裝修大作戰 - 12

今日上去望望，都係同上次一樣！冇郁過，都係等傢俬，只係拆左栅!

出旺角搵窗簾，間間睇落差不多，都唔知點揀，呢條街好多亞姨派傳單，跟傳單上左一間睇，呢間睇落D布靚D，問店員價錢，話要視乎布料和尺寸，大約一千元一套窗，我唔知算唔算貴，印象中，上次六百幾（N 年前屋邨舖買），我有兩套窗，廳要兩層，仲要落地長度，我諗要三、四千，我跟返設計圖個顏色揀，房果幅要高度遮光，揀左三款布料，自己好鐘意，揀埋款式，計落比預期貴左D！

裝修大作戰 - 11

又上去睇！今日冇人開工，見到成間屋整好晒天花、地板、牆，只欠全屋傢私，我諗全個裝修工程，花最多時間在訂做傢俬，睇情況，現在只是等傢俬到左先可以開工，仲有40日，䓁等等等..........

Metal Steak

昨天在旺角睇燈和門鎖，今天去灣仔！

先去食個 lunch ，去左中環歌賦街呢間 Metal Steak，去到未開門，今日好熱，行左去斜對面間叫做 Creative Co-op 的家品店涼冷氣，順便睇睇，見到門口有米字旗梳化，又有同款單人椅，價錢不算貴，見到有個鐘幾啱心水，要度度尺寸是否夠位掛，又見到D碗都幾好，好幾樣都啱心意，等遲小小裝修差不多完工再來睇！呢度D店員好有禮貌，服務好好！

行返去 Metal Steak，開左門，我第一個入去，冇其他客，有兩個店員，入口有個燈箱餐牌，佢地主要賣六款牛，價錢每 gram 計，最少要order 200g，最貴是佐賀牛A4西冷，要$1.9/g，其次係佐賀牛A4肉眼，要$1.8/g，西班牙黑毛豬就$1.2/9，其他安格斯和紐西蘭就$0.6-0.7/g，即係最低消費$120，另外加$30有湯、沙律、飯，但份量很小，飲品有罐裝 wine，有紅、白酒和 Rosé，沒有試，始終太早了，而且相信質素應該很一般！先在門口的燒烤爐那邊的窗口跟師傅落單，要邊種牛肉同埋要幾重，同埋要煮幾成熟，然後比張 sticker 你，好似超市果D價錢 sticker ，埋去收銀處比錢，然後入去搵位坐，呢度既設計帶小小工業feel，高身木枱和櫈，有些鐵網，牆身都好raw，一入門口收銀後面有一排位，行入D有四張可以坐六人的枱，有樓上但沒有開，牆上掛了些圍裙供人客自取，因為用鐡板上，所以用圍裙好D，我們叫了佐賀牛A4西冷和肉眼，五成熟，店員把牛扒送來，牛扒略為生了，不足五成熟，而鐵板不夠熱，好快凍左，肉質好，要是熟多一點，油脂會少D，吃起來不會太油，成個 lunch hour 只有四枱客，我諗食個 lunch $150，唔係太多打工仔可以成日食，我諗都幾難做！

潮福蒸汽石窩

去完迪士尼，出旺角食野，原本諗住去朗豪坊附近的食店：水上人，試近期大熱蒸海鮮，但要等位，改了去旺角道的潮福，一樣要等位，其實都好夜，成十點都要等，都等左半小時先有位！九點後八折，十一點後六折，再等多半個鐘有六折，但係好餓好累喇，唔想等，即刻叫野食！

叫左𧎚，鮑魚、元貝、雞、菜、仲有排骨粥底，先將米、排骨、南瓜放在鍋底，不用加水，靠蒸氣和海鮮汁去煲，上層蒸海鮮，下層煲粥，每款海鮮都有計時器去計時，蒸完一款蒸另一款，始終是新鮮海鮮，味道當然是鮮，排骨粥更是精華所在，好好味！難怪大熱，更有不少人自己在家整，個個都買有蒸格的火鍋煲！

迪士尼詭城玩失蹤

又到 Halloween promotion，今年迪士尼有新野，往年的詭墳學院、馬戲團，都冇乜特別，今年見宣傳轉晒，見十七號，有會員優先試玩，立即登記左先！

入園前例必去青衣城食野，今次又食拉麵！好友早兩個月搬左屋，去青衣唔太就腳，下次要約去九龍塘或者旺角先得！食完麵，入到去三點幾，先去售票處登記，兩點半開始登記，四點半後會封左 Toy story、灰熊山谷同埋迷離莊園，只招待已登記會員，所以有條營光粉紅色手帶比我地做識認，由於節目七點才開始，四點半後好多會員未入來，呢幾個園區極少人，所有機動遊戲基本上不用排隊！連平時好多人的彈弓狗，都唔使等，大把位，可以一人坐一卡！玩左一陣，差不多七點，去灰熊山谷睇第一個節目，見到有個好細的舞台，等睇表演的人越來越多，亦有些傳媒，等到表演一開始，有個人出來講故事，然後有一班人出來演繹故事內容，但這班人是手持扯線公仔，由公仔來演繹，因為人多公仔又矮小，完全看不到在表演甚麽！只"聽"了一陣便走了，因為7：20在迷離莊園有表演，行過去等一陣便開始了，表演是用燈光投射到迷離大宅，然後有一些全身由頭到腳都是白色的人，在大宅外行來行走，營造陰森氣氛，然後他們走到人群，與觀眾合照，我們未看完便走了，還有其他表演至晚上十時，我們選擇去城堡前等睇八點鐘的煙花，今年的 Halloween 節目實在令人失望，感覺迪士尼的管理層不善經營，未能因應港人的喜好去創作活動！去睇煙花因為知道十週年改了煙花滙演的投射影像，到煙花開始才發現沒有改，同早前在網上看到的不同，不過今晚好多人係第一次睇煙花，因為反應好熱烈同興奮！

睇完煙花去買野，商店出奇地少人！以往睇完煙花散場時，商店內是迫滿人，排晒隊，但今晚很少人，不用排隊，雖然可以很輕鬆，但看見冷清的場面，代表經濟不景，對我們來說也有間接╱直接影響！

裝修大作戰 - 10

上去睇，有師傅在工作，見到廚房已經舖了牆磚，廁所都鋪晒天地牆，坐廁都安埋，整左個幾月，進度都好快，希望可以快D完成！

裝修大作戰 - 9

裝修公司聯絡我，話有幾個位有鋼根外露，問我想就咁補返，定係打左生銹部分先再補，價錢相差一倍！問左師傅意見，貴D做法會 last 得耐D，長遠計，都係要比多D！

裝修大作戰 - 8

尋日約左揀廚房爐頭磚，上去裝修公司揀，元素系列，有D似岩石同雲石之間，有幾種顏色選擇，雪花白太淺色，因為櫃都係白色，石墨若又黑麻麻又撞色，得灰色比較適合，灰色又有分幾種灰色，最後揀左碎岩石果隻灰色，揀完磚，對埋D櫃尺寸，比埋D電器尺寸，攪定！

今日又上去睇睇，見到砌緊磚牆，地同牆都做左入牆，睇到D電線點走，好期待呢！

裝修大作戰 - 7

今日約左去旺角砵蘭街揀磚，呢度好多裝修用品店，我地去左一間樓上鋪，應該係同裝修公司相熟，選擇好多，大陸磚平價一D，意大利磚當然靚，貴一倍以上！最後當然買大陸磚，揀左地磚，廚、廁的牆磚，價錢比預期平！

揀完磚，揀坐廁、洗面盆、花洒、水龍頭，坐廁個個睇落差不多！坐上去試，揀左個細少少，方方地，油壓式廁板，洗面盤揀左個圓形的，水龍頭買了意大利牌子，浴室花洒、廚、廁水龍頭，同一個系列！

買完再去買牆紙，只需要買一卷，只是床頭幅牆要貼，所以一卷就夠！

裝修大作戰 - 6

搬走左十日，今日上去睇睇！冇師傅開工，因為拆左大門只有鐵閘，隔住鐵閘見到入面所有野已經拆晒，個窗撘左栅，覺得好開心，感覺所有舊野冇晒，看到新的開始，影左幾張相，自己一路睇一路笑！

貓之家

又到溫馨飯聚！

上次去完烏溪沙BBQ，又約出來！上次是好友生日，今次係佢個仔！今次去另一個好友在上水的家，他的家剛裝修完不久，全屋以白色為主，牆上掛了三幅希臘風景相，窗上掛了一幅魚網和貝殼，很有希臘 feel ! 地方當然不及烏溪沙村屋大，不過兩個人住已經很足夠！

好友家中養了一對貓，貓媽媽剛生了三隻貓BB，很可愛，牠們都很弱小，所以都不敢抱牠們！

今晚又打邊爐，又係洗野洗左好耐！今晚的食物也很豐富！有龍蝦、蝦、帶子、蟹柳、大量肥牛，和一些打邊爐必備的食物！我們開了紅酒和白酒，吃得很開心！

今個月的食局頗多，十日後又有另一飯局喇！

裝修大作戰 -5

明天要交吉屋比人喇，今日又要返工，唔夠時間！剩餘要搬走的東西也比預期多得太多了，唯有放棄一部份！

先將一半物件用行李箱車去老媽的家，然後再返轉頭，執埋剩餘果D，好辛苦呢！又落雨，差D截唔到的士，攪到好夜先完成！

新志記

相約了舊同事飯局，上次是十二月，已經相隔八個月了！約好了在太子站的新志記，在地鐵D出口，一出來見到一間志記，原來是同一間，只是招牌沒有"新"字，見到餐牌是新志記，才確定是這裡，這裡是一家頗舊的飯店，店內裝修較殘舊，坐位也不多，都以細枱為主，我們十多人，訂了最大的那張枱，老友們陸續到來，雖然不再見面，但總有說不完的話題！

我們叫了鵝腸、鹽焗雞、炸生蠔丶西蘭花帶子、生炒骨、椒鹽鮮魷、蒸勝瓜等等，呢度D燉湯好得！好足料好好飲，叫左兩大煱，好正！D小菜好夠鑊氣，全部都好好味，一定要再來！

飯後大家已經約定中秋節後出來，去BBQ！

裝修大作戰 - 4

為了要趕快完成pack 箱，在放假時日以繼夜執，和每晚收工執，大量棄掉雜物後，將保留的pack箱，這才驚覺家中雜物是如此的多！為了將箱頭數量控制在40箱左右，我將一年沒有用過或將來未必會用的，都棄掉，只是怕倉不夠位，昨晚還pack 通宵，最終是56箱，早兩日已經知道超過50箱，已通知了搬運公司，要加錢了，可能要加租一個細倉了！我打電話去迷你倉問會唔會有大小小4x7倉，我話我book 左倉今日入，有冇大小小既倉可以換，佢話有呀！留左比你！我都冇講我係邊個，佢竟然知道我要換大D倉，原來佢話物流果邊，我聯絡開果位曾小姐通知左佢，話我由原本40箱加到50幾，叫佢揾定個倉比我，剛剛好有人臨時退租，才有倉比我，太細心了！也太巧合了！

約了迷你倉的搬運部門，下午兩點，先清一些垃圾，再到樓下叫收買佬回收電器，收買的阿姐上來看，所有電器都不值錢，因為都很舊，我志在佢幫我搬走，她問我有否舊酒、舊CD、舊手錶，我其實有支長頸FOV，正考慮是否有人收，冇就掉左佢，便問她收不收，她說值幾百元，我諗可能唔止，不過原本就想掉，就算了，平平地比佢收！

攪完回收電器，個司機話要遲45分鐘才到，我又掉一些垃圾，執屋時發現有幾支紅酒，大概是七、八年前的，放得太久了，不知有否變壞，也棄掉了，才放到垃圾站，轉頭已被人執走了！！掉完垃圾，車也到了，兩個搬運工人好快手pack 好野，收買佬也來收電器，成間屋變得好大空間，剩餘些垃圾要呢幾晚清埋！

跟貨車去迷你倉，我先上去辦手續，D箱上到去再數一次，運輸工人將貨入倉，入晒倉後只剩餘小小空間，原來租倉是沒有鎖的，你可以自己帶鎖，他們也有供應，收費$60，唯有照買，另外倉咭$60，可以自由出入，攪掂晒就攞埋D電器catalogue 去裝修公司，比佢地預尺寸做櫃，早D返屋企執埋D野！

Wu Kai Sha BBQ

好友生日，又相約成班人去好友在烏溪沙的村屋BBQ，因為要返工沒有join 佢地買食物，去到見佢地未洗好野，不過都差不多洗好，同上次一樣，超多野食，有蝦、帶子、鮑魚、石斑、羊架、雞翼、牛扒、雞扒、粟米、蕃薯、等等，個爐放在屋門外，由三位男士主力做燒烤的工作，女士們都舒舒服服地涼住冷氣等食！好幸福呀！