周杰倫嘉年華世界巡迴演唱會2025香港站 (啟德主場館)

終於迎來第一次嘅啟德主場館，亦都係第一次聽周杰倫嘅演唱會，佢應該係第一個喺呢度開演唱會嘅台灣歌手，之前謝霆鋒開嗰陣時候已經想去聽，但係買唔到飛🥹 今日同好友一齊去✌🏻

我哋搭車過去主場館嘅時候，都幾塞車，所以我哋中途落咗車，然後行返過去，由於啟德主場館可以容納幾萬人，所以都好多人入場，沿路都係人山人海，入到去場館啲指示都幾清楚，好有買咗樽水飲，但係要拎走個樽蓋，都幾搞笑！我哋今次坐最貴嘅飛，但係最貴飛之中比較後嘅位置，同一個價錢都真係爭得幾遠！🥹 未開場之前我哋行前啲去影相，每個座位上高都有支心形嘅燈，可以感應轉顏色！

其實我哋個位係完全睇唔到周杰倫，為太遠，而且係水平線，基本上比前面嘅人遮住咗，只能夠睇大屏幕，呢度地方夠大，氣氛都真係幾好，其實坐上高會好啲，起碼唔會俾人遮住，所以我哋都唔係太滿意呢個座位，今晚係第一場，周杰倫嘅表現麻麻哋，而且嘉賓好多都係唔識嘅新人，所以都幾失望，如果下次去啟德主場館聽演唱會，都係唔好嘥錢坐咁前，因為都係睇屏幕🫠🫠

後記：佢開咗三場演唱會，第一場嘅表現係最差，第二場有改善，嘉賓係山下智久，第三場嘅嘉賓竟然係郭富城😱如果我肯定嗌到癲🥺

 

畢加索-與亞洲對話 / Café Boheme

今日同好友一齊去M+博物館睇展覽，因為今晚去聽演唱會，所以晏晝出嚟睇吓展覽，原來佢哋冇去過M+，我地在Airside 食完llunch 過嚟，點知佢話呢個館暫停開放，要要等，所以我哋行住其他唔使錢嘅館先，之前上網睇join會員可以送三張飛，所以我join咗會員先，我哋以為可以即刻用，原來只係比會員自己分三次用🫠🫠唯有之後嚟多幾次！不過會員可以帶三個人七折買飛，都好啦！

我哋行晒其他免費展館之後，喺售票處附近嘅商店又行咗個圈，終於等到呢個展館開返，就即刻買飛入場！個展覽係介紹畢加索唔同時期嘅作品，亦都有介紹佢嘅生平，睇完呢個館再行埋其他展館，時間都唔早，去食D野先去睇演唱會！

行左去海旁果邊，去左一間叫 Café Boheme，叫咗個pizza同埋兩個意粉，呢度嘅嘢都幾好食，不過好急趕，食完嘢嗱嗱聲call車去啟德主場館！

 

Nam Nam

今晚要去啟德睇演唱會，但好友今晚北上，所以先將行李寄存在Airside 的locker ，然後join 我地食lunch ，去左食越南野，入坐時諗住坐最入果張枱，因為我地個個都有背囊，以免阻人出入，但店員話留座，唯有坐隔離果張一人叫左一碗河粉，麻麻地，叫左杯香茅斑蘭薏米水 😑應該唔會再嚟😅

 

六本木

今日約咗好友去深水埗食嘢，因為要攞演唱會飛，我哋過幾日就睇周杰倫演唱會，今晚出嚟聚一聚順便傾吓到時點樣安排！

上次我哋喺深水埗食飯嘅時候經過呢間日本餐廳，睇網上嘅評價都唔差，所以試一試，餐廳入邊就唔係太多人，我諗少於一半座位有人，佢除咗一般餐牌之外，例牌有塊黑板寫咗今日新鮮嘅食物，我地叫左條橫筋苗鯛，有D串燒壽司，食物質素不過不失，略為貴左少少！咁啱好友的男友生日，我地買左蛋糕同佢慶祝🎂

 

飯局作客 ： 六月之星生日飯

又到六月之星生日嘅飯局，每年六月都有兩個friend一齊慶祝生日，今次又去另一個好友屋企，而家佢屋企已經變咗係我哋嘅聚腳地，今次唔打邊爐，因為每次打邊爐都要去買指定係食物，要去唔同嘅地方買，例如牛肉要去深水埗，雲吞肉丸嗰啲就要去九龍城，海鮮類又要喺荃灣或者大成街街市買，真係要有幾個人同日一齊放假先至去買到，今次就食肉肉大餐，即係有牛扒🥩、雞翼、蝦🦐、豬頸肉、花螺、雜菜煲！我哋次次都買薩莉亞嘅急凍雞翼，我覺得都唔錯，焗完出嚟都唔會乾，下次買包擺喺屋企隨時可以食🤣🤣 食完飯就切蛋糕，今次買咗 Lifetastic 芒果蛋糕🎂，都幾好食👍🏻

 

次郎拉麵

上星期經過呢間拉麵店，唔知佢係未開定係開咗，但係見到入面冇人，啲員工又好似忙住執嘢，所以冇試到，今日就過嚟試吓，叫咗個柚子湯拉麵同餃子，之前食過Afuri 嘅柚子拉麵覺得幾好食，呢間雖然都係柚子拉麵，但係冇咗柚子嗰份清新，因為佢淨係幾條柚子皮喺個面度，個湯底都係豬骨湯，整體嚟講我覺得不過不失！

 

Casa

又係派手信嘅時候，去咗銅鑼灣呢間餐廳度食，餐廳嘅裝修以粉紅色為主，睇落都幾新淨，可能開咗唔係好耐，我哋叫咗兩款意粉，跟咗湯同埋沙律，另外再杯咖啡同 tiramisu ，意粉都唔錯，咖啡同甜品都幾好！

 

2025年六月大阪自駕遊 Day 7 - 堺市、関西空港

今朝起身執好行李，準備傍晚返香港，好友就留多一日，我哋揸車去咗堺市嘅AEON Mall行街，因為我要買餅乾，通常AEON Mall都會有久世福商店，去到果然真係有，即刻買返幾包餅乾，然後就要諗吓點樣塞入個篋度🤣 我哋去商場度搵嘢食，揀咗一間叫做神座嘅拉麵店，之前喺心齋橋都見到有，不過就未食過，今日見到佢都多人食，所以試吓，都係普普通通不過不失，算係性價比高，食完嘢行多陣就要出發，好友車我去附近嘅火車站搭火車，有一個叫做七道嘅站，入閘前見到佢係扶手電梯上，點知上完扶手電梯之後另外仲要行樓梯🥹，我相信附近應該有lift 搭，不過已經入咗閘，返轉頭要落樓梯出閘，唯有頂硬上，慢慢拎住件行李上樓梯🥹🥹上到月台真係望到另外一邊有lift🫠 趁佢而家未有車，就將頭先買嘅餅塞返入個篋度，然後搭架火車，呢架係急行車，都要35分鐘左右先去到機場！

去到機場秤吓個行李， 28.6 kg，嗱嗱聲寄咗件行李，就喺機場行吓，上次嚟嘅時候機場已經翻新咗，多咗好多嘢睇，仲有間Dior嘅餐廳，不過今日唔係太夠時間，所以冇試到，四圍去搵吓嘢食，間間都超多人，唯獨一間壽司店係冇乜人，叫做築地孫右衛門，可能因為個個望到佢係企位，但係其實入面仲有坐位，叫咗10貫壽司嘅set，要¥4,200 ，另外加個鮪三昧¥2,900 ，老實講質素就係一般！不過一個人又係好難等位，所以唯有揀啲唔使等位嘅地方！食飽飽就上飛機返歸了！