在樂園出去食晚飯，去左尖沙咀搵食，本來去厚福街 H8果間本陣，後來想起之前去過，跟住諗起之前想去 AVA 對面果間日本餐廳，今次終於走去試，間餐廳雖然在寶勒巷的街舖，但門口很神秘，既看不到店內情況，又沒有人出入，亦只有少量告示在門外，感覺是一間只招呼日本人的店子，我們走近門口時，有人出來招呼，我們便入去看看，店裡很細，只有16個坐位，和六個 bar 枱位，當時只有一枱客四個人，店子的裝修像居酒屋，舊舊地，寫了多款精選的食品在牆上，餐牌也很簡單，以海鮮及剌身為主，亦有串燒和小食，例如魷魚一夜干、激辣鱈魚腸、爆墨魚咀等佐酒小食。
一坐低，店員放了兩碟小食，我們一邊睇餐牌，一邊如快咁食晒碟小食！實在好肚餓！店員介紹是日有新原條鮮魚，是目張魚（唔知係咪咁寫），成條做剌身之後，魚頭尾連骨煮湯，條魚細細條，片出來的肉不算多，味道新鮮， wasabi 是用新鮮手磨的，不會"攻"鼻，煮了的湯有點腥，白色的湯應該不是用這條魚的頭尾來煲的吧，煮白色的魚湯應該要一整條魚吧！食完魚食牡丹蝦，好友上次去日本北海道食過大大隻的牡丹蝦之後，對它念念不忘！所以叫來試試，雖然都唔算細隻，但係當然同日本果D無得比啦！呢兩隻都好鮮甜，蝦頭既膏仲做埋壽司比我地！好味！之後來紅豆蕃薯餅，店員話個紅豆餅唔甜，唔算係甜品，一客有兩個，每個切開兩邊，個餅入面既紅豆好明顯唔係用罐頭紅豆，D紅豆幾大粒較乾身，而且唔甜，配上軟腍腍的黃色蕃薯，好好味！接著是串燒，叫了牛舌和餃子雞翼，牛舌燒得剛剛好，上面洒了椒鹽，略咸，但適合佐酒，所以我們叫了啤酒，是 Okinawa 的 Orion 啤酒，而餃子雞翼皮脆肉 juicy ，很喜歡這兩款燒物！最後是鵝肝石鍋燒飯，原來這個飯是很細的，看石鍋上的那片鵝肝，便知道比例如何，不過這小小的鍋能做到有微微的飯焦，配埋油潤的鵝肝和豉油，好好味！
這裡的食物做得有心思，海產新鮮，環境氣氛很 friendly ，只是坐位有點迫，鄰坐很近，清楚聽到大家的談話內容，要靜一點傾計可能要坐 bar 枱，因為 bar 枱每兩個位都隔開左，會有返D距離，其實佢地有間六人房，在廁所旁邊，房門外仲有部洗衣機，關左房門就見唔到，雖然廁所有冇人都關門，但感覺不太好，順帶一提，這裡的洗手間是傳統日式的.........踎廁!
沒有留言:
發佈留言