2025年六月大阪自駕遊 Day 6 - 六甲山、淡路島、神戶、鶴橋

今朝瞓醒，九點去廚房整埋個早餐食，跟住就要執嘢走，因為10:00要check out !

跟住揸車去咗附近嘅六甲山公園展望台，去到見到泊車同埋入去展望台都要俾錢，睇地圖呢度有幾個地點，都係一啲觀光同埋展覽介紹，我哋興趣唔大，所以淨係去咗買手信，然後就揸車走，過去旁邊嘅六甲山頂纜車站，原先想話搭纜車來回一轉去有馬溫泉，但係計一計時間唔係好夠，因為我哋訂咗枱食晏，仲要揸車過去，所以最後都冇搭到纜車！因為過到去一定要行一陣先至走，所以唔夠時間！

跟住揸車過去淡路島，兩年前同另外一班朋友去過，仲想去條橋上高睇，今次我哋就唔上橋，淨係路過條橋，直接過去食pancake，冇錯，係同上次嘅行程係一樣🤣 經過條橋嘅時候開始落雨！我哋過咗條橋之後就去到淡路島SA休息站，同上次一樣，呢個休息站係非常之大，亦都有摩天輪，又有Starbucks，好大間手信店，亦都好多嘢食，我就幫襯咗Starbucks飲杯咖啡，又買咗啲手信，我哋買咗幾串串燒上車食！

跟住去訂咗枱嘅幸福pancake，不過嚟到嘅時候都幾大雨，所以我哋叫咗嘢食先，買完嘢食等緊嘅時候，我就叫佢哋去打卡位影相先，因為嗰陣啱啱停咗雨，我因為上次已經影咗，所以我就留喺度睇住啲嘢，轉頭食完嘢先去影相，佢哋影完相返嚟啱啱好有嘢食，我哋四個pancake四杯飲品，我食完之後想出去影相嘅時候，佢又再落雨🥹 所以本來想影天國的階梯，都上唔到去影😅

食完嘢之後，喺店門外有間賣financier 費雪蘭蛋糕，佢有好多隻味道，你可以自由組合，店員都好識做，又比我哋試食，不過呢啲蛋糕唔擺得耐，所以我只係買咗兩盒俾自己同屋企人，買完就揸車返出去！

跟住去左附近一個叫做あわじ花さじき嘅花園，呢度有兩個花田，一個係薰衣草另一個唔知係叫做乜嘢花😅 可惜又落雨，所以匆匆忙忙影幾張相就入返室內，又係買手信嘅時候，我哋又買咗啲嘢食，因為而家喺淡路島，佢最出名嘅洋蔥，所以好多洋蔥相關嘅產品，我就買咗洋蔥湯粉！

揸車過去神戶，喺海邊影吓佢嘅地標神戶塔，我記得疫情之前同阿媽去過大阪，都有嚟呢度，跟住喺商店街嗰度見到上次喺度買咗個袋，嗰間舖頭仲喺度，跟住見到一間卡樂B專門店，梗係要買返啲薯條啦，難得有咖喱薯條，一定要買返盒🤣 跟住我哋又入去商場行吓，搵咗間3 coins ，因為好有話要幫屋企人買把遮，話好輕身，我哋睇咗輪都搵唔到，跟住無意中又喺第二個位見到又有遮，仲要有佢想搵嗰把，見佢咁輕身我哋一人又買一把🤣

傍晚揸車去鶴橋站，因為今晚book咗食燒肉，係我哋之前去過嘅あぶりや燒肉放題，今晚呢度冇乜客，得嗰兩三台，上次嚟仲好熱鬧，今次就靜咗好多，人少少就食得開心啲，我哋都叫咗好多款唔同嘅肉，最重要係佢哋嘅甜品，今期嘅甜品都唔錯，而且個樣都好靚，每次嚟食燒肉都必食！而家每位都係¥4,580，我哋九年前第一次食係¥3,480食到而家🤣🤣 今晚終於可以早少少返酒店了，因為聽日我要走喇！

2025年六月大阪自駕遊 Day 5 - 神戶、六甲山

今朝瞓晏少少先至出門，直接揸車過去神戶，去咗神戶三井outlet，行咗個圈冇乜嘢啱，跟住去咗AEON mall 度行吓，同埋準備買嘢食今晚去glamping嘅時候食，我哋喺超市買咗可麗餅食頂住肚先，留肚今晚食😆 呢度間超市都幾大，都幾多嘢買，我哋揀咗啲牛肉、蝦、蟹、蔬菜，因為本身Glamping都會有嘢食供應，不過我哋自己加嘢食，買完嘢之後就開始出發去六甲山！

揸咗差唔多成個鐘頭車先去到，先去check-in，放低野之後我地四圍參觀，狂影相！呢度可以燒花火，仲有得賣，不過當然係貴啲兼夾得一款，冇其他選擇😅 而且可以放嘅位置只有附近嘅一個迷你籃球場，嚴格嚟講係一小片空地有個籃球架，其實旁邊係垃圾站，我哋等到天黑先至去燒，因為隔離幾間屋都有小朋友，所以我哋都唔可以太嘈😅呢度供應嘅食物質素就唔算好高，普通貨色，份量亦都唔算好多，好彩我哋買咗好多其他嘢食，所以食到非常之飽！

酒店住後感：
Glamping Dome Kobe Tenku Spa Suite 
呢度全部都係半圓形嘅Glamping屋，而且顧名思義佢係有Spa，我哋住嗰間係叫做 Dubhe，呢度大概有18間屋，全部都係白色半圓形，睇得出有大有細，分開咗兩邊，一邊有七間另一邊大概十一、二間，我哋住七間呢邊，對面有幾間都係可以俾寵物住，不過今日就唔見有寵物，所以嗰幾間都冇人住，另外兩三間就有一家大細有小朋友，我哋嗰間係明顯比佢哋高少少，一入到Glamping屋，個個都哇哇聲，呢度有四張床一字排開，有張梳化對住個窗，呢度亦都有啲玩具，例如投影機、棋等等，喺側邊有個門行出去，就係洗手間同浴室，另外仲有一個木嘅浴缸裏面已經有水，行出去露天嘅地方，有個桑拿浴室，有個銀色嘅金屬盤愛嚟俾你浸凍水，又有一個火爐，而喺入口嘅側邊就係廚房，裏面嘅設備好齊全，有個燒烤爐、雪櫃、飯煲、廚具等等，整體嚟講環境都好唔錯！而且啲Glamping屋都幾新淨，我諗佢開咗唔係好耐！

2025年六月大阪自駕遊 Day 4 - 梅田、我孫子

今朝瞓醒冇食早餐，亦都冇揸車，我哋直接搭火車去梅田，因為好友話梅田嗰邊泊車應該都貴，去到梅田，喺火車站附近嘅幾個商場度行街，行到咁上下，就去咗食嘢，原本係想食我上次食過嗰間鰻魚飯，但係排晒長龍，所以放棄咗，喺商場附近見到有一間食丼嘅，叫做もつ焼ウッチャン ，其實佢類似居酒屋咁樣，亦都有串燒食，不過可能午飯時間，所以主要係賣丼，我哋每人揀咗一款，另外加咗啲串燒，味道都唔錯，店入面嘅裝修有好多舊嘅電影海報，唔少係李小龍嘅電影海報，可能店主係fans 😄

跟住繼續行街，去咗一個商場，因為嗰度做緊高達嘅Pop up Store，去到先知原來要預約先入得，雖然店入面冇乜人，但係都係唔俾人Walk in🫠 好友唯有上網預約，但係仲要抽籤，唯有等消息，旁邊有間售賣萬博紀念品嘅商店，見到一個Badge 都幾靚，所以都買咗！😄

再繼續行街，又去咗另一個商場，裏面有幾間賣日本各地嘅食物嘅商店，我哋最鍾意就係北海道嗰間，見到之前好友買俾我嘅蜜瓜蛋糕，不過我覺得佢太甜，所以冇再買，另外買咗啲咖喱，有我鍾意食嘅芝士咖喱，即刻買返兩盒，又買咗支豚肉汁，呢度仲有蜜瓜雪糕賣，即刻整返個蜜瓜牛奶雪糕，呢兩樣都係北海道嘅名物🍦😋

行完街我哋搭火車去一個叫做”我孫子”嘅站，因為今晚訂咗枱喺呢度食飯，呢度附近有條商店街，不過冇乜嘢行，而我哋今晚食飯嗰間飯店斜對面，有間賣蛋糕嘅餅店 florence ，入邊啲蛋糕好靚，我哋入去睇吓，亦都有啲蛋卷曲奇之類嘅嘢買，我哋又買咗少少，不過就唔食住，因為陣間要去食燒肉，所以唔食咁飽😅

今晚要去食嘅燒肉店叫做 ハヌル，係韓式和牛燒肉店，店入面嘅地方唔係好大，所以一定要預約，我哋叫咗八種稀少部位和牛、又叫咗牛肝同牛肉嘅刺身等，喺八種稀少部位裏面我哋揀咗有一種可以重複叫，メス牛イチボ 同埋特選厚切鹽燒牛舌，呢個牛肉同牛舌真係好好食 👍🏻👍🏻食到好飽，好正！好友仲叫左碗韓式冷麵食👍🏻

食完飯喺附近行吓街，見到有間超市，入去行咗個圈，我就冇嘢買，見到佢有花火賣，原本想買返幾包聽日去Glamping 燒，但係又驚嗰度唔知俾唔俾燒，所以最後冇買到！跟住就揸車返民宿，執定少少行李，聽晚去Glamping !