2025年9月第一次廣島獨遊 Day 2- 宮島、嚴島神社、宮島水族館、紅葉谷公園、彌山展望台、獅子岩、表參道商店街

今朝在廣島駅食個早餐先，去左星乃珈琲，知道附近有コメダ珈琲，不過唔太就腳，見依家星乃都有多士早餐，一條(約三份一塊)厚多士加一隻烚蛋，一杯咖啡¥600，我要1.5倍加大裝咖啡，就¥720，亦都有D set 有沙律配埋，我就簡單D，多士加蛋夠了！

食完早餐搭JR 地鐵去宮島口，約半小時車程，再步行約五分鐘到碼頭，亦可以選擇搭路面電車，就要72分鐘，步行約2分鐘到碼頭，當然有巴士去，但我冇深究，所以不太清楚！

去一號月台搭山陽線，地鐵都頗多人，有機會冇位坐，不過搭左一個站好多人落車，就有位坐了！去到宮島口站幾乎落晒車！一出站要落一層過對面，再上返路面，就見到電車站就在碼頭旁邊！排隊買飛上船，有IC 卡就唔使排，直接在閘機過，都頗多人過去，見佢每個鐘有四班船，十幾分鐘有一班都好密，船程大約十分鐘，可以選擇坐船內有冷氣座位，或船外吹海風影相，不過冇得坐，隻船有三層，最低係泊車，另外兩層乘客用，沿途都望住個海中大鳥居⛩️越來越近，泊岸時鳥居在右邊，睇落好近！

一落船，沿右邊行可以直接過去鳥居，未開始行已見到鹿🦌，不過只有一隻，而且呢度唔可以餵鹿，所以隻鹿都唔會行埋嚟搵食，我沿海邊行，知道旁邊有條表參道商店街，回程先至行，暫時唔肚餓，行一陣先，行前少少又見到幾隻鹿🦌🦌🦌，有隻較年幼的就走埋嚟聞吓有冇野食😅 有幾隻停留在餐廳門口，我諗餐廳老闆會餵佢地，因為見老闆有拍打佢地，好似叫佢地走開，佢哋都冇反應！ 行到去鳥居⛩️附近見到一隻有角嘅鹿🦌，坐喺度任影，見佢隻角纏住左D野，真係想幫佢整甩佢🤣

去到嚴島神社，入去睇吓，要買飛，不過神社冇乜野睇，都係有個大殿比人拜神，又有御守同繪馬售賣，仲有個位伸出少少可以同鳥居影相，不過依家潮退，可以行落海灘企埋D影，我就轉頭先落去！

行完神社出嚟，跟指示行去宮島水族館，入去涼吓冷氣！一入去係介紹瀨戶內海蠔嘅養植方法，有D蠔吊在水𥚃模擬海底環境比你睇，都幾得意！跟住係其他海洋生物，有個大魚缸，𥚃面有不同嘅魚類，不過個魚缸偏細，雖然有兩三層樓咁深，不過唔夠闊，見D魚都係靠住玻璃游來游去！另外有個海豚缸，又係偏細，見海豚都唔能夠𣈱泳🥹今期水族館有個昆蟲展，又睇吓D昆蟲！睇埋其他海洋生物，水母、沙鰻、蝦蟹等，出到嚟商店旁，有海獅同企鵝，海獅果邊可以通去表演場地，今日未有表演項目，旁邊仲有條路行去錦鯉館，除咗錦鯉仲有金魚同海狗，行返去商店，其實仲有個水池，比人坐低伸對腳比魚仔咬腳皮，見有兩個學生仲手比魚仔咬，我就冇興趣😅去商店睇吓有冇野買，我就冇乜野啱，見到好多沙鰻產品，不過唔算得意，冇乜野啱！

出嚟行返去鳥居，今次行入沙灘近距離影個鳥居⛩️，本來想攞架飛機仔出嚟影，不過好大風，架機應該頂唔住！所以冇飛到！跟住行返去表參道商店街，呢條街好熱閙，呢條街好多手信店，多數賣木飯勺，應該係幾出名嘅產物，當然仲有好多食店，唔少係燒蠔，嚟到廣島一定要食蠔！見到一間幾新淨又大間少少的，入去坐低食，當然有D小店似街邊檔有張長凳，又另一番風味，我叫左五隻燒蠔，加杯瀨戶內海檸檬梳打！D蠔略為乾左少少，較細隻！可能店家一次燒多隻，去得慢，不過都係新鮮嘅！食完出嚟繼續行，見到有張地圖可以攞，先發現原來有覧車上山，咁就返轉頭！

先去咗紅葉谷公園，雖然話係公園，但係都幾荒蕪，只有一啲山路，行咗一段路先至去到纜車站，先搭一架細嘅纜車，一架車最多可以坐六個人，上到山之後再轉另一架大嘅纜車，呢架就可以坐十幾人，上到山都幾涼快，風景都唔錯，行咗個圈影咗啲相就走，因為落山嘅尾班車係4:30 ，因為已經三點幾，所以都係落返山，沿着山路行返去紅葉谷公園，頭先經過一個鯉魚池，見到可以餵魚，買咗魚糧埋去餵，個池唔係好大，份魚糧只有一個細紙杯嘅份量，所以好快餵晒，跟住繼續行返去表參道！

行到表參道已經身水身汗，見到有一間本地嘅啤酒，所以買咗一杯試吓，本身唔係特別鍾意飲啤酒，不過見佢係本地生產，所以試一試，個人覺得比較苦澀，跟住行過一間燒蠔嘅商店，又忍唔住食多兩隻蠔🤭食完去搭返船出市區，都已經五點了😅

落船之後今次搭電車返去，雖然知道搭電車要一個鐘，但係因為火車應該唔會有位坐，所以想喺電車度坐吓涼下冷氣😅去返Minamoa 商場，搵野食！尋日因為冇時間行商場，所以今晚行咗陣先去食飯，喺商場睇咗陣，揀咗一間叫做瀬戶內味覺処芸州，個名好中國feel，不過佢係食日本菜，見到佢有壽喜燒，所以去試吓，店入面只有我一枱客，另外有D房應該有人，個壽喜燒套餐，揀咗黑毛和牛，有四片牛肉，亦都有兩舊刺身，不過佢壽喜燒個鍋好似 Shabu Shabu 咁，成碗壽喜燒汁，個火只係一嚿蠟嗰種，所以火力唔係好大，不過味道係唔錯嘅！

食完飯再喺商場行咗個圈，原本想去BicCamera，但係佢已經關咗門，所以唯有返酒店，又喺便利店嗰度行咗一陣，喺Lawson 忍唔住買咗一包炸雞食😆

 

2025年9月廣島獨遊初體驗 Day 1 - 廣島市

甚少會喺七至九月呢D日子去旅行，今次又破例，因為近排實在太忙，好想放空一下，好好休息返幾日，所以今次就去一個從來未去過嘅地方，事前亦都冇特別去蒐集有啲咩景點，粗略咁睇過一啲介紹，到時去到先再諗吓，因為志在Hea幾日！

一早9:00機，其實每日只有一班機來，一班機回，所以基本上冇得選擇，亦都唔係間間航空公司有機過去，今朝早咗少少出門口，所以搭早咗一班巴士，六點幾已經去到機場，先去寄咗件行李，跟住就過關搵嘢食，行咗個圈諗唔到食乜，就去咗Arabica % 買杯咖啡飲吓先，上兩次已見到佢開咗，不過就冇機會試，今次就淨係叫咗一杯咖啡，入面有一排座位係望住停機坪，所以喺嗰度坐咗陣，呢間其實都好多人，不過多數都拎走，所以啲位係冇乜人坐😆 飲完咖啡諗住行去40號閘嗰邊食鏞記，點知佢未開，見到開咗一間 Urban Coffee roaster ，但係啱啱飲完咖啡，所以買咗樽水同一個肉桂卷，然後搭無人駕駛過去閘口嗰邊坐低食，其實201-230 呢邊有兩間食店一間係味千，另一間係美心，如果啱食可以過到嚟先慢慢食！

飛三小時十分鐘，今次架機唔滿，我坐得比較後，由我果行開始，已經冇乜人，今次我旁邊兩個位都冇人坐，後面成行冇人坐，見隔離果行都係咁，就可以拎起扶手坐得舒服D！到埗後，機場好細，都有四個櫃枱過關，都算快！行李反而要等，過海關係人手過，唔似東京大阪自助過，出到去接機大堂，好細，只有一間便利店，呢個機場冇鐵路直達，只有巴士！行出去係巴士站，巴士站旁有售票機，呢邊有locker ，我諗住去旁邊三景園行吓，諗住近近地拖埋個篋，但係行過去都唔太近，去到公園入口更加係要行樓梯，所以影左幾張相就走了！

去返巴士站買車票，出廣島市¥1,500，在2號巴士站，出到去見有車，去廣島市新幹線駅口，我比張車飛職員睇，佢叫我等下一班車，下班車去巴士總站，我記得酒店附近有巴士總站，所以等下一班車，其實佢呢條巴士線，一班去廣島JR 站，另一班去巴士總站，去巴士總站果架都會停廣島JR 站，當巴士離開廣島JR 站開往巴士總站時，我發覺我攪錯左，原來個巴士總站不是酒店附近果個，而係近廣島城果邊😅頭先應該在廣島JR站落🤦🏻‍♀️

落左車，好肚餓，見呢度有Sogo Food court ，食D野先搵車返酒店！見到一間叫做なるとキッチン　食炸雞的，見佢有半隻雞賣。所以叫左試吓，要等十分鐘，見佢都好熱，應該係即叫即炸，雖然雞髀位都juicy ，不過雞胸就好乾，雞皮有少少油膱味😅，食飽就去搵車撘返酒店，跟地圖搵到個地鐵站，縣廳前駅，去到月台先發現唔啱，應該要去紙屋町駅，於是搵職員問，但係溝通唔到🤦🏻‍♀️，應該要去另一邊，不過我出唔到閘，因為佢個地鐵係唔可以同一個閘出入，職員幫我取消左record ，就可以出返去，跟住指示去左紙屋町駅，原來佢係路面電車，搭左2號線直接返廣島駅，搭左七個站，佢好似香港電車一樣，均一價¥240，邊個站上落都同價，都係落車比錢！

電車嘅總站係兩個大商場 Minamoa及Ekie，由商場穿過去隔離蔦屋家電，再行過去酒店都好近，先去check-in放低行李，然後出去搵嘢食，check in 後，行返去Minamoa，呢度有一層係食肆，都好多嘢食，不過好多舖頭都唔多人，見到菊川四丁目鰻魚飯，只有一枱客😅行咗個圈，本來想食生蠔，但成個商場都冇生蠔食，所以揀咗一間食牛舌嘅叫做仙台名物炭燒牛たん東山雅，叫咗個厚切牛舌套餐，有湯有飯，牛舌係好厚切中間係半熟，不過覺得外皮略為煎得過左，中間就啱啱好，好好食👍🏻👍🏻　

食完飯想話喺商場行吓，但係佢都差唔多落閘，所以我都冇乜點行，就返酒店，返去之前去咗附近7–11、Family Mart 同Lawson，在樓下間Lawson買咗大樽水，2公升仲平過細支裝，每次住酒店都買一支大嘅水，自己斟嚟飲，因為唔想飲酒店啲水，更加唔想用佢個煲😅

酒店住後感：
相鐵Fresa Inn 廣島駅前
由廣島JR站步行前往大約6-7分鐘路程，由Minamoa 穿過去蔦屋家電中間有條天橋，入到去蔦屋家電，行到最尾落返一層個出口出，過條馬路就係，全程都係有冷氣嘅地方，除咗中間條天橋，而且有晒扶手電梯，拎住行李都好方便，酒店樓下就已經有間Lawson 好易認，後面街都有間 Family Mart，在蔦屋家店出口旁邊都有間7–11，雖然酒店左右兩邊都冇乜商店，不過過條馬路就另一個世界，因為除咗蔦屋家電旁邊仲有個Eki city，都係好多嘢食嘅地方，而且火車站周邊都有商場同商店！
酒店大堂要上一層在2F， check-in都好簡單，有部機可以自助check-in，不過要先同接待處嘅職員攞咗個QR code先就快啲， check-in完就喺旁邊可以攞牙膏牙刷之類嘅用品，呢間酒店嘅牙刷刷毛比較軟身少少，平時好多酒店D牙刷刷毛都係好硬，呢間相對嚟講較為軟身，當然唔係好柔軟嗰隻，佢亦都有配備浴鹽同埋護膚品可以自取，可惜係冇漱口水！😅
房間嘅面積都係比較細，類似APA咁，床邊就係梳妝枱都冇乜空間剩，僅僅放得一張凳，不過佢入房插房咭嗰個位，擺定咗一張卡俾你，用嚟代替房咭插喺個咭位，等你間房有電，咁出去果陣就唔會唔記得攞房咭啦！👍🏻🤣