2024年12月東京伊豆自駕遊 Day 1 - 秋葉原、海老名、箱根雕刻の森美術館、下田

上星期先至由東京返香港，隔左八日又再飛東京，不過今次係由東京去伊豆熱海，HK Express 最近都開左航線去靜岡，不過我訂機票果陣未有，因為我有個重要嘅會要開，所以同好友分開到步，佢哋喺琴日搭早機過咗去東京，我就尋晚搭凌晨機，今朝早上去會合佢哋，凌晨機嘅好處係冇乜人過關，由我落機到過埋關等攞行李，只係用咗8分鐘，如果早機嘅話起碼都要成個鐘，不過行李都好快到咗，跟住就去搭火車出市區，因為啱啱走咗班火車，就要等半個鐘，去到東京站再轉JR去秋葉原，因為上個禮拜先住完秋葉原，所以好友話去華盛頓酒店搵佢，我都知道位置喺邊，落左車去六號月台飲支奶先，今次飲北海道4.0牛乳，隱陣😆 上去酒店房 join 埋佢哋兩公婆同好有家姐，一齊寄存行李喺酒店，就出去食嘢，今次真係去コメダ珈琲🤣上次冇位，今次有位😄食完早餐返酒店攞行李，再出車去熱海！

揸左個幾鐘，去到一個出名嘅休息站，叫做海老名，呢個休息站好大，好多野賣，又好多野食，我地主要買野飲同買手信，因為今晚食buffet 所以要留肚🤣 上返車，再揸個幾鐘車去箱根！

去左箱根雕刻の森美術館，呢度好大，有好多藝術擺設及雕刻，我哋主要係佢一個彩色玻璃塔 Symphonic Sculpture ，B座係一座圓柱形嘅建築，沿着樓梯行上去圍繞住周圍都係彩色玻璃，好靚，不過都幾高，上到頂都幾驚，跟住我哋都有睇其他藝術品，又去咗一間Picasso館，不過就唔係太多嘢睇，行到咁上下又去睇吓有咩紀念品賣，我就買咗盒顏色筆比好友嘅女兒，因為佢嘅用料係比較安全，買完野出發去酒店了！

 揸左成兩個鐘頭車，先去到酒店所在嘅下田市，我哋book咗6:00食晚飯，但係去到酒店已經遲咗10分鐘，酒店要我哋食吓一轉，即係7:00 ，我哋搞咗check-in仲有半個鐘頭時間就買咗包花火去附近個海邊度玩，呢度比市區凍好多，我哋冒住寒冷行幾分鐘過去海邊，幾個大人玩花火玩到好開心，始終香港冇得玩，難得酒店仲有得賣，所以都玩得好開心，跟住就行返去食buffet !

呢間酒店最出名係佢個buffet，因為有好多魚生，又有燒烤食物，又有正常嘅熱葷，佢個刺身好吸引，因為係劏咗幾條魚，將個刺身鋪晒出嚟，我哋係咁攞大拖羅，又攞咗啲海鮮去燒，烤肉就麻麻哋唔係特別靚，主打都係海鮮！呢度可以order新鮮鮑魚不過都幾貴，所以我哋都係冇叫，因為食刺身都食到飽，仲可以加錢飲酒放題，我地冇飲酒，所以冇加錢，食飽行去頭先個海邊，又行吓便利店，不過冇乜野買，又行返酒店休息！

酒店住後感：
下田聚楽ホテル
酒店嘅位置都幾隔涉，而且酒店都頗舊，全部都係榻榻米嘅房間，房間向海，check in 時已鋪好床墊，呢啲咁舊嘅酒店總係感覺燈光有點陰暗😅 不過勝過價錢平，一泊兩食，仲要好豐富 單人房¥17,000 👍🏻 好友兩公婆就book咗一間有私人風呂嘅房，我哋就冇私人風呂因為單人房，當然可以去酒店嘅大浴場度浸溫泉啦，但係因為好友個家姐話佢要去浸，所以為免尷尬我都冇佢，而且有啲攰，因為琴晚凌晨機踩到今晚都好攰，所以早D沖涼瞓覺！

 

Amuse

今晚約咗好友食晚飯，去左深水埗食西餐，餐廳位置頗隔涉，店子係開放式，沒有門，呢個天氣都ok ，地方唔算好大，大約廿幾個位，我地坐最入，因為中間有張長枱大約8-10人訂左枱，得返一張枱！

餐牌食物幾吸引，我哋叫咗一個豬手、焗蘑菇、意粉，同埋兩杯飲品，食物嘅份量都幾多，味道都唔錯，我哋就食唔晒，因為個意粉汁都幾漏😅 好友問我幾時再飛，我話下星期🤣佢一月再去歐洲，今次同屋企人去意大利，真係正👍🏻👍🏻

 

Harry Potter Mahou Dokoro (HK)

返到香港，去又一城睇吓呢間上星期新開的 Mahou Dokoro ，呢個位前身係百老𣾀，我估佢可能做短期租約，見裝修較簡單，門口㗎火車用紙做😅 有D流，產品冇乜驚喜，可能剛去完東京果間，所以覺得冇乜特別野，呢度都有 Sorting hat 比人影相，上次在東京影左，呢度就唔影喇！產品價格偏貴，寧願在日本買😅😂

 

2024年11月東京三人行 Day 4 - 橫濱、池袋

今朝起身冇食早餐，由秋葉原搭車去橫濱，喺月台嗰間”酪”嗰度買咗鮮奶飲，不過今次揀嘅鮮奶麻麻哋，唔係太好飲，去到橫濱站，在西口第二 bus terminal 22號站等 outlet 巴士，見有時間，就在附近便利店買三文治和咖啡，一路等車一路食，巴士11:20 準時開車，都唔太多人撘，大概七成滿，車程半小時左右到達三井outlet Yokohama，睇定幾點有車返橫濱！

第一去呢個outlet ，都幾多人，去食個lunch先，喺food court 揀咗間烏冬店，類似丸龜製麵所，就係買烏冬可以自己夾啲炸物，食完飯先去Hoka睇吓有冇正嘢，可惜唔啱心水！反而去Tempur買咗枕頭，再行咗一陣都冇乜特別嘢啱，我哋搭返15:45 嗰班巴士出返去橫濱！

去到橫濱要搵LV嘅旋轉木馬影吓相，不過旋轉木馬比想像中細，周邊亦都冇特別嘢配合，零零舍舍一個旋轉木馬，確實有D失望，既然嚟到，都影吓附近公園嘅燈飾！

買唔到想搵嘅嘢，就搭返火車走，見到佢有條線可以直接去池袋，又出去池袋搵扭蛋機，因為好友要幫姪女Chiikawa 扭蛋機，仲好順利咁幫佢扭到佢要嘅嘢，真係好開心，我哋記錯咗Capcom喺池袋，原來係渋谷，所以今日又擺唔到Figure，去到遲袋又再去食篝拉麵！今次試咗佢個醬油沾麵，老實講都係食返雞白湯拉麵好D😂

返到酒店附近，又買咗少少芝士返去送酒，因為尋日買嗰支梅酒未飲晒，所以今晚飲埋佢！

 

2024年11月東京三人行 Day 3 - 秋葉原、原宿、銀座

今朝瞓醒留在秋葉原，因為要幫好友個仔搵Figure，先在火車站食早餐，原本想去コメダ珈琲，但係冇位，所以去咗旁邊的Tully’s ，食完早餐喺附近四圍行，都有搵到佢想要嘅Figure，不過分得好散，冇一間好集中有齊所有嘢，所以我哋決定晏D去渋谷嗰間Capcom度睇！

行到咁上下諗住去食晏，大家都想食壽司，所以喺Google search到附近有間壽司店評分都幾高，就喺酒店附近，就行過去試吓，呢間店叫做すし土風炉，呢度係完全個室，所以私隱度比較高，我哋叫咗一啲壽司同埋料理，又叫咗隻蟹，同埋一啲串燒，食物嘅質素就不過不失，唔算特別出色，價錢亦都唔貴！

食完飯已經四點，嗱嗱臨搭車過去原宿睇鞋，不過都係睇唔啱，但係我見到有間Angelina，所以入去買朱古力，但係佢未有得賣，只有佢哋signature嘅栗子蛋糕同埋栗子雪糕，不過我都買咗一盒蛋糕仔手信比屋企人，我哋三個就食雪糕！

跟住落返銀座買餸，我哋去咗三越百貨地庫買牛肉，買咗神戶牛同埋国產牛牛舌，仲有啲菜，返去整Sukiyaki，又買咗少少刺身，今晚嘅晚餐好豐富，牛肉同牛舌都好好味，可惜設備只能夠煎牛舌，如果係燒烤就正喇！