2023年7月八人同行自駕大阪之旅 - Day 5 奈良鹿公園、門真三井 Outlet

結果尋日流左成日汗疲累嘅一天，今日嘅行程要輕鬆一D🤣 今朝比多兩個鐘大家休息！十點先出發！😆

今日去奈良餵鹿，揸車揸左40分鐘左右，先去入油⛽️，跟住再去搵間 coffee shop ，經過一間コメダ珈琲店，入去買外賣，店員送左幾包細細包嘅花生比我地，類似魚皮花生，我冇食，佢地話好食，店內有D一大包入面有100包細嘅花生賣，佢地話要買嚟做手信，呢間 coffee shop 有好多分店，可以之後再搵吓！

去到奈良泊低車已經12:00pm ，行去東向商店街，就在近鉄奈良駅旁邊，因為我地目標係食拉麵，所以直接去拉麵店，呢間叫做元喜神的拉麵店，好友之前去過，所以帶我地去食，佢都要等位，不過都好快有位，佢呢度最出名係雞白湯沾麵，食完沾麵可以加飯🍚落湯煮，每張枱都有電磁爐，可以自行加熱，我地又要分開兩張枱，除咗叫拉麵，佢呢度有古都華士多啤梨汽水，大家都叫嚟試吓，因為古都華士多啤梨出名好食😆我就冇食沾麵，因為份量太大，淨係食湯麵，個雞白湯好好味，唔怪之得咁多人排隊！佢地食完麵再食飯，仲有炸雞 🍗 好飽🤣🤣 食左一個鐘，出返去奈良駅，沿途見到有雪糕店，大家都食左杯雪糕，去到車站，見到有人擺檔賣手畫卡通鹿，亦可幫人畫寵物個樣，都好得意，好友就叫人幫佢畫佢個公仔，晏啲先至返嚟攞！

我哋跟住去鹿公園，今日仍然好熱🥵，我地買左D鹿餅餵鹿🦌🦌鹿公園分左兩邊，近國立博物館果邊，D鹿好多都食飽咗，餵佢哋都唔食😅 行返去有商店街同人力車果邊，D鹿就好似好餓咁，好Chur，仲咬我哋件衫，叫我哋快啲餵佢地😅 小朋友都比佢哋嚇親！唔敢餵佢地！所以冇再買鹿餅餵佢地😅在鹿公園行左近兩小時，先去返奈良駅攞返幅卡通畫，再去門真！

由奈良過去門真，都要揸車一個小時多D，今次係去門真三井 LaLaport outlet ! 呢個新商場，真係要揸車去方便D! 我地去到 outlet 即刻去超市，因為已經五點，超巿好多人，扒類選擇唔太多，拿拿聲揀幾款牛扒、刺身，呢個超市冇冷凍 locker ，但有冰提供，我地好快手pack 好野，將食物放普通 locker 存放，然後分開去 shopping 約定八點集合，我同好友去買 T shirt ，在 Adidas 遇見好友，我哋一齊買左波鞋，買完差唔多夠鐘，再去買D串燒外賣返去，返去民宿都要成個鐘！

大廚👩🏻‍🍳先炒左雞肉同豬肉，再煎牛扒🥩，叮返熱D串燒，9:50 先開餐 ！好好味又平！大家食得好開心！😆😆飯後食埋D金奇異果🥝

洗完碗沖埋涼已經十二點幾，幾位女士一齊敷mask 🤣 話要成班女，一齊做吓呢D野，先係好朋友去旅行應該做嘅野，仲要影相留念 📷😆😆可惜有一個瞓左，爭左一個😅

 

2023年7月八人同行自駕大阪之旅 - Day 4 環球影城

嚟到成個旅程嘅重頭戲，環球影城！

點解咁重要呢？因為團友們都有玩 Mario 呢個遊戲，我又睇咗呢套電影，所以好期待入去呢個園區！所以我哋一早買咗花pass，但係D時間唔係太理想，所以我哋決定一早衝一轉入去！

樂園正式係9:00先至開門，我哋7:00就出發，直接揸車入去環球影城，個停車場離開入口都幾遠，大概都要行10-15分鐘！我地7:45 去到樂園入口排隊等入場，上次我差唔多9:00入嚟都可以去到Mario，今次要再早啲，因為撞正暑假好多人！我嘗試喺入口用 App 攞整理券，但係攞唔到，一定要去到園區門口先至有得攞🤦🏻‍♀️ 八點開始入場喇！大家衝呀！成班好似速龍咁，好好笑！我哋衝到去Mario園區入口，已經要攞整理券🥹，我相信係依家冇得直接入園區，所有人都要攞整理券，所以我哋即刻用app 攞，都攞到9:20 ! 咁大家就take 個break休息一陣，因為頭先衝得太勁，個個成頭大汗！😂😂 搵左間未開門的餐廳，坐一陣先再行過去！

我哋早大概10分鐘行過去，因為好多人排隊入園區，我哋排到去啱啱好夠鐘，就可以入去了！我地一入去就衝去餐廳攞券！因為餐廳都多人，不過攞完張券，其實15分鐘後可以入，我地周圍影吓相，好快就可以去餐廳了，入到去要排隊買野食，我地幾乎每款食物都叫一碟，叫到成枱野食！😅 影相都影左半個鐘！食物質素普普通通，唔會有驚喜😅，我地都食唔晒！😂

食飽去行吓 shop 影吓相，然後出返去入口付費影相區，呢到有人幫你影相，set 好晒機，當然可以幫你用你自己部手機，不過佢話限影一張，都係想你幫襯佢買相，我地一定要買，等晏D用 fast pass 入嚟先買！

影完相已12:15 pm ，我地個 fast pass 去第一個遊戲係 Doraemon ，時間係11:50-12:20，遲左幾分鐘，都可以入，先放低野在 locker ，因為呢個係戴VR 玩嘅過山車🤦🏻‍♀️，不過唔係好激果種 😅

現完 Doraemon 又急急腳去返 Mario 園區，我地 fast pass 入園區時間係 13:10 之後，而玩 Koopa’s challenge 就13:30 ，如果唔係朝早衝左一轉，真係唔夠時間！雖然有 fast pass ，都要排一陣，呢個雖然好似打機咁，但加埋視覺效果很好👍🏻係好玩嘅，13:30 入去玩完出嚟都14:00 了，即刻去買相先，揀相又攪左一輪，佢呢度買2張相連套及 down load soft copy 都係￥1500，抵呀！我地一人揀一張團體相再share soft copy ，然後揀張個人相！好靚，買完相，又要趕去 Harry Potter 😅因為 Harry Potter 14:30 可以入（其實Harry Potter 園區冇人流管制) 14:50 -15:20 玩 Forbidden Journey ，有幾個好友在 Mario 園區買野遲少少先過嚟，我自己過左去玩先！

玩完出嚟，好友一家三口過左嚟，佢地小朋友唔夠高玩，我就幫佢睇住小朋友，佢哋入去玩，我同小朋友去玩魔杖互動魔法區，我買左支魔杖，同小朋友玩，要念咒語同跟導師動作施法，D機𨶹先有反應，小朋友就好鐘意，大人就覺得諗咒語好攪笑🤣

玩左一陣好友就出返嚟，交返小朋友比佢地，我就玩多次 Forbidden Journey ，用小朋友張 fast pass 玩，出返嚟之後其他團友都到左，又等佢地去玩，出返嚟先至一齊去影合照😆

跟住 take 個 break ，在街上買隻雞脾食，坐吓休息一陣，然後繼續玩埋最後一個 fast pass ，可以揀 Spider-Man 或者 Jurassic Park 坐船，冇限時間玩，大家唔想濕身，所以揀 Spider-Man ! 

玩完 Spider-Man 已經5點幾，再去排 Minions ，要排70分鐘，實際排左45分鐘就玩得！玩完出嚟去 shop 行吓，七點幾團友們已經疲態盡露😂

最後衝刺大家自己去 大街D shop 買野，我都要買手信，然後再會合各人，八點就走喇！再要行去停車場，個個冇晒 energy 😅😅

揸車返民宿，先去附近搵食，大家唔想花時間搵，求其食壽司郞，點知好多人，可能好多同我地一樣在樂園出嚟，近近地食算，見咁多人就諗住叫外賣，揀緊野食時，見佢叫 number 又好快！所以都係堂食，又要分開兩張枱，食飯時小朋友成餐飯都在扭計，令好友兩公婆好嬲！小朋友又爆喊🤦🏻‍♀️ 擾攘咗一陣先攞車返去！返到去大家都筋疲力倦！拿拿聲冲涼瞓覺！😅

2023年7月八人同行自駕大阪之旅 - Day 3 淡路島幸福 Pancake、明石海峽大橋塔頂體驗、心齋橋

今日8:00 出發🥱🥱團友都有小小遲😏，第一站要去淡路島，預計要個多小時車程，揸左個半鐘，見到明石大橋，一過左橋先去一去休息站，呢個淡路休息站，有個摩天輪！風景好靚，有間 Starbucks ，我地因為要去食 Pancake 所以唔買野食同野飲喇！
影左一陣相，就繼續行程！

我地去幸福 Pancake ，沿途見風景唔錯，仲有大風車，呢個島周圍都好有度假區嘅感覺，沿海仲有D度假小屋，好靚！

間幸福 Pancake 開10:30 ，我地10:22去到，停車場在餐廳對面，呢度頗多人泊車及過馬路，有工作人員指揮交通，餐廳好大，外面已經有兩個打咭位，一個教堂鐘、一個韆鞦，仲有隻遊艇，我地先去攞位，有室內或室外，如果淨係食 pancake 就坐室內，如果食意粉果D，就可以坐室外，我地揀左室內有冷氣😅，但呢度冇大枱，全是四人枱，我地分左兩枱，我地一攞完枱就四散出去影相，留低一兩個坐低等，大家失晒控🤣🤣🤣🤣，因為剛開門，所有打咭位冇人，所以大家衝晒出去影相先，除咗門口外的教堂鐘和韆鞦，呢度最出名打咭位係 “天國的階梯”，係一條白色樓梯，有個門框，因為在海上，影出嚟幾靚，另外仲有個大圓圈，呢個就普通D 😅

我地影左一輪，就接替其他好友去影，然後先落 order 叫野食，呢度每張枱上都有個數字牌。用嚟落 order，要去門口部自助機落單，先 scan 數字牌上的 QR code ，再揀野食比錢，Pancake 有咸有甜，我地各叫左D，上餐都頗耐，大家影完相先食，見到越來越多人，打卡位都要排隊，好彩我地拿拿聲影左先，如果唔係又要花時間排隊😅

走嘅時候在店外的教堂鐘影埋相，先至去攞車，走果陣已經12:00 ，跟住去明石大橋，我哋預約咗上橋頂， 1:20先開始， 1:00去集合，12:30 左右去到集合點，尚有時間，就在集合點旁邊嘅公園影吓相，影下大橋，今次上呢條橋，原本想全部人一齊去，但係好友個女太細，唔可以上去，要12歲以上先至得，所以佢哋車我哋嚟呢度之後，佢哋會去附近嘅Hello Kitty Smile ，再返嚟接我地！

之前因為睇電視，周奕瑋介紹咗呢個景點，所以上網搵咗資料，首先要經JTB 上網預訂，成人¥5000，中學生¥2500，網上預訂時，要填姓名同埋年齡，選擇時間，每日只有兩個時段，早上九點幾或下午1:20pm ，我地揀左下午然後俾錢，再收到email confirm，我哋去到集合點嘅時候，未夠鐘所以唔入得去住，橋頭呢個建築物，裏面都好熱，因為冇冷氣，諗住海邊應該會有D風，但係今日完全係冇，所以都好熱，人齊後就入去briefing，呢度最少12人成團，最多48人，今日有29個人參加，分成四組，Briefing 時講吓條橋興建嘅過程，亦都講解安全守則，佢有部翻譯機連耳筒比你聽中文或英文，所有帶上去嘅物件都要有繩連住，佢會提供一個粉紅色嘅膠套，俾你包住個手機📱，全部人都要着佢哋嘅背心🦺，因為有好多個袋，有拉鍊，可以裝D重要嘢，就係銀包同Passport，因為佢會叫你跟身，另外要帶頭盔🪖同埋手套🧤！成個 Briefing 用左20分鐘左右，已經成身汗🥵

首先我地要行樓梯上去橋底行人路，要行170級樓梯，行起上嚟又唔係好吃力😅其實呢度有 lift ，唔知點解唔比人搭，可能架lift太細？🤔 上到去，等佢地開閘，一開閘，大家都好開心，最估唔到係，一滴風都冇🤦🏻‍♀️🤦🏻‍♀️🤦🏻‍♀️🤦🏻‍♀️ 佔唔到在海中心的橋上面係會冇風！我地沿路行，一路都可以從地上的孔望到海，行左廿分鐘左右就到左橋塔，再要撘lift 上98F塔頂，上到去個位罝唔大，亦都係冇風 😅 我地在呢度影合照，然後自由活動約15分鐘，呢度望落去真係好宏偉，真係難得一”望”🤣，雖然行得都幾辛苦，不過都值得上嚟，如果天氣唔好咁熱就更加好！所以都係建議冬天嚟，不過冬天可能會好凍😅

影完相再搭返lift 落去，沿路行返去召集嘅位置，放低晒啲頭盔，再頒發返證書，就可以離開，手套就送俾我哋做紀念，我哋影完相先至掉！我哋等埋司機來接我哋幾個，所以喺公園嗰度買咗杯雪糕食，因為實在太熱了！淡路島嘅名物應該係洋葱🧅，呢度好多大大個嘅洋蔥🧅賣！😄我哋人齊之後，一齊返市中心！

返到去難波，竟然落雨，今晚嘅晚餐我哋分開食，因為有幾個想食蠔，但係有幾個係唔食蠔，唔食蠔嗰幾個又想去貓頭鷹餐廳，所以大家分道揚鑣，先車咗佢哋去貓頭鷹餐廳，然後我哋就去食蠔，呢間係放題任食，有生蠔🦪同埋蒸蠔🦪 ，每位¥5080加¥1100可以任飲酒精飲品，我地四大一小，小朋友免費，只有一個要加錢任飲啤酒🍻！D蠔都好新鮮，同埋都幾大隻，我哋食咗幾轉，足足有兩桶蠔殼😆

食飽飯又去心齋橋，因為要去藥妝店買嘢，大家最後衝刺，人哋關門之前買埋！再去固力果影相，終於人齊可以影大合照，但係新嘅打卡位已經關咗門，不過有好多人都跨欄杆入去影！影完相都差唔多11點，要返去瞓覺喇，因為聽日要打大佬！🤣🤣去環球影城要玩足一日！