2018年6月第一次去名古屋 Day 3 - 長島、名花之里、三井Outlet

話咁快到第三日，今日上網預辦登機了！

今日會去遠小小，長島 Nagashima ，由名古屋市搭巴士去大約35-50分鐘，視乎你去邊個位置，在名古屋的近鉄巴士總站，有多架去不同地點的巴士，例如去白川鄉、大阪、四國等地，當然車程會較長，選擇去長島，因為是車程最短！在長島有四個主要景點，第一個係名花之里 なばなの里 Nabana no sato ，呢度主要係賞花，第二個係長島溫泉，當然就係浸溫泉啦，第三個係遊樂場，即係有過山車果D機動遊戲嘅遊樂場，第四個係outlet ，第二至第四個景點係黐埋一齊，巴士會先去名花之里，再行廿分鐘車程先到其餘果三個景點，未黎之前，上網睇過，遊樂場同溫泉剛剛好閉館幾天，所以我去唔到呢兩個地方！先去名花之里先！

尋日已經睇過巴士站位置，就在名鉄百貨樓上，售票處在3樓，埋去counter查詢，職員完全唔識英文，好彩我影左個時間表，指俾佢睇我要去邊，佢又指個收費表俾我睇話我知幾錢，不過職員個態度就唔係幾好，全程已經唔使佢講英文，淨係睇圖，佢都黑口黑面，好似聽到英文都唔想做咁！買完飛等 11:20 的巴士，只有幾個人搭，有一家係大陸人，我見架車有女士座位，在第二第三行，我就坐左第二行，班大陸人坐晒我前後隔離左右包圍着我！好彩佢地唔嘈！因為坐坐下都訓晒覺！

11:55 就到達名花之里，只有我一個人落車，行過去入口好近，呢度入場要比錢，入場費¥1600，雖然會送返¥1000 coupon 比你，但係只可以用來買花！一入門口見到有個廿週年嘅牌，呢個名花之里已經20年喇！個牌前面有張枱仔，專係俾人擺相機自拍，唔知佢地真係咁細心定係唔想係咁幫人影相，不過呢個設計真係幾方便！今日呢度嘅遊人唔多，不過今日真係好熱好曬！我全程都要開遮，呢度出乎意料之外地多餐廳，我見到有兩間餐廳中間有個小教堂，教堂另一邊係一個湖，仲有一條小小嘅橋伸出個湖度，都幾靚，當然我係咁影相啦！影影吓見到旁邊有一個好似富士山咁嘅圓形物體，原來係一個圓形觀景台，中間整咗一個假嘅富士山做裝飾，個觀景台可以升高同埋轉動，陣間過去睇下先！

沿住個湖邊行，見到呢度有個溫泉，仲話有露天風呂！今日天氣太熱喇，雖然浸完可以沖涼，但係都覺得好熱，所以都係冇去到，一路向前行，見到有條小橋，橋下面好多魚，見到有小朋友餵緊魚，原來旁邊有兩部機售賣魚糧的販賣機，每盒魚糧¥100，我又買盒玩下！魚糧包裝好似一個威化餅的盒，中間抝開，裡面係一粒粒的魚糧，我拋幾粒落水，即刻好多魚遊埋黎食，D魚好大條，佢地好似好肚餓，係咁爭住食，倒晒D魚糧之後，個威化餅盒都可以整碎俾D魚食埋！我再買多一盒餵佢地，跟住又有其他人餵，所以我就去其他地方，就去富士山觀景台！

上去觀景台又要俾錢，¥500，觀景台慢慢升高，但係只係轉左一個圈就落返嚟！離遠望到條河上有D唔知係乜嘢嘅建築，有D類似係水壩上面有幾個機關咁，我睇地圖都冇寫係乜嘢嚟！anyway ，好快睇完，就去睇花，今期係繡球花，一大片地方都係繡球花，有好多唔同嘅品種同埋顏色，睇完已經身水身汗，去商店行下涼下冷氣！睇睇個時間差唔多有巴士到站，一於去下一站 Outlet 睇下！

由名花之里搭巴士，廿分鐘到達長島樂園、温泉、Outlet，見到個樂園入面有水上樂園，呢度有溫泉酒店，如果一家人過來這邊，可以住返一晚，如果唔過夜的話，應該唔夠時間玩晒遊樂場+溫泉+Outlet，名花之里未必個個啱去，尤其有小朋友，睇花唔啱小朋友！今日只可以去 outlet ，去睇下有乜品牌！呢度都幾大，店都好多，行左一陣，先去醫肚！見到有間叫朝日屋的，專食松阪牛，見今次冇乜消費，就食豪D！叫返個牛扒餐食先！

全店只有我一個客！就叫西冷牛扒餐！可惜冇肉眼！先來湯和沙律，唔係特別好，牛扒鐵板上，但係冇汁的，個牛扒表面有D鹽，味道略為淡左D，肉味唔算好濃，不過油花好勁，老實說絕對唔係物有所值，有點失望！食完野在商場行下睇下野，都冇野啱！跟返時間表出去等車，回程搭17:40果班車，回程有十幾人，出返去名古屋市行下！

返到去巴士總站就在名鉄百貨，呢度有間 Loft，我幾鐘意去 Loft，有D似香港 City super，佢賣的妝物，在藥房不會見到有售，佢地有好多家品，不過名古屋呢間冇，我揀左D粉底、頭髮造型用品，比錢果陣話退税counter 收左工，做唔到退税，唯有明天再來買！

行返去車站的らまいもん通り搵食，見到有間廣壽司，就去試一試！叫左個 set，質素麻麻！身在日本，始終想食壽司，可惜唔見有好的壽司店！呢兩日再睇下有冇！食完飯返去食埋水果瞓喇！

2018年6月第一次去名古屋 Day 2 - 名古屋市、栄 （榮）Sakae

今朝瞓到自然醒，差不多九點，尋晚瞓得算幾好，係未完全瞓著時，聽到雪櫃有D嘈，摩打行下停下，因為雪左水果，所以冇熄到雪櫃，今晚食晒D水果就熄左佢！

今日天朗氣清，又係星期日，條街好多人，跟朋友介紹去搵鰻魚飯食，在的士站已見到廣告牌，店子叫做 備長ひつまぶし，地點在火車站太閤通出口個的士站旁，有個叫做 エスカ Esca Bazar 的地下街內，這地下街大部分係食店，一如以往，日本的食店絕大部分係11:00先開，我10:30去到備長ひつまぶし，已經有幾個人等緊位，我行左一圈，都見唔到有其他食店開咗門，咁我又去等位，我前面有五個人，陸陸續續都有人嚟等位，店員早5分鐘出來每個客問幾多位，一到11點正就開始入座！店內大約有四十個位，只有三個位係面壁果種單人位，其餘都係兩人枱或者因應人數移動D枱比四個六個咁，店員冇安排我坐面壁位，因為後面仲有三個單人，我早D所以坐二人枱！鰻魚飯三膳目（三種食法），分左幾個價錢，視乎你要幾多份量既鰻魚，最少有¾ 條，或者一條、一條半....咁上，我叫咗最少嘅¾條，我見等位嘅人入晒坐之後，都仲有兩個位剩，店入面有兩個位置係有玻璃隔住睇到廚房，我冇埋去睇，不過都望到師傅燒緊鰻魚，等左一陣個飯就到！先影咗相，再飲湯，試一試鰻魚個味道，好味！鰻魚表面係脆既，個人覺得咸左小小，本身食野淡味D，其他人可能覺得唔咸！正！

食完野在商場行左一陣，然後去附近的高島屋、名鉄百貨行下，兩間百貨公司都有點舊，在名鉄百貨見到有個巨型星戰角色 Chewbacca ，見到名鐵巴士站，上去睇定巴士班次時間表先！跟住又去左另一個叫 passe 的商場，這𥚃的商店主要是售賣年輕服飾的，行完就搭鐵路去另一個較熱門的地方栄！

由名古屋駅撘市營東山線過去，我由櫻通口出去的士站旁的9號出口落去，呢度有兩條線，地上有黃色線指示去東山線，睇住顏色就無錯！只需兩個站就到！一出站行左去呢度地標 Oasis 21，唔係好清楚呢度有乜野，好似係類似一D做教育既地方，建築物外型是一個圓形，行去地庫，見有一個叫 Central Park 的地下街，同大部分地下街大同小異，主要係女裝多，行行下忽然見到有間叫 Light cafe 的餐廳，佢地有 soufflé pancake 同 3D 拉花咖啡，就試試佢！叫左最基本的一款，沒有加水果，只加糖漿，有楓糖或蜜糖選擇，揀左蜜糖，另外一杯3D拉花 Latte ，可選貓、狗、豬等動物造型，我揀左貓！仲可以揀凍或熱咖啡添，天氣咁熱叫返杯凍先！我order 的兩樣都係製作需時，不過餐廳冇乜人，唔使等好耐！pancake 先來，個 pancake 底部煎到微焦，令佢有小小脆同埋好香，好味！3D latte 隻貓好可愛，唔捨得攪爛佢！好開心可以食到咁好味的 pancake ！

食完野出去行下，在 Oasis 的圓形下向上望，見到頂樓有D水，上去望下先，原來係一個透明水池，水池旁的地面是磨沙玻灕，我上到去先睇到，行起上嚟都有D驚，所以匆匆忙忙影左少少相就走！

見到附近有一間三越百貨，就諗住行過去果邊行下，行過少少已經見到有間LV ，有得LV就即係附近最旺嘅地方，過咗LV見到有間好大嘅驚安殿堂，對面有間百貨公司，入到去見佢做緊閉館清貨，所以冇乜野買，行完諗住去三越，點知關左門， Anyway 榮呢個地方都冇名古屋市咁繁榮，叫做到此一遊！

返到名古屋市已經九點！返酒店附近睇下有乜食，去左一間居酒屋，叫做なにがし，我叫左兩隻手羽先、串燒雞肉同雞肝、刺身五款，見到佢地有一款飲品，話用左1.5個檸檬，見有幾款酒，其中一款係梅酒，所以叫杯試下，原來1.5個檸檬，係雪到結冰，當係冰咁用，既有檸檬香味，又保持冰冷，都幾好飲！刺身有三文魚，証明為遊客而設，質素麻麻！手羽先幾好味！叫多兩隻！加多串雞肉同雞心！不過串雞肝應該係雞腎，唔係雞肝，店員英文好有限，我睇漢字 order的，可能佢攪錯吧！