魚治

之前上YouTube睇片介紹呢間日本餐廳，今晚相約好友們一起去試，餐廳門口嘅位置已經擺咗餐牌，餐牌係畫圖畫形式展示食物樣版，但係個店入口好矮，要”捐”入去 😅

餐廳嘅地方唔算好大，不過D 餐牌好日本，因為訂咗枱佢都有張紙寫住定左貴姓，全部都係日文！同埋佢啲餐牌好似日本咁，有張紙寫咗今日有乜嘢特別海鮮，不過有D魚已經賣晒，我哋叫咗四隻日本生蠔、一夜干、燒粟米、刺身七点、和牛三文治、燒厚切牛舌、滿足壽司、燒魷魚、甲羅燒、炒野菜，食物都唔錯，不過份量細D，甲羅燒我哋只係叫咗一個試吓，因為驚一次過嗌四個，如果唔好食就嘥咗，結果真係唔係太好食，因為好鹹！剌身同圖片相差好遠，最好食係條一夜干同埋厚切牛舌！

食到8:30 有表演，其實每晚都有，就係用一D唔記得咗叫做乜嘢草，去燒魚生片，燒完再分比每枱客，不過睇個樣已經知呢隻魚生片係麻麻哋，事實上真係麻麻地，有少少腥！純粹貪得意睇吓個表演！下次可以考慮試吓食其他嘢！因為好多嘢睇落都好吸引，但係我哋食唔到咁多！

香港故宮文化博物館

上個月買賣門票，第一日即刻上網訂，7月2日第一日開要返工冇去唔到，好彩冇攞假去，諗住好多人，點知撞正打風冇開！訂左今日去，在佐敦食完面，就搭巴士296D 過去！

我哋訂咗1:00 ，準時去到，落咗車見到有D工作人員在左邊，因為左邊係入口，先上扶手電梯，經過售票處，有好多圍欄，兜咗個大圈先入到去正門入口，其實唔係好明，都唔多人，點解唔可以直接行入大門，要兜一個圈先入去呢？

入口有X光機要檢查行李，右手邊有詢問處，隔離係locker，因為我帶咗背囊，所以要擺locker，我哋攞咗指南之後，由第一個館開始睇，先去洗手間，就在一號展館旁邊！

一號館： 紫禁萬象  建築、典藏與文化傳承
主要係講紫禁城建築，有D磚瓦、地圖等等
二號館：  紫禁一日  清代宮廷生活
只是咗好多紫禁城入面嘅日用品、龍袍、玉璽等等
三號館：  凝土為器  故宮博物院珍藏陶瓷
顧名思義，當然係展示陶瓷物品啦
四號館 ： 龍顏鳳姿  清代帝后肖象
係一皇帝皇后嘅畫像，亦都有個播映室播放影像
五號館 ： 器惟求新  當代設計對話古代工藝
展示一D古代工藝品
六號館 ： 同賞共樂 穿越香港收藏史
香港收藏家嘅收藏
七號館 ： 古今無界 故宮文化再詮釋
呢個展館嘅展品好現代化，有喇叭、鏡等
八號館 ： 國之瑰寶 故宮博物院藏晉唐宋元書畫
主要係一D書畫，有個位置有玻璃窗可以望到出外面，頭先在正門向上望到呢個位
九號館 ： 馳騁天下  馬文化藝術
同馬相關嘅展品，有一個互動區，你行近個mon，D馬就會行埋你度

咁多個館，第七八號館係比較悶，冇乜嘢好睇，最多嘢睇都係二號館，唔知佢之後會唔會轉展品，淨係知道八九號館會轉，遲D睇吓佢有冇新展品！

自家麵

今日去故宮博物館，去佐敦轉296D 巴士過去，先在佐敦食D野，在地鐵站附近食碗麵，呢間主打自家制的麵，叫左個胡椒湯牛肉麵，同埋餃子，味道唔錯，覺得有自家制的感覺，唔似集團式工場制品，係D侍應比較好大媽 feel  😅

 

咖啡

最近買了咖啡機，一部用咖啡粉可以打奶泡，另一部用 Capsule ，當然要買咖啡粉同 capsule 啦，我買左一罐意大利 Passalacqua Harem 咖啡粉，及 Amor coffee 的埃塞俄比亞咖啡粉，另外在 Nespresso 買了咖啡 capsule ，首次購買指定套裝仲送個儲存 capsule 的盒，可以放48粒 capsule ，唔要盒可以要咖啡杯，但屋企太多杯了！所以揀咗個盒😅 

試左兩部機，打奶技巧仍需努力，而咖啡就覺得 capsule 好飲D，可能另一部咖啡粉機唔夠力，亦可能咖啡粉唔夠味，總之就係爭DD 🤣🤣

 

板神鉄板燒日本料理

前幾日睇YouTube介紹呢間鐵板燒，其實之前新開嗰陣時都睇過一篇報道介紹，不過已經唔記得咗，再睇過啲報道先至記得曾經睇過，今日就去試一試佢！

訂咗枱2:00 ，因為佢1:45 後入座有八折，但3:00落場！應該都食得好急！今日呢度地方都幾大，間開咗幾個Area，有好幾張鐵板燒枱，而且都幾滿座！每將鐵板燒枱，都可以坐到6-8個人，我哋個坐嗰張係兩張枱相連，有兩個鐵板同兩個師傅，坐左大約11人，多數係兩位兩位，有一個係一位，大部份人都係點同一個餐，只係牛肉嘅選擇唔同，我哋就揀咗澳洲和牛薄切，因為預計食到牛肉會好飽，見到人哋揀厚切真係厚好多，不過肯定會食唔晒！個餐有三件刺身、鮑魚、龍蝦、魷魚、牛肉、炒飯、野菜，我哋另外嗌咗兩杯飲品，做得鐵板燒嘅食材都係會好新鮮，不過我哋張枱個師傅就手勢麻麻地！

睇YouTube片介紹嘅時候，係由日本師傅做鐵板燒，嚟到當然唔會係日本師傅去處理啦！本地師傅水準當然冇日本師傅咁好，而且佢又做特價，更加唔好有太大期望，整體來講食物嘅質素唔差，價錢都算合理，店員嘅服務好好，環境都好靚同好新淨！呢個價錢好多地方都食到咁上下嘅質素，所以下次都會試吓其他餐廳！

 

日牛涮涮鍋專門店 Nichigyu

今日好友臨時打電話約食飯，出咗去旺角食，去咗朗豪坊13樓，原本想去德國餐廳鋸扒，點知餐廳話今日冇牛扒 ？！跟住就行咗去隔離呢間火鍋店！

見到佢任食我都覺得麻麻地，不過好友想試，咁就試吓啦，我坐低都覺得伏伏地，牛肉我覺得都可以，其他配料就真係麻麻哋！而且呢度都唔算平！

食完飯我哋行去果欄，買咗水蜜桃同埋貓山王榴槤！水蜜桃我哋買咗一盒撞瘀咗嘅！平D！買完去好友屋企食，榴槤好食，水蜜桃超甜超多汁好好食！雖然瘀咗D，但係店主冇介紹錯，呢隻真係高質，所以買呢盒好抵食！