嚐仙

 

話說好友J 前兩日同朋友去食甜品，食咗個唔好食嘅芋圓，今日就同我哋去搵間正宗D嘅台式甜品店，搵到呢間主要係食芋圓的店，店嘅地方非常之細，仍然坐到10個人左右，所以都好迫，我哋叫咗三款甜品share食，我本身對芋圓冇特別大興趣，因為覺得佢都冇乜味，而且D糖水比較甜，呢間都做得唔錯，好友非常之滿意，我哋都食得非常之飽！今日食足三餐真係大滿足！

Palco Modern Italian

頭先食完lunch 已經四點幾，我哋原本想去上次見到嗰間 AME stadium 玩遊戲，但係去到見到好多人，加上頭先食得太飽，所以最後都係冇玩到😅

然後行返過去海運，行完街6:00 pm再去呢間意大利餐廳睇吓有冇位，因為時間尚早，所以有位，不過要個半鐘頭交枱，我哋都冇問題，餐廳嘅裝修好靚，亦都有D室外嘅位，大部份嘅座位都可以望到海，環境已經冇得輸，睇吓餐牌嘅選擇其實就唔算好多，主要係頭盤、湯、Pasta、risotto 、主菜就只有四款同埋甜品，點菜之前已經上咗麵包同埋一D薄脆，個薄脆好好味！我哋要encore🤣 店員介紹頭盤 Smoked pork belly & baby spinach salad ，主菜 我哋揀咗 Grilled US Prime ribeye 同埋 Spaghetti with grilled scampi & scampi tartare，飲品就冇揀到，因為好多飲品都係加咗茶，所以我哋只係飲水😅 因為我哋四點幾先食完飯，六點又來食飯，所以食唔到咁多野！

前菜個 pork belly 太肥，唔係好啱我哋食，菠菜都好鮮嫩，個肉眼扒🥩我哋叫咗medium，雖然佢個樣好似好生，但係食起上嚟個口感，好似幾乎全熟，不過都仲好Juicy，好食👍🏻，個蝦🦐意粉就好好味👍🏻👍🏻，只係份量細左D，呢度嘅服務好好，我哋亦都準時交枱，食完飯上咗樓上睇吓，見到商場整咗個假嘅機場候機牌，仲有行李車，我哋即刻喺度影相，最搞笑係個牌會轉地點同埋航班時間，絕對唔馬虎，我哋喺度等佢轉巴黎🇫🇷、東京🇯🇵、倫敦🇬🇧，好攪笑😆，影相都咁開心，如果真係可以旅行都唔知開心成點🤣🤣

Gontran Cherrier Artisan Boulanger - Paris

 

今日約咗好友 F 和 J ，原本想去尖沙咀海運大廈食意大利菜，點知佢午市full晒，原本諗住Walk in，但係我和 J  2:00pm 去到，佢3:00pm 就落場！而 F 仲未到，唯有今晚再嚟睇吓有冇晚餐啦！食唔到呢一個意大利餐廳，我哋就轉左去 K11 Musea ，一路行街一路等 F，在 K11 Musea 行咗幾個圈，最後揀咗去呢間餐廳度食，其實我之前嚟過一次，不過上次係食牛角包，上次只有牛角包三文治之類嘅食物，今次有其他主菜，所以我哋決定坐低等 F ，最後 F 足足遲咗兩個鐘頭先至到 🤦🏻‍♀️

我地叫咗一個牛肉漢堡包，同埋一個 Roasted French game hen，再加一個牛角包，同埋飲品，食物嘅質素都唔錯，幾好食，咖啡亦都唔錯，只係嗰杯芒果奶就麻麻地！

碗屋

 

在中環Hea左一日，終於等到食晚飯時間，先上去攞位，我哋訂咗枱，呢間店都頗為舊，上到嚟先知原來係食放題，店入面大部份係卡位，今晚都幾多人，差不多全部滿座，食物嘅選擇都頗多，有火鍋、刺身、壽司、鐵板燒等，等好友到齊，我哋就開始叫嘢食，我因為頭先食咗個Tea，所以都唔係咁肚餓，我地先叫左一 round 刺身，刺身嘅質素就唔錯，佢哋特意整咗一個刺身蛋糕，其實只係插咗支蠟燭在刺身盤，佢地都係一番誠意補祝我生日，所以都有吹蠟燭 🎂😆

我哋都叫咗啲鐵板燒嘅食物，叫咗厚切牛肉，仲有鮑魚、煎蠔、火鍋等等，雖然價錢同食buffet差唔多，不過主打都係日本食品，相對來講都抵食！

食飯嘅時候，好友告訴我們，她要移民英國，而且連層樓都賣咗，因為佢有三個小朋友，為咗小朋友嘅將來，趁而家BNO可以去英國居留，所以即刻就過去，佢話一月就會過去，走得好匆忙，我問佢過去做乜嘢工，佢話預計過去兩年都唔會做嘢，佢老公亦都未搵嘢做，過到去先算，這個好友嘅性格就係咁樣，到時先算，而佢成世人都幾好運，可能就係佢果種船到橋頭自然直心態，反而令佢更加順利，因為佢屋都未買/租，話必要時住 Airbnb先，希望佢一切順利啦😊

Christmas market at Landmark

今晚約咗朋友去中環食飯，晏晝過咗去中環睇醫生，然後去食個Tea，知道中環置地廣場有個Christmas market ，食完 tea 過去睇吓有咩買，先去 LE SALON DE THÉ de Joël Robuchon，呢度有high tea，不過我唔係咁肚餓所以叫 high tea，只係叫咗份牛油果飛碟同埋法包三文治🥪👍🏻

食完去 Christmas market 行，個場地都整得好靚，不過唔係好多嘢買，有一個 booth 係 Ralph polo，仲有買手袋、買曲奇餅、買寵物玩具同埋文華酒店買食物的booth，我買咗個狗狗玩具比牛奶仔，另外買咗一樽文華酒店好出名嘅玫瑰果 jam，上次去酒店嘅餐廳度食過好好味，所以買返一樽返去食😋

Brass spoon

去中環睇醫生，約咗人下午茶未夠鐘，在附近行吓，食少少野先，見到呢間越南餐廳冇乜人，就入去試吓，叫咗碗生牛肉粉，同埋一杯鹹靈物，湯嘅味道就一般，牛肉嘅質素就唔錯，食緊嘢嘅時候已經比張單我，我諗佢應該要落場，所以匆匆忙忙食完就走啦！

飯局主場 - 第二十回

 

頭先去街市買咗蟶子、扇貝、九節蝦、鮑魚，連埋大閘蟹同雞應該夠食，好友仲買咗蛋糕添！屋企亦都有提子，因為海鮮唔可以留過夜，所以唔敢買咁多，蝦好似少咗D，應該買多半斤😅，朋友未到之前我就處理好D海鮮，洗乾淨海鮮放雪櫃，切定D蒜蓉，浸定D果皮，一個蒸爐搞掂晒所有嘢！

我地六個人蒸咗11隻蟹，每隻大約五両，有公有乸，都幾多膏！不過冇舊年果D咁靚，呢期D蟶子都好靚，每人一隻好似唔多夠，早知買多一倍！今日啲海鮮大家都好滿意，我都好開心！食完飯我哋仲切蛋糕🎂，感激佢哋同我補足生日🥰

Coffee break

 

今晚約咗朋友去我屋企食飯，時間尚早，出去食D嘢，行過女人街，見到成條街好多攤檔冇開檔，自從疫情之後冇晒遊客，我諗有一半檔攤都冇開檔，以前喺女人街兩邊嘅食店，都睇唔清楚個門口係點樣，而家就好清楚睇到晒D舖頭個名，行過見到呢間咖啡店，應該開咗唔係好耐，之前未見過，所以去試吓！

睇吓個餐牌都仲有午餐，所以叫咗個南瓜 risotto 食，另外叫咗杯咖啡，趁放大假可以飲多幾杯咖啡，因為唔使驚瞓唔着！個飯味道都唔錯，飯的軟硬都亦都適中，咖啡就一般，以價錢來講都算抵食！

食完野去大成街街市買餸，今晚朋友會買大閘蟹同埋雞，我就買幾樣海鮮到時一齊食！