2024年10月東京七天生日之旅 Day 3 - 中目黑 Starbucks、銀座篝拉麵、Le café V、鳥貴族

今日早返少少起身，出去中目黑朝聖 Starbucks Reserve Roastery ，我地行去小伝馬町站搭Metro 日比谷線，坐到總站就係中目黑！由東口1出口出嚟，過馬路去對面間冬甩店後面，沿住條河(其實應該係渠🤣)一路行到去南部橋，中間行咗大概八個路口，每個路口都有一條橋，沿路都有少少餐廳，一路都見到好多人踩單車，可能因為今日係星期日，Starbucks 門口有一個交通管制人員，可能驚D人影相影到行咗出馬路，我哋入去睇吓嘢影吓相，見到今期嘅精品都幾靚，先去行吓每一層，最後行咗去第三層，有酒吧嗰一層，都仲有一、兩張枱，買嘢食就要排隊，不過都係排幾個人，我哋買咗兩款麵包同埋兩款咖啡，然後坐咗出去outdoor嘅位，今日天氣太熱，所以坐室外都幾舒服😌我哋都坐咗個半鐘先至走，走之前當然要shopping，買咗咖啡豆，又買咗隻杯送俾我同事，走嗰陣見到已經要人流管制，要攞飛等候入場 😱好彩我哋早嚟，上次都係一早嚟先至會少人D，唔知點解好多人鍾意晏晝先嚟🤔

沿着頭先嗰條河行返轉頭去火車站，今次行對面嗰邊條路，行過一間朱古力店叫做 Green Bean to bar Chocolate ，呢度有啲堂食位，因為佢有朱古力蛋糕，我哋就買左少少朱古力🍫，行出嚟嘅時候開始落雨，行返去地鐵站搭 Metro 日比谷線，出返去銀座！

先去食篝拉麵，去到只有六個人等緊位，所以等咗大約廿分鐘就入得，叫咗兩個雞白湯拉麵加味玉，水準依舊好食，出返嚟嘅時候，門口竟然有廿幾人喺度等緊位，好彩食得早！

食完就行返出去大街中央通り，今日係星期日，所以銀座嘅中央通り係改咗做行人路，只有星期日先至可以企喺呢條馬路中間影相😄 又去 Uniqlo 朝聖，今次一心去訂製自訂繡花圖案嘅袋同埋T恤，之前想訂但佢話要等幾日，今次去問佢話要等三個星期😅，不過冇問題，下個月都會再嚟，到時先再攞，原本諗住喺落訂單嘅時候先至揀要乜嘢產品，點知原來佢嘅程序係先買咗產品，再攞件產品去Service counter，話俾佢聽你要乜嘢圖案，跟住釘喺邊個位置等等，所以我哋去問完又再落返去買嘢，買完嘢又再上返去，上到去嘅時候又有第二個客落緊訂單，但係佢只有一個人做嘢，呢度就等咗好耐，到我哋整嘅時候一樣係好耐，因為佢要反覆確認你釘邊個位，又要用膠紙固定晒啲位置，再喺電腦入好多資料，如是者喺UNIQLO嗰度折騰咗兩個鐘😭

原先諗住去LV食個tea，因為喺UNIQLO搞咗好耐，所以最後我哋決定兵分兩路，一個去攞位一個喺度繼續落單，喺LV攞完飛之後，又出返去中央通嗰度坐低等吓，等咗差唔多半個鐘先至有位，因為距離午餐唔係好耐，所以我哋只係食咗兩款甜品，同埋叫咗兩杯嘢飲，坐咗一個鐘左右就走！

跟住去行街，去左三越百貨嘅 FANCL度買supplement，行多一陣間就開始落雨，於是我哋去搵嘢食，去咗附近嗰間鳥貴族，之前一路都想試，但係一路都冇試過，今次就決定去試吓，去咗有樂町嘅分店，上到去要等位，等咗差不多一個鐘先有位，我哋坐嘅位都比較熱，因為對正個爐頭，又近住個廁所，今日食拉麵同埋去LV都係坐近廁所位，今餐都唔例外😅呢度用平板電腦落單，我哋揀咗幾款雞嘅串燒，有雞腿肉、雞翼、西京燒汁雞、雞肉丸等等，總之全部都係雞🤣🤣 只係唔同嘅醬汁，最重要係佢多數係每碟都有兩串，而價錢只係¥370 一串，性價比都好高！食完嘢都比較夜，所以今晚我哋搭的士返酒店，因為酒店喺新日本橋，由有樂町返去唔算好遠，都係搭咗¥1,600！今晚冇去便利店，因為搭的士直接返咗酒店休息😂

 

2024年10月東京七天生日之旅 Day 2 - 田原町、淺草、Skytree

今朝瞓到自然醒，就係自由行嘅最大優點，唔使急趕去追行程，瞓醒覺就出去，搭地鐵去田原町，我哋要行過去三越前站搭 Metro 銀座線去田原町站，一出地鐵站經過APA酒店，就去APA 樓下果間 コメダ珈琲食個早餐😄，過咗早餐時段，所以買咖啡冇多士送，我哋就叫咗一個今期季節限定嘅番薯🍠麵包，叫一個share食，因為佢杯咖啡都幾大杯，飲完咖啡就去行合羽橋商店街！

大家都諗住唔會點樣買嘢，因為屋企真係冇位，所以純粹睇吓，不過去咗一間專賣咖啡用品嘅商店 Union，佢有一D咖啡豆賣，所以都買咗少少咖啡豆，前前後後行咗三個鐘，跟住就行過去淺草寺果邊

經過淺草金半壽喜燒，見佢落咗場，今次冇機會幫襯，行過對面，見到有間鰻魚店叫做淺草うな鐵，就入去食晏，店入面有兩層，每層嘅地方都唔算好大，大概一層只有20個座位，店員叫我哋上樓上，樓上只有兩枱客，呢度除咗鰻魚飯，都有少少串燒，我哋每人叫咗一個鰻魚飯，叫咗雞同埋蔬菜兩款串燒拼盤，又叫咗兩杯橙汁汽水，呢度嘅鰻魚飯係蒲燒鰻魚，鰻魚燒得好靚，好好味，串燒亦都做得好好，雞串燒拼盤有雞翼、雞腿肉、同埋免治雞肉，好食，我比較喜歡食日本嘅雞肉串燒，佢哋都燒得好好食，而蔬菜串燒就係蒜頭、冬菇、白果、青椒仔，今餐整體嘅味道都好滿意，好食👍🏻👍🏻👍🏻👍🏻

食完飯沿住伝法院通行，經過一間叫做Canelé et Crème Glacée 的甜品店，主要係賣法國甜品 Canelé 同埋雪糕，叫左兩個試吓，個Canelé 外皮略為硬咗D，雪糕亦都唔係特別出色！味道不過不失！

繼續行去淺草寺嘅仲見世通，去影吓雷門，行咗一陣就搭地鐵過去押上站 Skytree，在Skytree行吓街睇吓嘢影吓相，行咗哈利波特專門店，又去咗比卡超專門店，今日都冇收穫冇消費，今晚諗唔到食乜嘢，所以決定返酒店自己煮✌🏻

我哋搭返Metro 半藏門線，直接返去三越前站，就去三越百貨嘅地庫買食材，呢間三越入口大堂擺咗個好巨型嘅擺設做緊展覽，我哋直接落去超市，超市唔算好大，加上時間已經六點幾，食材都賣得七七八八，我哋揀咗一款刺身，一款螺，再買咗支壽喜燒汁，同埋買咗D牛肉，再加一D菜、蒟蒻同水果，我哋揀咗三款唔同級數嘅牛肉，最平係國產和牛，跟住係神戶牛，最貴係松阪牛，就試吓三款牛嘅分別，行返去酒店好近，返到去好似返屋企咁， Hea低晒啲嘢，放晒啲食物入雪櫃， Hea一陣先至煮嘢食，因為食材簡單快捷，我哋用個煎pan煮咗壽喜燒汁，一滾起就落牛肉，煮一煮就食，食完先再煮第二款，煮吓食吓，三款牛肉當中，我覺得神戶牛同松阪牛質素差唔多，松阪牛再好少少，兩款都好好食，早知唔好嘥錢買國產牛，直接買最靚嘅就得！因為都俾呢兩款牛肉比下去 🤣🤣 煮埋啲菜同埋蒟蒻，再食埋D咁多問題刺身同水果，都好飽！今日嘅行程都好輕鬆，對腳亦都唔係好攰 👌🏻

 

2024年10月東京七天生日之旅 Day 1 - 新日本橋

已經多年沒有和姊妹去旅行，難得今次可以一齊起行，今次搭香港航空，今日 9:15 機，撘 N 車去機場只係$23.8 ，搭五點幾果班尾班車6:45 去到機場，今日天氣有點涼，著一件薄長袖有點凍！今朝掛左一號風球潭美，風勢唔大，應該可以正常起飛，因為舊年去大阪返香港果程機3號風球一樣照Landing😅去到機場先去寄行李，跟住即刻過關食早餐，去咗Beef & Liberty，叫左個漢堡，食完再慢慢搭車過去閘口！

航班如常起飛，今次竟然有飛機餐提供，之前搭香港航空只係得一個麵包同一支水，今次有個早餐，雖然係一個點心比較簡單，但係都叫做回復正常供餐！去到成田過關都算快，過關後去買NEX 飛，排隊到我哋嘅時候已經係15:40，趕得切 15:44 班車，唔使等半個鐘！😅

一個鐘頭就去到東京站，例牌喺東京站裏面睇吓嘢，然後轉總武線，原來就喺我哋頭先落車嘅 NEX 月台對面，又要落返去嗰層，上咗車之後等咗成10分鐘先開車，其實我哋只係搭一個站，去到新日本橋站，搵到最近酒店嘅出口，但係呢個出口要行樓梯，好彩我哋嘅行李篋唔重，下次搭車先再去搵吓有冇𨋢搭，等回程可以搭𨋢，行去酒店只係幾分鐘，就喺車站出口後面，好近，入去酒店check-in，放低行李之後，即刻出去搵食

之前上網search咗一間燒肉店，喺酒店附近有幾個叫做 Coredo 室町 1-3 三個商場，不過燒肉店唔喺商場度，喺對面街入面，呢度附近好多食店，呢間燒肉店叫做 肉の切り方，我哋叫咗兩個燒肉set，¥5,300 一位有十款牛肉，另外叫咗一碟菜，同埋兩杯梅酒，原本想叫多個厚切牛舌，但係店員話賣晒，而我哋個set入面都有兩片牛舌，餐牌寫住係厚切，但係我覺得佢係薄切😅店員有個牌話俾我哋聽唔同嘅肉點乜嘢醬料，不過個牌都唔係好match啲牛肉嘅排位，所以我哋都冇理，個牛舌都唔錯，如果係厚切就更好，跟住嘅牛肉都好好味，牛味好濃，呢度係用近江牛，好好食，梅酒亦都好飲，呢餐真係唔錯👍🏻 之後再追加兩片牛肉薄燒！

食完飯我哋行返酒店，見到附近有個鳥居⛩️，有個公園仔，可以影吓相，然後例牌要搵返間便利店睇吓有冇甜品啱，不過今日冇乜嘢啱食，淨係買咗兩樽水同埋兩包生果返酒店，其實酒店有水煲，不過唔係好敢用，所以都係買樽裝水算，反正買大支裝嘅水係好平，都係around ¥100 左右，平過香港好多！

酒店住後感 ：

Monday Apart Premium Nihonbashi
Monday 高級公寓日本橋
自從上次同好友去東京住上野，好友住呢一間酒店嘅分店，就覺得呢間酒店式公寓好正，所以今次又再租，而今次呢間位於新日本橋站，由最近嘅地鐵出口行過去，只需要兩三分鐘，酒店喺後街，附近亦都冇乜店舖，所以比較靜，起碼唔會比噪音嘈醒， check-in好快手，職員會比兩組密碼你，一組係搭𨋢嘅時候要輸入密碼先至可以搭𨋢，另一組就係房門嘅密碼，話夜晚12點後就冇職員on duty，亦都要入密碼先至可以開門入嚟，而且住密碼嘅紙， check out嘅時候要俾返佢，上到房見好新淨，一入門口就係廁所，旁邊係浴室，浴室對面係爐頭(廚房)，有雪櫃、微波爐、小焗爐、電飯煲、水煲、咖啡機、煎pan、餐具等，浴室入面亦都有洗衣機，再行入去有餐枱同兩張床，餐枱張梳化可以改做床，上面亦都有一張可以拉落嚟嘅碌架床，我哋兩個人，就唔使瞓呢兩張，直接瞓兩張單人床，張餐枱都好大，我哋可以擺晒啲嘢喺枱面，好方便！