航拍 15 - 高尾山

今次日本之旅本來想去箱根，不過近近地去高尾山睇下可唔可以飛，坐纜車上到山，見到只有一個位置可以起飛，所以飛左轉，不過今日好大風！部機不斷 warning ，我都唔敢飛咁耐！而且飛出去冇乜野睇，山上D樹已枯黃，外面個 view只睇到兩個隧道口，所以好快飛返來，過完D相同片，諗住飛多轉，點知纜車站的職員前來阻止，我才想起有管理員的地區應該不可以飛，唯有降落！

2019年2月 東京散心之旅 Day 4 - 高尾山、新宿

今日星期六，出去效遊一下，出發去高尾山，撘一個站去御茶之水轉中央線快速，直接去到高尾站，再轉京王高尾線去高尾山口站，一出站就有大地圖，指示搭纜車上山，除左纜車仲有吊車，我當然選擇纜車啦！行去纜車站的路上，有商店街，呢度名物有炭燒團子，一串有三個麵團，外面塗了醬油，買左一串試下，冇乜味，麵粉同醬油味！

行到纜車站，要買飛，來回要 ¥930，車程八分鐘，一架纜車大約坐三十二人，沿途沒有風景，亦望唔到吊車，兩旁只有樹！上到去，見有唔少行山人仕，呢度有寺廟，有地圖指示去藥王院，沿住指示好易搵到！又去買御守！買個比自己，呢排有D黑仔！

落山果陣，見到車站旁有溫泉，又去浸下，呢度平日收費 ¥1000，週末及假期¥1200，今日雖然係週末，但係做特價，都係¥1000，可能今日唔多遊客吧！另外租浴巾 ¥150，呢度好過 LaQua spa，有三個露天風呂，亦有坐住浸背脊的坐位，浸到好熱果陣可以坐下，幾舒服！

浸先溫泉出返去，諗住去中野，但瞓著左剛好 miss 左個站，唯有去新宿！因爲前兩日已經去過新宿，今日去南口果邊搵野食，見到一間叫做アカマル屋的居酒屋，又去試下，店入面好 full ，剩返兩個 bar 枱位，不過仲有樓上，睇下餐牌主要食串燒，亦有一品料理，我叫左幾款串燒，呢度主要得豬同雞，叫左大葱雞、雞肝、雞心、紫蘇豬肉同埋燒牛舌，又叫左杯梅酒！食物味道一般，價錢平，氣氛熱鬧，食完野行出去，見有個位有好多櫈，D人坐滿晒㩒手機，見到個佈景，應該係打 Pokemon ！其實今晚凍左好多，D人都唔怕凍！搵室內地方行，去高島屋行下，買左士多啤梨同香蕉返去食，走果陣見附近開左間鹿角巷！都有D人排隊！


夜晚返到酒店，睇左陣手機，食左水果，绘諗住冲涼瞓覺，浴室竟然冇水！打落去接待處，佢地攪左大約半小時先有返水！

2019年2月 東京散心之旅 Day 3 - 豊洲、後樂園、 LaQua spa、池袋

一瞓醒再睇下個電話，竟然有反應！着咗冇電果個標誌，仲叫我充電添！即刻嗱嗱聲充返電先，但係由零開始充應該冇咁快充滿，所以我拖慢D先出門口，好驚個電話轉頭又唔着，一充左稍為有D電就即刻着機睇下，首先睇返我搭幾點機返香港，然後check返D信息，再將呢幾日影嘅相send 返俾自己先，始終旅行嘅回憶唔想冇咗！

有返電話就好好多啦！今日先去豐州市場，今次一心去搵大和壽司，因為之前在築地最出名就係大和壽司同埋壽司大，壽司大已經食過，大和壽司上次就見唔到，所以今次特登去搵下，原來佢嘅位置在火車站一出來的左手邊，而且間店嘅入口在室外的，有別於壽司大是在室內的！

去到見到有10幾人排緊隊，睇唔到究竟間鋪入邊有幾多個位，但係我見佢兩個兩個咁叫入去，而且一路都有人走，原來佢唔同壽司大嘅做法，壽司大嘅做法係一尊尊咁做，即係話同一批人入去，同一批人走晒先至再入下，而呢度就有位就比人入，我等左大概15分鐘就有位喇，入到去原來大概有26個位，因為係兩個鋪位，而師傅就有八個，因為每邊大概13個位就已經有四個師傅，所以佢基本上係一個師傅負責嘅客食完就走！一坐低師傅佢問剩係得 Omakase ok嗎？同埋有冇乜野唔食，冇就開始整壽司！壽司上得好快，一共有九件，有拖羅、玉子、海膽、熟蝦、魷魚、鰻魚、三文魚子卷等等，師傅話個餐完喇，有乜嘢特別要order就話俾佢知，我加咗個赤貝，成個過程真係好急趕，由一開始擺低碗湯，到最後一個赤貝送到，只係20分鐘時間，最重要係質素真係麻麻地，可能我期望太高啦，以為佢同壽司大差唔多，比較起來壽司大好好多，而且個師傅都會盡量同你傾下計，雖然英文麻麻地，但係呢度食得好趕，質素唔好，感覺好流水作業，唔及得以前在築地食，無論係壽司大定係其他場內市場嘅壽司店，都有人情味好多，呢度好似好港式嘅運作，希望你快D食完就走，等佢可以做多幾單生意！唔怪得可以養咁多個師傅，不過真係覺得佢名過其實！

食完壽司再行下先走，撘車去水道橋，去睇下東京巨蛋同埋後樂園，主要去 LaQua spa浸溫泉！去到水道橋站由西口出，離遠都望到D招牌，同埋摩天輪，唔使驚搵唔到！要去後樂園，先經過東京巨蛋，在外面影下相，行去後樂園，入口的摩天輪今日停駛，見到有人在維修保養！上次經過望到過山車覺得好高，今日睇都係好高！而且都多人玩，呢個樂團比較簡單，只有幾個機動遊戲，入面只有一個商場，溫泉就在商場內，今天頗多人，一入去接待處，就有人簡單講解呢度幾層樓的設施，邊D要入費，如果享用收費的按摩，仲要另外租衫，佢本身入場費已有一套衫在館內穿著，而按摩則要另一件！冇打算另外付費的服務，因本身入場淨浸溫泉已經要近三千円，價錢略貴，不過好多近市區的温泉都要二千円以上！呢度有幾個池，有露天風呂，不過只係頭頂露天！浸完溫泉出身汗，冲個涼就走！

行返去水道橋站東口果邊，諗住去食龍蝦拉麵，點知未開！撘車落池袋，去試下 Tokyu hands 對面果間くら壽司，之前在九州食過ok ，今次再試下，上次有做大拖羅壽司 promotion ，今次就冇，呢間做特大蝦壽司，個蝦同上次食差不多，其他就真係差D！不過叫做試下就算！

跟住行 Tokyu hands ，每次總可以流連在 Tokyu hands 一、兩小時，佢有好幾層可以慢慢睇！在附近行多間就走，返酒店前，又去 7-11 買半熟蛋食！

2019年2月 東京散心之旅 Day 2 - 東京迪士尼海洋

尋晚瞓得好好，一覺醒來，已經八點幾，原先計劃去箱根，但天氣預報話箱根落雨，所以改左今日去迪士尼，酒店附近又冇乜野食，所以直接去東京站食，清清地食齋！去左車站入面果間 T’s café ，之前食過一次，雖然係素食，不過碗拉麵好多油，不過應該係植物油！食完麵搭車去到舞濱已經十一點！都知道會攞唔到 fastpass ，所以去左 Disney store 行下，原本睇中相機帶，但見陳列果條舊左，起晒毛粒，所以冇買，冇野買就入園，先去買張紀念車飛，剛剛出左 Duffy 特別版本，所以買咗一張！

入到樂園，今日超多人！今日又唔係假期唔知點解咁多人，而且都幾凍！好多平時唔使排隊嘅機動遊戲，都排晒長龍，就算攞花pass，都要排長龍，真係好誇張，唔知以為今日係假期添！四圍影下相，行下D商店，因為太凍要留在室內時間長D，行到過去嗰邊，多咗個影相位，係今期嘅主題，所以都排隊影返張，每次去樂園都會影一張由呢度嘅攝影師影嘅相，今次就影呢度啦！

去到邊都好多人，行完商店出來，見到反斗車王巡遊表演，諗住攞個手機出嚟影相，點知個手機唔着，好似完全冇晒電咁！但係頭先明明仲有電，起碼仲有60-70%！於是攞個後備充出嚟充電，正常如果電話冇電，一插電應該都會着個紅色嘅電池冇電標誌，但係佢完全冇反應，唯有等佢充多一陣先，但係充左半個鐘頭都冇反應，我心諗我用咁多部手機以來，從來未試過壞機，估唔到呢部咁貴嘅iPhone竟然用咗幾個月就咁樣，冇咗手機果剎那真係好徬徨，因為好多嘢都係用app去睇，例如鐵路圖、Google，同埋航空公司預辦登機個app，我先想起我唔記得搭幾點機返香港，所以我諗要攞去Apple Store 度維修，但係最快都要聽日，因為今晚去完樂園出嚟都應該關左門，唯有今晚再試下叉電睇吓點樣！個電話壞咗搞到好徬徨影響晒心情添！

部機唔着都冇辦法！去搵地方食飯先，首選一定係上船嗰間 S.S Columbia ！過咗午飯時間就冇乜人，唔使等位，叫咗個燒牛肉龍蝦味餐，最重要係有麵包，因為最鍾意食佢呢度嘅軟包，不過今日唔係好肚餓淨係食咗兩個，上次食咗三個都嫌唔夠，真係好搞笑！

食完飯去咗睇下 Toy story 要排幾耐，見到排隊要100分鐘所以都係放棄！行去商店見到出左幾款35周年版本嘅手信，包裝係好靚而且價錢都比較貴，因為價錢太貴所以冇買，佢比一般手信貴左成倍所以唔買，因為都係果類食物，只係包裝唔同！

今期樂園做緊聯乘 Pixar ，周圍都有相關產品同埋裝飾，在鬼屋前面擺咗個巨型嘅 Pixar 標誌，當然要影返D相啦，好快就天黑，聽到廣播話，今晚個水上表演要取消，唔知係咩原因，因為天氣都好好應該就唔關天氣事，可能基建股將之旅元原因吧！冇咗個電話周身唔自然，又擔心嚟緊仲有五日冇電話點算呢，又唔知整唔整到，搞到冇晒心情，加上都冇乜嘢特別鍾意，所以最後都係買咗少少嘢就走！

由樂園出去，諗起有樣嘢未買，所以去左車站果間 Bon Voyage 度買，買完出嚟剛好睇到放煙花，我都冇影相，如果有攞相機出嚟影相就可以啱啱好影到迪士尼線架車經過，同時又放緊煙花，可惜有Miss 左！去車站直接搭車返酒店，因為中途都冇乜嘢食，睇吓酒店附近有冇嘢好食！

返到酒店附近又唔係咁肚餓，走去 7-11 睇下有冇乜嘢小食，見到有半熟蛋，一包有兩個，所以買左一包食，返到酒店再充下個電話，臨瞓前見充左個幾鐘都冇反應，就諗明天改變行程，要先去新宿整電話，因為淨係記得新宿果間Apple Store 位置，其他地方唔知邊度有，因為冇電話check！