2023年2月九州自駕遊 - Day 2 Marinoa Outlet 、桜井二見ヶ浦、夫妻岩、福岡Lalaport Gundam

今朝同好友會合先，佢地酒店有得泊車，係自動轉上去car Park 果種，所以我地放低行李在佢哋酒店先，去食早餐，近近地在松屋食個早飯！

跟住出車去 Marinoa Outlet ，個 outlet 在海邊，好大風，旁邊有間教堂好靚，係比人結婚用，我地泊低車就開始行，我主要想買 St.Cousiar 的餅乾，但沒有全粉粒果隻，要同公司另一品牌久世屋先有！唯有買幾包先，之後再去其他地方睇吓有冇，呢個 outlet 好大，有點舊，商場中間有間 Starbucks ，又幫襯吓，好友就去買衫，跟住幫好友的朋友搵Coach 袋，平時我地唔會行呢D名店，發現佢做緊半價再75折，又真係幾平！結果冇幫佢朋友買到手袋，反而我地買左銀包同香水🤣 跟住我地又行去一間日本制的皮革店，揀左個小手袋！再去Roxy 買左件褸！同埋買左件衫，平時我地去旅行好少買野，多數買野食同藥妝！今次竟然買到其他野😅

買完野去搵一間在絲島市叫做糸島食堂的店，去到見門口有條隊，雖然已經三點，佢地4:00 last order ，但仲有十幾人排隊，今日好凍好大風，佢門口停車場幾乎泊滿車！呢間店位置真係要揸車去！我地輪流上車避風！等左15分鐘就有位，好快！店好新淨，𥚃面大約有三十個位，兩旁係四人枱，有一邊係 Tatami，中間兩排面壁位，餐牌好簡單，但係全日文，呢度用QR code 落單，落單頁面就有圖片！我地揀左大拖羅丼、特上海鮮丼，同埋海膽海鮮丼！D丼睇落唔大，用木桶裝住，我地 share 食！個大拖羅好肥美！好好食呀！其餘海鮮都唔錯好新鮮，鮑魚好爽，海膽同蝦都好鮮甜，正👍🏻😍😍😍 食落D飯都幾多！好飽！佢枱面有兩款醬油，一款係魚生豉油，另一款係佢地自家醬油，甜甜地用嚟撈飯！都幾好味！又買支試吓！我地食到四點，已經走剩幾枱，建議唔想等可以3:45左右到，last order 四點，但收五點！可以有一小時慢慢食！

食完飯再去下一個景點，桜井二見ヶ浦夫婦岩！呢個景點在海邊，好大好大好大風！我地近距離影完相，再去旁邊放飛機！飛過去影。有D人同我地架飛機揮手！我地飛左一轉就走，因為太凍，我地雙手冰凍，即刻上車開暖氣！

我地今晚住博多，先去酒店放低行李，然後去超市買野食返酒店煮！今晚間酒店係住宅式酒店，有爐頭可以煮食！我地揸車去福岡 Lalaport ，呢個商場有個高達，夜晚7:00 有一場表演，我地剛剛好泊好車趕得切睇！因為好友係高達迷，所以跟佢一齊睇，睇完就去超市買餸，好友就上樓上睇高達模型，呢個超市比上次大阪堺市間 Lalaport 少好多野買，上次見到一包牛肉好多舊好平，今次就一pack一款肉，雖然有七折，都唔夠上次平，不過冇辦法啦！都要買！原本有D 賣¥2000/100g 嘅切落位，不過冇得揀，我地見最出果D有點肥，𥚃面有D瘦D嘅，冇得揀就唔買，因為我地只可以煎同sabu sabu ，有網燒先可以買咁肥！最後揀咗幾包牛肉，然後去揀湯包同生果蔬菜，揀到咁上下，行返去肉櫃，見到做半價，即刻換返兩包七折比佢，再買多塊牛扒 🥩🤣 total 6 pack 牛🥩、1 pack 豬肉、兩包菜🥬、一大盒水果🥗、一包餃子🥟、2份魚生🍣、四隻蛋🥚！一包雞湯，好豐富，牛有三種，有黑毛和牛、霧峰牛、佐賀牛，返到酒店，去好友間房煮！先煎左牛肉同牛扒，黑毛和牛給比下去了！😅最好味係佐賀牛👍🏻👍🏻😋 跟住煎水餃🥟，再sabu sabu 好正呀！水果好大盒，係西柚好酸！其餘都甜！好飽呀！食飽傾左一陣就返自己房！

酒店住後感：
Dream Inn Hakata
我地為左想煮食，所以搵左呢間住宅式酒店，位置離博多位唔太近，不過我地揸車，呢間酒店冇自己的停車場，但附近有好多停車場，我地就泊左在酒店旁的停車場！附近雖然有便利店但要行三四個街口先到！條街有點靜，呢間酒店一梯三伙，好新淨，空間充足，每間房都係好似日本傳統的間隔，即係 open kitchen 兩個爐頭一個雪櫃，一個浴室有埋洗衣機，獨立廁所，趟門睡房，有兩張床，有張梳化同枱，呢度有一煲一pan，有晒基本餐具同洗潔精，垃圾要分類處理，酒店接待處有一個職員，十點後用密碼出入大門，房間都係用密碼所以冇匙卡，我地對呢間酒店都好滿意！早知住多晚！😅

 

航拍 25 - 九州絲島市桜井二見ヶ浦夫婦岩

我哋將架車泊咗喺夫婦岩對面嘅停車場，然後行去夫婦岩嗰度影咗一陣間相，今日好凍，而且好大風，天色亦都唔係太好，天陰陰咁，再行去旁邊有一個位有幾張長凳，我哋就喺呢度放飛機，近距離影一影夫婦岩，同埋拍下片就飛返嚟！因為實在太凍，凍到對手都僵晒，影出嚟嘅效果都唔係太理想，自己就唔係咁滿意😅

 

2023年2月九州自駕遊 - Day 1 中洲川端

又返鄉下😅！今日班機晏少少！11:00機，一早搭小巴轉巴士，等10分鐘，7:43 有車，35分鐘去機場，呢兩個月國泰同 HK Express 都不斷取消部分去日本的航班，尋日又再宣佈取消，好彩我冇受影響！好友用 Asia mile 換左國泰機票，所以同我唔同機去，不過航班差不多時間飛，不過佢哋回程班機取消左，要玩多兩日先返港！😅

因為唔同航班去，大家各自去機場食早餐！今次去近住40號閘果個 Chase Sapphire Lounge 問吓我張 Priority pass 用唔用到？ 上次冇問，今次即管問吓！一入去就見到有個牌寫住 Priority pass 可以用 😅 今日唔多人，食物選擇都少，自助取嘅有雞包仔、乾燒伊麵、粥、火腿、芝士、沙律同飲品，每張枱面都有個QR code，可以scan QR code落order嗌嘢食，但係可以落order嘅食物只有三款，菠蘿包、雲吞麵、同埋鹹嘅窩夫，我冇落order叫嘢食，求其食D嘢坐一陣，見到隔籬枱嗰兩公婆走咗之後，先見到佢哋原來留低咗個電話，職員就幫佢地keep起，當我走嘅時候都唔見佢哋返嚟攞，可能都未咁快發現到😅，跟住睇吓附近幾個lounge開幾點，環亞嗰個開12點，所以好友要喺1號閘果間環亞 Premium lounge 食咗先， AE 嗰間仲誇張三點先開，跟住就去45號閘等上機，好友在另一邊的65號閘，所以去到福岡先見，佢都係遲10分鐘飛，去到應該唔駛等好耐！

飛機飛咗兩小時50分就到，中間瞓咗一陣加埋應該有兩個鐘，因為尋晚失眠，所以好快瞓着咗，今日班機都幾多人，因為見到有個旅行團，有少少嘈！

落機後過關都好快，攞埋行李出埋閘都係15分鐘，自助報關比起上次大阪快好多！可能今日唔多人！搞掂晒就等好友班機到，佢遲咗10分鐘到，我就去便利店增值張西瓜卡，同埋買支水飲，我都係等咗大概15分鐘，人齊就就去搞租車，今次同上次一樣都係租Toyota嘅 Roomy，租車公司有架車去機場接我哋去攞車，車程好近只係幾分鐘，攞完車我哋先返酒店，今晚住中洲川端，好友住三井花園酒店，我因為嫌佢太貴，所以唔同佢地住同一間酒店，我租咗後面街嗰間 Livemax，比三井花園平一半！當然酒店係細好多，房都冇咁靚冇咁新！放低行李之後大家就去行一陣間街，我哋行咗去博多川端通商店街，呢條商店街比較舊，啲舖頭都好舊式，冇咩睇啱，行到去街尾見到有間Aeon，有超市有藥房，仲係廿四小時營業，入邊都好大，我哋買咗少少零食同埋水，再行返去商店街買士多啤梨，我哋買咗一盒淡雪同一盒普通嘅士多啤梨，跟住攞返酒店先，因為今晚book咗食飯喺酒店附近，所以擺低野先，去好友間房睇吓，間房真係幾大仲有張梳化！呢間酒店仲有浴場添！真係一分錢一分貨😅

今晚book 左一間叫做とりまぶし雞料理水炊き，當然係食雞㗎啦！好彩有book位，去到已經滿席😅，我哋訂咗¥5,500嘅套餐，有六道菜加甜品，包埋1.5小時飲品任飲！食物就有兩款前菜、燒手羽先、水炊雞煱、菜、雞飯、煉奶士多啤梨🍓！佢啲雞做得好好食，個手羽先燒到皮脆肉嫩好Juicy好好味！👍🏻呢個我哋要追加！個水炊雞個湯好濃，好好味！入面D雞肉好大嚿好厚，但係都好嫩！仲有啲雞肉丸，係免治雞肉加咗雞軟骨，一齊刴成肉丸，所以都有啲咬口！佢俾咗一盤菜我哋，好似打邊爐咁放落個雞鍋度煮，D椰菜好甜，店員有幫我哋加湯，不過再加就唔係加雞湯係加豆腐湯，所以我哋食之前佢叫我哋飲咗雞湯先！另外佢哋自家做咗一個汁，係用九洲產嘅橙做，同個雞好夾，好味！我同好友都要買支返屋企！個雞飯都好好食！用燒脆咗嘅雞皮，加埋一D雞肉，仲有紫菜飯，另外可以配埋Wasabi、醃蘿蔔一齊食好好味！飲品係任飲，見到D酒嘅價錢大概都要六百幾円一杯，飲三四杯都抵晒！我地就飲梅酒同埋柚子酒，每人都飲咗三四杯，食到非常之飽！最後甜品係雪到結冰嘅士多啤梨配煉奶！好甜！

食完飯出去行一陣，見到D屋台，竟然見到九年前幫襯過嗰間屋台，仍然喺度！仍然係冇乜客！ 😅 跟住走咗落去地下街，我記得之前行過呢條街地下商店街，呢條地下街好長好多店舖！不過佢哋好早就關咗門，所以都冇嘢睇，我哋就去搵大國藥妝店，因為頭先喺川端通商店街得松本清一間藥妝店，價錢都比較貴，而且我哋睇過大國藥妝店收10:00點，不過我哋搵唔到間舖頭，行行吓突然間落雨，我哋諗住落返去地下商店街穿返過去酒店嗰邊，誤打誤撞就搵到間大國藥妝店！原來佢喺大廈嘅地庫唔係地面，買完野再落一層就係地下商店街，行返近酒店嗰邊出返地面，再返酒店！

酒店住後感：
Hotel Livemax Hakata Nakasu
好友book 左三井花園酒店，但要千元一晚，所以我冇book 同佢地一齊住三井，我見附近有幾間酒店平D，就揀咗呢間，貪佢平一半，酒店有細細的 reception ，有兩個職員，有兩部自助機，見有幾個男士正在辦理check in ，我就自助 check in ，上酒店房見走廊有D舊，入到房，房間好細，如果用兩邊打開妁旅行喼，係唔夠位打開晒行李，呢間應該係適合商務的酒店，見住客多數係男士，不過房間有微波爐，適合宅在酒店的人士！夜晚去好友間房食士多啤梨🍓，佢地間房大好多，有張梳化仔，而且好新淨👍🏻

Bape Cafe!?

食完燒牛肉，忽然有人約tea，去左海港城港威間Bathing Ape 入面，呢間餐廳！見佢係新開！餐廳入面只有三個卡位同兩排面壁位！除咗卡位full 左，就冇其他客，我地坐面壁位，餐牌食物選擇唔算多，我地叫左龍蝦意粉，Buffalo wings，一杯咖啡同一杯蝶豆花梳打，我冇食意粉唔知好唔好食，個Buffalo Wings 好重蒜味，食完口氣都勁😅 食品就一般，都係食佢logo，餐廳都唔係好打卡able 🤣

 

燒肉どん2 (燒肉 Don Don)

今日放假，自己一個無聊地去旺角行吓，諗住今晚早D返屋企煲湯，所以都唔約人！

在女人街行吓！雖然已經同大陸全面通關，不過旺角唔太多遊客！行行吓見到呢間一人燒肉，應該開左冇幾耐！見入面冇客，就入去試吓！

餐牌燒肉有牛、豬、雞選擇，叫左200g 嘅牛小排and 牛肩肉餐，跟埋沙律、湯、紫菜溫泉蛋飯，水就自助，自己去攞！一人一爐，有幾款醬汁在爐上面個架自己揀！百幾蚊個餐嚟講，D肉片雖然好薄，個牛肩肉都幾好，牛小排就似合成肉😅 個溫泉蛋值得一讚👍🏻，好食過溫野菜好多！🤣如果一個人想食烤肉可以考慮呢度！

 

溫野菜

好多年冇食過溫野菜，因為見佢經常都好多人等位！今日冇人等，即刻有位！ 就食吓佢！

記得以前係放題形式，依家已經唔係，以為散叫份量會多D，但原來都唔係！D肉一樣係紙咁薄😅 好彩今日唔太餓，所以只係叫左5份肉，一份菜，加多個牛肉飯就夠！同以前放題咁嘅價，冇咁抵食了！

 

Corefy

今日同好友食lunch ，去左呢間樓上café ，呢度有D露營佈置，又有D波希米亞風格的裝飾，不過要除鞋上去坐，我地都係坐返普通位！

餐牌食物都係好多咖啡店咁，有意粉、漢堡包等，我地叫左三文魚扒、漢堡包🍔，同埋兩款茶，食物同飲品都唔錯！今期做緊綠茶🍵食品 promotion，有綠茶 waffle 、甜品和飲品，我地左叫到，不過見隔離枱食左一半就唔食，唔知係唔好食定係太飽呢？😅

同好友傾左，下次放假約佢去放狗，因為好耐冇見佢隻狗🐕喇！