百樂潮州酒家

踏入三月，又係 farewell 旺季，午餐已經食左一餐，又食左散水餅，夜晚又食！

約左去食潮州菜，今晚見好多吉枱，市道唔好，周圍都好靜，我地坐低等人齊，走去買左幾支紅酒飲，叫左幾款餸，鹵水鵝、蠔餅、烏頭、川椒雞等，最近成日想食蠔餅，終於有得食！食完飯，又點少得潮州甜品！水晶包、反沙芋！正呀！

食完飯佢地繼續飲野，我因為今日抝柴，隻腳好痛，所以要快D返屋企，返到屋企用冰敷下，然後用上次在大阪買的鎮痛貼，希望明天冇事！

金剛 Kong Skull Island IMAX 3D

1973 年，Bill Randa 帶領一衆軍人去骷髏島去勘察，實際上是去尋找金剛，衆人一飛抵骷髏島，即遇上金剛！所有飛機被擊落，衆人死裏逃生，一批人由受僱的前英軍 James 帶領前往島的北面，等待之前約好的救援機，另一批人由隊長 Preston 帶領，前往尋找金剛，要為死去的軍人報仇，在路上，James 等人遇到當地的土著，和一名留在當地多年的美軍，當他們與 Preston 等聯絡上，一同尋找失蹤士兵的時候，卻發現更可怕的生物........!

套戲頭段都好緊湊，中間有點靜場，後段金剛鬥怪獸，好似之前果套金剛鬥恐龍一樣，而呢套就少左講金剛同女主角之間的感情，只係見過一次，就幫佢，男主角好似成套戲都係果個表情，佢都係做返 Loki好D！

香港花卉展覽2017 -和三昧

又到一年一度的花卉展覽，今年同去年一樣，天氣唔太好，天陰陰，但沒有落雨，去影相前，先去食個 lunch ! 去左銅鑼灣的和三昧，因為好想食鐵板燒！lunch time 都多人，不過都有位，叫了兩個一人前 set，揀左鮑魚餐，除左鮑魚，仲可以揀柱貝或大蝦或鵝肝，另外牛肉有三種牛，美國牛、澳洲和牛同佐賀牛，有薄燒同厚切兩款，我地揀左厚切和牛同佐賀牛各一份，可以 share 食，餐有沙律菜，好新鮮，活鮑魚即場燒貨真價實，海蝦大大隻，鵝肝分兩份，雖然細細舊，始終高膽固醇，小吃多滋味！牛肉先來佐賀牛，䥫板迫出油脂，入口不肥膩，剛剛好！再來澳洲和牛，給比下去了，應該先吃和牛才吃佐賀牛！食埋炒菜炒飯，飽到不行了！

食飽出動去影相，入場費$14，用八達通入場好方便！今年雖然天氣唔好，但係都好多人，今年主題係玫瑰花，好多玫瑰花都開得唔係好靚，可能係品種關係，而且第一日好多花都就快凋謝，可能因為 個場 set up 左幾日吧！當然唔少得中間的鬱金香花田，呢個位係最多人影相，今年的鬱金香比舊年靚！今年都係有好多學生在畫畫，又有人帶公仔來影相，今年D裝飾都好靚，不過真係好多人，影左一圈就走喇！D相影得唔太滿意！

4DX 盧根 Logan

2029 年，已經沒有新的變種人出現，年紀漸漸老去的盧根隱姓埋名，與 Charles 一起隱藏在一個廢置工廠生活，他聘用了一個白化的變種人 Caliban 照顧 Charles，他則做出租車司機維生，一天，有一個墨西哥女人 Garbiela 找她，她知道他的身份，並向他求助，希望他能帶一個叫 Laura 女孩到邊境以外的地方，同時 Transigen 的人亦找上門，目標亦是 Laura，後來 Garbiela 被殺，盧根帶著 Charles、Laura 逃避 Transigen 追捕........!

片長達140分鐘，只有少部分悶場，海報寫住英雄震撼終章，由X-men 到狼人到盧根，由未變狼人之前到年老體弱，Hugh Jackman 已經演了十多年，來到最終章，兩個主角垂垂老矣，難免有些唏噓，今次沒有大量變種人，而打鬥場面絕對不少，很多血淋淋的場面，以為因此要列入三級，原來加了一場無謂的露胸場面！

2017年2-3月東京六天之旅 Day 6 - 新宿、成田空港 T1 T2 來回交通

話咁快去到行程最後一天！今日坐黃昏機走，留在新宿行街！先去食早餐，在歌舞技町見到博多天神拉麵店，呢間拉麵店，當年第一次到東京自由行，就在這𥚃食拉麵！一直沒有再來過，今日去重溫一下！店子仍是老樣子，現在看來很殘舊，拉麵選擇不多，叫了豚骨湯拉麵，有半隻蛋、五片豚肉、一片紫菜，以¥500的價錢是非常便宜，仲有無料替玉（免費加多個麵），當地人也會來吃！

食完麵去返南口果邊行，今次買左D自用的妝物，在高島屋見到復活節顏色的 LC 煲，好靚！但只接受預訂，沒有現貨，之後在 Tokyu hands見到櫻花圖案的一 set 浴室用品，我買了浴室地氈和厠紙架的套！

行完一輪，返去攞行李，見到有家新開的拉麵店，主打仙台牛舌，店內設計比較摩登，主要是紅白二色，店外有三碗拉麵模型，看來很吸引，攞埋行李入去，店內竟然沒有客！只有我一個包場，而且是午餐繁忙時間，即時有了好唔好食的念頭？門口有自動售賣機，拉麵只有三款，都是牛舌，只是湯不同，有辣唔辣同黑色湯，還有一款飯，我叫了唔辣，和一支橙汁氣水，拉麵的賣相吸引，牛舌切得很薄，老實說羶！牛舌有羶味就唔好食，拉麵也普普通通，店主如不加其他選擇，恐怕難以維生，店員另外送了一片燒厚牛舌，同樣是羶！

食完野去機場喇！今次早D去機場，目的想睇下由T2去T1 要幾耐，先去repack area 磅下行李冇過重，因為今次冇乜買野！HK express 未有咁早比人 check in ，唯有帶埋行李去搵 T1，跟指示牌搵去 T1的方向，行返出馬路的巴士站，找到18號巴士站，是免費shuttle 往T1，每廿分鐘一班車，因為是循環線，即係廿分鐘行一圈吧？鮮黄色車身藍色線，好易認，一個站就到T2，好快，落車的站是 T1 的6號站，即時在站頭睇下回程路線，由T1去返 T2就要三個站，如果經 T3就要4個站，在 T1落車後，入去行一陣，雖然T1的商店不同，又多野賣D，不過都冇買到野，好快就去返 T2，返到去 check in 完行李，去買下手信比自己，原本想買薯條三兄弟，但係賣晒，唯有買其他，點知入到去閘口附近，原來有大把！都買返幾盒先！去排隊登機時，見到D年輕人，可能冇買寄艙行李，件手提行李好大件，仲要攬住兩隻大公仔，雖然閘口在廣播，話手提行李超重要加錢，但到上機一刻也沒有收費，大概是趕起飛，根本沒有時間處理，見有D手提行李太大件，放不到上行李架，空姐也會幫忙放其他地方，難怪好多人都唔買寄艙行李，返到香港仲唔使等行李添！

2017年2-3月東京六天之旅 Day 5 - 築地、田原町合羽橋道具街、 Skytree

話咁快去到第5日喇！今日早小小，九點未夠就出門喇！去築地食野！想食鮨國，唔知多唔多人排隊呢？撘都營大江戶線，去到築地，見到多左好多店舖攞檔出晒馬路邊，主要係D燒烤海鮮、玉子燒，好多人！我目標為本，直接就去鮨國，竟然冇人排隊！入面有大把位，我叫左海膽飯、清酒煮大蜆、牡丹蝦，好鍾意食佢哋嘅清酒煮大蜆，好新鮮好厚肉，牡丹蝦雖然唔係好大隻，不過都好鮮甜，一路食，見越來越多人，到我食完走果陣，變咗要等位！

食完野行左一陣就走，去搭日比谷線，記得車站附近有間廉價酒店 First cabin，順便過去望下，價錢雖然平，不過位置確實係唔就腳，酒店附近有間便利店，唔記得叫乜嘢名，有D沙律、飯餸賣，在其他便利店見唔到有，價錢100g 賣百幾¥，都算好平！

搭日比谷線去上野轉銀座線，去田原町，去到又落雨，在街頭行咗一陣，去咗一間好舊既咖啡店飲咖啡，店內只有一個客，他正在吸煙，在日本唯一令我覺得唔好的地方，就是很多食店可以吸煙！以為日本人好注重健康，其實食煙的人也不少，以為日本人都好細心，但係又唔會分非吸煙區！我唯有選擇坐遠一點，這些古舊的咖啡店，店員大多不會說英文，不過一些簡單的英文咖啡名稱，例如Latte，就一定識聽！飲完杯咖啡，仍然落雨，唯有繼續行，今次諗住唔買大件的餐具，除非真係好鍾意，所以今次只係買咗筷子、匙羹、計時器，同埋硅藻土做的防潮粒，行完道具街，去 Skytree 喇！

去到 Skytree，食D野先，行了一圈決定去食烏冬，去了一家叫 田うどん本陣的店，叫了湯烏冬，份量頗少的，吃完不夠飽，再去食其他！去左另一家叫たまひで いちの軍雞料理的店，這店主打親子丼，見份量不大，又試下！店員話要坐低等等，我以為冇位，等左一陣入到去，竟然一個客也沒有！這裡只有一列坐位，看不到有其他房之類的地方，可能要我等，是希望在門外做一個要等位的假象，令人覺得要等才是好食吧！不過這招可能有效，等的時候有一家人又等埋一份，所以一次入了五個客！等位時已選了"雅"親子丼，除了滑蛋和雞肉，還加了生雞蛋，味道不錯！

食完野在商場行下街街，來過多次，也沒有甚麼特別要買的地方，見做緊叮噹電影的 promotion ，有個隨意門比人玩 VR，我買左個筆座比喜歡叮噹的老友，行左一陣就走喇！