2024年2月大阪獨遊 Day 1 - 心齋橋

2024 第一飛，考慮左大阪定東京，始終東京係我至愛，不過見USJ 做鬼滅の刃，所以都係去大阪！尋日都有兩朋友飛左去大阪，睇吓在大阪會否見到面！

今次搭HK Express ，朝早9:55 機，一早去左機場，見到機場仲有新年裝飾，我第一次見，平時唔會初十前去旅行，今次年初九出發，仲有新年裝飾😄 今次架飛機好新淨，機型係A321 Neo ，之前未搭過，坐位係分兩邊，每邊三個位，今次飛得好快，準時9:55 開機，在跑道等起飛等到10:30 先起飛，日本時間 2:20 到日本，即係飛左兩小時50分鐘，今次過關好快，2:48 已經過左關，第一次係人等行李！不過都好快，等在幾分鐘行李就到！3:04 已到火車站買飛，可惜下一班車要15:35 要等半小時🤦🏻‍♀️ 呢度又冇野行！落去月台等吓！其實可以搭普通車，不過只係早9分鐘開，又冇行李位，又要停多D站，所以都係坐 Rapit 好D，今次仲買左舒適位，有單人坐！不過隔離位果兩個人，一上車開始食餅，不停發出膠袋磨擦聲，仲要將餅碎掃晒落地🤦🏻‍♀️🤦🏻‍♀️

4:15 去到難波，先去酒店check in ，今次住難波東嘅APA ，在千日前，由火車站行過去大約7-8分鐘，放低行李就出去搵食！先去在黑門市場及心齋橋商店街之間，一間叫做 豪快立ち壽司 ，上面次同埋好友去到因準備關門所以食唔到！今次去試吓先！店內大約有廿個位左右，入到去見只有兩個客在壽司枱，我也坐壽司枱，餐牌只有日文，google translate 翻譯得唔準，只能翻譯到大概意思，再估估下 😅呢度壽司價錢￥200-¥800 ，我叫左大拖羅壽司，海膽三文魚籽壽司、白子同鲸魚剌身！仲有梅酒！質素一般，算係物有所值！食完行去固力果招牌，沿路見呢間壽司店在同一條街原來有三間分店！

去固力果影吓相，然後在心齋橋行吓，去到大丸又睇吓D手信，見到有間叫 Foucher 的朱古力店，有兩盒水晶做型的朱古力好靚，可惜已售罄！再睇下其他！都冇心水，過兩日再睇下，在心齋橋行多一陣，行到去法善寺橫丁，見到之前食過果間水かは茶屋，食爐端燒的仍在，就入去食吓先！ 上次坐樓上，今次坐樓下，今次見佢冇擺咁多食材出嚟，可能就快收工，所以唔攞咁多出嚟！我叫左燒扇貝、蝦、雞翼、雜錦串燒八種，個扇貝咸左D，其餘都ok ，係雜錦串燒略為乾淨左D 😅 食飽行多陣就返酒店休息了！

酒店住後感 ：

難波東站 APA 酒店 261 

今次住呢間 APA 位置在千日前，好近火車站，都好方便，而且價錢平，今次book 單人房四百多元一晚，有張雙人床，不過 APA 一向嘅缺點都係房間細，只係夠擺一隻篋，而且張床同張枱好近距離，雖然有張凳，不過都唔能夠完全拉晒出嚟坐，所以好多人都會選擇坐喺床邊，而唔坐上張凳度，所以呢間酒店嘅床褥，通常都係傾側咗去一邊，如果張床兩個人瞓，瞓落去會覺得張床褥係傾斜唔平，所以唔係咁好瞓，不過去旅行個人攰就容易瞓得着D！

 

石室咖啡冰室

今年年初四仍係假期，唔會年初四咁嘅樣🤣 今日去九龍城放飛機，先去食早餐，去左附近呢間餐廳，今日都頗多人，室外的枱已full，只餘兩三個有膠廉圍住的枱，應該會有點焗，今日不太熱，都可以坐入去！叫左個漢堡，同埋杯薑餅咖啡，食物都ok ，咖啡都可以，如果夏天嚟就可能太熱了！😅

 

牛皇星

大年初一，走去哥和老街公園放飛機，好友咁啱在九龍塘，約埋另外兩個好友一齊去食晚飯，出左去佐敦，原來想去食小菜，但係冇開，改左去呢間，都好幾年冇幫襯過，打個新年邊爐先！

叫左個醉雞鍋，貪佢有半隻雞😂 叫左牛肉、脆肉鯇骨腩、牛胸爽、韮菜鮫，另外叫左條鱆紅魚刺身！其實叫左刺身應該唔叫骨腩，所以我地都食唔晒😅食完飯原來想去睇吓廟街夜繽紛，但好友約友女友，所以都係各自歸家😄

 

蘿蔔糕 2024

 

又到一年一度整蘿蔔糕嘅日子，今朝約咗好友去茶餐廳食早餐，我就過去Starbucks買杯咖啡飲，然後一齊去街市買材料，蘿蔔就買咗30斤 🤣因為今日預計整18底，跟住買埋粘米粉、臘腸、臘肉等等配料，就去好友屋企開工，首先就蒸咗D乾貨，然後開始搞D蘿蔔，四個人加埋機器輔助，都幾快完成，最花時間嘅反而係等佢蒸，我哋有一個 Miele 蒸爐再加一個三層電蒸鍋，同一時間可以蒸九底👍🏻 咁就快好多！一共廿底

由於廚房都好忙，所以我哋今晚叫外賣食，叫咗Pizza，我都好耐冇食pizza喇😅 都係鍾意食個蒜蓉包多D 😄

蘿蔔糕20底

蘿蔔（未去皮）- 30斤

粘米粉-2400克

澄面-600克

馬蹄粉-144克

總水量（蘿蔔出水量＋ 開粉漿用水量）-4717毫升

糖-12茶匙

鹽- 18茶匙

蠔油-24湯匙

白胡椒粉-6茶匙

臘腸六孖

臘肉六條

瑤柱四両

冬菇6兩

鋒哥廚房

今日相約好友入屯門食飯，因為壽星仔想食呢間，貪佢任飲任食！

一早Book 左枱，7:00 前去到未有客，我地八個人，所以比左間房我地，呢度係可以先食一個羊腩煲或者雞煲，然後打邊爐，因為我哋有兩個爐，所以揀咗一煲羊腩煲同一煲雞煲，然後先再打邊爐，呢度每位送半隻龍蝦🦞，羊腩煲個味道都OK，雞煲就揀咗小辣，雞肉麻麻哋，本身隻雞比較瘦，冇乜肉🤣 火鍋就叫咗個清清地嘅蕃茄薯仔湯底，配料都係牛肉為主，牛肉就普通，任食火鍋嘅質素，其實食完個羊腩煲都好飽，其中一個好友食食吓唔舒服，冇乜食過嘢，所以有D嘢都食唔晒，好浪費🤦🏻‍♀️ 最後食雪糕就個個都食得落，甜品真係另一個位，三百幾蚊嘅價錢嚟講都算OK，不過對我哋九龍人嚟講就太遠了！ 

特工亞皆老 Argylle

 

今朝去香港公園放飛機，然後去朗豪坊新開嗰間 Beans 食野，然後去睇戲！

故事講述 Elly 是一位小說家，她的間碟小說 Argylle 很受歡迎，已經出到第四本，她寫第五本的時候，諗唔到個結局點寫，於是搭火車去探父母攞吓靈感，她在火車上遇到一名真正嘅間諜 Aidan，更在火車上遇到襲擊，原因係一個被稱為“國土安全局”的組織覺得她的小說，能預測他們的未來，所以想捉她，Elly 無奈跟Aidan 按自己想法去英國，希望憑她的想法去諗下一步，在倫敦，兩人尋找一條萬能鑰匙，有助於揭露她小說中也提到的部門。後來她懷疑 Aidan 想殺了她，於是打電話給她的父母尋求幫助。當她到達酒店會合其父母時，才發現父母驚人的秘密………！

套戲都幾長，不過幾好睇，有齊攪笑、動作、愛情，一開場已經係一場追殺戲，故事發展亦出人意表，有驚喜😂

壽喜燒 肉屋

早兩年疫情時，大家都留在家食飯聚會，曾經同好友上網訂壽喜燒返屋企食，果次就係訂呢間，覺得幾抵食，唔知佢幾時開左店，見到廣告，午餐$199起，就去試吓！

店在海防道樓上舖，午餐$199起，係赤身A5薩摩牛110g，上一級係霜降A5薩摩牛110g $249，最高級係極上霜降A5薩摩牛120g ，我揀左中間果個，跟餐有前菜、野菜盛合、白飯、漬物、蘭王蛋，另外加杯飲品，個名好聽叫做星紫流砂，係石榴、益力多、碟豆花茶，味道ok 👍🏻 牛肉切得非常薄，貼住隻碟，一夾起就扯爛😅 牛肉只有兩片，全程自己攪掂，店員只幫你開火，食過幾次壽喜燒都知點煮😄 先落汁，如果太咸就加水，煮牛肉用中細火力，因為牛肉好薄，煮到半熟夾起，放入碗沾蛋汁食先會滑！牛肉質素唔算出色，不過不失，比起上次外賣爭D，壽喜燒都係留去日本食，大份D抵食D！🤣🤣

 

食完壽喜燒，行去對面九龍公園放飛機，上次在 Park Lane 果邊放左一陣，今次去另一邊睇吓，呢邊有水池，有個攞左D藝術品嘅公園，見冇乜人又試吓飛，今次用個公仔嚟做對焦，同一個公仔，有時對到有時對唔到，都成功拍左一兩條片 ✌🏻✌🏻