新志記

今晚要搭零晨機，之前約左好友飯局，食埋先至返去攞行李，約左去太子站的新志記，之前來過一次，覺得D小菜都唔錯，尤其係燉湯，足料又好味，其實呢度主要食海鮮，不過小菜都做得好好！

今次飯局都約咗好耐先約得成，我地有大人細路九個人，我地叫咗個豬肺湯，小菜方面就叫咗香蔥雞、椒鹽鮮魷、生炒排骨、中式牛柳、銀魚煎蛋、炒豆苗，好味道！好友帶左D生果比我地食，好好味的香印！正正！

食完要趕返屋企梳洗，再趕去機場！

殿 大喜屋

食過番尋味，又去殿 大喜屋！

今次一行4人，我去攞位先，去到見好多人，諗住有排等，原來係未夠鐘，一夠鐘，全部人入晒去，好友泊好車，好快過到來，我地坐卡位，今次唔使諗，全部揀上次食過好食的食物！剔完食物紙，去攞野飲，兩女飲 sake 兩男飲橙汁！！

今次主攻刺身，唔少得蝦！有生蝦、燒蝦、中式煮蝦！！蝦，全部都係蝦！而限時自取的海膽手卷，都食左兩 round，另外都有叫左小小熱食，當然唔得炸貓山王！而 sake 飲下飲下，就飲左12支！今次記得食甜品喇！仲食左D橙，因為而家D橙好貴，食返D先！

食飽飽，好友車我地去尖沙咀碼頭，我地坐在海邊吹水，睇下人地釣魚，傾到成兩點先走，好耐冇咁樣靜靜地傾下計，大家都話想一齊去旅行，不過共識唔到日期同地點，睇黎都好難成事！

美孚九華徑燒烤場

相約好友們去BBQ，原本上個月，因為有人病了，所以改了今天才去，我們在旺角等，因為要買海鮮，今次買左扇貝、鮑魚、蝦、蟹、瀨尿蝦，然後坐的士入去，地點在美孚附近，如果由地鐵站行去都頗遠，所以一齊坐的士去，去到見有兩個燒烤場，我地去果間叫美孚九華徑燒烤場，入場先付款$148一位，比一張贈飲券和一張食物券，飲品只有一支或一罐，如果揀可樂會送多支水，食物券換當晚的特別食物一份，今晚有豬仔脾，或者羊扒，其他燒烤食物一律任食，去呢D燒烤場好處就係食物選擇多，食完就走得，當然食物質素一般，亦歡迎自𢹂食物來，飲品就唔可以自攜！

我地先洗左海鮮先，然後一邊燒一邊等朋友來，呢度物資充足，有錫紙、牛油、蒜蓉、辣椒、豉油、蜜糖，又有麵包、棉花糖、番薯、粟米等，肉類都係豬／牛／雞扒、雞翼、腸仔、丸咁啦！難得今次人齊！一路食一路傾，好開心，食到人地收檔！

Anova 慢煮牛扒

趁 Anova 慢煮機做減價，比之前仲要平多幾十蚊，嗱嗱聲搵人幫手買，好友都話要買兩支，所以一次過買咗三支！話咁快就送到香港啦，約人出來食飯順便攞埋貨， 3支慢煮棒都唔係太重，只係個盒比較大，攞到返屋企當然要試吓先啦！

買咗塊平平哋的牛扒試，同上次一樣，切一小塊出來，今次揀個無根的位置切開，用來做比較，首先要搵一個比較深的煲，好彩屋企有一個，將慢煮器夾在煲邊，裝咗個App，調教左溫度去55度，然後就去處理塊牛扒，將牛扒放入真空袋，用真空機抽真空，上次及左水壞壞地，今次用又冇事喎，處理完牛扒，見D水仲係凍冰冰，原來用錯左華氏55度，改返攝氏55度再等過，見D水開始暖，放包牛扒入水度，教咗1小時時間制，等佢慢慢煮，等到仲有大概15分鐘，就可以煎果一小塊牛扒，都慢煮牛扒煮完之後，再煎一煎兩面，兩塊牛扒切開，生熟程度睇落好似一樣，但係食落口，煎嗰塊D肉明顯有渣，慢煮嗰塊就冇乜，juicy D，好味D，效果比起用蒸爐更好，真係值得買來用，下次試下豬扒或者雞先！

蛇王芬

今日約咗人去中環的蛇王芬食飯，順便攞埋佢幫我買幾晚煮器，過咗五是繁忙時間，得一兩枱客，呢度裝修頗殘舊，收費亦不便宜，不過有好多年歷史，相信質素唔會太差，我哋叫左燒味雙拼飯、蛇𡙡、燉湯、炒豆苗，我燉湯好甜，蛇𡙡都好足料，雙拼飯都唔錯，不過覺得蛇王二更好！講起蛇王二，好掛住佢地D脆皮膶腸呢！

今個聖誕無銀用 Office Christmas party

Clay 是公司總經理，與老婆友兼同事 Josh ，正為公司的聖誕 party 籌備， Clay 的姊姊 Tracey 忽然殺到，因為業績欠佳，Clay 這分公司面臨倒閉，除非能夠簽到科技公司的一份大合同，否則聖誕後，就要解僱所有員工，Clay 決定邀請科技公司的代表參加公司的聖誕派對，可惜在派對中發生事故，令派對和公司毁於一旦，Clay更被綁架.....!

都係因為到期的電影券先至睇呢套戲，笑了唔算豐富，都係果D有味笑話， 加D男女關係咁，近年 Jennifer Aniston 都係拍呢類喜劇，見到有佢份都唔係好想睇，都預計到係乜嘢戲，原本諗住睇下笑下就算啦，不過真係笑唔出！

山頂盧吉道、灣仔築地、銅鑼灣

原本約好友出走澳門一天，不過其中一人太忙了，不能去太遠，改為本地一天遊，先在中環站集合，行去纜車站等，一齊坐纜車上山頂，其實每程車費＄32，四個人車費比的士更貴，不過好多年冇坐過纜車，都係想體驗下，車程比想像中快，去到山頂，我地在商場行左一圈，就去盧吉道行山，呢度都好出名，因為有D獨立屋，基本上得幾間，呢條行山徑都好好行，因為都係平路，沿途有唔少人跑步，我地都見到有座癈置的獨立屋，又見到一些老樹，好快行完一圈，又回到纜車站，跟住去灣仔築地食野！

坐的士去都係六十多元，平過坐纜車，我已經來過一次，但係朋友們未來過，今次少人好多，唔使等位，一去到，先去立食區食壽司，餐牌多咗 omakase，我哋唔想食咁飽，因為仲有好多野想食，所以叫咗一客 omakase 試一試，我地四個人每件刺身同埋壽司都一開四來食，好搞笑，其中食左牡丹蝦壽司同埋大拖羅壽司都覺得好好味，所以encore左每人叫多件！今次來有梅酒飲，我地叫咗一客有五杯的梅酒，五種味道！

食完立式壽司，走去食龍蝦包，見到多咗一款帶子包，係用丹麥酥做底配上帶子，我哋叫咗龍蝦包同埋帶子包，四個人食，兩款都好好味，食完飽就去食燒烤！大家都飽飽地，所以只係要左幾款嘢食，叫咗一個螺、雞肉串、帶子、燒三文魚、手羽先，食埋都好飽下，食完晒野我地就係度行一陣，不過都冇買到零食就走啦，其中一位好友就要走先，我哋仲有下場，落銅鑼灣行街！

去到銅鑼灣，先去H&M行左一陣，好友買咗衫同鞋，我就買咗一頂特價帽，行到攰攰會地又去搵嘢食！去咗皇室堡嘅 Dazzling cafe，呢間都係我好喜歡去的餐廳，我哋叫咗意粉、薄餅、炸雞、炸魚柳、薯條，當然唔少得食甜品啦，叫咗朱古力味的 waffle ，今日都算大滿足，希望下次可以去得成旅行啦！

妖夜尋狼：世紀血戰 Underworld blood war

Selene愛的人都被殺害，女兒被迫與她分開，不知所終，她亦退隱江湖，但新一輪殭屍和人狼戰事即將發生，人狼新首領Marius崛起，血族必須依靠Selene的血，才有機會獲勝，她為了唯一的盟友David和 David 的父親Thomas，她要挺身而出，作出最大的犧牲，才能終止這場戰爭……！

呢套戲拍左好多集，都唔係集集有睇，之前睇過果幾集都唔記得講乜！都係因為有電影券就快到期，所以先至用埋佢，講唔上好好睇，劇情發展都係預料中事，不過不失！

飯局主場 - 第七回

又要宴客喇！今次挑戰11人飯局！

好友的兒子一歲生日，相約了一仲好友，一共11個人，不過有兩個臨時病咗，冇黎到，最後只有九個人，咁多人打邊爐就最啱啦，裝修之後，第一次在家裏打邊爐，我哋去街市買咗海鮮，有牛頸脊、九節蝦、帶子、象拔蚌仔、螺、脆肉鯇魚片、雲吞、韮菜餃、蟹柳等等，今次洗下啲嘢就食得，唔使煮煮小菜咁花時間！湯底用咗自家煮嘅，唔使用雞湯，我哋用咗白蘿蔔、蕃茄、薯仔來煮個湯底，好鮮甜又冇味精，正！我哋開咗支荔枝酒飲，上次在馬鞍山飲過，所以買支返嚟飲，基本上呢隻荔枝酒冇乜酒精味，甜甜地又唔會似藥水味，好啱女士們飲！好友飲咗杯淨 Vodka，開始胡言亂語，好好笑！

食完飯唔少得食蛋糕，好友訂咗個蛋糕好大個，我哋有本身食得飽，好彩仲有有食力嘅朋友，最後包底食晒成個蛋糕！成晚都傾得好開心，希望下次都可以再食過啦！