身先，呢架車冇乜人搭，附近都好郊區 feel ，要搭8個站去深谷花園，用左22分鐘，沿路D車站係好舊嘅，可能因為呢度住宅區，所以人又少，車站又舊，一去到深谷花園站，唔同晒，因為翻新左，成個站又新又靚，仲有好多花束裝飾，離遠已經見到個outlet，我諗好多日本人都係會揸車去，見停車場泊咗好多車，但係火車就得幾條友落車行過去

一入去見到有野食，有間函太郞食壽司的，我之前去過一個 outlet 都食過，麻麻地，隔離有間食鰻魚嘅，去日本一定要食鰻魚，只有日本鰻魚先係最好食，在櫥窗睇咗好多個套餐都想食，最後揀咗白燒．蒲燒鰻魚定食，可以試到兩款鰻魚，份量唔會太多，因為想留返肚陣間飲咖啡！未到 lunch time 大把位，入面全部都係四人枱，當然超過4人可以再拍埋啲枱啦！我就一個人坐咗側邊梳化嘅四人枱，真係唔係幾好意思，不過我都會好快食完走，唔阻住人做生意！呢度係用平板落單，佢圖文並茂，雖然冇英文，但係都可以看圖落單，除咗叫咗定食之外，我再加多一個串燒鰻魚肝，例牌叫杯橙汁！個鰻魚好好味，好感動呀！好耐未食過咁好食嘅鰻魚喇！喺香港食嘅鰻魚，一定係腥嘅，同埋個味係唔同嘅，可能唔係新鮮整嘅關係！頭先落單果陣叫左少飯，依家唔夠食🤣 唔係因為好肚餓，係因為鰻魚送飯係好好食，所以變咗啲飯唔夠食！🤣

食飽就出去行吓，睇過outlet嘅 guide ，商店都唔算好吸引，除非有個人喜好的牌子，可以睇吓官網資料先，否則要考慮是否去，因為都好山長水遠過去！

https://www.premiumoutlets.co.jp/fukayahanazono/

個人認為成田空港附近的酒々井 outlet 都夠做，又近又有啱自己的品牌！我見呢度最高級有 Valentino、Bally ，其他有日本牌子同各大運動品牌， Nike 、Addidas、NB等等，我見大牌子商店係冇客嘅！最多人係食店同賣食物嘅店，例如久世福、Lindt，個 outlet 入面都算多人，D食店好多要排隊，呢度有個小小兒童樂園，有兩款機動遊戲，一個係迷你跳樓機，一個係迷你龜速火車 😅，就在 Starbucks 旁邊，我梗係去 Starbucks 買咖啡飲，一路飲一路睇人玩迷你跳樓機！跟住去久世福買左D食物就走！

搭返秩父線去熊谷站，因為去要去新宿，唔係返東京站，所以在熊谷站轉湘南新宿ライン，啱啱有班特別快速，63分鐘直達新宿，比普通車快7分鐘！長程車又可以眠一眠😴

到左新宿，先去東口睇3D貓貓🐱，現場睇又唔算好3D，有D角度仲覺得佢扁左🤣🤣 行去歌舞技町，以前個百菓園冇左！多左間屋台苑，其實日本人同遊客都好鐘意去屋台，貪佢好氣氛！呢個屋台都好細，見佢都有D客，再行去哥斯拉果邊，人流都幾旺，雖然冇以前咁多人，都有以前七八成人流！

去藥妝店買少少野，然後去南口果邊，去高島屋搵食！尋日食唔到人形町今半，今晚睇吓高島屋分店有冇位，少左遊客嘅高島屋靜左好多！雖然佢翻新左，始終本地人消費都冇遊客咁多，頂樓食肆呢層比較靜，可能未到繁忙時間！去到人形町今半，有大把位！在門口揀定個壽喜燒set，一入坐就叫左個 set 再加支（一合）天覧山嘅純米吟釀，原來一合係一小支，大概都有200ml，一個人飲好似多左D😅，個set 有湯、醃菜、牛肉只有三片！同D配菜，穿著和服的店員幫你燒第一塊，然後就自便🥹，佢另外有一小樽醬油，同一小樽水，比你加落個鍋度，太咸就加水！塊牛肉好好味呀！好滑冇渣！入口即溶！同日山比較的話，呢度好味D，可能人在日本覺得好味D !🤣同埋蛋同飯都唔同嘛！食得好開心！

食飽落去行吓！行過 LC 見又推出 Berry 聖誕系列，自從疫情後 LC 嘅產品已經係全球同步，當然依家滙率低，應該平過香港，不過都冇乜特別新野推出，吸引力大減！行過一個賣健康產品 counter 見有麥蘆卡蜂蜜同一D健康茶，見有支生薑飲，天氣凍買支返去飲吓先，店員送左兩包薰衣草入浴粉比我，啱晒！今晚一於浸吓對腳！🦶🏻🦶🏻頭先見到已經想買，依家有得送就更好！😆跟住店員仲帶我去退稅，我買嘅係食物，竟然可以退稅，退稅 counter 都係得幾個人，好快攪掂，職員話 consumable 產品封左袋唔可以拆就得 👍🏻👍🏻

行行吓聽到廣播話收7:30 （以前好似收8:00）即刻衝去B1超市買生果！今期係提子當造，買左束巨峰，雖然價錢同香港差唔多，但係一定好食D😄 買完野出返去行多陣就走，好攰！太耐冇去旅行，今次好似以前第一次去自由行咁，對腳超攰！要早D休息！

 

闊別三年 - 2022年10-11月東京快閃五天遊 Day 1 銀座

經歷左差不多三年疫情，終於再次出發！

對上一次搭飛機已經係2019年12月，今次早兩星期先至決定，因為未中過 Covid 都擔心旅途中中左唔知幾時先返到香港，睇左網上好多資料，大概知道點處理，加上機票比之前平左，酒店又平左，滙率又跌至新低5.1 ! 雖然機票比2019 年貴左千幾，而酒店平左幾佰，計埋洗費低左，就平過2019 年，當時對7.1 ，所以都係決定去，真係太耐冇出門喇，日本上月放寬自由行已經想去，但當時返港要酒店隔離7日，依家一話0+3，可以返工，個個都蠢蠢欲動，好多朋友都話要去旅行，趁未全面通關，應該唔太多人吧！就去一轉睇吓點！

事前準備，要下載日本的 MySOS app （11月14日後就唔使用呢個App，改用 web site 登記），預早幾日在 App 填資料先，要上載 passport，等幾分鐘之後App 會通知你成功與否，在網上見好多人話 upload 唔到，可能唔知要等陣轉頭先知，唔係即刻知！收到通知後再 upload 針紙，有個位要填之前有冇住過其他地方，果度有三格，我填晒香港又過得到！今次等耐D，因為話係人手 check，大概半小時先收到 app通知成功，個 App會由紅色畫面轉左做綠色，之後我冇理佢，隔左一日睇佢又變咗藍色，正常係要藍色先啱嘅🤣

買左香港航空，9:15 am機，一早5點幾去等機場巴士，巴士都差唔多full ，比想像多人，去到機場心情嘅興奮又緊張！尋晚已經失眠冇瞓過🤦🏻‍♀️，想快D上機瞓吓！機場嘅人都唔少，當然都比以前少左好多！航班告示牌以前係滿滿的，現在只用了一半，行去 K 段做自助登機，然後去寄艙行李，航空公司職員問我有冇 download MySOS app，我話有，佢叫我 show 比佢睇係咪已經轉左藍色，攪掂晒就過關，北面關閘冇開，去晒南面關閘，依家轉左自助過關，scan passport ，然後要除一除口罩做人面辨識，唔使再對boarding pass 同passport ，好方便，過X-ray 同以前差不多時間，因為少左北面關閘，集中晒D人在呢邊，所以好似幾多人！整體來講全程比以前要用多小小時間，係寄艙果度用多左時間，等左半個鐘，過X-ray 都係10分鐘！

今次見機場十室九空，幾乎全部店冇開或執左，食店只有老麥同美心果間 Canteen，飲品只有蛋撻皇同Bless，都有D小食賣，我就買左支水！今次登機閘口好近，26號閘之後的範圍，有入冇出，唔可以出返去！未夠鐘上機時行去40 號閘口睇吓，以前個 Premium lounge 改左做 Sapphire lounge，唔知係咪第二間公司，見佢雖然有開但冇乜人，我諗唔係以前果間！anyway 唔夠時間食，都冇入去問😅

登機亦都自動化，只需要人面辨識，唔使 passport 同登機証！好方便！好快可以上機，今次坐45行，剛剛好在機翼旁，只睇到少少風景，尋晚冇瞓過，所以上機一陣就瞓左，跟住派餐派到我旁邊就醒咗，已經飛左一個小時，飛機餐只有一個沙嗲牛肉包，同一支水！今朝冇食野，頂住先，食完又瞓，中間醒過一次，仲有半小時到埗就廣播，好快到左成田！

真係久別重逢！過關程序，有好多工作人員沿路指示，首先要展示 MySOS 內的 QR code ，為免有D人未換 sim 咭未有網絡，會指示旅客有邊個 free wifi 可使用，因為要上到網先可以開到個 QR code ，工作人員會根據唔同色 MySOS 分流旅客，呢個位置應該係由餐廳臨時改做檢查站，有好多枱櫈放埋一邊，個格局都係餐廳咁！然後埋 counter 比兩張紙，一張藍色代表核對藍碼已完成，呢張藍色紙揸住去出口會收返，所以只係揸住幾秒就要比返佢 😂 另一張米白色紙，係教你如果在日本中左 Covid 點做，上面有個 QR code ，可真接上日本厚生省的中文網頁 ：https://www.c19.mhlw.go.jp/covid-19-ct.html
完成後，就跟正常過關程序，一樣要填兩張紙，頭先飛機上面空姐冇派話唔使填，但原來都係要！跟住影相打指模同以前一樣，由落機到過埋海關，全程23分鐘，比想像中快！跟住取行李，今次要等行李，唔係行李等人！等左7分鐘先攞到行李，跟住有海關人員帶住緝毒犬聞吓你件行李，然後去check 行李出關，關員都冇叫你打開行李，以前有張枱比你打開行李，依家冇晒枱，我諗疫情關係都唔使打開你D野比人睇🤣

一出閘好冷清 😅冇乜人接機，直接落去火車站，見機場依家有D好似電話亭物體，原來係一D臨時工作間，又幾好諗頭，如果突然間要開個 zoom meeting或者處理一下D文件，甚至匿埋休息一陣，就可以租呢個工作間，入面有Wi-Fi，而佢價錢係每15分鐘收 ￥275，都唔貴！

買 NEX 去東京站，未夠鐘，先去 Starbucks 買杯咖啡同買件 cinnamon roll 醫肚，原本諗住仲有半個鐘可以坐低食，但係攪左15分鐘，所以都係拎走上火車食！撘一個鐘到東京，再轉山手線兩個站去秋葉原 ！

今次住秋葉原的 JR-East Hotel METS ，就在秋葉原電器街出口，一出站就係酒店，超方便！酒店好新淨，應該開左冇幾耐！上2樓reception ，自助 check in ，我入名 search 唔到，入訂單號碼又search 唔到，就救求，有職員視像對話，其實現場都有職員協助，原來可以 scan passport ，應該一早scan passport 方便D ! 酒店最高係9樓，我住四樓，咁近火車站都驚嘈，但係又冇喎！隔音好好，好靜！放低野就出去行吓喇！出酒店時都差唔多6點了！

在附近行左一圈，跟住撘車落去有樂町，去銀座行左一陣，原本想食壽喜燒，但係 full 左，冇得食！去附近睇吓有乜嘢食，求其見到有間食串燒就入去試吓！呢間叫做銀座 じゃのめ Ginza Janome的居酒居，店內只有兩枱客，我叫左幾款串燒，同一碗迷你海膽丼，另外一杯梅酒，店員識講國語，落單就方便好多，食物質素一般，串燒偏咸左D，而且好燶！梅酒好淡味！

食飽行多陣，去左 Uniqlo ，呢間 Uniqlo 有12層，我買左兩件衫一條褲，香港唔知有冇，買左先！跟住返酒店，好累！要早D瞓😴😴

太古集團 信望香港 信望未來

今日去太古城，處理先人嘅強積金戶口，搞掂之後去商場行吓，見到太古集團做緊一個展覽，免費入場就即管入去睇吓，裏面主要介紹佢哋喺香港嘅歷史，除咗國泰航空同埋船運之外，最出名當然係可口可樂，同埋太古砂糖啦！入邊展出咗好多好舊嘅可樂產品，展出咗好多好舊嘅可樂產品，又有幾個影相位，影完張合成照片，仲可以download 返落嚟，又可樂罐錢罌賣，又有D免費襟章比人攞，得閒入去玩吓都唔錯，好彩今日冇乜人，佢呢度仲有個小型機艙，俾你感受下坐 Business class 嘅感覺，仲有職員可以幫你影相 🤣🤣

 

飯局作客 - 生日海鮮宴

又係生日飯局，今次去好友屋企食海鮮打邊爐，好友一早買晒野，洗乾淨晒等我哋到，差唔多人齊就已經可以開始食，海鮮就用蒸爐蒸，因為好友個火鍋冇蒸格，今晚有象拔蚌仔、韓國大蜆、蝦、藍蟹、牛肉、丸、雲吞、水餃、響鈴、生菜同豆苗，好豐富！韓國大蜆好大隻，不過好多沙，其他海鮮都好新鮮，食到非常之飽，當然唔少得生日蛋糕啦， 好友喺美麗華酒店嗰間Coco 訂咗個蘋果蛋糕，佢話餅店每日只係做一個，所以要提早訂，呢間Coco 我好耐之前去過，佢D蛋糕水準都唔錯，個個都話個蛋糕好食！

食完飯大家喺度傾偈，講開去旅行，我哋呢一group人講咗好多次話一齊去旅行，但係都咁多年都冇去過！今次大家落實出年一定要去，但係一個好友佢已經約咗人，出年2、4、9月都要去旅行，而另一個好友因為要就佢個女放暑假，想8月去，另一好友想5月去……….人數一多，就係會有呢個問題 🤦🏻‍♀️

走嗰陣坐好有㗎新車 Tesla，佢送我返屋企，架車好靚，佢個女喺架車度大展歌喉，唱我最鍾意嘅 A whole new world 呢個小公主好攪笑 😍😍🤣🤣