因為酒店10:00 check out ，所以 9:30 出門口，check out 後放低行李在酒店，搵左幾個景點，行埋先走，最近酒店的是第二公園，佢真係一個住宅區的公園😅，公園不大，早上沒有人，見佢整左聖誕裝飾，不過日光日白當然唔會著，不過呢度擺咗個火車頭，係以前果D蒸氣火車 SL8620形，可以行上去影相，我就影幾張相先走！
跟住去左山形まるごと館 紅の蔵，睇介紹應該介紹山形特產人形公仔和清酒，去到發現今日無開，所以在門口影幾張相，到此一遊😅
再行一段路，去左譀訪神社，神社內空冇一人😅，我諗呢度旺季或者週末應該多人，見佢頗新淨，似有翻新過！又影吓相就走😅
跟住往酒店方向行另一條街，呢度有間男山酒廠，之前有買過男山的sake，所以都想去睇吓，去到門口見到佢寫住Tasting & Shopping 營業時間係9:00-12:00，但係又冇開😅，酒廠嗰邊可以行入去，但係又冇人，所以最後買唔到酒，又冇得試酒！
由酒廠行返去酒店，經過一個八幡神社，又入去望吓，入面都係冇人，不過聽到有人念經，而且佢都舊舊地，所以冇逗留就走！
行返酒店嘅時候，經過一間蕎麥麵店，之前上網睇咗想去食，但係11:30先開，要等半個鐘頭，所以我冇等，直接返酒店，因為一陣要搭長途車，可能買個便當上車食！
攞返行李之後直接去山形站搭新幹線，喺JR嘅服務處買飛，裏面有幾個職員，但係沒有人客，我見到可以登記換領櫻花鎖匙扣，所以即刻都註冊換領，另外仲可以攞一份摺紙，買咗12:05嘅車飛，預計13:57到達宇都宮，即係差不多兩個鐘，仲有成半個鐘先開車，我就去火車站嘅商店買手信同埋便當，山形市嘅名物係車厘子，所以買咗兩杯車厘子啫喱，諗住去到東京同好友食，另外買咗兩盒藏王嘅雪人餅手信，個造型好可愛，不過唔知好唔好食😅，另外再買咗一個三味牛肉便當，其實佢得兩款選擇，所以我揀咗呢個，跟住放微波爐叮返熱，再攞上車食！今次去山形市，比想像中少人，因為山形市都係一個大站，未去過一個日本嘅城市係咁少人，條街冇乜人之餘，所有景點都見唔到有其他人！我諗要喺落雪嘅季節佢先至會多人，因為好多人由呢度出發去銀山溫泉或者藏王樹冰，所以我諗佢除咗落雪嘅季節，其餘嘅時間都係冇乜人，所以佢好多個景點都係冇人😅
上咗車，就開個飯盒出嚟食，味道就一般！火車途經米澤市，又經過福島市，之前有考慮過去米澤，但係唔夠時間，所以改咗去宇都宮！火車準時13:57 去到宇都宮，呢度嘅環境比想像中熱鬧，我開頭以為好似山形市咁，淨係火車站會熱鬧啲，但係離開咗火車站條街都好多人，火車站亦都幾大，因為呢度好多人會轉車去日光市，火車站都係有一個商場，我因為拎住行李，所以冇點行到，先去酒店放低個行李先，再行返去火車站睇吓有咩食！
宇都宮有條路面列車，叫Light line tram (LRT)，類似香港嘅輕鐵，不過上網睇過佢嘅路線唔係咁啱路，所以冇機會搭，喺火車站旁邊見到有間咖啡店好似幾好，所以入去食件cake飲杯咖啡，店名 Island Stone coffee roasters，叫咗一件士多啤梨蛋糕，加一杯咖啡，上去樓上坐低飲！呢度嘅窗可以望到火車站！順便上網睇吓附近有咩景點！
飲完咖啡再去商場行吓，呢個商場都算幾大，比起山形市個車站商場仲要大，水果都幾平，不過一個人食唔到咁多，所以冇買到，喺商場睇咗陣冇咩啱食，頭先行去酒店嘅時候見到沿路都有好多食店，所以陣間都係返去食晚飯！
行完商場行返酒店，沿路搵吓有咩食，睇到有一間食串燒好似幾好，要上一層，上到去冇位，唯有再搵第二間，呢度雖然有啲食肆，不過其實條街都好靜，基本上見唔到幾多個人，可能因為呢度係住宅區，相比火車站熱鬧好多！最後揀咗一間頗為地道嘅居酒屋，我唔記得影佢個門口，店名係サムライ 駅東店，不過呢間嘢麻麻哋，我叫咗魚生，佢有三款，我諗係我喺日本食過最唔好食嘅刺身😔 基本上每款食咗一件就冇食，另外叫咗幾串串燒，同埋一碟餃子，串燒同餃子都好一般，因為食物質素真係麻麻，所以冇再嗌嘢食就走！
酒店住後感：Four Points Flex by Sheraton酒店嘅位置離火車站都幾遠，大約要行8-10分鐘，中間嘅路都係住宅區，所以比較靜，酒店就幾新淨，接待處有唔同國籍嘅職員，可以講到流利英語，而且多數都係好年輕，感覺都好有活力，房間就細細地，都好乾淨整齊，酒店有提供簡單嘅早餐，即係只有麵包同飲品，整體感覺唔錯，唯一係遠離火車站，對於唔係揸車嘅嚟講就冇咁方便，如果係揸車嘅話，酒店旁邊就已經有停車場！同埋酒店附近冇便利店，最近都要行後兩條街先有一間Lawson，不過酒店大堂都有少量杯麵零食和飲品售賣，有需要都可以買來充飢😅
沒有留言:
發佈留言