Pondside Cafe·Restaurant •Bar

大廈又要做強檢，今日出街先去做咗檢測先，跟住過中環睇醫生，因為約咗今日驗血同埋照超聲波，搞掂晒就落咗去金鐘，因為想去呢間餐廳試吓！

餐廳位於香港公園內，由太古廣場行上去都好近，我都係第一次去香港公園，唔知呢間餐廳開咗幾耐，不過最近有報道介紹，現場睇店裏面都有D新，外面就唔係好新，可能裝修嘅時候只係裝修到D窗，D石屎位翻新唔到，因為個餐廳在池邊，我諗外牆要翻新都有D困難，可能要好大工程，呢間餐廳嘅最大賣點就係個水池，由餐廳望出去睇到個小瀑布，同埋個水池，其實水池度有好多烏龜，不過唔近餐廳呢邊 😅 可能有報道介紹過，都全場滿座，要等位，見餐廳有一半位望到水池，另一半就睇唔到，見到有D情侶都係想等池邊位，店員好生手，見有幾張枱寫住Reserved，但係由頭到尾都冇人坐，本來係唔需要等位，就係因為有幾張枱hold 起咗，先至要等，不過都好快有位，我坐個位啱啱好望住個池，可以影下相！

食物方便，餐牌只有3 course 午餐，價錢都唔平，頭盤我揀咗蕃茄湯，佢跟咗一小塊意大利包，配橄欖油同醋，主菜揀咗香煎豬扒配黃梅紅酒汁意大利粉，飲品就要咗杯凍咖啡，因為要 Latte ，仲要加錢，同埋轉燕麥奶，都要加錢 😅，豬扒雖然有D乾，不過味道唔錯，意粉就係我喜歡嘅Al dente 😆 個汁都好味！咖啡都好好飲，唔錯唔錯！

YOI Coffee & Bakery

晏晝突然間又落雨，而且雨勢都幾大， 去九龍城食D嘢，上網search下，見到呢間新開嘅coffee shop，可能因為落雨，店入面唔係好多人，大概只有三四枱客，全店大概有30個位左右，餐牌都好簡單，主要都係吐司麵包之類，我叫咗個慢煮嫩雞胸羅勒醬三文治配火箭菜，同埋甜品 Religieuse à la Pistache 開心果修女泡芙，另外叫咗杯咖啡，三文治嘅麵包係用意大利香草麵包，好食！份量都幾大，食完都好飽！好彩個甜品好細件，佢個外形好似個壺蘆咁，係兩個泡芙疊埋一齊，裏面係開心果Mousse，再加啲開心果碎，近來都好少食甜品，呢個唔太甜，好好味！呢度D咖啡都好好飲，下次再試吓其他嘢食！

 

明日戰記 Warriors of future

 

在未來的世界，地球受到嚴重嘅污染，人類要興建天幕去解決問題，同時有一種巨型植物在地球迅速生長造成破壞，同時佢亦都能夠淨化空氣，人類稱佢為潘朵拉，科學家發明左一種藥物，可以抑制潘朵拉嘅生長，減低佢造成嘅破壞，同時仍然能夠保持到佢淨化空氣嘅作用，B16 區派出空軍執行任務，尋找潘朵拉嘅母體，再注入藥物，必須在下一場大雨之前完成任務⋯⋯！

睇呢套戲純粹係為咗捧香港電影場，之前睇預告，大概都知道故事講乜嘢，呢一類科幻片嘅劇情都係大同小異，值得人關注嘅係佢嘅電腦特技，香港嘅技術向荷李活大製作水準邁前一大步，製作水準都好高，雖然故事比較單薄，演員亦都係只有幾個，不過睇得出製作認真，花咗好多心機，好值得大家去捧場 💪🏻💪🏻💪🏻💪🏻

Starting over

今日去中環複診，睇完醫生上去士丹頓街，本來諗住想去食pizza，但係去到Pizza店，睇吓個餐牌，見到Pizza都係一個個咁order ，冇一件件🍕咁樣 order ，所以冇食到，因為一個人食唔到成個Pizza 😅，行過少少見到有間 coffee shop，個樣似係新開，因為好新淨，藍白色嘅裝修好靚，門口仲擺咗個舊式電話做裝飾，餐廳嘅玻璃窗仲可以望到大館，入去試一試佢先！

叫咗一個素嘅意粉，蘆筍黑松露意粉，另外叫咗杯咖啡☕️，本來唔想飲咖啡，因為今朝喺屋企自己沖咗咖啡飲，但係又冇其他飲品選擇，最後都係飲咖啡，不過呢度嘅咖啡真係幾好飲，有少少衝動想買包咖啡粉返去試，但係屋企仲有好多咖啡粉同埋Capsule，所以都係遲啲先！😆

 

Paul’s kitchen

上次去好友屋企食飯嘅時候，好友介紹呢間餐廳，話啲嘢好好食，同埋佢係食非洲菜，因為未食過非洲菜，所以想試吓，不過我都好疑惑，非洲菜真係好食咩？我哋訂咗枱，今晚就去試！

餐廳在重慶大廈裏面，入門口，就有一大班印度人遞傳單俾你，叫你試印度菜，你只要話俾佢聽你要去呢間餐廳，佢哋都唔會阻攔你，甚至會話俾你聽點樣去，一入重慶大廈一路直行，見到右手邊有條黑色嘅樓梯，行上一層，第一個路口轉右，行到尾就見，餐廳好新淨，唔知係新開定係新裝修，個格局好似西餐廳，睇吓個餐牌，食物嘅選擇都幾多，好友食過佢嘅炸魚話好好食，見到餐牌寫住炸魚係用鯽魚， 好友話佢個燒春雞都好食，不過我哋今次冇叫，為叫咗非洲辣王雞煲配烤餅，另外仲叫咗沙律配軟殼蟹、加納XO醬燒茄子、炸魚墨西哥薄餅、墨西哥夾餅配燒牛肉，飲品佢哋就叫咗非洲加納朱古力，個朱古力好香滑，味道好濃，真係好飲，我就叫咗巴基斯坦芒果汁，又甜又好味！最後叫左紅絲絨蛋糕，味道唔錯，不過好漏，我哋食得好飽，所以四個人share一件都食唔晒！😆😆😆😆

食物係好食嘅，不過感覺上佢唔係好正宗非洲菜，嚴格來講可能係用非洲嘅配料，加入去港式嘅菜式度 cross over ，如果係正宗嘅非洲菜，未必係啱香港人嘅口味都唔定，總之好食就得，一定會再幫襯！不過要留意一樣嘢好重要，就係佢個廁所，好恐怖！因為廁所係商場嘅廁所，又殘又舊又污糟，D門仲要冇鎖，出面有好多黑人同埋印巴藉男士，你都咪話唔驚！不過呢度個廁所唔關餐廳事，餐廳本身係好新淨，係個商場太舊，所以個廁所都好核突，所以建議先去iSquare借廁所，去完先至好嚟食嘢，食完想去廁所都係去返iSquare！😅

 

麵屋丸京

今日去深水埗試吓呢間拉麵店，因為近排都幾Hit，聽講話都排晒隊，見佢3:00落場， 2:00去睇吓多唔多人，店子在荔枝角道大馬路上，離遠已經見到有條隊，前面大約有九個人，店入面嘅座位大約有20個左右，有幾個吧枱位，三張二人枱，同兩張四人枱，排咗大約35分鐘就可以入座，排隊嘅時候店員已經派咗一張點餐紙，好多嘢都話賣晒，四款湯底得返兩款，拉麵有五款，最想試嘅一款又話冇晒，另外期間限定果D又話暫停供應，小食連餃子都冇！得返炸雞，在冇乜選擇嘅情況之下，叫咗招牌嘅丸京拉麵，同埋飲品！

拉麵🍜有三塊叉燒同三塊真叉燒，有味玉同埋筍，另外加咗紫菜，湯底嘅味道幾好，麵都唔錯，兩款叉燒我唔係好分到個分別，不過都好食，整體來講唔錯，如果唔係咁多人排隊可以多D嚟食 👍🏻👍🏻

 

飯局作客 - 魚蝦蟹

又去好友屋企食飯，上次食羊架食過返尋味，今次再買，仲買埋魚🐟蝦🦐蟹🦀鮑魚，好味！另外仲買左西瓜🍉！不過好友切西瓜嘅時候唔記得洗下個砧板，因為個砧板頭先切完蔥，令到D西瓜🍉都有少少蔥味，好搞笑 😆

食完飯喺度傾偈，約定下星期去尖沙咀食飯，因為近期都成日係自己煮，有一排冇出街食，所以想出去食飯！訂定枱先！

 

阿媽有咗第二個 Mama’s Affairs

 美鳯姐以前係金牌經理人，後來生咗個仔之後，就專心做家庭主婦，而家個仔就快入大學，佢都變得好清閑，又想搵啲嘢做吓，就去朋友嘅音樂教室果度做，識咗D年輕人，當中一個外賣仔方晴，好鍾意唱歌跳舞，美鳳姐都覺得佢好有潛質，於是決定捧佢做歌手，而方晴亦不負所望，不過方晴佢自己都有自己屋企嘅問題，就好似美鳳姐一樣，佢同丈夫、兒子嘅關係，都有要解決嘅問題⋯⋯！

套戲都幾好睇，有D場口都好感人，有時每個家庭都有佢嘅問題，社會上有好多人都得唔到家庭溫暖，好多年輕人都唔識得珍惜自己擁有嘅嘢，有時要有D歷練先至知道自己有幾幸福！

IKEA 尖沙咀

睇完戲行去舊嘅K11商場行吓，前幾日開咗間 IKEA ，咁就順便過去睇吓，地鐵通道一行入嚟就見到，應該係全港最細間嘅IKEA 😅，但係買嘢食嗰個位就好大，而且超級多人，買傢俬嘅位置好細，呢度都好多嘢食賣，我就冇嘢啱，所以都冇幫襯，雖然見到個鯊魚包好得意，但係太多人喇！所以冇買到！下次冇咁多人先至買來試吓！

 

殺手列車 Bullet train

Ladybug 接左 order ，要在日本的一列子彈火車上取一個公事包，看似簡單的任務，很容易取得公事包，但列車上，尚有其他人為此公事包而來，有日本前黑幫成員的兒子，因兒子被推落樓而被誘騙到火車上尋找兇手，而兇手亦為公事包而來，尚有帶公事包上車的一對兄弟殺手，另外有為報復來的男人，及為咗取酬勞而來嘅女殺手，一切行動都在火車上發生……..！

好耐冇去 K11Musea 睇戲，今日先去多賀野食碗沾麵先去睇戲，套戲一般啦！其實睇 trailer 都大概知道套戲講乜，劇情發展都係意料之內，Brat Pitt 近年都少有佳作，Channing Tatum 驚喜客串，又有死侍張相客串😅，都係得啖笑！

 

飯局作客 - 自己釣的魚仔

又去好友屋企食飯，佢哋釣左D魚仔，今晚蒸埋佢，另外買咗羊架，仲有茄汁蝦碌，同埋榨菜蒸牛肉，簡簡單單食一餐，始終都係自己煮係最平靚正！
今日仲買咗日本赤肉蜜瓜，好甜好多汁！

 

Party room

 

都有成年冇同呢 group 好友食飯，今日相約一齊去另一好友嘅party Room，地點在葵興，我哋先喺地鐵站附近買少少零食同飲品，然後上去等好友，呢個party Room地方唔係好大，但個感覺好住家feel，好似間兩房兩廳嘅單位咁，有得唱K、打機、玩狼人、麻雀、啤牌、board game 等等，好友兩個仔可以玩餐飽！我哋玩咗兩個幾鐘好友先到，跟住叫外賣食，又等咗個幾鐘，搞到成10點先有得食！

The Uniek

有一陣子冇去南豐紗廠，今日過去食個晏，見到呢間餐廳係應該開咗冇幾耐，上次都唔係呢個店名！

呢度主要都係食西餐，店嘅位置好細，只有幾張枱，因為有半個舖位係做零售，所以得半間鋪做餐廳，我叫咗個法式油封鴨髀，味道都唔錯，另外叫咗杯咖啡，咖啡就一般啦！