方太糕品舖

我哋食完飯，諗住分頭走，其中一個話要去佐敦買芝麻卷俾老婆食，大家都好好奇，點解要特登去買，佢話好好食，於是成班都話去買來試，一齊行過去佐敦，小店位於上海街，跟住佐敦果邊，好友話佢地好多時好快賣晒，今晚都算好彩，店主方太話啱啱整多咗10條，我哋六個人買咗五條，我同其中一個好友share一條，一條大概切到六件，另外見到有好多砵仔糕，大家又一人買咗一兩件返去，芝麻卷都好香芝麻味，砵仔糕嘅紅豆都好多，都幾好食😋

 

又記小廚

今日同一班舊同事食飯，去咗呢間小菜館，我哋坐樓上，因為我哋有六個人，樓下嘅枱好細張，所以要坐樓上，但係樓上幾張大枱都係地盤佬，有一枱又煙🚬又啤牌🃏賭錢，都有D污煙漳氣🤦🏻‍♀️

我地主要係食羊腩煲，我覺得呢度D羊腩煲普普通通，唔特別出色，食完羊腩煲我哋就打邊爐，都係一般火鍋店嘅質素，不過老實說價錢真係平！以價錢來講都真係好抵食！👍🏻

 

潮興

同好友約食飯約左幾次都約唔到，今日終於約到，去打冷，呢度好熱鬧，我地坐室外，差D唔記得掃安心出行 😅 我哋叫咗蠔餅、炒蜆同埋炒咗碟菜，因為得兩個人，加上好友冇乜食力，所以三樣嘢都好夠食！

之前買左個 Mario 星星⭐️爆谷🍿桶比好友，所以佢話要請返我食飯😆

 

飯局作客 - 橫頭磡邨

好友J生日，去佢契媽屋企食飯，我都係第一次去佢契媽屋企，佢契媽一早買定晒餸，喺廚房洗洗切切，等我哋上嚟，佢買咗勁多嘢食，海鮮有好大隻蝦、東星班、鮑魚、扇貝、象仔蚌、脆肉腩、牛肉、各類丸同餃！果然係同佢哋嘅預期一樣，勁大份量嘅食物！我哋有幫手切蒜頭辣椒芫荽蔥！溶咗好大個鑊做湯鍋！好勁！食到超級飽！海鮮都好靚好新鮮！正！

 

Preface

時代廣場旁邊，開咗呢間新嘅咖啡店，外表好吸引，簡潔嘅裝修，而且樓高有幾層，今日就約咗好友食lunch，我先上去搵位，我仲諗住會好多人，點知去到都即刻有位，不過食物嘅選擇就真係唔多，因為咖啡店好多時都主要係得麵包糕點沙律之類，我叫咗個沙律食住等朋友，我send咗個餐牌比佢哋睇，佢哋覺得冇乜嘢食，於是過嚟搵埋我，三個人食一個沙律，滾水淥腳咁食咗佢！然後一齊轉場！🤣🤣🤣

跟住去咗時代廣場地牢City Super食嘢，因為好友有coupon，我哋用咗五張coupon，等於半價，好抵！

 

梅艷芳 Anita Mui

小時候的梅艷芳，和姊妹在荔園唱歌表演，長大後，一起參加了新秀歌唱大賽，可惜姊姊未能入圍，妹妹就成功入圍，兼且取得第一名，受到唱片公司嘅力捧，認識了設計師劉培基，從此合作無間，而初出道的梅艷芳，認識了仍未大紅的張國榮，兩人成為了好友，更相約將來可以在紅館開演唱會時，互相做對方的嘉賓…….！

呢套戲嘅宣傳做咗好耐，除咗老一輩嘅人認識佢之外，好多年輕人都好有興趣去睇吓呢套戲，因為想知道佢係一個乜嘢人，如果係唔認識梅艷芳嘅人，睇呢套戲就未必感受到佢當其時走紅嘅程度，其實係現時冇一個歌手能夠做到，好似佢咁歌影視三棲，而且仲要好好成績！可惜掌摑事件，改變左佢嘅人生！至於套戲講佢感情嘅生活，大家都係睇傳聞，都唔知真定假，不過佢同日藉歌手嘅戀情，好多人都覺得與事實不符，因為果個日藉男歌手出咗名係揸男，戲入面卻一往情深🤷🏻‍♀️

 

Glasshouse

今日要去中環睇戲，先去食個lunch，去咗呢間 IFC 分店，之前去過佢銅鑼灣 Times 同埋K11 Musea 分店，我覺得最好食都係K11 ，呢間嘅食物質素就冇咁好，不過都OK，係K11好食D 😅 我哋匆匆忙忙叫咗意粉同埋飯，另外一碟芥蘭苗，兩杯飲品，芥蘭苗都唔係苗，而且都幾老，意粉仲有幾好食，嗱嗱聲食完就走，因為仲要趕睇戲！

 

嚐囍

好友生日，佢因為過幾日要入醫院做手術，所以想食餐好D，因為之後都可能要戒口，休息成個月，雖然唔係一D好嚴重嘅病，但係都係主要器官🫁開刀，希望佢順順利利，早日康復！💪🏻

再去西環呢度食，都幾年冇再嚟過，見到門口都係好多人等位，雖然訂左位都要等，見到個門面應該裝修過，因為以前個招牌係紅色嘅，而家變咗金色，裏面嘅裝修同原本冇乜太大分別，睇落係新淨左，但係格局都係有D逼夾！等咗半個鐘就有位，我哋好想食臘腸卷，但係佢已經冇做臘腸卷！冇得食😅我哋叫咗幾個煲仔飯，同埋小菜，都保持到個水準，好好味，最後梗係要切埋個蛋糕啦！

 

永恆族 Eternals

幾千年來永恆族一直都幫助人類，抵抗變異族的入侵，但不能干涉人類的發展，或介入人類的爭鬥。直到現代，Arishem 主宰永恆族，而一直與他溝通的Ajak死去後，她將與 Arishem 溝通的能力傳給 Sersi ，Sersi 了解永恆族的主要任務，其實並不是對付變異族，而是協助準備大崛起。但永恆族與人類的相處幾千年，Sersi 決定違背 Arishem 的意願，可是男友 Ikaris突然揭露自己由此至終均支持大崛起，才誘騙 Sersi 等人前往變異族的領地…….!

套戲角色較多，都幾難記得故事詳細內容，中間有少少悶😅

 

仁芝初

 

睇完醫生，出去旺角，而家女人街兩邊嘅舖頭，都因為女人街嘅檔口少咗，容易俾人見到，今日就見到呢間甜品店，唔知係咪新開，之前好似唔覺眼，又入去試吓，呢度主要係賣中式甜品，座位亦都唔係好多，試咗湯圓，同埋綠豆沙，味道OK啦！👌🏻

 

Cosha

今日去中環睇醫生，先去食個早餐，去咗呢一間coffee shop，在伊利近街，個位置有少少癖，雖然差唔多一點鐘，但係一個客都冇 😅 中環區lunch hour都冇生意嘅話，應該好難維持落去！我要

我叫咗一個UFO，其實係半個牛油果🥑，上面有蛋黃，下面係沙律🥗，另外叫咗杯咖啡，食物都唔錯，咖啡都OK ☕️

桂月

最近都少咗去太子深水埗果邊飲咖啡，今日又過去搵食，行行吓見到呢間，應該開咗冇幾耐，又入去試吓！

店入面只有兩檯客，食物嘅選擇唔係好多，叫咗個蜜糖雞翼，同埋班尼迪蛋三文魚鬆餅，飲品就叫咗洛神花青瓜水，因為今日晏咗少少，所以唔飲咖啡！😅食物不過不失，店員都好招呼，亦都有問你意見，有誠意做好，不過店入面裝修唔夠打咭able 😂 冇乜特色，呢度附近競爭咁大，真係要有返D特色先至得！