2023年2月九州自駕遊 - Day 4 高千穗鉄道、高千穗峽、阿蘇火山、草千里

今朝一早起身，因為今日行程緊湊，會合好友之後，在酒店樓下嘅 Family Mart 每人買份三文治加杯咖啡上車先食！因為今日去高千穗，要揸兩個鐘頭車！仲要趕搭11:00 火車！

我地去到高千穗鐵道嘅車站，早咗到達，其實佢每40分鐘一班火車，我哋原先要搭11:00 班車，但係早咗35分鐘到，剛剛搭唔到前一班車 🤦🏻‍♀️ 唯有在車站等，今日好凍，我地要在站𥚃面的等車處等，𥚃面有暖爐，等到差唔多有車先出去！呢個車站都好舊，有少少紀念品賣，我亦都有啲介紹關於車站嘅歷史！呢個鐵道，聽講因為多年前一個颱風吹爛咗條路軌，政府決定唔做維修，將呢度廢置左，後來覺得廢置左又有D可惜，於是改為觀光鐵道，火車會去到某個位置停低（因為路軌斷咗），然後再駛返番轉頭！

終於等到有火車到！大家影左一輪相，然後先至上車！火車只有兩卡，車卡係露天嘅，座位大概有20個，即係話每班車大約坐到40人，大家打對面坐，我哋呢班車大概只有廿人，火車經過一D住宅嘅時候，見到有一個婆婆喺窗口同大家揮手，好搞笑，來回都見到佢！真係好有心！🥰 跟住火車會經過兩條隧道，經過隧道嘅時候都會有啲燈光效果，因為隧道入面比較暗，加咗燈光效果就有D嘢睇吓，跟住火車去到一個位置停低，左右兩邊都各有條橋，呢個時候司機會攞部機出嚟放泡泡 ，仲會一面用日文講解，非常搞笑！🤣🤣 雖然好搞笑，但係個效果都好靚，大家狂影相同埋拍片！其實呢度風景幾靚，不過而家呢個天氣啲樹葉比較枯黃，如果天氣好應該會好靚！停留左大約5分鐘，火車就回程了！全程大概半小時，所以40分鐘一班車！

離開火車站再揸車去高千穗峽，只需10分鐘就到，停車場旁邊就係售票處，我哋在售票處度買飛划艇🚣🏻‍♀️，每隻艇￥4100，週末¥5100，限時三十分鐘，超時每10分鐘 ￥300 ，每隻艇最多可以坐三個大人，或者三個大人+1個小朋友，買完飛就行落去碼頭，就會見到好多藍色嘅艇，上船之前先扣救生衣在腰上，職員簡單教一教你點樣划，就可以出發！好友未試過划艇，所以有少少唔係咁順！我地都同人哋D船撞過幾次，因為大家都係划進得好慢，所以問題唔大，最緊要唔可以划去瀑布下面，附近都有救生艇 Stand by，呢個瀑布附近嘅岩石好靚，好友顧住划艇，我就係咁影相 😆 我地划左廿幾分鐘，啱啱好半小時內返到去，落咗船之後行返上去停車場，呢度有條橋可以影返落去個瀑布，就係平時好多旅遊資訊入面見到果D相，就係呢個位度影！影完相我哋諗住喺呢度搵嘢食，但係呢度冇乜選擇，只有喺小店度買咗一串團子🍡，同埋一杯軟雪糕🍦食！軟雪糕有兩種味，一種係宮崎名物日向夏，應該係一種橙🍊，或者芒果🥭味，我就揀咗兩溝🤣

食完雪糕就去下一個行程，就係去阿蘇火山，去火山之前我哋先去一去附近嘅國立公園，因為要放一陣間飛機先！跟住就過去阿蘇火山，記得人生第二次去日本就已經去過阿蘇火山，今次嚟到同印象中嘅阿蘇火山好唔同，好友話近期阿蘇火山爆發過，唔知係咪呢個原因，見到旁邊有兩座建築物好似荒廢咗，只有一個旅遊中心有開，附近亦有得租直升機飛過去阿蘇火山睇，我地影咗一陣間相，就揸車過去草千里，草千里顧名思義係一個大草地，不過而家嘅天氣啲草都變咗枯黃，所以冇想像中咁靚，呢度有個好大嘅停車場，但係只有幾間小店，我哋喺度搵嘢食，見到有架小巴開咗車尾門賣緊熱狗，好友就食熱狗，我就對熱狗冇乜興趣，所以喺小店買咗個燒牛肉包，大家叫做食咗少少嘢，又行咗一陣草千里，見到呢度好多馬便便，應該週末有得騎馬影相！我地在山坡影吓相就走喇！

去完草千里已經四點，我哋仲要去附近一個賣牛奶嘅地方，叫做 So Milk Factory 買杯牛奶飲吓，呢度好多牛奶產品例如芝士，但係全部都要冷藏，所以都買唔走，我地飲支奶就走，不過我哋買錯咗支酸奶，所以冇試到佢D牛奶嘅味道如何，有D可惜！最後都買咗一盒餅乾，同埋一小瓶芥茉醬！

揸返兩個鐘頭車返去熊本城，返到酒店都七點， check-in完之後再出過嚟！本來好友想上網book一間食牛腸鍋嘅店，但係book唔到因為full左，所以諗住去附近搵嘢食，我哋行過佢原本想book嗰間牛腸鍋店，又即管入去問吓有冇位，點知竟然有位！今日我哋諗可能佢都好似香港咁，留位俾人WhatsApp，又或者有人甩咗底，問吓冇壞，咁啱就真係有張枱！呢間叫做 もつ鍋田しゅ Motsunabe Tashu ，店有兩層，我哋坐樓上，全部係榻榻米，每枱中間有一塊簾遮住，所以都幾嘈，咁啱隔離嗰枱都好多嘢講，所以都幾嘈吵下，我哋叫咗最平果個套餐，因為同最貴只係爭咗個馬刺，同埋前菜有D唔同，我哋反而另外散叫一個馬刺，加埋都平D，套餐有一個牛腸鍋，額外有一份菜、牛腸、麵，牛腸雖然睇落好肥，但係食落去係比較爽口唔肥！好食，不過份量好少，我都夠食，好友可能唔係好夠飽，跟住佢哋再買士多啤梨食！😅

酒店住後感：
Dormy Inn 六花の湯
酒店位於 Kumamoto-Jo Hall 旁邊，即係尋晚我哋住嗰間 Koko Hotel Premium 旁邊，酒店少少舊，好友對 Dormy Inn 有情意結，貪佢平、有溫泉、有免費燒夜拉麵/烏冬，我就嫌佢舊左少少，價錢仲貴過尋晚果間 Koko 😑 房間唔算好細，不過冇比較冇傷害，再揀一定係 Koko ! 我就冇浸溫泉，不過就有食佢嘅宵夜拉麵，碗拉麵係淨麵冇餸，得幾條筍😅

 

2023年2月九州自駕遊 - Day 3 太宰府天滿宮、熊本市 Aeon mall

尋晚嗰餐食得好開心，今朝起身都唔係好捨得離開呢間 Dream Inn 酒店，有機會再嚟住返兩晚！

今日嘅行程第一站去太宰府嘅天滿宮，我未去過呢個地方，附近有好多停車場，每個停車場都有啲人企出嚟搵客，我哋好簡單，最緊要睇價錢，同埋就近天滿宮，我哋泊低架車之後，由天滿宮嘅側門入去，呢個寺廟好多人，因為話呢間廟係主要求考試合格，所以都好多學生，同埋今日撞啱有個印尼團，有幾十人，所以好多人，因為嗰團人着晒同一樣顏色嘅衫有公司logo ，去到邊度都見到佢哋，而且佢哋每個景點影相都影好耐，都幾阻住其他人，後來佢哋入左一間食肆食飯，即刻成個廟少咗好多人，我哋就行得舒服啲！😅

其實個天滿宮主樓而家做緊維修，圍咗板，所以只有圍板上面嗰張相可以睇！呢度地方都好大，睇到張地圖仲有鳥居同埋可以行上山，呢度多人上山主要因為呢度有個竈門神社，由於卡通片鬼滅之刃入邊嘅角色竈門炭治郎，個名唔唔知係咪同佢有關，總之就因為呢套卡通片多咗好多人上去睇😂，好友唔係好方便行咁遠，所以我哋都冇上去，同埋呢度種咗好多梅花，所以好多茶屋，可以一路賞梅花同埋食梅枝餅！可惜而家梅花未開花，只有一兩棵開咗花！我哋冇坐低食餅飲茶，不過都買咗梅枝餅試吓，因為佢新鮮整，即整即食，有少少似豆沙餅，唔會太甜，個皮脆脆地都幾好食！

行咗一陣，我哋行返正門出去，因為嗰邊有條表參道，同其他日本嘅寺廟一樣，正門多數有條表參道，俾人食吓嘢買吓手信咁，而呢個商店街最出名就係間Starbucks ！因為佢係著名設計師隈硏吾設計嘅，用咗大量嘅木條去做裝飾，我哋梗係要朝聖啦！在門口影完相，入去幫襯吓買番杯咖啡食返件cake 😂 呢度雖然好多人，不過好多都坐一陣就走，所以keep住都有位！仲有一剎那影到冇人🤣

飲完咖啡，繼續行去火車站，因為太宰府嘅火車站都好古色古香，處處都見到梅花圖案，同梅花相關嘅產物！跟住我哋行返去攞車，繼續下一個行程！

我哋要去熊本市，揸咗一個鐘頭車，中途經過一個叫做広川嘅休息站，又去休息一下！買吓手信 😆

再揸多一個鐘頭車先去到熊本市！先去酒店放低行李，今晚住呢間酒店，對正熊本城！間酒店好新，我哋放低咗行李之後就出去行下！揸車去咗附近一個 Aeon mall ，雖然佢舊舊地，不過都好大，都幾多嘢睇！我哋買咗D手信，又買到我想買嘅久世福餅乾！仲有間Fancl ，買到supplement，仲有贈品送，送咗個玻璃兜同埋一個矽膠鑊鏟！都算滿載而歸🤣

買完嘢已經差唔多七點，再揸車去附近食壽司，去咗一間叫做 寿司じじや，都係類似連鎖式嗰種有運輸帶嘅壽司店！我哋叫咗好多款壽司，個海膽就麻麻哋，但係個牡丹蝦好抵食，因為都幾大隻！我哋係咁喪食牡丹蝦壽司！😆 跟住個鰻魚壽司又好好食，又整多兩碟！正 👍🏻👍🏻 食完嘢就返酒店休息喇！

酒店住後感：
Koko Hotel Premium 
酒店在 Sakura Machi / Kumamoto-Jo Hall 內，呢個 Sakura Machi / Kumamoto-Jo hall 係一個好大型嘅綜合中心，有商場、商業大樓、酒店，商場外面有一隻好巨型嘅熊本熊裝飾，樓上有呢間酒店，酒店嘅接待處喺14樓，接待處有免費入浴劑、護髮油珠珠、護膚品供應 👍🏻 呢度嘅裝修都幾Grand，以價錢來講五百蚊一晚（單人房價）真係非常超值，酒店嘅房間都幾大，多數房間都可以遠眺熊本城，酒店係非常之新淨，每間房都有張梳化仔，有張大大張嘅書枱，浴室亦都算幾大，分開浴缸同埋淋浴間！張床比較軟，瞓慣硬床嘅我都覺得OK嘅！我個人好滿意呢間酒店！下次去熊本一定要在住呢間！酒店斜對面仲有商店街，可惜我哋入住時間太晏，去唔到商場行街，所以唔知商場入面有乜嘢商店！