Bamboo Thai

朗豪坊間戲院旁的餐廳，又轉手了，又做返泰國菜，上手港式餐廳好快執笠，轉手呢間泰菜都係稍作裝修，今日去睇戲前食個 lunch ，下午茶餐牌好似越菜，多數係檬粉，我叫左個海鮮蕃茄湯河，牛油雞翼，同菠蘿薑沙冰，味道一般！價錢合理，可以一試！

當文歷餅店

食完lunch，又係甜品嘅時間，去咗商場嘅呢一間餅店，開咗唔係好耐，之前行過見到未幫襯過，今日就特登過去試吓！

去到唔使等位，店入面坐位唔多，而且要隔開坐，就更少位，我地叫左檸檬茶、菠蘿包、DKA ，另外再叫左一款蒜蓉牛角包，店員話係今日新出的，個包搽左蒜蓉，再加粒蒜頭，都幾好味，檸檬茶我就覺得好甜，始終外面”紙盒”要用白朱古力先做到，所以好甜！其餘不過不失啦！我地叫左兩杯茶，今日又咖啡又茶，今晚應該瞓唔著！🤦🏻‍♀️

Harbour side grill

又開始放大假，冇得去旅行就留港消費，去咗海運大廈試吓呢一間新開冇幾耐嘅餐廳，呢度全新係地獄廚神 Gordon Ramsay 嘅 Maze grill 餐廳，餐廳有個靚景望住個維港，我地叫咗兩個set lunch，我地叫左一個湯，同埋一個牛肉他他，主菜我地揀咗三文魚同埋 risotto ，食物嘅質素都唔錯，只係三文魚嘅汁比較鹹咗D，其實呢間餐廳主要係做牛扒，但係咁岩今日大家都唔係特別想食牛扒，所以冇叫到，今日天氣好好，雖然有D 雲，不過都算天朗氣清，心情都好D！

鍋心海鮮燒

上次我地去旺角食完蒸海鮮，店員話攞住張單，去呢間佢地公司嘅分店，可以減$100 ，都幾抵，不過呢度係燒烤嘅海鮮，我地都係鍾意食蒸海鮮多D，不過見佢平咗咁多，又試吓佢啦！

呢度又係分時段入座，我地訂咗8:30 ，我地早咗到，所以去咗附近嘅佳佳甜品食糖水，食完甜品啱啱好人齊，我地喺門口度等位嘅時候好熱，因為佢門口有幾盞大射燈，加上天氣又熱，所以熱到我哋係咁流汗！等到入座嘅時候，見到店入面其實就唔係好大，多數都係四人卡位，得一張合併嘅大枱，我地六個人坐，呢度好似樓上仲有位，但係睇唔清楚係咪有樓上！呢度係廚房燒好出嚟俾我哋嘅，所以我地就喺度傾偈等，其實我地等入座之前佢應該比張點心紙我地揀咗海鮮食先，因為佢除咗揀海鮮仲要揀串燒，我地六個人要揀18款開串燒，揀海鮮同串燒都揀咗一陣，我地揀咗芝士醬燒龍蝦🦞、鹽焗海蝦🦐、蒜蓉貴妃蚌、生蠔🦪、帶子，串燒揀咗好多款，除咗呢D之外仲有三個飯，今次冇上次食得咁飽，可能因為上次一嚟到就有碗湯飲，同埋D蒸海鮮都夾雜住D蔬菜，而且上次個飯係多好多，同埋又有臘腸所以飽D，我地未食完已經講定下次去食buffet 🤣

K-bus Parlor

今日相約好友 F & J 去食蒸海鮮，之前去過果間小漁港，上次係過年嘅時候，疫情開始爆發，隔咗幾個月再嚟，食物質素都保持到，食完嘢我哋去旺角食糖水，行吓行吓見到酒吧又想去飲嘢，最後去咗呢間，之前好似嚟過呢度附近幾間酒吧其中一間，因為幾間個格局差唔多，所以都唔知去過邊間，我哋一人叫咗一杯 cocktail ，一路傾偈一路食花生，食下食下，食咗三兜！我哋傾偈傾咗好耐，因為好耐冇三個一齊食飯，飲完野我哋去搭車，因為好友搬咗去上水之後，就唔可以一齊搭車，佢自己一個去搭火車，我哋兩個就搭的士返去，始終以前一齊住九龍方便好多，不過好友 F 啱啱先搬過去上水，簽咗一年租約，之後先至搬有機會搬返出九龍！

航拍 20 - 清水灣大㘭門

已經好耐冇航拍，對上一次已經係九月，之後因為疫情，都冇乜出去，今次原本去元朗，但係唔多夠時間，所以臨時轉去西貢，由鑽石山搭91號巴士，去到車站剛好有車，1:20 pm 開車，架車都幾多人，沿路經過彩雲邨的時候落大雨！心諗如果去到落雨拍唔到，就當行下山！

2:00 pm 到達大㘭門落車，好彩出太陽，我跟網上面介紹去行，行咗上條斜路上面，上到去先發覺行錯路，應該在頭先落車嘅時候轉左邊，不過唔緊要，因為呢條清水灣道直去，有一個觀景台，應該都可以放飛機，呢條路好靜，沿路都冇人，不過我後邊有一班菲裔嘅男女，應該都係去同一個目的地，沿途車亦都唔多，行咗大約半個鐘就去到目的地，先至發覺原來呢度我之前嚟過放飛機，上次係同朋友揸車入嚟，呢度叫做大坑墩，上次已經係兩年前嘅事，雖然個景色係冇變，不過都試吓飛啦，因為部機太耐冇用，我都想佢郁吓！

上次行去放風箏嘅草地度放飛機，今次去觀景台嘅位置度放，呢度冇乜人，反而風箏果邊就好多人，今日都幾大風，飛機起飛左一陣，唔係好傳送到影像，見到架飛機飛緊，但係畫面係冇郁，而且又警告我好大風，搞到我都有D驚驚地，唔敢飛得太遠，所以飛咗一個圈就返嚟！影出嚟效果唔理想，有少少爆光，雖然都轉左Manual mode ，同埋加左濾鏡，冇人陪我放係驚青D😅

放完飛機沿路行返出去搭巴士，今日都好熱，行到身水身汗，行到去巴士站剛剛好走咗架巴士！下一架車要等20分鐘，在巴士站見到有條103 M小巴線，係去將軍澳地鐵站，反正我都係去地鐵站，是但一架都冇問題，睇吓邊架有車先，話口未完就有架小巴，即刻上車，架小巴都開得好快，肯定快過搭巴士，去到將軍澳要搵嘢食，因為成日未食過野，落車果度係Popcorn商場，一行入去就見到有一間豚王，都好多年冇食過喇，就去食下啦，拉麵店入面一個客都冇，就只有我一個客，下午茶餐$72 ，一碗拉麵、三隻餃子、一罐汽水，都好抵食，我記得佢初初在中環開嘅時候，一碗拉麵都要$100左右，當然而家競爭大左，分店多咗，自然可以做平D，加上最近市道咁差，唔做特價真係未必生存到！