2026年3月四人福岡自私遊 Day 5 - 天神、太宰府、Lalaport、天神屋台

今朝又去街角間Mei cafe 咖啡店飲咖啡，今日就唔食早餐，因為陣間要去食Full Full 的明太子法包，我哋去天神嗰間分店，去到9:35未開門，已經有幾個人排緊隊，我哋就排住隊，輪流去隔離便利店兜個圈，差唔多開門嘅時候見到有security 維持秩序😅 因為佢有限制人數入店，如果有兩個人出先可以放兩個人入，因為我哋係排第四，所以第一round就入到去，佢入面有六個座位，你可以坐低食，雖然佢最好賣係明太子法包，但係其他麵包睇落都好正，我哋買咗一條法包再加幾個麵包，喺店入面食，我個人對明太子唔係太喜好，但係好友覺得好好食！可能我食過好多次日本嘅麵包，所以唔會有太大驚喜，佢哋少去日本，所以好多嘢都覺得好正🤭

買完法包，就去地鐵站搭車去太宰府，喺麵包店附近見到Mina商場，原本想去行吓，但係其中一個好友話今晚先過嚟，所以我哋冇行到，就直接去搭地鐵去太宰府！

半個鐘左右就去到太宰府，行去表參道，再入去太宰府摸吓隻御神牛，喺對面行咗一陣影吓相就走，再行返表參道，買少少嘢食，必食梅枝餅、士多啤梨大福，見到呢度都有明太子法包，不過就冇買嚟試，呢度亦都唔少明太子嘅產物，好友就買咗支明太子醬！

跟住搭火車去大橋駅，轉巴士去Lalaport！一去到Lalaport 就見到高達個背脊😆 大家第一時間影咗高達先，之前喺網上見到有張相係在附近一條橫街的汽水機前，可以影到半個高達，所以我哋去搵嗰條橫街，發覺網上嘅相係改過，因為高達影出嚟唔會咁大，改圖應該係將高達放大，汽水機縮細，現實係相反🤣🤣 行返去商場，大家都想食嘢，去咗food court嗰層揀咗間食沾麵嘅，一人嗌咗一碗，呢間叫做玉Gyoku ，個沾麵好食，而且份量好多，我哋食到好飽！

跟住係自由活動時間，各自去shopping，我就冇乜嘢啱，行咗個圈就出去影高達，都咁上下就會合佢哋，因為之前睇咗回程架車幾點鐘有車，所以到咁上下時間我哋就去搭車，佢哋買咗少少嘢，搭返接駁巴士去大橋駅，車站有間Donki，我哋又入去行吓，買咗一啲食物，又可以退稅，搞掂就再搭地鐵返去天神！

去到天神，想去食燒鳥，行咗幾間都冇位，我哋諗住去返Mina 商場行左先，跟住上網睇吓原來佢收八點，我哋去到已經七點幾，所以放棄咗，反而行返去Full Full 買明太子法包返香港食！剛好喺佢關門前買咗，去唔到Mina，就去搵嘢食，頭先經過有啲屋台，我哋想睇吓有冇機會有位，其中有一檔食燒烤，見佢有位，我哋就坐低試吓，不過佢呢一檔都幾逼夾，我哋都坐得有啲迫，叫咗一啲串燒同埋燒鯖魚，叫做體驗吓屋台，食物就好一般，大家都覺得可以睇吓有冇第二檔，所以唔食咁飽，跟住行過啲見到有一檔大檔啲，見佢有位，就坐低試吓，呢一檔坐得舒服好多，感覺亦都乾淨啲，店員多數係女性，見佢有關東煮，我哋就叫咗關東煮、串燒、意粉、蠔湯等，呢間好味啲，所以我哋食得好開心，原本諗住今個旅程都食唔到屋台，因為聽日就要走，點知俾我哋喺天神食到，所以大家都好開心！

食完嘢意外地見到新地標Pixel 樹😅咁就順便影吓相！跟住返去民宿食埋啲生果同薯片，跟住大家要執行李，聽日就要走，歡樂嘅時間過得特別快，開頭諗住六日都夠，而家發覺六日係唔夠😅

 

2026年3月四人福岡自私遊 Day 4 - 柳橋聯合巿埸、海ノ中道水族館、博多駅

今朝我自己一早起身走咗出街，主要係去街口嗰間coffee shop飲咖啡，順便借個廁所，雖然民宿有廁所，但係沖水系統唔係太夠力，所以想飲咖啡順便借佢哋廁所，飲完返去join埋好友就出去！今日落雨，同日本天文台預告一樣，話咗今日落雨就落雨！

第一站我哋去扭橋聯合市場，其實係喺民宿附近嘅一個魚市場，佢哋因為今朝冇飲咖啡，所以個個都未瞓醒，去到魚市場先問吓附近有冇咖啡店，搵到有兩間都未開，唯有去咗魚市場先，呢個魚市場好細，都有少少遊客，多數係香港人，我哋見到有一檔賣生蠔，好似好正，買咗兩隻試吓，因為好大隻，好味！跟住就搵咗一間食海鮮丼嘅店舖，叫做勝かぬかつ食堂，要等位，等咗半個鐘左右就有位，裏面只有八張枱，全部都係香港人😅我哋叫咗兩個海鮮丼，一個炸豬扒飯，個炸豬扒飯出乎意料之外地好食，外皮脆，肉好Juicy！好好食！食完之後，好友又話想食生蠔，所以佢買咗一隻食，我就買咗啲茶葉，佢哋又買咗啲零食做手信！又買咗少少生果，我哋決定返一返民宿先，放低啲水果先再出去！

沿路搵到一間咖啡店，叫做Tagsta espresso stand，店入面一個人都冇，只有我哋幾個客，見到店裏面其實有一個展覽空間，放緊一啲類似藝術品嘅嘢，我哋一人叫咗杯咖啡，得我嗰杯係用瓦杯，佢哋其餘都係紙杯，所以只係影咗我杯咖啡！

返民宿放低啲生果，就搭的士去博多站，去到車站都好熱鬧，有個RoadShow做緊推介九州食品，我哋望咗一陣就走，去搭鹿兒島本線，去到香椎站，轉香椎線，去海ノ中道水族館！都要搭成個鐘頭車，去到水族館嗰個站，都要行一段路，呢個時候仲要橫風橫雨，去到水族館都濕晒，最搞笑我哋去到有個燈位，我同一個好友過咗個燈位，另外兩人過唔到要等下一轉燈，我哋就先行去水族館，因為太大風大雨所以唔等佢哋，最好笑我哋行到去水族館仲未見到佢哋，所以我哋去買飛先，原來Miss咗個燈位要等4-5分鐘咁耐😅

水族館入場費¥2,500，入到去先上去睇表演，好多年都冇睇過海豚海獅嘅表演，去到啱啱好有一個場次，所以先去睇咗表演先，個表演差唔多半個鐘先至完，跟住就行水族館其他地方，睇魚嘅館就唔係好大，兩層樓高又唔算好闊，最大嘅魚類只係鯊魚同埋魔鬼魚，跟住行去其他地方睇，有一個位置係睇企鵝，旁邊有個位可以餵海獅，佢有啲locker咁嘅位，每一格都有一兜魚仔，收費¥500，有六條魚，我去威海狗，海獅都好醒目，楝咗喺度唔郁，其他海獅又唔敢埋嚟，所以成兜俾佢食晒😅 跟住又去睇海龜，仲有一啲海洋生物，我哋全程用咗兩個半鐘，行晒成個水族館！

搭返火車出去博多站，跟住搭的士去搵Workman Plus，去到見到有四個香港女人買緊衫，佢哋買咗好多，我哋都唔少嘢，可能我去過幾間 Workman Plus，呢間算係細間，佢哋三個第一次嚟，完全失晒控！因為呢個品牌主打有功能嘅服飾，例如夏天防曬降溫功能嘅衫褲，好啱佢哋，所以佢哋喪試衫褲，我就只係買咗一頂降溫帽同一套抗疲勞睡衣，因為之前買咗套長袖，而家夏天有短袖同短褲，佢哋買到唔多願走，但係見到嗰幾個女人準備俾錢，因為佢哋買好多，我哋驚等好耐，而且我哋三個都揀完，所以我哋就走，不過一個好友仲未買完，我叫佢下次自己去買，因為佢五月會再去日本，仲要係自駕遊，到時可以慢慢揀！

買完衫出到嚟，接唔到的士，因為落雨又撞啱放工時間，於是我哋call Uber， call完車要等10分鐘，所以去便利店行一陣，出到嚟就有車，返番去博多站！行OIOI ，然後喺商場嘅喜水丸食晚飯，之前有KOL介紹過呢間，老實講，我覺得佢好普通， food court嘅質素，唔建議去食，食完飯我哋就去大国藥妝店買嘢！

返到民宿，洗埋今朝買嘅生果嚟食，仲有新買咗兩包薯片，又開埋嚟食！