2022年11-12月大阪飛機團 Day 4 - 天橋立、舟屋之里

今朝一早出發去天橋立，位於京都北面，由酒店出發揸車個多小時，中途停左一個休息站，不過呢個站好細，主要我哋係去洗手間，佢呢度呢有少少壽司賣，亦都有一D米同埋蔬菜，我買咗一小包米同一樽士多啤梨果醬，後來先發覺呢包米係用來做米糕嘅，唔知用嚟煲飯得唔得 😅，之後又見到另一個休息站，叫京丹波味夢の里道の駅，又停一停，呢個中途站都幾大，仲有間超市，仲有嘢食賣，我哋冇買嘢食淨係喺超市度買咗少少嘢，又買多包米😅同埋買咗包烏冬，原本想買手信，不過諗住去到天橋立先睇吓有冇其他手信！

未去天橋立之前，我哋去食海鮮丼，好友搵左呢間叫做海鮮かわさき，佢哋開10點，我哋去到已經11點，要等位，我地先去”寫名” (日本等位係有張紙比人寫名、人數同電話，好少有飛攞)，好友去泊車，好友想食佢個蟹肉丼，但係每日只提供五個，我哋都諗住冇得食，因為等位都等咗半個鐘，到我哋有位嘅時候，安排咗我哋坐窗口邊，對住過海真係好正，而且蟹肉丼仲有得食！可能前面果D客都係本地人，對其他海鮮當然興趣大D都唔定，因為價錢都平D，我哋除咗叫蟹肉丼之外，另外叫咗一個鮪魚丼同埋上海鮮丼！店員問我地要大中細？我地一律叫大，原來大中細係指飯嘅份量，唔係海鮮份量！唔怪得一樣價錢🤣🤣🤣 蟹肉丼除咗有蟹肉之外仲有蟹膏！正呀！係個鮪魚丼麻麻地，其餘兩個都好正！好好味😋 因為叫左大份飯量，食到好飽😅

跟住行去攞車，行吓消化吓！不過只係幾分鐘路程就去到一個商場叫做 Mipple，去完洗手間，見到有間¥110店 Seria ，又入去買吓野，買左少少聖誕裝飾，同埋幾支筆，因為見佢係 made in Japan 🤭

跟住揸車去天橋立，都好近，不過又係遇到泊車問題，兜嚟兜去先搵到一個位，泊好架車之後就去買飛搭纜車，來回車飛連入園費用只係¥850，纜車有兩種，一種係一卡車坐好多人果D🚡要等夠三十人先開車，另一種係一個人坐，好似上雪山嗰種纜車，我哋唔想等，所以坐單人坐果種，雖然上山係好高，但係纜車距離地面好近，所以我都唔驚，仲沿路拍片添 😂，上到去好似一個公園咁，主要係離遠睇天橋立嘅景點，要彎腰從胯下倒望先睇到好似飛龍🐉咁，個人認為真係睇唔到似飛龍 😅😅

呢度有個小型摩天輪，同埋有個腳踏車軌道，雖然睇落好小朋友，但係如果坐喺單車上高，停到某個位置可以睇晒成個 view都幾靚，見到好多情侶都係停低車狂影相！呢度仲有個許願輪，可以用¥300買三個陶瓷做嘅大餅，好似個$5大少少，我諗應該係許願嘅時候，將個陶瓷大餅拋去個許願輪中間穿過去就得，我哋就冇玩到，見到都有D人玩，我哋逗留左都唔夠一個鐘頭就走喇，搭返單人座位纜車落去！

跟住揸咗半個鐘頭車，去到一個叫做伊根舟屋の里公園道の駅，由呢度望落去，就見到舟屋喇，我諗係叫做船屋吧，類似大澳嘅水上屋咁！呢度好多麻鷹，而且飛得好近，我地影左一陣相，就直接揸車去伊根舟屋，呢度仲有個伊根港カンジャガハナ灯台，我地終於可以放飛機喇！

放完飛機去附近搵野食，去左一間叫做炭丹屋，去到已經4:40，見到店面只賣少少甜品和飲品，原來地庫有堂食！而且係和式裝修，我地仲要包場😄 食物嘅選擇唔係好多，我哋叫咗兩個和牛ステーキ重，同一個牛肉飯，同幾杯飲品，坐左一陣已經天黑！食咗一個鐘，食飽就走，我地揸車走嗰陣，見到呢間店已經要關門了！咁早收？😅可能呢區冇夜市 😅

我哋直接返酒店了，因為都要揸個幾鐘頭車返去！我返到酒店都冇再出去， 而好友佢哋又去搵宵夜食！

 

2022年11-12月大阪飛機團 Day 3 - 伏見稻荷大社、二条城 Naked Flowers

今朝check out 完，先將行李自助寄存在酒店先！然後去食早餐，好友家姐介紹左一間 coffee shop 叫做Komeda’s coffee ，話日本人都鐘意去，早晨好簡單，只有麵包和多士，配不同果醬或牛油，加杯咖啡！食完野見有藥房已經開咗！就去睇吓野先！跟住返酒店攞返行李，行去 Hotel Gracery，因為租車公司就在酒店旁邊！今次租 Toyota 的 Roomy ，比七人車細小小，我地要將一個坐位放低，先放得晒D行李😅，跟住出發去京都了！

11點幾在難波出發，去到伏見稻荷大社，泊好車，已經差唔多兩點😅 去到大社入口，有D小食檔，我哋先去洗手間，再出嚟買小小野食，因為今朝個早餐份量好細，搭左兩個幾鐘頭車大家都肚餓，買左蟹肉條，口感係一團麵粉😅😂！另外買咗一串牛肉串，牛肉串搽咗好多醬汁，D醬汁比較鹹！又買左大判燒，一人一個 ，呢個味道就正常😋

食完嘢就行千鳥居⛩️⛩️⛩️， 一路行一路影相，其實啱啱開始行嘅時候個個都喺入口度影相，所以影出嚟啲相都會好多人，其實再行入D就有好多位可以影到冇人，所以大家都唔需要心急喺入口到即刻影相！我地足足行咗成個鐘頭，行返轉頭嘅時候經過一間茶屋，個View 好靚，不過當然係滿晒坐啦！😅

行完伏見稻荷大社，先返去酒店放低行李，今次住 Urban Hotel Kyoto-Shijo Premium Fitness and Spa ，好友訂酒店時睇錯左資料，以為有停車場，原來酒店入面係冇得泊車嘅 ！🤦🏻‍♀️ 個資料係話附近有得泊車，係講緊街嗰D泊車位，我地仲要住三晚添！😅跟住我哋就將行李搬入酒店check-in先，好友就揸架車去搵停車場！酒店都提供左一張地圖，話俾你聽附近邊度有停車場，返上酒店房放低野，先再出發！

好友在車等我地放低行李再出發去搵食，先去行一陣街，泊左架車在 BicCamera ，呢間BicCamera好大，好多嘢睇，近期興起露營用品，呢度露營產品好多選擇，有D好大好大嘅露營帳篷，簡直係一房一廳咁大😂，行左一陣然後去食嘢，其實今日冇乜食過嘢，早餐好簡單，午餐只係在伏見稻荷大社食咗兩串小食，跟住都冇食過嘢，好友搵左一間叫做龍馬軍雞農場，應該係同日本一個著名嘅人物坂本龍馬有啲關係，因為店門口有佢個人像，店入面好似幾大有三層！我哋坐地下，近門口，個位有D風，都幾凍 ! 店名叫得做軍雞，就梗係食雞㗎啦，我哋叫咗幾款雞嘅食物，有玉子、雞刺身拼盤、雞鍋、雞串燒等，味道都唔錯，不過就唔係話非常好食，而且份量偏細，所以都要加個烏冬打底🤣

食飽咗就揸車去二条城，泊咗架車喺二条城對面，然後行過去，好友上網search 咗佢做緊 Naked Flowers 光影節目，入場費要¥2,200，入到去，有一個入口有D光影表現，主要展示一隻鳯凰飛翔的光影效果，行入去護城河，一幅牆上又有光影表演，我哋都影咗好多相，睇咗兩、三轉，每轉幾分鐘，跟住行去一個位置有好多紅葉，不過我覺得嗰D紅葉唔係完全係紅葉，而係用紅色嘅燈光照住，令到就算未變紅嘅紅葉都會變咗紅色🤣 再行過去係一D小賣店，同埋介紹 Naked Flowers 嘅創作，就行完了，以為護城河會有投影落二条城上，點知都冇，有少少失望，我在小賣店買咗一包香支，因為聞到個味道好香，所以買一包返屋企！

跟住揸車返酒店，周圍搵位泊車都唔容易，因為夜晚好多車位都俾人泊咗，同埋每個泊位個價錢差別都有D大，我哋又要搵價錢比較合理又近酒店嘅車位，好彩搵到最後一個，拍完車行出街口就係便利店，喺便利店買D甜品返酒店食，便利店行過少少就係酒店，好近好方便！

酒店住後感：
Urban Hotel Kyoto-Shijo Premium Fitness and Spa 
京都四条城市高級酒店
酒店嘅位置有少少僻，附近只有兩間便利店，距離京都站都有D遠，比較適合駕駛人士，但酒店冇自己嘅停車場，泊車都不太方便，酒店有單車出租，可能本地人會適合，或者鍾意踩單車嘅遊客都可以考慮，酒店都好新，而且都多團入住，酒店大堂有餐廳食早餐，不過我訂酒店嗰陣時就冇揀到早餐，房間就唔係好大，一入門口右手邊就係洗手間同浴室，床邊有張櫈，我訂果陣三百幾蚊一晚都幾抵，不過酒店冇提供樽裝水，而家好多酒店都會比一、兩支水比住客，呢間就冇，不過大堂有水供應，不過要用紙杯裝，所以只能夠攞到一兩杯，亦都有D咖啡粉茶包之類供應，酒店有浴場，我就冇去浸，因為見有到有團，應該好多人！所以唔去喇！酒店都係唔會日日換床單，只會三日先換一次，毛巾就每日會換！