2022年11-12月大阪飛機團 Day 6 - 貴船神社、堺市三井Lalaport、難波

尋晚好早瞓，今日亦都唔使咁早出發，可以休息多一陣！😄 今日要 check out ，要搬晒啲行李上車嘅嘅！

今日第一站去貴船神社，又係泊車問題！又係冇位，兜嚟兜去其實見到車位唔多，見到最近果個停車場都full左又唔可以等，於是再駛入D，都係冇位，就算有都係食肆嘅車位，跟住就落返去再搵過，去到頭先見到最近果個位停車場，啱啱有車走咗，有一個位！真係好彩！

泊低架車之後就可以行去貴船神社影相，佢最出名就係條樓梯兩邊都係有D燈，之前睇過一條片，係落雪嘅時候影嘅貴船神社，真係好靚，雖然而家冇落雪，但係過景都係靚嘅，而旁邊有一條溪流，夏天嘅時候應該會有D流水麵食，D食店會喺河上搭一D座位俾人坐，而家冬天，所以全部都收起晒！我諗夏天會比較熱鬧！

我哋影完相之後再行入D，有一個叫做奧宮嘅地方，不過去到果度都冇乜嘢睇，所以好快都走返出嚟！都行咗差唔多兩個鐘！走嘅時候都見到有D日本團！

我哋今日要出返去難波，揸咗個半鐘頭車，在中途站東大阪PA 度停一停，呢個休息站喺天橋底，有間便利店，見到佢有藍山咖啡！見佢數量限定，又買杯試吓！當然 ¥218嘅藍山咖啡，味道就唔好有太大期望 🤣

揸左差唔多半個鐘就去到堺，我地去三井 Lalaport，呢個大商場好新好大，我地先去醫肚，見到有藏壽司，呢間有做大拖羅 promotion !😍😍  個大拖羅有D失望，冇我哋第一次在九州食咁正！其他壽司都不過不失，個牡丹蝦同埋鰻魚就好好食 👍🏻👍🏻

食完野，我地分頭行事，雖然個商場好大，但係啱睇嘅嘢就唔係好多，多數係啱一家大細嘅產品，例如童裝、家品、電器、超市、娛樂(類似冒險樂園)，呢度都有個中庭位置，好多櫈比人坐，我都係買咗少少嘢，大家嘅目標都係想去超市多D，我哋4:30喺超市集合，見到啲油甘魚超級平，士多啤梨同埋牛肉都係平到不得了多，最重要係質素高價錢平！😋😋 見到D大根￥99一條，真係好平！最後買咗一盒兩pack 士多啤梨¥1111，今晚返酒店食！

出到去難波竟然落雨！🤦🏻‍♀️ 我哋今晚住難波 Grids Premium hotel Osaka Namba ，check-in之後，即刻出去食飯，原本想去食燒肉放題，好友打俾佢家姐幫我哋book枱，但係佢話book唔到，所以改咗去千日前附近搵第二間燒肉店食，試咗呢間叫做五苑，話同一個集團，不過就唔係放題，食起上嚟冇咁爽，我哋只係叫咗幾碟肉，就去第二度搵食，原本想去一間叫做豪快立ち壽司，上網睇佢收夜晚11點，九點幾去到佢話close，唔知係咪今晚要睇波九點幾去到佢話close，唔知係咪今晚要睇波！😅

最後我哋去咗酒店附近嘅一間超市，我見到油甘魚同埋生蠔都平呀，所以又買咗啲返去食，加埋D水果，都夠飽！😅返到酒店食完嘢，就準備上網搞返香港嘅綠碼，同埋要執行李喇！明天要還車同 check out 了 😔

酒店住後感：
Grids Premium Hotel Osaka Namba
酒店好近難波火車站（高島屋果邊)，而且好新淨，酒店 check in 有職員協助果種，牙刷、梳在大堂取，但沒有包裝潔面用品提供，沐浴液洗頭水等在酒店房有大支裝，酒店亦沒有提供樽裝水，要follow佢哋IG先至可以有一支免費水！一入房旁邊就係洗手間，跟住有一道門，就係入去睡房，咁樣講好似好大，其實好細，睡房有一張梳化仔，電視就在旁邊，梳化仔後面係趟門，分隔開瞓覺嘅地方同埋洗手間，呢度都係三日先至換一次床單，不過我哋只係住一晚，所以冇分別！😅

 

2022年11-12月大阪飛機團 Day 5 - 嵐山、嵯峨野、渡月橋、竹林、保津川、友禪光林、清水寺、四条

今日行程緊湊，先去嵐山，揸車去嵐山，先去竹林行吓，之前跟團去過渡月橋，真係到此一遊果種，今次深入了解一下嵐山景色，竹林都係第一次去，好難影到冇人，唔係人山人海已經好好！😅 原來竹林都唔係好大，加上冬天D竹唔係好翠綠，所以唔係想像中咁靚！

穿過竹林就去到嵐山駅，準備坐嵯峨野火車去龜岡站搭船，我地遲咗一步，剛走左班車，要等一個鐘！🤦🏻‍♀️ 火車站冇乜野睇，加上天氣好凍，所以我地呆在火車站內上吓網，越等越多人，差不多夠鐘就可以落去月台等車，月台好細，火車比月台長，上車之後都要分開車頭車尾行過去啊，因為全部都係指定席或企位，火車到站嘅時候已經有人，因為前面仲有一個站，火車穿過山入面嘅隧道而行，路軌下低係保津川，路軌兩旁有好多紅葉，保津川有好多載人船隻經過，見到船嘅時候，我哋都會同船上面嘅人揮手，火車行咗大約20分鐘，去到開龜岡站，再由呢個站搭巴士去保津川遊船乘船站！巴士都要15分鐘車程！

去到河邊有好多船排隊等客，每隻船連工作人員大約可以坐三十人，四個人一排坐，每人有一個救生腰帶，今日船上面有我哋幾個香港人、大部份係日本人、幾個台灣人、仲有一個金髮美女，船上嘅工作人員有三個，一個年紀比較大，一個就好後生同埋好大隻，另外一個就兩者之間😆，一開始船頭一個人喺前面用一支竹來協助划艇，另一個有把手去輔助，而第三個人就坐喺船後面Stand by，見到船頭果個人都好忙碌，要走來走去，而且都要好用力，沿路佢哋都有講解左右兩邊嘅景色，我哋都在幾條火車橋下面經過，所以都見到有火車經過，包括我哋頭先搭嗰架嵯峨野火車，頭先我哋搭火車嘅時候同船上面嘅人揮手，而家我哋喺船上面同火車上面嘅人揮手🙋🏻‍♀️🙋🏻🙋🏻‍♂️😆 保津川上有幾個位比較窄，同埋多石，隻船經過嘅時候比較顛簸，不過隻船都好安全！行咗一半左右，坐後面個後生仔就走上嚟前面頂替前面個船夫，如果全程一個人做應該係頂唔順，所以佢哋要分工，船程足足行左1小時50分鐘，差不多到埗嘅時候，就見到有小販船駛埋嚟！大家都好興奮，船上面嘅食物有關東煮、燒小團子、燒魷魚同埋飲品，我哋都買咗少少嘢食，呢頭食完果頭已經到”總站”渡月橋😅 埋站之前，划船嘅後生仔忍唔住要除衫，除剩貼身底衫 show 肌🤣 其實佢唔除衫都睇到佢好大隻，仲染咗粉紅色頭髮😄 保津川遊船資料可以參考以下連結：

https://www.hozugawakudari.jp/zh-tw

在渡月橋上岸，其實渡月橋真係唔係特別靚，純粹係一個標記，附近有間 Arabica % ，好多人排隊，不過我見佢係冇得堂食，只係做外賣，好多人買杯咖啡坐喺河邊打卡！呢度仲有D人力車，幾年前喺淺草坐過一次，我地行過去嵐電嵐山站，我都係第一次嚟呢度，呢度一帶都好熱鬧！好多人着和服，火車站呢度有一個叫做友禪的光林，之前在網上都見過好多相關嘅相片，佢係好多條光柱，上面有一D日本圖案，我哋日頭去就冇咁靚，如果天黑着晒燈就會好靚！

原本我哋想去附近搵D嘢食，但係周圍都好多人，最後我哋去攞車嘅時候，喺停車場附近食咗個鯛魚燒！攞返車之後，就去清水寺，去到清水寺嘅停車場又爆曬，諗住附近搵停車場，但係塞車塞到暈！我哋喺一個停車場前面塞緊車之際，見到有車走，真係好好彩，嗱嗱聲泊咗去果個位度，跟住就直接去清水寺，今日多人到不得了，去到清水舞台嘅時候，真係驚佢會冧！多人到不得了，我覺得同疫症前嘅人流差唔多！行咗一陣好友已經攰到不得了，所以我哋都攞車走，本來想去二寧坂、三寧坂都冇去到！

好友諗住返酒店休息，但係我好想去四条，所以叫佢喺四条放低我，晏D再會合一齊食飯，佢哋就返去休息！我就先去四条食少少野先！因為成日都冇一食過一餐正餐！原本想食鰻魚佢又未開！求其搵咗一間食烏冬就算喇！在四条行咗一陣，再行去烏丸的大丸百貨，同 Disney store，不過冇乜野啱，然後再去會合好友食晚飯

佢地喺酒店附近搵咗一間叫做 やよい軒，佢係類似快餐店，自助買飛，免費添飯！食物就普普通通！食完飯我哋再去超市行，想買生果又唔多啱！反而買左油甘魚刺身同蟹柳！返酒店再補飛！😅

 

航拍24 - 伊根舟屋の里

相隔四年，今次去大阪，都帶埋航拍機去，因為有幾日好友會同我去京都，應該有D郊區可以玩航拍，今朝去天橋立嘅時候都已經想放飛機，但係佢呢D有管理員嘅景點，通常都唔可以放飛機，其實我哋可以食海鮮丼嘅時候喺海邊度放，不過嗰度個景就冇乜嘢睇，嚟到呢個舟屋の里上面個公園都放唔到飛機，直接嚟到舟屋旁邊一個空地，就喺呢度放飛機，呢度有個燈塔，同埋一大排船屋，飛左兩轉就走！因為好快天黑！

走嘅時候經過呢D舟屋，見到好多其實都係空置左，有部份係好似旅館咁嘅形式租比遊客，都見到有少量遊客準備入住，而呢D舟屋嘅外表有部份睇嚟係非常之舊，應該就係空置左好耐，稍為新淨D嘅應該係翻新左做民宿吧！如果住喺呢啲屋嗰度，望出去除咗係過海都冇乜特別嘢，可能連水上活動都冇，定係冬天先冇？🤔 經過三年疫情可能都冇乜人入住過！我諗呢度夜晚應該好黑！😅😅