2023年5月東京7天遊 Day 1 - 御徒町

又去東京了！近幾日忙忙忙，終於等到放假了！

今次坐國泰，8:10 機，一早搭巴士去機場，5:35上巴士，35分鐘到機場，今次在 A行，寄行李都好快！寄完行李就過𨶹，機場好多人，基本上有疫情前八九成！不過都好快，過完海關就去搵食，先搭無人駕駛去40號閘果邊，去lounge 食個早餐先，食左個雞包、伊麵、雲吞麵，就好飽了！食完野行返去28號閘上機！

飛機在跑道行左好耐，我都瞓著左，起飛時醒一醒已經8:35，即係遲左25分鐘飛，飛左一陣就派餐，我本來唔想食，不過咁耐冇食過飛機餐，又食吓啦，揀左chicken noodle ，唔好食😅食飽又訓左一陣，仲有時間又睇吓戲，揀左套The lost King，睇左大半就降落了！飛左四個鐘，13:39 到達海關，好多人！好多韓國人同外國人，反而國語人比較少！14:20 就過完關，出去搭NEX ，售票處大排長龍，好似話自助機都可以買遊客package，不過見到人龍好長，都有30幾人，雖然佢有四部機，通常D人喺部機度會搞好耐，我見有售票員嘅counter條隊有十幾人，有兩個counter，相對會快過自動售賣機，果然見到自助機果條隊郁得好慢，眼見14:49有班車，仲有25分鐘，好彩用咗10分鐘左右就買咗飛，可以趕得切搭呢班車！

一個鐘就去到東京站，再轉JR搭四個站去御徒町站，即係上野，上野有幾個火車站，分別有京城上野、JR上野、JR御徒町、Metro 上野廣小路同埋大江戶線上野御徒町，撘NEX最方便就係去JR御徒町，而且最近酒店，火車站一出嚟落緊雨！車站行出嚟係一個大廣場空地，旁邊有一間好大間嘅Mont-Bell 有三四層樓高，行過少少就係今次住嗰間酒店，先去酒店放低行李，再出去搵食！

原本想搵一間sukiyaki ，但搵唔到，可能冇左，改左去另一間食鰻魚嘅老店叫做伊豆榮，睇個門面都幾老舊，店內只有幾個客，我叫左個set，除咗鰻魚飯，仲有少少配菜，配茶有蝦、蛋、鴨胸、蒟蒻等等，仲有少少生果，同埋一份鰻魚飯，鰻魚飯冇想像中咁好食，佢係蒲燒鰻魚，燒得唔夠香，魚肉亦都冇乜油脂！

食飽就去附近行吓，好少去上野呢邊，佢最出名嗰條街アメ横，行到過去好多都收咗，冇乜嘢好睇，附近都係食肆為主，而酒店附近有間松阪屋，同埋Parco，兩間都冇乜嘢睇，喺超市買咗三盒咖喱同埋兩包貓零食！跟住就返酒店休息，今日都冇乜點瞓過，好眼瞓！

酒店住後感
Tosei Hotel Cocone Ueno Okachimachi
酒店嘅外型幾新，睇資料2020年落成，酒店門口有一片空地，樓下有一間咖啡店，其實附近都好多間咖啡店，酒店嘅lobby要上一層，見到門口有條樓梯，其實可以旁邊入去搭lift，接待處只有兩個員工，好快就安排到check-in，大堂有咖啡機可以提供免費咖啡或茶，牙刷、梳等可以在大堂取，有提供入浴劑，但係就冇護膚品之類，房就預期中一樣唔會太大，好在有提供樽裝水，張床都幾舒服，我好好瞓！酒店嘅位置離火車站好近超方便，不過附近真係冇乜嘢街好行，如果係志在shopping，就唔多選擇！近近地要去秋葉原就一個站，原本今次都想住秋葉原上次嗰間Mets 酒店，不過佢已經加咗價，貴咗差唔多一倍🤦🏻‍♀️，起碼秋葉原熱鬧好多，又多嘢睇D !