香江花月

好耐冇同呢一班好友食飯啦，上次已經係12月初嘅時候，今次約出嚟食飯，一定要搵間正嘢食下啦，喺網上搵到呢間火鍋店，聽講話店主豪花二千萬裝修，睇相見到D裝修好靚，所以就去試一試佢！

我哋訂咗枱6:30 pm，最早嘅時段，所以去到冇乜客，店員都好熱情招待，仲叫我哋周圍影吓相，我哋梗係去影佢果個”偽 Team lab” 😆 其實佢係一間房，裏面擺咗好多圓形嘅裝飾，而且有好多塊鏡，加埋燈光效果，真係有D似日本嘅 Team lab ，只不過地方係細好多，除咗呢個偽 Team lab 之外，店入面有好多古董擺設，所謂嘅古董係一D幾十年前嘅舊嘢，例如人手撥號嘅電話、舊式電視機等等，店入面嘅裝修真係好靚，睇得出用料係唔錯，而且地方都幾大，仲有兩間房， 部分卡位亦都非常之寬敞！所以我哋狂影相！😂😂

影完一輪坐低就先來個welcome drink ，係荔枝特飲，小小嘅杯入面有一粒荔枝肉，飲完見個杯底有條立體魚，幾得意，之前在某間日本餐館都見過，跟住睇吓個餐牌，餐牌一樣係好靚，其中個日本牛乳鍋，有兩朵用牛乳湯做的白色花🌹在鍋中間，非常之靚，平時食火鍋好少會揀牛乳湯底，因為覺得牛乳同火鍋好似唔係好夾，但係為咗呢個咁靚嘅火鍋湯底，就即管試一試佢！個湯底其實係剛剛開始食嘅時候，有少少奶味滑身D，跟住D湯吸左肉味就完全冇晒奶味，味道同普通湯底差唔多，另外佢仲有一個牛肉拼盤香江拼，放在一個圓形嘅盤上，剛剛好套喺個火鍋嘅邊，拼埋個火鍋一齊好靚😍😍😍😍，基本上枱枱都會叫呢個，一來食得火鍋嘅多數都會食牛肉，二來配埋一齊真係好靚！佢先上咗個火鍋同埋個牛肉俾我哋先，可能都知個個客都要影一輪相，我哋當然唔客氣啦，連平時冇乜影相嘅男士們都影埋一份！😆😆

除咗牛肉我哋仲叫咗半隻雞、響鈴、脆骨腩等等，呢度飲品都好有特色，我哋叫咗一杯蝶中花、鳯琉香、瑰洛月，三款飲品嘅造型都好靚，佢有得揀要唔要酒精，當然係唔同價錢啦，有酒精就貴少少，果杯鳳琉香，會即場整個波波喺上面，都幾得意，而杯瑰洛月我個人覺得甜咗D，食物方面，個牛肉拼盤嘅質素唔錯，D牛肉好淋，好好味👍🏻👍🏻  呢度嘅食材質素都幾好，店員嘅服務都好殷勤，一定要再同其他朋友嚟食！

 

Mamaday Studio

今晚約咗好友食火鍋，時間尚早，我哋就諗住去飲杯嘢，原先係想去酒吧，但係行咗三間都冇開，知道限聚令嘅關係，有D酒吧係酒牌的話就唔會開，但係如果佢係餐廳牌就會開，揀啱呢幾間都應該係酒吧牌所以冇開，行行吓經過呢間咖啡店，見到佢個裝修好特別，所以我哋就改去飲咖啡！

印象中呢個舊樓鋪位以前係一間粥店，定係隔離個舖位？我都唔係好記得，因為好少出去佐敦，咖啡店招牌好似做咗3D效果咁，唔知戴個3D眼鏡睇會唔會好立體呢？😎 個餐牌都好特別，因為佢將咖啡名翻譯左做中文嘅時候，都改咗D特別嘅名俾佢，例如 Americano 就改就叫做阿美國佬😂，我地叫咗一杯肥威(Flat White)，一杯你好污糟(So Dirty)同埋一杯莫卡(Mocha)，呢度有兩層，地下呢層就冇位坐，只有企嘅位，由後門有樓梯上去，呢度有圍欄圍住，應該店入面係有養貓，不過今日就唔見🐈🐈，上到樓上都有幾個客，座位大概有十幾個，有兩張枱係室外好似騎樓咁樣嘅位置，我地上到去嘅時候室外果兩張枱都有人，所以我哋就坐裏面，坐咗一陣室外位有一枱走咗，我哋就出去坐，因為兩位好友都要食煙，今日雖然有D熱，不過黃昏時間都涼兩地，而且有風扇，坐咗陣，隔離果枱都走埋，好快就有第二枱上嚟，我地坐一陣就走，因為差唔多夠鐘！

小房子

今日諗住去大南街其中一間coffee shop，但係見到有呢間，之前冇乜印象有呢間野，不過佢應該都開咗幾個月，呢個位成日都經過，唔知點解對佢冇印象🤔

店入面嘅座位都唔係好多，有一張好大嘅櫈，其實係有一D木嘅卡板組成，不過唔係咁好坐，因為冇得挨住坐，入面仲有個鋼琴，係舊舊地嗰種，見餐牌嘅食物選擇都唔少，又有飯又有蛋糕，我見到有D櫻花食物同飲品，所以就試一試，叫咗一個櫻花Bagel🌸🥯，同埋一杯櫻花梅子梳打🌸🍹，因為熱熱地想飲杯凍飲，佢呢度多數係茶，所以係熱飲嘅多，凍飲嘅選擇好少，咖啡亦只有一款冷泡咖啡，因為佢冇奶嘅，所以唔啱我飲，佢個 Bagel 係紅豆餡，櫻花梅子梳打都諗到係咩味道，兩款都係帶甜嘅食物同飲品，味道唔錯，店員嘅態度都好好，店入面裝修裝修都好打卡able ，所以見店入面人客清一色女仕😆

 

鬼金棒

 

今日去剪頭髮，剪完在尖沙咀搵D野食，行過路過見到呢間拉麵，之前在名古屋食過，在香港就未食過，所以試一試佢！

拉麵店來講呢度都算大，店入面只有幾個客人，睇吓個餐牌，都有好幾個選擇，我就叫咗個芫荽拉麵，上面有大量芫荽，個湯就揀咗麻辣，因為唔記得佢個辣度係有幾高，所以叫咗個小辣，我就覺得唔辣，芫荽雖然睇落好多但係食咗上嚟又唔係好多，因為佢係切都好碎！拉麵就唔算好特別，普普通通！

月

第三次檢測都係陰性，放心晒！而且已經過咗21日，又去大南街搵食，呢間餐廳其實行過好多次，次次都見到佢幾full，今日難得冇乜人，就試吓佢！

店入面嘅座位唔多，所以都幾迫，餐牌已經喺門外邊 show 咗出嚟！附近大多數都係咖啡店，多數都係三文治蛋糕之類嘅食物，而呢度就有啲似茶餐廳咁，反而就冇咖啡飲！叫咗佢哋最出名嘅炸豬扒鴨油撈麵，味道都唔錯，我諗喺附近要搵一間食得飽嘅都應該係呢度，他真係食件餅，就算上次去嗰間 Cofflow ，個意粉份量都係好細，呢度食物嘅份量大份D！

 

筷趣一町

睇完戲，去咗呢度食嘢，睇吓個餐牌見到好多都係即食麵，不過亦都有飯同埋其他甜品，我就叫咗個鰻魚意大利飯，同埋一個法式多士，食物嘅質素就真係麻麻哋，鰻魚有D腥，甜品亦都唔係好特別！

 

靈魂奇遇記 Soul

Joe 在一間學校擔音樂教師，人到中年，仍然希望做一個爵士樂鋼琴手，他得到學生的推薦，能夠和著名的爵士樂手Dorothea 合作的機會，他高興地回家準備時，不小心掉進地下的維修洞🕳️重傷昏迷，當他醒來後發現自己正前死亡之路，只是一個靈魂，當他知道此處是靈魂的終點，他將會消失於白光中，他極力掙扎時，意外跌落投胎先修班，他為了返回地球，他偷取了名牌假扮為一位靈魂導師，協助靈魂找到自己生命的火花，而火花便是獲得前往地球的通行證，他獲分配的靈魂22號，22號答應協助 Joe。返回地球時，Joe 不小心與22號對調了身份，22號意外進入了 Joe 的體內，而Joe 反倒寄身於一隻療養寵物貓的身體內......

我都係都幾好睇，令人反思夢想和生命的火花是什麼！亦都頗為感動，就係人生走到盡頭嘅時候，先至發覺好多嘢自己未做，可能已經為時已晚！

Cofflow 順流精品咖啡

最近大南街附近都多左咖啡店，今日試吓呢間，呢度有兩層，樓下只有幾個位，樓上就多位D，呢個舖位係舊樓果種，地面果層樓底高，樓上閣樓嘅樓底又低返D，樓上同樓下面積應該一樣，只係樓下有個廚房同廁所，所以只有幾個位，門口道鐵閘都係懷舊設計，店內好似保留一D舊磚牆，定係刻意用懷舊磚？ 

去到嘅時候只有兩個客，餐牌有意粉、沙律、三文治、蛋糕之類，我叫左一客意粉🍝同一杯咖啡☕️，仲有一件Black sesame 豆腐 mousse cake ，意粉有點淋，唔夠 Al denté ，咖啡好香濃， Mousse cake嘅味道就好清淡，店員都好好禮貌，又問我食物啱唔啱食，感覺都係想聽意見 ，有誠意嘅小店👍🏻👍🏻

 

Bonding coffee

尋日出咗第二次檢測報告，都係陰性，今日就出去行吓，去大南街搵食，見到呢間 coffee shop，之前冇見過，可能個位置比較隔涉，又或者係佢新開冇幾耐，因為裝修好新淨，今日去到一個客都冇，店入面有隻貓貓🐈，叫咗阿妹，聽店員講應該另外仲有一隻，不過今日唔見，店入面有D相掛咗喺度，應該係賣的，因為有D有標價錢，有D冇標價應該純粹係展覽，入面入面嘅座位都唔少，大約有10張枱，另外店門外有幾張櫈可以坐室外！

食物選擇主要都係糕餅類，我叫咗一個迷你pizza 同埋一杯咖啡，Pizza🍕就普普通通，冇乜餡料，咖啡☕️亦都不過不失，不過靜靜地坐下就幾舒服，又可以同隻貓玩下！

 

Ode∇ 鯛白湯拉麵 / MI·KE Sanchoku Ichiba

上星期做完檢測，咁星期再去做多次，呢幾日都唔敢出街，因為驚上次個檢測報告有假陰性，今日既然出去做檢測，身體又冇乜異樣，就出去食吓野，過去中環複診，順便去食碗拉麵，呢間拉麵店一直想去，今日就去試吓，撞正午飯時間，都有幾個人排隊，拉麵店兩面牆都係玻璃，可以睇到裏面嘅情況，店入面嘅座位唔多，大約只有10個位，不過食拉麵通常食完就走，所以都唔駛等好耐，呢度餐牌好簡單，湯麵只有鯛清湯同埋鯛白湯，仲有一款鯛沾麵，原本想食沾麵，但係沾麵係冇餸，當然可以加錢另外叫餸，不過試咗個湯麵先，下次先試吓佢個沾麵，呢度落單係在門外有部機落單的，落完單先至入去坐低等，同一般日本拉麵店一樣，座位都係圍繞住廚房坐，可以睇住師傅做麵嘅過程，個沾麵係會出煙嘅，好有意境😆，鯛白湯麵個造型都好靚，有兩塊筍，切成佢哋logo嘅形狀，先試下個湯底，濃濃嘅鮮魚味，好飲！麵就普普通通，唔算特別，當然配埋個湯就好味好多啦！😊😊

食完麵行過對面間 MI·KE Sanchoku Ichiba 睇吓，頭先排隊嘅時候望到對面呢間舖頭，係賣D日本食物，所以過去望吓，原來係同呢間拉麵店同一間公司，呢度主要賣D日本製造嘅食物，有好幾樣係洋蔥製品，有洋蔥仙貝、調味料、洋蔥湯包等等，當然仲有其他食材啦！例如醬油、罐頭、米、sake 之類，我買咗少少嘢食，跟住就去複診喇，複診完都即刻返屋企，在街市買定少少蔬菜同生果，再閉關幾日！😔