Wetland

今日去上水幫朋友搬屋，佢搬去濕地公園隔離嘅Wetland ，同佢喺上水廣場食咗少少嘢，就去佢屋企執嘢，然後等搬運公司嚟搬嘢，再入去天水圍，新屋嘅地方唔係好大，大概只有300尺，不過佢一個人住係絕對足夠，呢個屋苑都幾好，低密度，屋苑入邊亦都好多空間，大廈亦都唔係好高，格局仲有啲似Apartment，上到去佢屋企門外，十足十酒店嘅走廊咁，單位亦都冇鐵閘，更加似係酒店咁，屋入邊已經有晒裝修，仲內置咗雪櫃洗衣機，開放式廚房，有一間睡房，同一間儲物房，儲物房擺唔得落一張床，大概等於半間睡房嘅大細，啱晒好友擺雜物，每個單位都有一個小露台，可以晾衫，搬運公司放低晒啲嘢就走，我哋就開始執嘢，不過都只係分門別類，仔細再執就要等好友自己慢慢嚟😅

執到咁上下，好友嘅男友湊埋佢隻狗過嚟，好耐冇見佢隻狗狗，見到都好開心，同佢玩一陣跟住我哋就落去會所食飯，呢個會所都唔錯，環境都幾好，而且唔係好多人，價錢亦都好相宜，真係茶餐廳咁嘅價錢，如果人少少真係都唔使出去食，食完飯再帶隻狗落街行咗一陣，我就返屋企，好有屋企都好近輕鐵站，搭輕鐵去返天水圍站轉地鐵，都要成個鐘先返到屋企😅

 

泰發泰國餐廳

最近好想食泰菜，在網上看到幾間泰菜的介紹，原本想去另外一間，但落左場，就去左呢間！

佢有兩個舖位，一間落咗場，另外嗰間細間D嘅就有開，店入面只有一枱客，我叫咗一個生蝦刺身同埋冬陰功湯河，另外叫咗個椰青，因為今日真係好熱，個生蝦刺身有跟埋個炸蝦頭，呢個做法我幾欣賞，不過可惜，可能非繁忙時間，個蝦頭唔係即炸，所以唔熱唔脆！嘥咗！冬陰功湯就唔算好好，以我食過九龍城咁多間泰國菜，呢間嘅冬陰功就一般😅

 

青雪商店

好友介紹有問在大坑的雞白湯麵，今日想約埋一齊去，但佢行唔開，唯有自己去，過左lunch time 去，入面有兩枱客，坐低覺得好似冇乜冷氣，店員話壞咗，但今日好熱，仲要食拉麵，店員態度好似唔關佢事咁，反而廚房的師傅就話唔好意思，猶豫咗一陣，來都來了😓照食！坐在風扇位好少少，冇試雞白湯，試左牡蠣湯麵，另外叫左個鮑魚，個牡蠣湯好杰身，好濃，仲有少少腥味，個人認為太濃，偏咸左少少，加上熱辣辣，都有少少影響食慾，個鮑魚就好食，幾抵食，下次再試個雞白湯比較吓！

Fineprint

今日去中環睇醫生，行去地鐵站嘅時候經過華人行，見到有間新開嘅coffee shop，入面都有少少位坐，不過係一張好長嘅枱，所以好似搭枱咁全部人都唔識，但係坐埋張枱，見到收銀處有少少蛋糕同埋麵包，我就叫咗一件檸檬蛋糕，同埋一杯咖啡，檸檬蛋糕就一般，咖啡就唔錯，枱面有水杯水樽自己斟水飲，咖啡係唔錯，不過就坐得唔係太舒服，因為佢係高身嘅凳，同埋人貼人咁坐，可能買外賣會好D😅

 

綠茶

今日去咗奧海城，見到就快開霸王茶姬，行入少少見到呢間店，近日見佢周圍開分店，以為佢係茶餐廳，因為之前有間叫紅茶😅原來食淅江菜，見佢裝修都幾靚，餐牌茶式也漂亮，有部分菜式似農耕記，格局好似深圳嘅食肆，就入去試吓！

叫左一客菜肉包、炒飯、菠蘿茶，味道不過不失，下次搵埋朋友一齊去試吓，可以叫吓佢啲特色嘅菜式👍🏻

 

佳芳廚房

今日去開深水埗，去試吓呢間街坊小店，店舖睇落唔係好大，不過見轉入去𥚃面仲有位，而且非繁忙時間都頗多人，餐牌選擇頗多，主要係中式小菜同餃子之類，店員極力推介迷你冬瓜盅，話說好足料，所以叫左一個試吓！不過D料唔算好多，只有三粒瘦肉，同一粒鮑魚，其餘蟲草花、蓮子等有小量，湯就好多，雖然用料足但份量少，店員路過還問我是否足料，我比佢睇吓我放晒上碗飯D湯料，佢以為冬瓜盅內仲有，得知沒有後她一面疑惑，後來埋單時店員話平時好足料，今次可能係佢地疏忽了，所以減了$10，店家做生意都算好老實，而且食物質素也好好，下次會再幫襯過👍🏻

 

Magistracy Dining Room

呢幾日都落雨，天氣唔係太好，今日過去中環睇醫生，跟住去大館食晏，預先book咗呢間餐廳，喺大館嘅主樓旁邊另一座建築入面，行過門口都睇唔到，因為佢冇招牌，不過望到裏面有個人喺接待處，呢度係好英式嘅裝修，好有維多利亞風格，以前可能係法院之類，地方唔算好大，大概只有十零張枱，不過啲座位都幾寬敞，見到有條樓梯應該仲有樓上，今日見到只有三四枱客，我哋一早訂咗枱，不過Walk in 都有位，午餐只有一個餐牌，我哋首先叫咗半生蠔🦪，係 La Perie Blanche No.3 好鮮甜，佢仲上咗一個麵包，都幾大個😅，頭盤叫咗雞肝鵝肝芭菲配酸種麵包，雞尾酒蝦鬆餅，主菜就揀咗牛油酥皮燉三黃雞雜菜批，同埋肉眼扒，個盤因為係鬆餅同埋麵包，所以都好飽肚，加上生蠔之後已經食咗一啲麵包，所以都幾飽，跟住主菜又係牛油酥皮，真係都好漏😅個牛扒又幾好味，牛味都幾濃，side dish 揀咗油封馬鈴薯，奶油菠菜，所有食物都好飽肚，所以呢餐食得非常之飽，最後都叫咗一個朱古力布甸share食，食完飯我哋上去樓上睇吓，原來樓上係好細，只有一張枱，不過望落去個view都唔錯，我哋影咗幾張相就走！

 

銀座篝 （香港）

晏晝食完壽喜燒，喺尖沙咀行咗一陣間街，去咗K11個商場度行吓，見到銀座篝拉麵，諗起未食過，見今日冇乜人，就去試吓！

我諗佢開咗都有幾個月，啱啱開嘅時候驚會好多人排隊，今日見只有一兩個客，可能未到晚飯時間，我叫咗松露雞白湯拉麵，因為每次去東京食都係食呢個，所以先有得比較，個湯嘅味道都接近，不過我覺得佢比較油，而且湯嘅顏色亦都係比較深色，大概同日本食嘅有八成相似，如果要排隊就唔會食，唔使排隊嘅話得閒都可以過嚟食吓！

 

天澗壽喜屋

今日去尖沙咀剪頭髮💇🏻‍♀️，跟住經過呢問壽喜燒，好似幾吸引，上去試吓先！依稀記得好似呢個位之前曾經做過餃子店，依家做壽喜燒同壽司，我叫左個set 加左件大拖羅壽司，件壽司唔錯，個壽喜燒佢話用鹿兒島嘅A4和牛，睇落雪花都好均勻，但係牛味唔算好重，個壽喜燒汁都唔錯，整體嚟講都滿意，價錢都係二百幾蚊一個set，勝在冇乜人，又包場🤣🤣

 

白玉串城、馬來西亞榴槤大排檔、順德佬

又約咗好友北上，好友因為成日都想去叫車，所以佢個叫車嘅Apps升咗level，佢call嘅車可能貴少少，但係都係新淨，司機會着制服，同埋有兩張水擺喺架車度俾人客飲，最重要係好好服務，因為佢哋係好想我哋比好評，我哋call咗車去食串燒，我唔係好清楚個位置喺邊，因為全程都係call車，所以佢哋喺個Apps嗰度通知司機去邊，我又睇唔到，我哋去咗一間叫做白玉串城嘅地方食串燒，係炭燒，同埋有個架自己喺度轉住嚟燒！今日去到差啲包場，全場得兩枱客，例牌喺美團落單，呢個餐有豬牛雞肉，有幾多前菜，有碟糯米腸、炸薯仔、菜、燒茄子、韓式冷麵、韓式豆腐湯！仲有四杯飲品，串燒有60串，每人都有三包調味粉，有兩包係辣粉，我個人就覺得佢唔辣，呢個餐都幾抵食，都食得好飽！

食完嘢本來諗住去食榴槤，因為榴槤店就喺附近，不過啱啱食得太飽，所以去行吓街先，call車去咗一個商場卓悅滙，喺入邊行咗一陣間街，又去霸王茶姬飲茶，Hea咗兩個幾鐘再call車去食榴槤😄

去返食晏嗰度附近，有一間叫做馬來西亞榴槤大排檔，佢有個價目表，有好多款未聽過嘅榴槤，不過有一半都賣晒，最後我哋揀咗貓山王，成個買都要$500😅不過佢啲榴槤係馬來西亞過嚟，而且都幾靚，我哋坐低四個人食咗成個榴槤，好味！🤣

食完榴槤，又慢慢行去搭車，又去另一個商場準備食晚餐🤣時間尚早，我哋就喺商場度行一陣，不過呢個商場比較民生，冇咩好行，唯有早D去食飯，可以去坐吓先，去咗一間叫做順德佬嘅飯店，好有話食過另一間分店，所以帶我哋嚟食，又係美團叫餐，呢個餐本身有豆腐煲、雞、炸鮮奶、雞蛋豬肉炒青椒、蒸魚雲、炒菜，我哋加咗個黑毛豬火腿同埋乳豬，因為呢兩個係佢哋嘅名物，叉燒同乳豬都好好食，雞都唔錯👍🏻其他就正路嘢，好有種買咗兩隻雞返香港，今日大家都冇購物，只有買咗呢兩隻雞！食完行出商場見到有班大媽喺度跳廣場舞🫢跟又call車去火車站返香港喇！全日食食食🤣🤣🤣