今日要去旭岳，食完早餐就出發，差不多到的時候，見到一個湖，叫做忠別湖，我地落車影左一陣相，再繼續去旭岳下的大雪山國立公園，去到旅客中心，門外有免費停車場，如果想泊近纜車站就要收費，我地拍左在旅客中心門口，因為啱啱好有兩個位，遲一步都要去收費停車場！入到去旅遊中心，見到有旭岳的模型，和介紹旭岳的行山路徑，在 visitor center 聽到好多人講廣東話！應該好多港人自駕遊！
呢個大雪山國立公園其實都好大，我哋只係選擇咗上山果段路，首先要搭纜車上山，車費係¥2900 來回，車程只有10分鐘，就上到去姿見駅，由原本纜車站嘅1100米，上到去就係1600米，纜車嘅班次每15分鐘一班都非常之頻密，但係上去的人都唔少，因為有團，果D團多數係韓國人，大部份係老人家，我地剛好追到預備開車嘅纜車，不過企近門口就咩都睇唔到，俾人遮住曬，所以我地諗咗落嚟嘅時候，要排頭位先至上車！
上到去姿見駅，氣溫都幾凍，佢有兩條路徑可以行，一條係順時針方向，另一條當然係逆時針方向啦，我地選擇順時針方向行，行到去第一展望台，影吓相留念，離遠見到山上噴緊煙！呢度D路係石路為主，所以都要小心行，因為D石係鬆嘅，不過旁邊亦都有D木欄或者繩索俾你扶住，過咗第一展望台之後，會見到有兩個唔係好大嘅池，呢度寫住夫妻池，池水唔係太多，我諗過咗冬天雪山融雪之後會多D水，而家始終係經過左一個夏天，所以應該唔會太多水，過咗夫妻池之後就繼續行，條石路都好崎嶇，我地都要好小心行，有D位係比較斜，眼見有D人行動不便都走上黎，真係佩服佢地，上山嘅路上亦都有唔少外國人，行到最接近噴煙嘅位置，就已經唔可以再行，當然另外仲有一D偏D嘅路線可以再上去山嘅另一邊，但係只有少數人會行果段路，同埋我地望到D人行到上去，好似都要落返嚟，冇得再上，我地在呢個位置開始行返落山，會先見到嘅係姿見之池，呢個池比之前見到果D大，而且D水好清，剛剛好倒影咗山峰落水面，好靚，只係天色欠佳，如果有返少少太陽就更加清楚，不過見到頭頂果一大舊烏雲，應該有排都唔會見到太陽！在姿見之池旁邊有間避難屋，就係萬一大風雪嘅時候俾人避難的，過咗避難屋就係開始落山嘅路，條路有D濕同埋斜，我地都要慢慢行，一路行嘅時候竟然遇見松鼠，佢好搞笑，我哋停佢又停，我地行佢又行，大家見到佢都好興奮，證明係好多人未見過松鼠！
好快落返去姿見駅，車站呢度例牌有手信店，我買咗一個牛鈴，做個紀念，跟住就去纜車站排隊，啱啱好有車，不過我地唔上，為咗係要搭下一班車企頭位，第二班車好快就到，只係等左幾分鐘，當然我地就上咗去最有利嘅位置啦，不過俾後面的人迫到不得了！我地之所以要企頭位，係因為上山嘅時候，望到山下面果D樹，有少少轉左紅色，有少少係黃色，再加D綠色都幾靚，所以要搵個有利位置影吓相！
行完呢個簡單嘅行山之旅，只係行咗一個鐘左右，亦都出咗一身汗，上車去下一個站，就係青池！好友佢哋上次去過，但係正值冬天，成個池已經結左冰，同埋一片雪地，所以佢哋睇唔到藍色嘅池水，今日天氣唔算好好，而且有D烏雲，即管去睇下咩環境！
揸車過去都唔係太遠，泊好架車之後行過去，過到嚟呢邊有少少太陽，睇到個天氣好好，池水係藍色嘅，池入面有D樹幹，倒影在池水上好靚，幾乎分唔到水平線位置！大家圍住個池影相，行到池嘅盡頭，有一個平台，行樓梯上去個平台度，可以望到另外一邊嘅水壩，好友話上次係冇呢個平台嘅，應該係新加的，同埋有一個小食亭，沿路見到條馬路好似仲未整好，可能政府發展呢個位做旅遊點，唔係單單淨係睇清池，睇埋附近嘅堤壩，仲有介紹附近嘅白の滝瀑布，再賣下一D相關嘅紀念品，再鋪好條路等D旅遊巴可以入，爭取多D遊客消費！
既然介紹咗白の滝瀑布，當然要去睇下啦，除左白の滝，仲有白樺街道同埋十勝岳望岳台，我哋淨係去咗睇白の滝，因為白樺街道可能唔啱季節，睇唔到白樺樹有咩特別，而白の滝在橋上面望落去，覺得佢唔係好大嘅瀑布，不過叫做順路過嚟睇吓！
去完清池之後，我地睇地圖見到蜜瓜園好近，所以決定依家去買蜜瓜，原本諗住聽朝返去札幌之前先買，既然而家有時間佢又咁近，就依家去買啦，知道蜜瓜園收五點，我地 4:15 左右到，去到有理冇理先再買半個蜜瓜食先，今次我地唔加雪糕，因為雪糕太甜，記得上次係 ¥1200半個，而家可能就嚟關門，收我地¥1000 ，更加抵食！食完蜜瓜就要買蜜瓜，我地之前諗左一日，大家都係決定買三個，因為三個已經有7Kg，我地係諗住 Hand carry 上機，因為 Hand carry 最多係7kg，買完蜜瓜就走喇！
由呢度返去札幌都要成個鐘，今晚住 Dormy Inn ，上次我地去九州都住過一晚，果間就唔錯，不過 Dormy Inn 通常都係比較舊嘅溫泉酒店，我地去到停車場，就在酒店旁邊，泊好架車之後我哋就去check-in，今次同好友間房打對面，都未試過住得咁近，間間酒店都將我地分開兩層，今次係住得最近嘅一次，上房放低行李又再出去，好友搵到附近有迴轉壽司，所以揸架車過去食 ，呢間叫做はま寿司 Hamazushi，同我地上次去果間くら寿司好相似，裝修格局都大同小異，都係主打平價壽司，坐低左之後佢都係有個 tablet 比你落order，但係個 tablet 係set 左係個旁邊個架度，撳起上嚟唔係咁方便，我地叫咗拖羅、蝦、海膽軍艦等等，呢間質素麻麻地，一般壽司價錢係¥90或者¥150一碟，每碟一般係只有一件，有部份係兩件，價錢來講算係好平，所以唔好期望質素高！
食完野就返酒店，點知返到去冇晒車位！入去接待處度問，其實佢仲有四個停車場，不過位置就遠D，全部都係隔一、兩條街，我地泊到去最近嘅位都隔咗一條馬路，停車場旁邊有便利店，我哋去便利店買半熟蛋返酒店食，好友話佢仲要浸溫泉，因為酒店夜晚會有免費拉麵，至到9:30 ，我就冇興趣食喇，所以就早D瞓！
酒店入住後評價
Dormy Inn Asahikawa Natural Hot spring
旭川多米自然溫泉住宿酒店
今次入住呢間酒店係比較舊，仲係用鎖匙，入咗房之後要將長條形鎖匙扣插入電源 In 口先有燈着，初時唔記得係要插鎖匙扣，搵左一輪都唔知點樣開燈，先突然醒起個紅色 In 制係要插條鎖匙扣落去！房間嘅面積比較細，睡床亦都係有搪門分隔開，洗手間沒有浴缸，只有淋浴間，酒店雖然舊但係都算整潔，而且有溫泉浸，仲有露天風呂，浸完溫泉出來有自動售賣機，可以買牛奶飲，不過一定記得要帶錢！而且呢度有漫畫書可以坐低睇，當然佢係日文啦！房價方面，因為係星期六嘅關係要600幾，如果係平日應該係400左右，價錢算係平，當然係因為佢比較舊，而且離地鐵站比較遠，早餐方面，選擇就唔算特別多，食物方面最特別就係有三文魚子、三文魚、熟蝦、咖喱蛋包飯，同埋有燒烤嘅食物，如果唔係揸車嘅話真係唔係幾方便！
