Little Napoli

今日終於去咗試我一直想試嘅薄餅店，之前佢喺跑馬地嘅時候已經想去試，但係因為個地點唔係地鐵站附近，所以就一路拖延，直至到佢搬咗去灣仔，今日終於去試咗佢，今日天氣麻麻，又落雨，去到先攞位，佢可以俾我揀Bar枱位望住個爐，或者普通座位，我就揀咗普通位，因為驚對住個爐會好熱，幾款Pizza都好想試，因為呢度係正宗嘅拿玻里pizza，所以唔會有好多餡料，我哋叫咗個前菜八爪魚， pizza就叫咗Margherita，另外叫咗兩杯Espresso，杯咖啡好濃，而且好細杯，真係一啖飲晒， Pizza好好食，難怪攞到米芝蓮，前菜就唔係太特別，另外叫咗兩杯雪糕都好好食，整體嚟講都係好滿意，一定會再嚟👍🏻

 

2025年9月成都之旅 Day 5 - 成都熊貓基地、寬窄巷子、天府機場

今朝一早起身見到落雨，同天文台預告一樣，今日真係落雨，因為今日包咗車，所以直接喺酒店check out，將行李擺上車，又去飲咖啡，我哋第一日去嗰間咖啡店，原來店主放大假，所以呢幾日都冇開，我哋好好彩第一日飲咗，不過另外兩個好友遲咗兩日嚟就飲唔到😅，我哋又search到另一間在太古里附近，叫做Mondoli ，店入面嘅裝修幾特別，好似外國嗰D屋咁，掛咗幾個動物頭標本，應該係假嘅😄店入面嘅座位唔係好多，我哋每人叫咗杯嘢飲，佢呢度除咗飲嘢之外，只有甜品，我哋淨係飲嘢，飲完嘢直接搭車去食晏，因為落雨就唔想喺出面行！

去咗一間叫做無名蹄花，當然係食蹄花(豬蹄)為主，另外加咗個豬紅、油麵、蒸南瓜，今日落雨凍咗好多，呢間店係類似大排檔咁，全部都係室外位，所以都有啲凍，個蹄花好軟腍，有啖熱湯飲吓！

食完飯call返架車去熊貓基地，原本唔係好想去，但係司機建議我哋來都來了，呢度最出名嘅景點係熊貓基地同三星堆，三星堆實在太遠，所以唯有去熊貓基地，落咗車仲要行條長斜路上去，因為私家車唔可以直接去到門口，上到去熊貓基地入面亦都有shuttle 搭，當然要俾錢，我哋去咗職員話最多熊貓睇嘅一個站，入到去迎面有幾個香港人行過，佢哋話睇咗成朝先至見得兩隻熊貓🥹 我哋跟住行咗第一個熊貓園區就見到兩隻，應該係佢哋見到嗰兩隻🫢 再行去第二個園區，又見到兩隻，我哋只係用半個鐘頭時間已經見到四隻，都已經算係任務完成，跟住大家都冇乜Mood行，所以周圍影吓相就走，再call返個司機嚟接我哋，個司機話我哋咁快行完🙄

又再去寬窄巷子！上次係夜晚嚟，今次係日頭嚟，我哋試食咗豆腐花，又去咗Pop mart ，跟住去左一間叫做壹丁咖啡度飲嘢，等緊飲品嘅時候，見到好友同佢男友喺出面唔知發生咩事，好友喺度喊🥺 佢哋入返嚟嘅時候亦都冇講咩事，總之今日成日都好似好低情緒價值🫠

跟住去食嘢，去咗一間叫做鍾水餃，係司機介紹嘅，我哋就覺得麻麻哋，不過諗住食啲嘢先去機場，驚機場冇嘢食，又搭咗個零鐘頭車先去到機場，機場唔多人，所以過關都好快，過咗關之後真係冇乜嘢食，亦都冇乜嘢買，所以我哋好無聊咁四圍逛，跟住就去閘口嗰度坐低等，好友同佢男友唔知傾乜嘢傾咗好耐，開始登機嘅時候佢哋都仲未傾完🥺 搞到我哋唔知等唔等佢哋好，最後佢哋再傾多一陣就上機，就係咁就完咗呢個旅程，可能今次嘅旅程唔係特別開心，而且呢度亦都唔係好有特色，所以我諗唔會再嚟！

 

2025年9月成都之旅 Day 4 - 熊貓郵局、成都武候祠、錦里、都江堰

今朝起身，諗住搵返第一日飲過嗰間咖啡店，點知原來佢冇開，好有嘅男朋友，見到對面有間買雪茄嘅店，就買咗支雪茄話要試吓，我哋就去咗旁邊嘅熊貓郵局度睇吓嘢先，因為好有想寄返張明信片俾自己，搞完一輪，就去返前日嗰間coffee shop度飲咖啡！

跟住call車去食野，去咗一間叫做甜水面嘅店，佢係路邊一間小店，我哋坐喺街邊食，我哋叫咗四碗麵同一個香辣抄手，甜水麵本身好細碗，牛肉麵就大碗啲，唔算特別好食！

食完麵再搭車去武候祠，顧名思義，呢度係三國時代人物嘅一間寺廟，因為好有對三國演義嘅故事都幾熟悉，所以佢哋都想嚟睇吓我就唔係太清楚，雖然好多時喺電視電影都睇過，但係印象唔深！呢度地方都幾大，而且售賣嘅精品都好靚，呢度仲有一條購物街，叫做錦里，有嘢食有手信賣，終於都買到手信喇！買咗葛根酥！試食咗覺得佢煙煙韌韌都幾得意，所以買咗幾包做手信！

行完街搵個地方食晏，去咗一間叫做陳麻婆，因為佢係食麻婆豆腐，另外叫咗幾個小菜，不過呢間嘢麻麻哋，我諗呢幾日食咁多餐，呢餐係最唔理想😅

行完街又再去飲咖啡，因為知道有一間叫做川納萬海好咖啡店，推出咗零下86度咖啡，其實係個杯冷藏到零下86度，再加入Dirty，呢間店好細，室內室外都有座位，我哋當然揀室內啦，因為有冷氣，但係我哋四個人就冇咁大張枱，所以分開坐，直至有人走我哋先至坐埋一齊，杯咖啡唔算好特別，嘴唇掂落個杯度亦都唔覺得好凍，而且個冰杯好快溶，不過叫做試過！

跟住再搭一程長途車去咗都江堰，呢個景區都幾大，我哋跨過條橋行去另一邊，又係旅遊商業街，又係好多嘢食，今次覺得好多個地方嘅旅遊街都係咁上下，都係食嗰啲嘢，我哋行到咁上下等天黑，因為要天黑咗條河先至會着藍色燈，個個圍住條河影一輪相，然後行多一陣就走！

搭咗成個鐘頭車，返返去酒店，大家放低啲手信，再出去食飯，搵咗一間叫做回水鎮江湖川菜，話明食川菜當然係辣嘢，叫咗個水煮魚同酸菜魚，另外叫多兩個餸，見到隔籬嗰台兩個外籍女士走嘅時候，基本上大部份枱上的食物都冇食到，原來佢哋話好辣食唔到😅我就覺得OK，啲嘢都唔錯，我哋本來叫咗飲品外賣送過嚟，但係到我哋走都冇送到嚟，所以我哋就走！

出去call車等緊嘅時候，啲飲品就送嚟，原來話架車壞咗，所以我哋都有嘢飲，好友話要再去酒吧飲嘢，我就唔想去飲，所以佢哋先車咗我返酒店，佢哋再出去飲嘢，我就喺酒店浸浴，執行李同埋睇電影，到我瞓嗰陣佢哋都未返嚟，所以我就唔等佢哋！