東鐵過海線通車 - 會展站

會展站今日通車啦！一於去湊下熱鬧！

由九龍塘站上車，先去咗金鐘站，行一個圈，而家金鐘站有條好長嘅扶手電梯上返去出閘，又喺度影吓相，原本想去金鐘食少少嘢，但係冇乜嘢啱食，所以再搭返地鐵去會展站，月台上面人頭湧湧，因為好多人喺度影相，因為呢度有個戰時炸彈擺咗喺度俾人睇，個炸彈係喺地鐵站嘅時候發現嘅，而家當然係得個殻擺響度，另外牆上面有一D舊火車站相片，例如馬料水、大埔滘，影完相出去行吓，行去會展食D嘢先，食完嘢再去灣仔碼頭果邊，呢度原來有個海濱公園，而且都幾靚，喺度影咗一陣相先至走！

 

M+ 博物館

M+ 博物館開咗應該有幾個月，預約咗今日去，食完飯之後，就準備入場，正門入口都係一個打卡位，門口有一啲好大嘅燈，正面對面仲有一D老店嘅光管招牌，入場嘅時候只需要出示預約QR code，在入場果層有一個展館，呢個展館好多人排隊，因為有人流管制，呢度而家展示緊一D泥公仔，密密麻麻擺晒成個場館，真係有少少密集恐懼 😅，其餘嘅展館都要上一層！

上一層有好幾個展館，呢度有幾個打卡位，第一個係廁所門口等候區，另外就係一條旋轉樓梯，條樓梯係冇得上去嘅，唔知係咪仲有一層未開定點？好多人都喺樓梯下面打卡影相，每個展館嘅門口都有講展館係做緊啲乜嘢展覽，我冇好詳細咁睇，直接走入展館參觀，有一個展館係講以前嘅香港，有好多舊嘅物件同埋相片，另一個展館就係一啲比較美術性質高啲嘅展品，即係唔係咁多人識欣賞嘅嘢 😅😅 仲有D展館係展示一D畫作、藝術擺設等等，又有互動區，又有小朋友玩嘅地方，我諗最特別嘅展品，應該係將日本一間壽司店重新裝咗響展館入面，呢度要排隊入去，每人只係可以有幾分鐘時間影相，我都情願輪流排隊入去，好過成班人迫晒入去，不過只可以睇，唔可以掂入面嘅嘢！😅😅 

睇完呢度又落返去地面果層，呢度有一間商店，不過唔係好多嘢賣，呢度應該仲有一間影院，好似仲未開， 另一個半露天劇院，就播放緊一D影片，如果行到攰都可以喺度坐下睇吓片！

我哋睇咗兩個半鐘，就走喇！出返去旺角食杯野，下一陣食埋飯就返屋企！

 

Add+

之前預約咗今日去M+博物館，我哋提早一個鐘去到，當然係為咗食飯啦！😄 我冇上網睇到M+嘅資料，不過我相信佢點都會有食肆，就算博物館入面冇，我知道西九呢個公園都有餐廳，因為之前都去過，博物館入面除咗呢間餐廳，見到仲有一間咖啡店，呢間餐廳都幾大，我哋12點去到就有好多位， 餐牌嘅食物選擇都唔少，我哋叫咗 set lunch，前菜有煙鴨胸同埋柚子鮮蝦沙律，主菜有烤豬腩肉，同埋煎雞扒，另外仲叫咗一籠叉燒包，食乜都OK，不過D店員比較新，上菜又慢，過咗12:30開始多人，所以有少少亂！食完飯走嗰陣已經見到門口出邊排晒隊，好彩早D過嚟 ！😅

 

奇異博士2 失控多元宇宙 Doctor Strange in the Multiverse of Madness

Dr. Strange 前往參加前女友  Christine 的婚禮，婚禮期間，街上一輛巴士突然飛起並被破壞，Dr. Strange 令一隻異次元怪物出現，怪物正在追殺一個少女，這個叫做 America 的少女曾經在他的夢中出現。救了 America 之後，她向二人解釋那些怪物，追殺她的目的，是為了獲得她能穿越多重宇宙的能力，Dr.Strange 因看到怪物身上的符文而想起了緋紅女巫Wanda ，並前往找她，希望她能幫助保護 America。但發現原來Wanda 才是怪物出現的罪魁禍首…….!

今次和好友一齊睇，睇戲前去咗朗豪坊食飯，去咗 Pizza Maru ，食咗pizza，食飽先去睇戲，套戲都幾好睇，係長咗D，同埋要好留心睇，因為佢多元宇宙轉來轉去，有D位都唔係太明！😅

 

I’s corner

之前搭車經過呢度幾次，見到呢間Cafe，都想試一試，今日去到竟然一個客都冇！

我叫咗一個漢堡包，同埋一杯咖啡，味道一般，不過不失！

食完嘢行返出大街，之前經過見到有間舖頭，冇開門但係個門口幾靚，只係唔知佢係乜嘢舖頭，不過應該唔係零售商店，今日行過見到佢有開，原來係一個攀石場，最近對攀石有少少興趣，有機會再睇吓去唔去試吓玩！

會所一號（科學園）

表弟結婚了，第一次在疫情下去參加婚禮，即係話呢兩年幾以來都冇朋友結婚，上次見呢個表弟，大概已經係七八年前佢爸爸嘅喪禮，嗰陣時佢大約20出頭，眨吓眼佢已經成家立室！

未去過科學園呢度飲宴，疫情下，個大堂用透明版隔開好多個細房咁，然後每個房只可廿人，大約兩三張枱，啱啱好今日放寬咗一枱可以坐八個人，原本要四個人一張枱，而家就可以坐多幾個，同枱仲有另外兩個表弟，枱面嘅回禮係冰糖燉檸檬，正呀！好過送朱古力或者糖果👍🏻 

因為疫情嘅關係上菜都係一份份，我覺得份量比較少，而且食物嘅質素好一般 ！飲宴完畢之後，有旅遊巴接送去大學站，好貼心嘅服務，我就唔跟屋企人車，搭接駁旅遊巴去轉地鐵返屋企 🚇

 

蝙蝠俠 The Batman (2022 年版本）

市長在家中被殺害，現場留下一些指控他説謊提示。蝙蝠俠在高譚市出沒兩年，在相熟的警督要求下首次跟高譚市警察局合作，在現場觀察，找出謎語人在現場為蝙蝠俠留下的訊息。蝙蝠俠用高科技隱形眼鏡錄下所見證據後，返回自己的家作進一步調查。蝙蝠俠找到謎語人在車中留下的 hard disk ，裡面有數張市長和一名叫Annika 出入 Iceberg lounge 的照片。蝙蝠俠衝入 Iceberg lounge 找企鵝人，他注意到女侍應 Selina，與Annika 同住，更發現她同是一名竊賊貓女郎⋯⋯

套戲唔算好好睇，如果你諗住好似一般英雄片咁樣好多特技，就可能令你失望，因為佢偏向查案嘅片種，鍾意睇查案劇情的話就會覺得幾好，好耐唔見佢有拍戲嘅男主角，演技上都冇咩突破，好似擺脫唔到吸血新世紀個樣 😅

 

PAN de PAIN

今晩約左好友去睇戲，晏晝先去食個lunch，呢間餐廳我唔記得有冇去過，淨係記得之前成日都好多人等位，今日就冇人喇！唔使等位，大把位！

睇吓個餐牌，有all day Breakfast、pancake🥞、French toast，好友就叫咗個All day Breakfast，我就叫咗個 French toast ，唔少得飲番杯咖啡！☕️食物都唔錯，咖啡相對來講就普普通通！😅

食完嘢仲有時間，我哋就去咗 AME Stadium 玩，我同ho有覺玩咗一次滑雪板🏂，然後一齊玩划艇🚣‍♀️🚣🏻‍♀️，不過划艇好難控制，唔係用力就得，都要D技巧，而且個槳唔係好受控制，所以划來划去都掂唔補品 🤦🏻‍♀️

好快玩咗一個鐘，就準備去睇戲喇！

飯局作客 - 油蟹

限聚令放寬咗，又係飯局嘅開始，今晚去好友屋企食飯，佢哋一早買咗海鮮，我收工上去就有得食，佢哋買左一隻長腳蟹🦀(油蟹)、蝦🦐、粉絲蒜蓉蒸扇貝、粉絲蒜蓉蒸蟶子，再用埋蒸蟹D汁，灼埋D菜！雖然好似唔係好多嘢食，但係都食得好飽！