2023年7月八人同行自駕大阪之旅 - Day 3 淡路島幸福 Pancake、明石海峽大橋塔頂體驗、心齋橋

今日8:00 出發🥱🥱團友都有小小遲😏，第一站要去淡路島，預計要個多小時車程，揸左個半鐘，見到明石大橋，一過左橋先去一去休息站，呢個淡路休息站，有個摩天輪！風景好靚，有間 Starbucks ，我地因為要去食 Pancake 所以唔買野食同野飲喇！
影左一陣相，就繼續行程！

我地去幸福 Pancake ，沿途見風景唔錯，仲有大風車，呢個島周圍都好有度假區嘅感覺，沿海仲有D度假小屋，好靚！

間幸福 Pancake 開10:30 ，我地10:22去到，停車場在餐廳對面，呢度頗多人泊車及過馬路，有工作人員指揮交通，餐廳好大，外面已經有兩個打咭位，一個教堂鐘、一個韆鞦，仲有隻遊艇，我地先去攞位，有室內或室外，如果淨係食 pancake 就坐室內，如果食意粉果D，就可以坐室外，我地揀左室內有冷氣😅，但呢度冇大枱，全是四人枱，我地分左兩枱，我地一攞完枱就四散出去影相，留低一兩個坐低等，大家失晒控🤣🤣🤣🤣，因為剛開門，所有打咭位冇人，所以大家衝晒出去影相先，除咗門口外的教堂鐘和韆鞦，呢度最出名打咭位係 “天國的階梯”，係一條白色樓梯，有個門框，因為在海上，影出嚟幾靚，另外仲有個大圓圈，呢個就普通D 😅

我地影左一輪，就接替其他好友去影，然後先落 order 叫野食，呢度每張枱上都有個數字牌。用嚟落 order，要去門口部自助機落單，先 scan 數字牌上的 QR code ，再揀野食比錢，Pancake 有咸有甜，我地各叫左D，上餐都頗耐，大家影完相先食，見到越來越多人，打卡位都要排隊，好彩我地拿拿聲影左先，如果唔係又要花時間排隊😅

走嘅時候在店外的教堂鐘影埋相，先至去攞車，走果陣已經12:00 ，跟住去明石大橋，我哋預約咗上橋頂， 1:20先開始， 1:00去集合，12:30 左右去到集合點，尚有時間，就在集合點旁邊嘅公園影吓相，影下大橋，今次上呢條橋，原本想全部人一齊去，但係好友個女太細，唔可以上去，要12歲以上先至得，所以佢哋車我哋嚟呢度之後，佢哋會去附近嘅Hello Kitty Smile ，再返嚟接我地！

之前因為睇電視，周奕瑋介紹咗呢個景點，所以上網搵咗資料，首先要經JTB 上網預訂，成人¥5000，中學生¥2500，網上預訂時，要填姓名同埋年齡，選擇時間，每日只有兩個時段，早上九點幾或下午1:20pm ，我地揀左下午然後俾錢，再收到email confirm，我哋去到集合點嘅時候，未夠鐘所以唔入得去住，橋頭呢個建築物，裏面都好熱，因為冇冷氣，諗住海邊應該會有D風，但係今日完全係冇，所以都好熱，人齊後就入去briefing，呢度最少12人成團，最多48人，今日有29個人參加，分成四組，Briefing 時講吓條橋興建嘅過程，亦都講解安全守則，佢有部翻譯機連耳筒比你聽中文或英文，所有帶上去嘅物件都要有繩連住，佢會提供一個粉紅色嘅膠套，俾你包住個手機📱，全部人都要着佢哋嘅背心🦺，因為有好多個袋，有拉鍊，可以裝D重要嘢，就係銀包同Passport，因為佢會叫你跟身，另外要帶頭盔🪖同埋手套🧤！成個 Briefing 用左20分鐘左右，已經成身汗🥵

首先我地要行樓梯上去橋底行人路，要行170級樓梯，行起上嚟又唔係好吃力😅其實呢度有 lift ，唔知點解唔比人搭，可能架lift太細？🤔 上到去，等佢地開閘，一開閘，大家都好開心，最估唔到係，一滴風都冇🤦🏻‍♀️🤦🏻‍♀️🤦🏻‍♀️🤦🏻‍♀️ 佔唔到在海中心的橋上面係會冇風！我地沿路行，一路都可以從地上的孔望到海，行左廿分鐘左右就到左橋塔，再要撘lift 上98F塔頂，上到去個位罝唔大，亦都係冇風 😅 我地在呢度影合照，然後自由活動約15分鐘，呢度望落去真係好宏偉，真係難得一”望”🤣，雖然行得都幾辛苦，不過都值得上嚟，如果天氣唔好咁熱就更加好！所以都係建議冬天嚟，不過冬天可能會好凍😅

影完相再搭返lift 落去，沿路行返去召集嘅位置，放低晒啲頭盔，再頒發返證書，就可以離開，手套就送俾我哋做紀念，我哋影完相先至掉！我哋等埋司機來接我哋幾個，所以喺公園嗰度買咗杯雪糕食，因為實在太熱了！淡路島嘅名物應該係洋葱🧅，呢度好多大大個嘅洋蔥🧅賣！😄我哋人齊之後，一齊返市中心！

返到去難波，竟然落雨，今晚嘅晚餐我哋分開食，因為有幾個想食蠔，但係有幾個係唔食蠔，唔食蠔嗰幾個又想去貓頭鷹餐廳，所以大家分道揚鑣，先車咗佢哋去貓頭鷹餐廳，然後我哋就去食蠔，呢間係放題任食，有生蠔🦪同埋蒸蠔🦪 ，每位¥5080加¥1100可以任飲酒精飲品，我地四大一小，小朋友免費，只有一個要加錢任飲啤酒🍻！D蠔都好新鮮，同埋都幾大隻，我哋食咗幾轉，足足有兩桶蠔殼😆

食飽飯又去心齋橋，因為要去藥妝店買嘢，大家最後衝刺，人哋關門之前買埋！再去固力果影相，終於人齊可以影大合照，但係新嘅打卡位已經關咗門，不過有好多人都跨欄杆入去影！影完相都差唔多11點，要返去瞓覺喇，因為聽日要打大佬！🤣🤣去環球影城要玩足一日！

 

2023年7月八人同行自駕大阪之旅 - Day 2 黑門市場、心齋橋、堺市Aeon mall

尋晚攪到十二點幾，今朝9:00 出發！第一站去黑門市場，大家先去上島咖啡店飲杯咖啡！呢間咖啡店在黑門對面，店員態度麻麻地，話要每人最少叫一杯野飲，我地本身諗住每一杯野飲加D麵包之類，都符合要求，另外仲見佢地有玻璃樽裝 Blue mountain 又買左支返去試吓！個店員先至態度好返D，可能太多遊客幾個人買杯野飲坐好耐，令D店員見到遊客態度咁差😒

飲完咖啡，開始去黑門市場行一圈先，我都好耐冇嚟，上午去大阪到冇嚟，今次係帶D未嚟過嘅團友嚟睇吓🤣行左一轉，大家鎖定目標，一間叫做黑門三平嘅店，揀左海膽、帶子、拖羅、刺身拼盤、燒蟹腳🦀、燒蝦🦐、河豚🐡，拆餐勁😆 食左成個鐘！🤣 食完再行多陣，買左咖啡豆，好友買左個冰鎮頸箍，只係 ¥500，好平！香港一般要百幾二百元！

今日行程係自由活動，我地兵分三路，一個好友自己去海遊館，一個好友一家三口自己搵節目，另一個好友一家三口就跟我去心齌橋行街！

我地由高島屋開始行，不過在高島屋冇收獲，行入心齋橋，先去北極雪條店買雪糕食，呢間北極好多年歴史，但我印象中第一次幫襯😄我地買左軟雪糕食，食完去影固力果，原本想影新嘅打卡位，但係好多人排隊，諗住等齊人先再影！行完一輪，去大丸會合好友，跟住揸左架車去高島區果邊，我地先去Daiso 行左一陣，然後去 Namba parks ，因為好友要去 Porter，佢地買完 Daiso 先上去 Potter，我地等埋其他人先上去 Porter搵佢地，上到去Porter佢地已經買完，見到有間 Record Tower，好友女兒買左 Blackpink box set ，跟住去退稅，再去攞車！

原本諗住去堺市 Lalaport ，半路見到堺市的 Aeon Mall ，所以改左去 Aeon，去到已經七點幾，買野返去 Shabu Shabu ! 我地揀左幾款牛肉、豬肉、雞肉，菜、豆腐等等，再買D刺身同壽司🍣，買完將要冷藏的食物放冷凍 locker ，其他野放上車先，然後分頭行一陣街 shopping ，我就玩左一次 Mario 機動遊戲，大家都冇乜收穫，就拿拿聲返民宿！

返到去，女仕們洗同煮，男仕再去便利店補貨 🤣 買定聽朝早餐，三文治、咖啡等，我地在民宿煮左兩份火鍋，因其中一人不食牛肉，而且份量唔少，所以點都要分開煮，煮完都10點幾！😅 食完野拿拿聲洗野，呢度有部細嘅洗碗碟機，但有專用清潔劑，所以洗完唔夠乾淨，要明天人手再洗，跟住再各自返房瞓覺！聽日又要早起身！😴😴

 

2023年7月八人同行自駕大阪之旅 - Day 1 臨空 Outlet / Aeon Mall

籌備左大半年，終於都可以出發嘅旅行，一大班人第一次一齊去旅行！今次八個人裏面有兩個係小朋友，其實一個已經係中學生可以當係大人，而另一個就幼稚園，中間有好多行程大家都想去，但係只有咁短嘅時間，都唔能夠完全做晒所有嘅嘢，所以行程都一路更新，加上早前有旅遊節目介紹左D景點，所以中間都有改，我地喺兩個月前已經訂機票同埋民宿，今次我哋訂Airbnb嘅民宿，因為想喺日本買嘢返去自己煮 🤣

早上6:30 在機場集合左先，寄完行李，就去24小時麥當勞食早餐，因為今次撘 HK Express 大家都冇買飛機餐，所以食D野先！在麥當勞遇到一個同日飛泰國的同事，之前都講緊唔知會唔會在機場遇見，真係見到，我諗大部份人都選擇去食麥當勞，其實我有貴賓卡可以去Premium lounge，不過佢哋冇，所以都係join 埋一齊😆

食完早餐行去閘口，今次70號閘要行到盡頭，去到已經上緊機，令我地冇時間在閘前影合照添 😅 上到飛機，大家都好快瞓著 😅 我就瞓左兩個鐘，因為前面的小朋友一直在咳，所以嘈醒左好多次！

一到步，先去攞車，今次有一個主力的司機，兩個後備司機，佢哋有車牌但好耐冇揸，主力司機就平時都有揸車，所以主要都係佢做司機！
我地租左架八人車，係日產嘅 Elgrand，我地放晒D行李上車後，發覺可以上埋D人，原本諗住要搵兩個去撘火車，依家唔使喇！😅😅

第一站先去臨空Rinku outlet ，佢地對呢個outlet 好大期望，我就幾個月前去過，冇乜野啱，只係想去海邊行吓！先去食D野，今朝食完麥當勞之後到呢餐，足足有六個鐘，去左一間叫做しゃぶさかつ喜， 主要係食炸豬扒，我地每人叫左個set ，炸豬扒好厚肉，不過唔夠 juicy 😅

食飽開始分開 shopping，我行左一圈就去海邊影相，仲見到日落，今次大家冇乜收獲，只買左少少野，就去附近Aeon mall 買野返民宿了！日本的 Aeon mall 一般都好大，今次呢間在臨空城泉南，我哋買左兩箱水，啤酒、薯片、水果、咖啡等，又塞埋上車 🤣🤣

跟住去食燒肉，搵左貝塚市的牛角炭火燒肉，去到都9:00 了😅 我地叫左任食set ，團友中有一個唔食牛，所以叫左豬、牛、雞，炭火燒雖然好有風味，但太熱了 😅 而且牛角的質素唔係特別好，情願食 あぶりや 😆

食飽返到民宿已經11點幾，今次租呢間民宿叫做合緣の宿，位於浪速區，都近難波，我地租果陣見佢寫住整棟出租，原來係指整棟有兩層出租，我地以為獨立屋只有我地，原來係比三樓我地，二樓分租比其他三伙住客，我地在三樓，要行兩層樓梯，攞住行李都幾吃力！上到三樓，走廊有部洗衣機，過D有一道門有獨立鎖，入到去就見到四個獨立門，係三間房同一個飯廳+廚房，即係全層係我地嘅！三間房，一間最大，有兩張雙人床，有浴缸，呢間比身型較大司機兩公婆同個女，另一間有一張單人床加一張碌架床，就另一pair 加個少女，最後一間有兩張單人床，就啱我同好友兩位女仕喇！同網上屋主提供嘅圖片一樣，好新淨，當然房間D相用左 wide angle 影，現場睇會細D 😅，廚房設備都算齊全，只係杯同筷子、叉匙羹等不夠，不過我地都買左紙杯同木筷子，大家放低晒D野就各自入房冲涼瞓覺，第一日已經好攰🤣🤣

元素大都會 Elemental

 

Ember 的父母是從火族移居到元素市，市內是以水、土、風三個主要族群為居民，Ember 父母開設名為Fireplace的商店，因為父母年紀越來越大，Ember 將要接手家族事業，但 Ember 容易情緒激動，對接手生意仍未成熟。一天Ember 在處理店裡的地下室宣洩怒火，不小心破壞了水管，一名水族男子從水管流了入屋，這水族男子Wade 是元素市市政廳的稽查員，他發現這店內的管道有問題，於是開了罰單並向上級報告，Ember 父母的店將停業……..！

故事簡單有趣，本來水火就是不能相容，刻意將兩者放在一起，宣揚社會共融，及每個人要為自己夢想努力及作出改變，不應再被固有想法框住 !

Indiana Jones and the Dial of Destiny 奪寶奇兵命運輪盤

 

1944年，Indi 和 Basil 在尋找聖槍時被納粹捉到，納粹軍當中有一名科學家Juergen 知道聖槍是假的，他有另一件神器是半個錶盤。Indi 在火車上與納粹搏鬥一番後，奪得了一半的錶盤，並由 Basil 保管

1969年，Indi 在大學教書，而且即將退休，他的兒子去世後，與妻子的關係變差，妻子也搬走了，他準備過他的退休生活。忽然 Basil 的女兒 Helena 找上他，原來Helena 一直在研究那半個錶盤，她與 Indi 一起研究這個錶盤，發現 Juergen 一直在尋找它，和平另外一半錶盤，Juergen 的追逐，令到Indi 要展開他人生最後一次冒險旅程…..！

來到最終章，始終主角老事已高，難得仍有能力，值得尊敬！成套戲都冇乜冷場，一如以往的緊張刺激 👍🏻👍🏻

Hama はま壽司

呢間壽司電應該上個星期先開，繼壽司郎之後，又一間日本嘅連鎖壽司店嚟香港開分店，不過今次呢間好低調，但係都有好多人喺度等位，攞完飛之後過咗去後邊街食嘢，因為要等成79張飛先到，所以食咗足足一個鐘後先返嚟，點知已經過咗我個Number， 不過佢呢度寫明過咗唔超過一個鐘可以再排返，我等咗三張枱就再嗌我喇！

呢度個格局有啲似壽司郎，揀咗幾款佢新張嘅promotion壽司，有大拖羅、帶子、烤牛肉等等，老實講，質素同壽司郎差唔多，甚至差咗D，我未見過咁樣嘅大拖羅，同餐牌上面張相爭好遠，好似嚿肥豬肉咁，都唔知自己食緊乜嘢！😅實物同相爭好遠，係日本一貫嘅作風！🤣🤣

 

UZimiZU

今日去佐敦食壽司，要等位，所以先去附近行吓！

見呢間燒鳥店，有串燒之餘，仲有啲日本套餐同埋有咖啡飲，所以入去試吓！
叫咗個帶子飯，另外叫咗杯椰香咖啡，食物嘅質素唔錯，咖啡都好飲，呢度好新淨，應該開咗冇幾耐，成個裝修都好日本feel，原本想試吓佢哋嘅串燒，但係冇乜時間，下次再試，食完飯再過去睇吓壽司有位未！