2025年11月日本東至西長途旅行 Day 9 - 宇都宮八幡山公園、東京錦糸町

在酒店食個簡單早餐，check out 放低行李，就出發去八幡山公園，行去宇都宮駅搭巴士，但搭錯60號車🤦🏻‍♀️去左帝京大学😅呢度冇其他巴士，得一條線返宇都宮，唯有撘返去宇都宮駅，轉撘54號線，見未有車，就去Starbucks 買杯湯 Soupuccino 飲吓！

搭巴士八個站去到昭和小学前落車，行過對面係祥雲寺，睇地圖可以行過去八幡山公園，原來唔得，啱啱有個工人在清理樹葉，叫我行返出去先過到去，原來頭先巴士站落車行小段回頭路，經過一條短隧道叫做塙田トンネル，穿過個隧道往左行上去，就係八幡山公園嘅入口，呢個公園都頗大，見到有個牌寫住蒲生神社表參道，又上去望吓，上到去只有個鳥居，乜都冇！再行去呢度個塔，今日公園冇乜人，塔下的商店都冇開，塔旁邊有條吊橋叫做 Adventure bridge ，吊橋唔算高，望落去大約兩三層樓咁高，下面都係公園部分，有個小水池，但沒有人😅 吊橋另一邊係一個啱小朋友玩的公園，仲有個迷你高卡車場添！見到都有人玩😅

在公園行一陣沿頭先條路，去返昭和小学前站對面，搭返巴士去宇都宮駅，去到巴士站剛好有車👍🏻 返到宇都宮駅都係十分鐘左右，車站有個商場叫做Tonarie ，之前在車站見到拉麵店廣告，間拉麵店叫做灯花，就在呢個商場，去試吓先！佢主打鯛塩湯拉麵，所以試佢呢個招牌拉麵！叫左拉麵加湯餃，湯都幾清甜，味道不錯，麵條都幾煙靭，唔錯，餃子就不過不失！

食完拉麵返酒店攞行李，再行返去宇都宮駅，搭JR 宇都宮線(上野東京線）一小時45分鐘左右到達東京站，再轉車去錦糸町！book咗間Apartment今晚住一晚，因為嗰度冇接待處，加上已經夠鐘check-in，所以直接去自助check-in，先放低行李，再去食嘢！

食完拉麵返酒店攞行李，再行返去宇都宮駅，搭JR 宇都宮線(上野東京線）一小時45分鐘左右到達東京站，再轉車去錦糸町！book咗間Apartment今晚住一晚，因為嗰度冇接待處，加上已經夠鐘check-in，所以直接去自助check-in，先放低行李，再去食嘢！

食完飯去Parco行吓，買左件冷衫，又去食左杯芭菲，好飽！跟住行返去Apartment，返到去收到好多message 關於大埔宏福苑發生火災，仲連環燒左幾座樓，好可怕呀！好慘呀😱😱😱😱

酒店住後感:
Livcity 錦糸町参番館
呢間係類似Airbnb嘅apartment ，由地鐵站南口出嚟，行8分鐘就到，中間嘅路段都幾靜，同火車站係兩個世界，雖然好靜但係都安全，佢係自助check-in，喺訂咗之後會用電郵同你溝通，亦都會要求你上傳Passport圖片，跟住就會send密碼俾你，到時喺大廈嘅門口按密碼進入大廈，去到單位門口亦都係用密碼進入，佢呢度係一梯兩伙嘅住宅，都好新淨，入到單位見道門有三個鎖，都好安全，入門口右邊就係爐頭，左邊係浴室同洗手間，再入就係廳+睡房，其實都唔算係個廳，因為只有一張細嘅枱同兩張凳，旁邊已經係一張雙人床，呢度冇電視機，但係有投影機，爐頭旁邊有張書枱，有個電腦Mon，所有嘢都好新淨，同佢網上嘅相片基本上係一樣，原本想住上次嗰間Super Hotel，但係見呢度價錢差唔多，又有洗衣機洗衫，所以就揀呢度試吓，佢個投影機冇電視，但係有YouTube，可以睇香港嘅新聞，屋主都好着緊， keep住email聯絡我，個浴室亦都有浴室寶，方便洗完衫之後，開個浴室寶吹乾啲衫，因為洗衣機係冇乾衣功能，如果有埋就更加好！當然住幾日嘅就冇問題，因為我住一晚，所以要即晚吹乾啲衫！整體嚟講呢間apartment 唔錯，乾淨企理，屋主又跟得緊貼，只係離火車站遠一點，不過行咗兩次之後都覺得唔係好遠，側邊個路口仲可以離遠望到晴空塔！雖然大廈後面係行車天橋，但隔音很好，完全聽唔到車聲👍🏻