Limited

上星期行過土瓜灣呢度，見到呢間新開嘅咖啡店，當其時冇人，而且我已經食飽飯，所以冇去幫襯，今日就特登過嚟食飯！

店入面嘅座位唔係好多，大概只有十幾個，店外面有少少座位，咁熱嘅天氣當然坐裏面啦！餐牌嘅選擇唔算好多，不過都係有D主餐類別嘅食物，即係意粉同飯，唔會淨係一味得多士或者蛋糕咁少選擇，我就揀咗個海膽明太子意粉同埋一杯咖啡！意粉嘅味道都OK，咖啡都係，近期都好多呢一類型嘅咖啡店，間間都盡量去試吓，暫時都未有一間會令我覺得一定會再去！呢間就有機會都會再嚟！

 

飯局主場 - 第廿五回

呢個group嘅朋友都有一段時間冇見，因為約咗幾次都約唔到，上次已經係12月見面到而家，今次係好友個仔生日，所以去我屋企煮飯食，今次就早好多，四點已經集合買好晒餸，開始煮飯，因為呢個好友煮飯都用比較多時間，所以要預早D時間😅，今日買咗花竹蝦🦐、東星斑🐟、雜菜花甲，同埋肉餅，雖然只有四個餸，但份量都唔少，今日煮少咗飯，佢哋唔夠食，每人得半碗多啲，不過加埋水果同蛋糕🎂，大家都好夠飽，水果今次買咗水蜜桃🍑，因為見到Muji竟然有生果賣，而且D水蜜桃都幾靚，一盒有五個賣$238 ，超級甜同埋多汁！蛋糕就買咗傳統嘅款式，本來我想去嗰間 Liftastic 度買個西瓜蛋糕🍉試吓，不過佢哋已經買咗蛋糕，所以就冇買來試，下次第二個好友生日先試吓！

 

2020 東京奧運閉幕

話咁快奧運會又完結啦！今年香港成績都唔錯👍🏻👍🏻👍🏻👍🏻👍🏻👍🏻，攞咗一金🥇兩銀🥈三銅🥉，全香港嘅人都好開心，好耐未試過咁齊心去慶祝一樣嘢！

😄😄😄

睇電視直播閉幕式，表現都比較簡單！三年後 2024 年就到法國🇫🇷，到時唔知有冇機會去法國睇呢！😅

八方台式麵屋

尋晚覺得心跳好大力同埋好急，今朝即刻去睇醫生，去咗愉景新城嗰間診所，之前未去過，只有一個醫生當值，但係睇醫生嘅人好多，所以個醫生都好快手！醫生話我反而係心跳好慢，話如果太擔心就去照心電圖，不過又係要預約果隻，急都急唔黎，而且醫生話呢個情況都冇藥食，唯有盡量放鬆D！

睇完醫生，發覺原來愉景新城都有一間誠品，見裏面有間小店，又去試吓佢，呢間真係小店，大概只有10個位左右，食嘅係台式食物，叫咗個牛肉麵試吓，飲品叫咗一杯黑糖珍珠鮮奶，因為都比較晏，唔想飲咖啡，個麵就麻麻哋，覺得茶木好食D，飲品就飲咗幾啖冇飲，因為我本身都唔係喜好珍珠，而且佢比較甜！

食完野見到對面有一個人counter 係賣水晶，可以揀水晶然後佢幫你穿手鍊或者頸鏈，不過D水晶係比較 raw 果種，即係好原石果種，而且係質素比較麻麻地，所以冇幫襯😅

 

玖捌

今日想去九龍城試吓新開嗰間coffee shop，不過好多人等位，所以就放棄咗，行過呢一間，見有少少台式風味，有茶有咖啡，又試吓佢，店入面嘅座位好少，大概只有10個左右，食物嘅選擇唔係好多，主要都係bagel 🥯  ，同埋有D狗狗食物，叫咗個三文魚Bagel 🥯 ，同埋一杯咖啡，食物同咖啡就普普通通，咖啡都唔算好特別，叫做試過就算😅

旺角海鮮菜館

記憶中好似18定19 年嚟過呢度食，經過疫情之後，今次嚟見佢價錢平咗，今晚滿座，不過就冇人等位，我哋四個人，佢俾咗張大枱我哋，可以坐10至12個，可能佢呢度最多坐四個人，所以先比張大枱我哋，因為其餘多數都係兩三位，呢度有好幾個套餐選擇，套餐就真係抵食啲，我哋揀咗一個套餐，海鮮有蟶子、扇貝、蝦，湯就係白肺湯，小菜就有一個小炒王、炸子雞同埋炒飯，食物嘅份量都唔細，我哋就啱啱好食得晒，海鮮都係新鮮好食！

因為好友近日父親去世，等佢搞掂晒屋企D嘢之後先約佢出嚟食飯，佢講返佢父親去世嘅事，有D遺憾唔能夠見佢最後一面，不過佢父親都算係走得舒服，雖然係急性中風，但係唔係太痛苦，因為都昏迷咗一晚，第二朝就離開咗，而佢中風之前亦都係打緊麻雀，贏咗好多，好開心，都可以話係開心咁走，算係有福氣，可惜醫院遲咗通知佢，其他家人早一步到醫院都見到佢最後一面，佢去到醫院嘅時候佢父親已經去世，不過學好友話齋，佢父親已經賺咗，因為早幾個月已經歷咗兩次大手術，差D頂唔住，難得手術後可以康復得好理想咁出院，最後一段時間都係同屋企人開心執渡過，都算係賺左！

 

金玉滿堂

上次三月同呢group 朋友食飯，之後去到今日先再約出嚟，足足五個月冇見，諗住今次齊人，最終都係有一個嚟唔到，今次約出嚟食飯，一來係大家好耐冇見，二來其中一位成員又剛剛轉咗工，所以都想大家出嚟見吓面傾吓計，剛轉工嘅朋友，轉左去做類似陪月嘅工作，不過主要係做扎肚，佢話近年呢行嘅需求好大，佢一學完攞到證書就即刻有人請，仲想佢快D返工添，可能呢幾年都流行扎肚呢樣嘢，佢就快要移民英國，所以想學一門手藝，希望過到去都可以有出路，見到佢做得開心都戥佢高興，今年都多朋友移民，所以盡量大家見多D面，日後可能比較難面對面坐埋一齊食飯！因為另一個朋友都打算移民英國，不過佢就話太太同女兒過去，佢拼搏多幾年先過去，因為佢事業剛起步冇耐，都想搵多啲錢先！

講返呢間食店，睇個樣應該開咗唔係好耐，因為都幾新淨，店入面嘅面積都頗細，門口只有幾張細枱，條路都好窄，跟住行到裏面，再有兩張大枱，同埋兩三張細枱，呢度主要係做小菜同埋海鮮，我哋叫咗白灼魚皮、燻蹄、炸豆腐、白肺湯、酸菜魚、黃金魷魚、黑椒鮑魚、炸子雞、咕嚕肉同埋炒菜！我哋呢一個group嘅人都幾食得！😅幾個男士都係大大隻嗰種，要食好多肉😄 我哋六個人食咁多個餸，佢哋都覺得唔係好飽！😅唔知佢哋使唔使返屋企再煮個麵食🤭🤣 小菜嘅質素唔錯，黑椒鮑魚就怪怪地，鮑魚都係清蒸或果皮蒸好食D！呢度可以再嚟食，唯一缺點係座位屬於後門嘅地方，其中有枱客仲喺度食煙🚬！🤦🏻‍♀️ 可能兩三位咁樣，坐出邊好D ！

 

HIKARI

又有新開咖啡店☕️，位於荃灣大壩街，今日就去試一試，見到唔使等位，就真係最好！店入面嘅面積都好細，有條樓梯上樓上，不過明顯就冇開樓上，樓下大約20個座位，已經坐滿晒，剩返兩個面壁位對住門口塊玻璃，面壁為一共有三個，都係對住塊玻璃望住出街，有人等位嗰陣時，就會你眼望我眼有啲尷尬 😅，睇吓個餐牌，都係吐司、意粉、小食、少量甜品，當然唔少得咖啡，同埋非咖啡類飲品！

試咗三文魚意粉，同埋黑松露意大利飯，飲品就試咗竹炭咖啡同埋芝麻鮮奶，兩杯都係黑色飲品！食物嘅味道不過不失，份量亦都唔算好大，竹炭咖啡就咖啡味比較淡，可能比竹炭嘅味道掩蓋左，芝麻鮮奶亦都唔算好特別，都係想像中嘅味道！試埋佢哋嘅甜品 crème brûlée ，味道有少少淡，不過都啱我食！整體來講呢度都唔錯，店員都友善！

 

聖耀皇權俄羅斯皇家珍品展 / 瞧潮香港60+

飲完茶去睇展覽，去左車公廟站的香港文化博物館，之前去睇過羅浮宮展覽，今次去睇瞧潮香港 60+，呢個展覧是免費的，另外有個聖耀皇權俄羅斯皇家珍品展，要收費的，只係$10，咁就睇埋啦！

呢個聖耀皇權俄羅斯皇家珍品展，話精選左俄羅斯克里姆林宮博物館170組宮廷珍品，話呈現出俄羅斯沙皇時代的君皇氣派，入面的展品包括皇室物品，例如權杖、聖物、馬具、武器、貢品、飾物及玩具等，以闡述當時16-18世紀沙皇的加冕典禮、出行儀式、軍事權力、外交禮儀和宮廷生活，反映當時政治和文化如何結合教會與皇權等等，展品相當有歷史！

睇完就去睇瞧潮60+，呢個展覽主要展示香港流行文化的故事，戰後流行文化的進化，隨着時代的變遷和媒體的發展，戰後至近代香港流行音樂、電影、電視和電台廣播節目的發展，展出逾一千件展品，包括歌手登台服裝、獎座、唱片等，佢有一個 photo booth ，可以揀一D電影海報做背景影相，都幾攪笑，我都影左兩張😆😆，入面有D展品因版權問題，咁可以影相，不過大部分都可以影，所以都影左唔少相😅