4口

食完 tea，行左一陣街，想飲杯嘢，見到呢間開咗冇幾耐嘅小店，又坐低試下，呢度係食新派福建菜，見到佢哋啲食物應該都幾細碟，所以揀咗幾樣野，藍莓淮山、老酒蒸蟶、黑蒜粒燉番鴨湯、姬松茸北蓀排骨湯，同埋一碗米線，仲有兩杯飲品，所有嘢嘅份量都係好細，因為頭先都食咗下午茶，細細份就啱喇！食物嘅質素就不過不失，味道唔算好特別！

 

舍 SHÈ

今日去中環呢間餐廳度食Tea，呢間餐廳嘅位置，應該以前係法國 Angelina 餐廳，早幾年去過，唔知幾時執咗，亦都唔知有冇轉到其他餐廳，而家呢一間見佢都好靜，可能餐廳嘅位置在連卡佛裏面，唔係咁多人知道，呢度勝在有個幾靚嘅 view，今次個Tea 係中式點心，造型都幾靚，點心有粉紅色嘅蝦餃、松露野菌餃、雜菌手袋👜酥、花之戀春卷同埋鮑魚酥，甜點方面就有天鵝🦢棉花糖、椰汁金魚配楊枝甘露、豆沙小南瓜同埋燕窩撻，食物嘅味道又唔係特別好，都過得去啦，始終價錢都唔貴 👌🏻👌🏻

 

sofi Coffee

上次同好友在九龍城食泰國嘢，食完行過見到呢間Cafe，今日就去試吓，店入面嘅裝修有D禪，深色嘅木紋傢俬，配上米白色嘅圓形坐墊，店入面最入嘅位置，地上有一幅枯山水（かれさんすい），好有日式庭園 feel ，店入面比較靜，雖然出邊係太子道西，車水馬龍，但係裏面就比較平靜，見到呢個環境，大家講嘢都唔會太大聲，呢度除咗咖啡之外亦都有茶，食物嘅選擇唔算好多，主要係一D輕食，有窩夫同埋刈包，仲有少少甜品，試咗兩款窩夫，燻三文魚配羽衣甘藍窩夫🧇、古味辣花生醬雞柳窩夫🧇，另外試左豆腐芝士蛋糕配黑芝麻醬，食物嘅味道唔錯👍🏻，造型都好靚，咖啡都好味 ☕️😋

 

紅花会

成個九月份，得一個生日飯局，呢個朋友過去一年都冇出嚟食飯，因為佢有D社交恐懼，前年我哋又唔記得咗同佢食生日飯，所以今次約出去食飯都冇特別講係同佢食生日飯，比個 surprise 佢補祝返生日！

今次去港島區食，因為要就好友收工，因為得佢一個住香港區，平時都係佢過嚟九龍食，今次就一就佢，因為佢話而家放工後要學緊奇門遁甲，所以唔能夠太早出嚟，所以就佢喺佢公司附近食，揀咗呢間菜式係少少京川菜咁，我哋叫咗水煮毛血旺、老壇酸菜魚，茶薫樟茶鴨、避風塘九肚魚、梅肉炒萵筍絲、回鍋肉，食物嘅質素都唔錯，不過我哋叫晒全部都係辣野，點知好友個新女友唔食辣野😅，不過回鍋肉同埋樟茶鴨都唔辣，佢都可以食😅甜品就叫咗個紅棗糕，當然唔少得我哋帶嚟嘅蛋糕啦！當好友開開心心切蛋糕🎂，希望佢生理心理都健康啦！😆😆

 

泰皇閣

好友D 好耐都冇同我食飯，舊年佢11月生日嘅時候，想同佢食飯，但係佢父親剛剛去世，所以沒有慶祝，時隔九個月，佢主動搵我食飯，原來係因為中秋將至，佢買咗月餅🥮俾我，其實以往佢每年都有買月餅俾我，但係呢兩年都冇買到，我亦都冇特別為意，到佢今年再送月餅俾我，我先想起佢以前成日買俾我 😅😅

我哋去九龍城食lunch，其實九龍城嘅泰國菜館，好多間都食過，都冇乜邊間特別覺得好食，不過好友search左呢間，我哋都未食過，又去試吓！去到都幾多人，我哋坐最側邊嘅枱，隔離都坐滿左人，只係一塊膠板隔開，我哋都叫咗幾多嘢食，生蝦刺身、小食拼盤、生菜包、馬拉盞通菜，呢度啲嘢食都唔錯，我哋食到好飽，我哋不停咁傾偈，因為真係好耐冇見，原來佢唔知道好友的兒子患癌症，佢聽到之後都好唔開心，我哋都好無奈，只能夠希望佢盡快好返！我哋傾咗足足兩個幾鐘，我再同佢去搭車，行過太子道西，見到有間咖啡店，下次要去試吓先得！

好友送俾我嘅月餅🥮，係微熱山丘嘅鳳梨酥月餅，冇蛋黃月餅咁油膩，亦都係我喜歡吃嘅微熱山丘！正！👍🏻😆

 

Homu

經過呢間餐廳好多次，今日終於去試吓，主要都係食西餐，亦都有少少日式食物，我叫咗個牛肉飯同埋玫瑰咖啡，食物就普普通通，叫做試過就算😅

 

婆婆珈琲屋

旺角有一間叫做婆婆雜貨店，應該同呢間咖啡屋係同一間公司，上到去見到真係有一半係婆婆雜貨店，另一半係餐廳，佢個雜貨店買嘅嘢好多都係日本嘅，我之前都買咗一個富士山袋，而家又出多兩個款，其實呢間咖啡屋開咗都一段時間，成日想來試都冇試，今日終於去試！

餐牌係比較簡單，其實只係三品、四品、五品套餐，好簡單，只需在冷菜、熱菜、飯團/烏冬選擇三至五款食物，冷菜我揀咗山賊汁雞卷、糖心蛋，熱菜就揀咗辛口明太子手羽、金平牛肉、蒲燒鰻魚，最後係三文魚富士山飯團🍙，飲品就揀咗富士山特飲，貪佢兩樣嘢都係富士山🗻造型，食物就普普通通，真係貪富士山🗻造型靚😅

 

南角

今日又去九龍城，去咗呢間開咗冇幾耐嘅咖啡店，之前去過兩次都冇位，因為唔想等，所以行左第三次，今次先至有位唔使等！

呢間咖啡店，前身叫做怡順榮電器五金，店外面同埋最入面位置，都保留咗舊有招牌，門口嘅裝飾亦都有少少懷舊，有個舊式電話☎️同埋燈，門口亦都有售賣一D水晶同香薰！

門外有兩張枱，如果帶咗寵物就可以坐門外面，店入面嘅座位亦都唔多，都係拍埋一邊坐，至於最入面或者有冇樓上就睇唔到喇！

我叫咗一個冬陰功蝦意粉，同埋一杯斑蘭椰子咖啡，我同埋 scone ，意粉嘅味道都幾特別，只係意粉稍為”淋”咗D，因為我都係比較鍾意食 Al dente😅 ，杯咖啡又幾好飲，佢係有一個椰子雪糕球，同埋斑蘭葉，個雪糕好好味！三樣嘢加埋好夾，好飲！個 scone 就不過不失，佢配左 cottage cheese 同 blueberry jam ，細細個都唔太”漏”，我諗會為咗杯咖啡再嚟 😄

 

段純貞 （荃灣)

今日去咗如心廣場嗰邊，睇吓有啲乜嘢食，見到呢間台灣麵店，之前在銅鑼灣見到有間分店，原來呢度都有一間，咁就試吓啦！

叫咗碗麻辣蒜味腱芯半筋牛肉麵，另外叫咗杯唔記得乜嘢山楂茶之類，牛肉麵都幾好食，不過麻辣就唔夠麻，亦都唔夠辣 😅，同埋份量比較少 😆