跟住揸車去箱根神社，只係揸咗半個鐘左右就到，去到神社剛好見到一對新人在影和服結婚相，我都影咗佢哋一張，因為個和服好靚，跟住就行去最出名嘅海邊鳥居嗰度影相，呢度要排隊影，但係條龍好長，我諗要排兩個幾鐘，因為每一個人都影咗好耐，雖然有個告示牌叫人哋影3分鐘，不過大概每一個人都影成5分鐘，有啲重要幾個人每人輪流影，目測人龍起碼都有30人，所以我哋只係側邊影吓相就算！
跟住揸咗一個鐘頭車過去江之島，之前去過鎌倉一次，但係冇入到去江之島，今次就淨係去江之島，拍低架車之後，行過一間小店賣包的，所以我哋一買咗個食住先，跟住喺附近一大嘅商店街同埋江島神社行吓，半路見到有間咖啡店，叫做Umito ，呢度有啲座位係望住個海，個景都唔錯，我哋淨係影咗相，跟住就攞埋杯咖啡一路行一路飲！
然後再行埋個燈塔嗰邊嘅花園，呢度嘅佈置都幾靚，不過我哋冇上到燈塔，因為唔多夠時間，我哋要出返去上野😅 都要兩個鐘頭先出到去，揸咗一個鐘頭車好友已經好眼瞓，所以要去中途站平和島休息站take個 break !喺呢度間商店見到有合味道嘅即食麵，佢唔係杯麵，係一包包嗰種，應該話係冇俾個杯你嘅杯麵，自己返去用個碗嚟沖😂 我就買咗另外一隻麵餅返去試吓😆
去到上野市中心，火車站旁邊個廣場有間超市，上次住上野嘅時候都去過，店名叫做吉池，地面嗰一層全部係賣海鮮同肉類，我哋買咗刺身、白子、北寄貝，見到有啲細隻嘅松葉蟹¥444兩隻，所以買咗四隻試吓，然後落樓下超市再買啲菜、肉類同埋一包湯底，返去民宿整火鍋！仲買咗一路都搵唔到，而呢度有大把嘅小岩井芝士，仲齊晒各款口味添😆
揸車過去葛飾區，搵我哋嗰間民宿，搵到之後喺門口搞咗好耐都搵唔到條鎖匙，因為屋主話喺信箱，原來喺信箱上高嘅黑盒仔，入到屋之後即刻準備煮食，因為都成八點！我哋開張枱喺廚房入面食，因為近啲個爐頭， 烚完可以近啲食😄D松葉蟹雖然細隻唔多肉，不過好多膏，真係好抵食，我哋買咗一包豬肉覺得好好食，嫌買得太少🤭，不過最後我哋都食唔晒D烏冬，不過已經食晒啲餸都好飽了！
食完飯嘅活動係執行李，因為好友佢哋聽日返香港，我因為遲佢一日到日本，所以會留多一日，執完行李就要輪流沖涼，因為得一個浴室，好友仲要洗衫，然後放啲衫入去浴室度吹乾，所以要嗱嗱臨沖曬涼先！
食完飯嘅活動係執行李，因為好友佢哋聽日返香港，我因為遲佢一日到日本，所以會留多一日，執完行李就要輪流沖涼，因為得一個浴室，好友仲要洗衫，然後放啲衫入去浴室度吹乾，所以要嗱嗱臨沖曬涼先！
Kik house
今次好友book咗呢一間民宿，佢係獨立屋，樓高三層，仲有個停車位，附近都係住宅區，所以比較靜，店主都張貼咗告示，叫大家唔好咁嘈，入門口地面呢層，有浴室廁所同一間雙人床房，上一層就係大廳同廚房，仲有洗衣機同一個廁所，洗衣機係冇乾衣功能，所以要洗完衫將啲衫放喺浴室開個浴室寶吹乾佢，客廳張梳化係梳化床，再上一層就有一間房係有兩張床，而另一間係榻榻米房，有張枱仔，應該可以鋪床褥瞓覺，不過呢層就冇廁所，要落返一層先有，而浴室就得一個喺地面，雖然每層樓都有冷氣/暖氣分體機，但係每次最多只能夠開三部機，所以我哋喺廳嘅時候就開廳嗰兩部，瞓覺嘅時候就開地面同3樓嗰部，今次真係要開暖氣，雖然係市區但係都好凍，呢間民宿都幾新淨，煮食工具亦都齊全，不過佢啲工具有啲殘舊，本身都係一啲平價嘅煮食工具，可能用耐咗屋主冇去更新，個易潔煎pan係嚴重花損，應該要買過一個😅其餘嘅嘢都冇乜大問題👍🏻
沒有留言:
發佈留言