海鮮角樂

都有一段時間冇去堅尼地城呢邊，今晚過來食海鮮，星期四的晚上，店內只有一枱客，店子地方不大，大約廿個位，點餐紙有多款海鮮選擇，亦有一些套餐，我們選了二人餐，都幾多野食，先來呀媽魚湯，奶白色的魚湯，有紅蘿蔔和粟米，都好夠味！飲完湯食沙律，蝦沙律用日式沙律汁，加上碎芝士，酸酸地，唔錯！海鮮先來磯煮鮑魚，印象中的磯煮鮑魚味道一般，店員推介佢地做得好味，果然冇介紹錯，而且鮑魚的質素也很好，跟住有蒜蓉粉絲蒸扇貝同清酒煮花甲，兩款貝殼類都鮮甜，套餐有兩件慢煮星斑扒，細細片的，鋪滿蔥，正合我意，星斑扒慢煮後再煎過，所以外皮有點脆！跟住係爆膏奄仔蟹，跟餐是鮮海蟹，但沒有貨，加錢轉了奄仔，果然是爆膏，用了鹽焗方式煮，外面看來比較乾，但蟹肉不會乾，最後是芝士焗龍蝦，龍蝦頗多膏，好好味！吃的很飽呢！

食到尾聲，得返我地一枱，與店員閒談幾句，說店主在香港仔魚市場有海鮮檔，所以攞到靚貨，難怪海鮮的質素好！

饕牛記

10月份飯局食個不停，今晚又約咗好友食飯，去咗呢間火鍋店，都係任食形式，好多唔同部位嘅牛肉都食到，所以好容易就食飽，因為除咗牛肉就係牛肉！仲有牛骨髓、牛丸、牛黃喉等等，當然佢仲有其他火鍋配料啦！亦都有限時，不過冇睇到佢究竟限時幾耐，淨係見到係加事要俾錢！

呢個地方唔係好大，但係好嘈吵，原因係講嘢有回音加上枱同枱之間都幾近，所以基本上傾唔到計，只可以同坐隔離果個傾計，原本我地想傾下嚟緊東京之旅，但係太嘈真係傾唔到，基本上，面對面都要用WhatsApp！直至走左幾台客先至冇咁嘈，我地揀咗日暮里站，附近一個叫做鶯谷嘅地方，果度有兩間民宿都符合我地要求，所以我地揀咗間平少少而且睇落好D果間，就由有account 嘅好友負責book房，傾傾下有人想轉呔去大阪，因為想去環球影城，不過應該唔會改，因為民宿都定左，所以一於去東京！

江南庭敘

尋日返香港，今日休息左一陣都仲係好攰，但係我有好多野要做，所以冇留在家中休息，先去尖沙咀剪髮，因為頭髮太長喇，夜晚又約咗好友去九龍灣食飯，今次係同我慶祝生日，唔係唔得，去左呢一間火鍋店，應該係新開冇幾耐，上次好友生日已經話想去，但係因為適逢中秋節訂唔到枱，今次就大把位，呢間野D價錢都幾貴，所以我地都冇特別叫海鮮，都係一D基本火鍋食物，火鍋用了都幾好，特別係雲吞同埋蝦滑，都係自家製，整得幾好！好友帶咗佢個仔一齊嚟，呢個小朋友大個咗好多，但係都算幾聽爸爸話！食飯嘅時候大家都講天氣涼左，係時候出去燒嘢食，原本想約下個月，但係十一月份好多人去旅行，月頭月中月尾都有，好難夾到齊人，不過都即管試吓夾唔夾到邊一日一齊去BBQ！

2018年10月北九州自駕遊 Day 6 - 博多、運河城

話咁快去到行程嘅最後一日，住咗五間唔同酒店得呢一間係冇早餐，其實見到佢有早餐，不過我地訂果陣冇楝到，去咗附近搵食，在火車站旁邊有個細嘅商場仔，入邊全部係食肆，見到一間食烏冬的店，叫做大福うどん，有好多款早餐set，我地每人揀咗一個早餐set ，我揀咗一個叫估々朝定食 set，好簡單有麵豉湯，白飯一碗同埋生雞蛋，仲有紫菜，我又加咗一兜納豆，在日本食早餐都係想食碗生雞蛋白飯加納豆，平時在香港食早餐根本唔會食飯，就算你想食都冇得食除非自己煮，就算自己煮都冇咁靚嘅生雞蛋！日本D雞蛋真係好好味！食完早餐就去返尋日地庫嘅超市買手信，買完手信返酒店執埋D行李，昵間酒店11點check out ，跟往攞埋車，就揸車過去運河城，呢度係一個大型商場，我地入去行左幾個圈，睇咗一輪野，都係買唔到嘢，跟住又去咗火車站附近嘅 Daiso，反而呢度就買到少少野，因為樣樣野都係 ¥100，仲要係日本做我哋先買，買完野都差唔多要去機場喇！

今日搭17:55航班返香港，早兩個幾鐘頭去到機場附近，先去還車，租車公司會車返我地去機場，其實呢間租車公司就在機場對面，只不過對面條馬路唔可以就咁行過嚟，所以要車我地過去，加上我地攞咗咁多行李，所以一定要車我地過去，車程只係幾分鐘，我地就去櫃檯check-in，櫃檯嘅時服務員再三提醒我地，手提行李只限兩件，限重7公斤，好友用一個細嘅喼，都要過磅，我用背囊就唔使！放低左行李之後見到機場都冇野行，就早D過關，因為過咗關一定有D嘢睇下行，過咗關，地方唔係好大，不過都可以消磨一下時間，因為我地又去食嘢，其實食店只有兩、三間，我地去咗一間食蛋包飯嘅，因為知道搭飛機冇嘢食，同埋返到香港都唔食嘢，所以食飽D，一人一個蛋包飯真係食得好飽！食飽就預備上機，三個鐘頭機好快就到，我都瞓咗個幾鐘！落機嘅時候同以往一樣要搭車，不過今次落車嘅地方好近海關，所以過關都好快，不過行李都要等左成半個鐘，好友就搭巴士返去，因為佢有巴士去到屋企樓下，我就搭的士，因為我部車去唔到屋企樓下！

總結今次自駕遊，真係好攰，我估唔到成日坐車都係咁攰，平時自由行要行路搭火車都冇咁攰，可能長時間屈喺架車度，等同坐長途機一樣，同埋日日都早起身又夜瞓，所以攰到不得之了！不過都好開心今次可以放左幾次飛機，雖然天色唔係太理想，都叫做有一，兩日好天，而且可以去一D冷門嘅地方，係平時火車去唔到或者公共交通去唔到嘅地方，期待下次再同好友一齊去飛！

航拍 11 - 九州別府市志高湖

去到至高湖，見到都有D工作人員，其實有諗過在湖邊放飛機，但係有工作人員嘅地方通常都唔俾放，所以我地決定離開，去附近飛，去咗頭先經過拍左幾架車嘅地方，樓梯上到去原來係學校，所以我地在泊車嘅位置起飛，飛去個湖度好近，景色都幾靚，仲可以睇到湖邊一點點白色嘅天鵝！湖邊嘅樹木開始有D變紅，我諗遲多一兩個禮拜會仲靚，湖嘅另外一邊，見到有好多太陽能電子版，亦都有一D梯田，景色都幾靚，只係天色唔太理想，因為天陰陰想落雨！我地飛咗兩轉，因為想留返舊電，睇下陣間上鶴見岳有冇得飛，不過估計冇得飛，因為有纜車就有工作人員！

2018年10月北九州自駕遊 Day 5 - 血池地獄、志高湖、鶴見岳、鳥栖 outlet

今日早餐在酒店食，平時溫泉酒店多數係 buffet，呢間就係 set ，即係個個都係食同一樣既早餐，冇得㨂，多數溫泉酒店都係一泊兩食，呢間一泊一食，早餐質素麻麻地！

食完早餐出發去血池地獄，印象中曾經去過呢個地方，冇乜印象係點樣嘅，去到門口見冇乜人，入場需要收費，佢呢度有五個唔同顏色嘅池，都係泉眼，要去晒咁多個池就要¥2000，如果去一個池就¥500，我地只係去血池地獄一個地方，因為好友話呢度有一隻藥膏，係用呢個池嘅礦物質做，話對皮膚好好，所以買來試下，因為有一、兩個朋友都有D濕疹，所以買比佢地試！買完飛入場先去一個商店，呢間商店都好多野賣，我哋都睇啱咗酒，因為我哋飲開果隻八年梅酒，已經買唔到喇，所以都要睇下其他牌子，不過呢度如果好飲都好難再返來！ anyway 買支試下，離開商店出去，就已經係血池地獄泉眼，呢度有個位置可以俾你浸足浴，不過我地就冇浸，始終冇毛巾，浸濕左隻腳好難搞！在泉眼旁邊有一個檔口，就係專買果隻藥膏嘅，我哋一買咗一、兩罐返去，佢係細細罐的，如果好用，可能都好快用晒！

去完血池地獄，就去志高湖，未到志高湖之前，經過一個地方，有一條樓梯上去，下面拍咗十幾架車，我地好好奇樓梯上面有D乜嘢，不過去完志高湖先再返去睇，去到志高湖，除咗我地只有兩個人在跑步，我地行去湖邊，見到好多天鵝同埋錦鯉，但係竟然無得賣餵魚嘅食物，只係有一D艇出租，我哋冇玩到，只係影下相就走，因為呢度有工作人員，唔係太方便放飛機，我地決定去返頭先見到拍咗十幾架車果度睇下，行樓梯上到去發覺原來係一間學校！泊喺度嘅車可能係老師們的車，於是我地就在泊車嘅位置放飛機，因為好近個湖，所以一定會拍到個湖！

睇完至高湖，再去上山，我地坐纜車上鶴見岳，在山下面的纜車站是高原駅，旁邊有一間叫做九州燒酎館，主要係買酒同埋紀念品，我哋先上山睇左先，乘搭纜車嘅來回費用係¥1600，纜車站本身亦都係一間手信店，我地都係回程先至再睇手信，坐纜車嘅時候，只係得我地同另外兩個外國人，車程只需要10分鐘，架車雖然行得快，但係都行得好定！沿途可以望到別府市，山上面嘅樹都好高，上到去山頂，都係好少人，纜車站後面有一個鳥居同草地，我地影一左陣相又睇咗一陣風景就離開，坐返纜車落山，同樣除咗我哋都係有兩個人，仲要係講國語的！落到山我哋就睇手信，買咗小小手信，行過去果間九州燒酎館，就冇嘢睇啱啦！

上完山，再過去鳥栖 outlet，可以去 shopping ！車程又要一小時有多，去到 outlet 外圍，見到呢個 outlet 有5個停車場，其中一個仲要係有幾層，好大！一入 outlet 攞張地圖睇下，見呢度原來唔大，同日本其他 outlet 差不多，但只有一層，相對算細！先去食D嘢，因為大家都肚餓喇，呢度只有一個 food court 同埋幾間食店，所以就揀咗其中一間叫做神戸元町ドリア，主要都係一D日式西餐，我地叫咗蛋包飯，食得好飽，不過都仲有位食多個甜品，因為前兩日見到有間pancake店，但係因為太飽食唔到，所以喺度叫咗個pancake食補返數！食飽飯可以去行街，去LC 望下，見貨量雖然多，都係一D長期在 outlet 都見得到的貨，見到個方型TNS 坑紋煎 pan ，之前已經考慮緊，見佢一減再減，原本¥9800，做七折¥6860，滿¥5000再減¥1000，即係¥5860，依家滙率 6.9，折合港幣$404！好難唔買！行李大把位，一於托返去！另外再買左隻蕃茄碟，同幫人買咗兩個毛巾set！跟住會給好友，一齊睇下衫睇吓鞋，都冇嘢睇啱，想睇下有冇 Fred Perry ，佢又冇！

行完outlet，揸車返酒店，今晚住在博多市，先去酒店擺低行李，然後出去行街，幾年前去過呢度，博多火車站就在酒店斜對面，亦都係呢度最旺嘅地方，呢度有百貨公司同埋商場，我有朋友叫我幫佢搵 Hermès ，不過見唔到佢要嘅款，跟住我地就落咗地庫行超市，淨係睇咗有乜嘢手信要買，原先有諗過要買D水果返香港，不過今次搭廉航，行李限制比較多，所以最後都冇買到！行一陣街又去搵食，在酒店斜對面有一間叫做笑門的店，有少少似居酒屋咁樣，食物選擇都多，當然唔少得福岡最出名嘅牛腸鍋，呢度亦都有烤肉，又有串燒，最多嘅當然係酒啦！我地叫咗一個牛腸鍋，份量都幾少，不過個湯好好味，所以我地叫咗兩個拉麵淥，好好味！我記得牛腸鍋應該係有D韭菜，我地食呢個就冇，只係有幾條葱，但係都好好味！食完牛腸鍋就食燒烤，我地叫咗牛肉同埋厚切牛舌，牛肉就唔算特別出色，但係個牛舌就幾好味，重點係厚切，我地仲叫左串燒，又飲咗梅酒同啤酒，店入面都好熱鬧，食客主要都係日本人，好多都係打工仔放咗工黎食，食完野，我地再去便利店買甜品返酒店食，7-11 便利店經常都有好多好靚嘅甜品同埋雪糕，今次見到有特別版 Haagen Daz 雪糕，有白雪公主同愛麗絲，分別係蘋果味同埋紅茶味，有圖片睇見到個雪糕入面係有心心圖案的，我地就買咗抹茶紅豆黑蜜雪糕，買完就返酒店食，今次住嘅係博多獅子宮酒店，房間都幾大，我單人房同好友嘅雙人房都係特大雙人床，打開個窗竟然係落地玻璃！房入面除左梳妝枱，仲有一張枱仔同埋櫈，市區酒店來說都算大，而且唔算貴，單人房都係五百幾！返房之後就食雪糕，我個人就覺得紅豆甜咗D，三層口感加埋一齊都幾特別！