申請回鄉證、Bigpack café

終於搵返舊果張回鄉証，可以申請換張新的喇，先上網做咗預約換証，揀咗網上填表及自助辦理，上網填番一D基本資料，預約左日期同時間，要帶齊四樣野去做自助辦理，1）身分證、2）舊回鄉証、3）相片檢測合格回執、4）合規格的紙質相片，但係乜嘢係回執呢？今日去到現場就知道啦，原來你係一定要在現場影證件相做第四樣”合規格的紙質相片”，原因係一套四張的證件相，印出來的時候，下面有一個條碼，呢個條碼就係回執，即係證明你張相合規格，我早左去到，先去影相，跟住有幾部自助機可以用，但係未夠鐘到我預約嘅時間，所以要等到夠鐘先可以辦理到，嘗試去辦理都係做唔到，一定要你係預約嘅時間先至可以做，坐一陣等到夠鐘就走埋去部自助機，先掃描舊回鄉證，然後掃描身份證，再掃描相片下面嘅條碼（即係回執），然後再要向住部機嘅鏡頭影一張相，我影相嘅時候望住下面D掣，所以影出嚟眼向下望，但係又冇得比你選擇再影過，唯有等一陣辦手續嘅時候睇下可唔可以影過，跟住部機就會比一張籌你，跟住就等叫Number，因為部自助機冇乜人用，所以只有一個窗口係辦理自助機嘅申請，個窗口有人辦理緊，等左一陣之後，果個人完成左就到我啦，埋到去窗口，就係交相同埋交費，職員見到我張相影得唔好，即刻可以影過另一張，因為窗口果度有個鏡頭可以再影相，成個過程包括等候時間只係用咗17分鐘就完成晒走得！真係好快，終於辦理好申請啦，要等十幾日之後先可以攞到張証！

辦理完申請之後，去附近個商場 The forest 搵嘢食，呢個商場嘅設計都幾靚，不過真係比較細咗D，鋪頭唔係好多，而且多數都係賣體育用品，可能因為商場身處波鞋街，入面都有幾間食店，揀咗呢間嘅原因係佢有室外位，其實未行入商場之前已經望到呢個露天座位，入到黎冇乜客人，室外位置有五張枱，三張都已經有人，我叫咗一個芝士雞胸肉配麥包，叫咗杯咖啡，不過杯咖啡好甜，响度坐左陣，因為今日天氣涼涼地，加上頭先涼左一陣冷氣，所以有D凍，雖然天色唔係好好，不過冇落雨，坐喺度都好舒服，呢度主要係食一D意粉，亦都有一D熱烤刨芝士嘅食物，不過佢嘅份量比較多，最少都要二人或者四人份量既食物先有刨芝士食，睇吓下次有冇機會同埋朋友一齊嚟試吓啦！