飯局作客 - 映灣園

上個月好友生咗BB女，都已經過咗一個月，終於可以去睇BB喇，因為好友住喺東涌，所以我地要約埋一齊放假先至可以入去探佢，今晚去佢屋企打邊爐，好友負責買野，而我就因為順路，走入去迪士尼行一轉，因為佢做緊會員優惠，入去睇下有D乜嘢買，因為上次已經想買隻Cookie，諗住等佢減價先買，話咁快就等到佢減價，咁就買一隻捧下場，同埋見到隻好得意嘅史迪仔，所以都買埋，再順便幫朋友買少少野，買完就去東涌會合負責買餸嘅好友，而BB嘅爸爸就揸車在東涌接我地去佢屋企，因為撞啱佢剛剛收工去到附近！

好友因為生多一個BB而搬屋，地方大左，又請左個姐姐，咁就可以叫姐姐負責洗野啦，未齊人之前我哋食豬腳薑，其實好友想我地食多D，甚至攞走，因為佢根本食唔晒，但係因為佢BB已經滿左月，老人家話唔可以拎走，所以想攞D返去食都唔得，但係轉頭要打邊爐所以又食唔到咁多！雖然D豬腳薑唔係好辣，不過BB女都幾辣，經常性扭計，最大問題係父母遷就，一喊就抱，所以BB女只有個幾月都已經識扭抱！

今次除咗睇BB之外，亦都係其中一個好友嘅生日，所以我地都有切蛋糕食，食埋蛋糕都成11點，都要走喇，因為已經冇村巴出去港鐵站，所以我地 call Uber，落去東涌地鐵站，然後再搭車走！

2018年11-12月 開心東京遊 Day 7 - 築地、新宿

話咁快行程就結束啦！今朝八點幾一出門落大雨，搞到我地好論盡，我地落到樓下，想先截的士，但係返工時間真係冇車，唯有趁雨勢減慢左，即刻快步走去地鐵站，原本有另一個地鐵口有升降機，但係個位置好遠，最近果個地鐵口又冇升降機，唯有人手拎去行樓梯，一上一落，但係上到月台都冇辦法上車，因為繁忙時間火車好爆，嘗試由另一個地鐵口睇下有冇的士，都係冇，因為落雨加上返工時間，所以我地決定分開四卡車上車，因為一齊同一卡根本無辦法上車，其實搭一個站去到上野應該會有好多人落車，因為大站始終多人轉車，果然去到上野站落左好多人，我地就唔使咁迫，去東京站只係五個站，所以好快落車！

先去買手信，出閘前，去近住5號月台入口的位置，就是 New York perfect cheese 的店，咁早去就一定買到，我地買完手信之後，將行李同手信攞落去行李寄存果度，將D手信 pack 晒入喼，然後先至寄存行李，因為佢係每件計，如果D手信唔入喼又會計多件，而且我地點都要將D手信塞入個喼度，先至寄到返香港！搞完一輪好肚餓，上去搭的士，因為落雨關係，的士站都排晒隊，好彩人唔算多，只係排10個8個，不過的士都好密，我地搭的士去築地場外市場，上次因為太過晏，去到好多店都收咗，今日一早去，就好多都有開門，今朝我地先去食大拖羅，入口即溶真係好正！跟住去食鮨國，十點幾去到竟然唔使排隊！可能因為落雨關係，加上豊洲開左，呢邊明顯少左人，唔使排隊之餘仲有幾多位，因為佢開10點鐘正常10點幾係第一轉入左，即係話第一轉只有幾個客，好開心唔使排隊有得食，我地每人叫左一個飯，我就專注食海膽飲，又叫左清酒煮蜆，食得好飽呢！我地食緊果陣開始要等位！

跟住我地去買生果，買咗一箱十個柑，然後搭車去新宿，去到新宿就分道揚鑣，因為兩個好友要睇 figure，我和好友就要買藥妝，所以各自行街稍後會合，我同我好友去左 Bic Camera，見識一下新出的8k電視！又去行伊勢丹，兩位好友就去OIOI，又去 mercibeaucoup ，佢睇到D衫係尋日見唔到嘅，影咗張相問我地有冇興趣，我地見件衫綠色所以冇興趣，後來佢先話原來仲有其他色！原本諗住同朋友去 tea 一tea，咁啱另外兩個好友都買完野，所以一齊去食少少野，去咗一蘭食拉麵，食完要準備去機場喇！

先去返東京站，又要再整理個喼，好唔容易將所有野塞晒入個喼度，然後出發去搭火車，搭NEX去機場！去到機場又食！因為機程要五個鐘，所以食左嘢先，回程我地一齊坐加長座位，好處係可以申腳，不過加長座位嘅唔好處就係身上所有物件都要擺上行李架，要攞嘢就唔係咁方便！呢程機唔係好瞓到，所以都覺得好漫長，返到香港好友又叫肚餓！因為已經係凌晨接近一點，所以我地冇乜選擇，得返太興一間，求其食咗少少野就一齊搭的士返去，我地大家住喺附近，所以一架車去晒幾個地方都好方便，七日嘅旅程就咁完結喇！諗住返到屋企要快D瞓覺，但係忍唔住都要開個喼，執D嘢出嚟影下相！

2018年11-12月 開心東京遊 Day 6 - 東京、新宿

好快聽日就要走啦，今日係shopping日，瞓醒就去東京站，因為要去買手信，東京站嘅手信去到下午就會賣晒，所以要買咗手信先，買手信前去大丸食壽司，上次食過一間叫すし鉄的唔錯，所以今次再去，我地叫咗好幾款壽司，不過冇上次咁好食，唔知係咪上次我好肚餓，加上坐壽司吧，睇住師傅整，所以整得好D，今次我哋坐四人枱睇唔到師傅整，感覺冇咁好食，質素好似差左！

食完野走去買手信，先去大丸地庫專賣手信嘅一層，在店外已經見到長長的人龍，New York City Sand 係最長龍嘅一間，人龍分左3段，近店子有兩段，在大丸百貨𥚃面，第三段最長嘅人龍，要排在大丸外面，龍尾寫住大約要50分鐘，我就排住隊先，佢地就去買嘢飲，然後再返來會合我，其實呢間店只係一個counter 位，非常之細，所以要人流管制，我地排咗大約40分鐘就入得喇，每人都買咗10盒8盒，因為冇買其他手信，淨係專注買一、兩間，買完呢間仲要去地鐵站買另一間 New York perfect cheese ，我地兩點幾去到時，佢已經賣晒，唯有明天請早！

我地在東京站內租咗一個locker，放晒D手信，然後先至出去繼續行程，順便睇埋聽日有冇地方寄存我地行李，然後由東京站搭NEX離開，因為我地行李比較多同埋大件，驚 locker 放唔入，同埋驚同時冇四個大locker ，好彩 locker 旁邊有一個行李寄存地方，可以放大件D嘅行李，睇咗價錢每件600 円，覺得都OK，同租一個locker 價錢一樣，咁就認住個位置，明天就放呢度啦！

放低左行李之後，搭火車去新宿！先去高島屋睇下有冇水果，今期水果選擇唔多，主要都係士多啤梨同埋柑，當然都有D提子同埋蜜瓜咁啦，我哋睇唔啱，就去其他地方行，去咗歌舞伎町果邊行街，又去夾公仔，行咗一陣街，又去食嘢，去咗好友一直想試果間穴子店，因為唔係好肚餓，而且鰻魚飯嘅份量唔係太多，所以我地每人叫左一客鰻魚飯，有D食大份，有D細份，呢間穴子店叫做しろや，其實係居酒屋，除咗穴子仲有其他嘢食，不過我地主要想食鰻魚所以先至上來，呢個鐘數冇乜人，除咗我地只有另一台客，店舖個環境都幾新淨，都見到佢有好多房，應該都幾適合一班朋友飲酒傾計！食完野繼續去行街，去咗OIOI ，因為好友要買  mercibeaucoup，我地在店內搞咗好耐，因為有好多款都覺得睇啱，左試右試，左揀右揀，最後每人都買咗幾件，全部都係冬季衫， 都買得好開心，跟住繼續行埋商場樓上，見到有一間叫做駿河屋的店，專賣動漫果類產品，好友發現有佢地心頭號之餘，仲比秋葉原平左好多，所以都忍唔住手買咗幾個，買到人哋要關門都唔捨得走!

2018年11-12月 開心東京遊 Day 5 - 東京廸士尼海洋、上野

尋日去完樂園果邊，今日可以去海洋喇！

一早出門，先去食野，去左試松屋！正常我係唔會去松屋，不過我地今次全程笑其中一個好友，因她朋友叫她要去食，話夠地道，仲話必食，我地去過日本多次，根本唔會考慮，只係貪得意去試，果然係我地預期，同吉野家差不多！志在填飽肚就算！

我地戴埋尋日買果頂帽入園，去海洋果邊，就要撘車，紀念車飛有三款，有聖誕主題同35週年，上次四月來買了米奇、米妮各一張，今次已經冇左，轉左第二款！買完飛又入去攞 fast pass ，可惜已經冇晒胡迪！咁唯有睇下有乜玩，我地去攞左奪寶奇兵 fast pass，又去咗睇Finding Nemo ，我地玩奪寶奇兵果陣，夾好左影相果陣時要擺甫士，影出嚟張相都OK，曬左每人一張，本來想玩多一次奪寶奇兵，但係佢竟然暫停左！

今日入嚟海洋呢邊，一早講左要上隻船度食午餐，今日唔係太多人，本來唔使等位，但係我地s上錯左去另一層，排左一陣先發覺原來唔係呢間，好彩只係排左幾分鐘，上返去餐廳，唔使等位，我地安排坐旁邊位，枱旁邊有一個窗，可以望到出面好多人圍住舞台等睇表演，不過我地只係睇到少少嘅舞台！

上到去餐廳我地一人叫咗一個set食，其實只有兩款選擇，一款係燒牛肉，另一款係燒牛肉加龍蝦尾，主菜未黎之前先來麵包同埋前菜，麵包有兩款，一款係米奇軟包，另一個係硬包，之前我食過，覺得個軟包好食，而個硬包我就唔係咁鍾意，所以一開始我就選擇兩個軟包，好友食過之後都覺得軟包好食，因為可以 refill，所以我地區叫完一次又一次，因為真係覺得好味！叫到我地都有D唔好意思，前菜係帶子沙律，沙律到左準備食之際，突然米奇同米妮，仲有 Pluto 在窗前經過，還向我們打招呼，我地攞唔切手機影相，只係勉強影到Pluto ！好 surprise 好開心！食完沙律，再食埋個主菜，好好味，正呀！食完野果陣我地仲順便買咗隻35周年嘅匙羹，因為得餐廳呢度先有得賣，所以我地一人買左一隻！

食完飯我地去行街，睇下野但係唔買住，等走果陣先買，夜晚我地睇海上表演，開始有小小落雨，我地繼續玩機動遊戲，然後再去shopping，走果陣雖然冇落雨，不過個地下都濕晒，搭返車出去舞濱，然後又去搵野食，尋日去左秋葉原，搭車經過上野望到都幾多野食，所以今晚去上野睇下有乜好食！

去到上野，食店比秋葉原多，都唔知點揀，有D睇落幾好嘅就好爆，有D無人嘅又驚佢唔好食，最好搵左一間居酒屋，叫做食道楽，食物選擇睇落幾多，有燒烤、有刺身、有串燒，我地每樣叫咗D食，食物都唔錯，我地又叫左梅酒飲，呢餐都食得幾開心，食完野我地又去便利店買雪糕食，今次又搭的士返去，因為都好近，價錢同尋日差唔多！